Abidadama Karana amo Dirava Ena Gwauhamata Abidia Dae

“[Iehova] Dirava ese guna ia gwauhamatalaia harihari gaudia namo hereadia ita dekenai ia henia.”​—2 PETERO 1:4.

1. Abidadama momokani hahedinaraia totona dahaka ese ita ia durua?

IEHOVA ia ura iena gwauhamata herevadia dekenai ita abidadama. To, “haida sibona mo Dirava ena hereva idia abia dae.” (2 Tesalonika 3:2) Abidadama kara be Dirava ena lauma helaga eiava siahuna ena huahuana ta. (Galatia 5:​22, 23) Unai dainai, Iehova ena lauma helaga ese ia hakaudia taudia sibodia be abidadama kara idia hahedinaraia diba.

2. Aposetolo Paulo ia gwau “abidadama” ena anina be dahaka?

² To, abidadama ena anina be dahaka? Aposetolo Paulo ia gwau ia be “matana dekenai ita itaia lasi, to iseda lalona ia diba momokani unai gauna do ita abia.” Ena be unai gaudia ita itaia lasi, to ita diba momokani do idia vara, unai dainai ia be abidadama karana hegeregerena. Danu, idia gwau abidadama karana be “ita daradara lasi, to ita diba Dirava ena davana namona ita naria kava lasi,” badina mai edia abidadama taudia idia diba Iehova Dirava ia gwauhamatalaia gaudia iboudiai do ia karaia momokani.​—Heberu 11:1.

Abidadama Bona Iehova Ena Gwauhamata Herevadia

³ Iehova hamoalea totona, iena gwauhamata dekediai ita abidadama be gau badana. Lauma siahuna amo ia torea revareva iharuana lalonai aposetolo Petro ese unai ia hahedinaraia, unai revareva be lagani 64 C.E. bamona ai, ia torea. Ia hahedinaraia bema ena bamona horoa Keristen taudia be mai edia abidadama, idia be “Dirava ese guna ia gwauhamatalaia harihari gaudia namo hereadia” edia guguru negana do idia itaia. Bona unai neganai, idia be guba Basileia lalonai Iesu Keriso danu idia abia ahuna be ‘Dirava ia henia gaudia, ese ia durudia diba.’ Abidadama dainai bona Iehova Dirava ena heduru dainai, inai tanobada ena kara dikadia ese idia guidia lasi, idia be ruhaia mauri namona idia abia. (2 Petero 1:​2-4) Bona hereva badana be inai! Hari inai negai, abidadama momokani idia hahedinaraia taudia be ruhaia mauri namona idia abia danu.

4. Iseda abidadama dekenai dahaka kara ma haida do idia noho be gau badana?

⁴ Bema Iehova ena gwauhamata dekenai ita abidadama bona Dirava ese ita ia henia ruhaia mauri namona dainai ita tanikiu henia, do ita goada karaia Keristen taudia namodia ai do ita lao totona. Petro ia gwau: “Umui abidadama sibona lasi, to kara namodia do umui karaia danu. Ma kara namodia sibona lasi to diba danu do umui abia. Ma diba sibona lasi, to umui ese emui tauanina edia ura do umui biagua namonamo. Ma tauanina biagua sibona lasi, to haheauka danu do umui abia. Ma haheauka sibona lasi, to Dirava badinaia kara danu do umui abia. Ma Dirava badinaia kara sibona lasi, to emui tadikaka [hebogahisi] henia kara danu do umui karaia. Ma [hebogahisi] sibona lasi, to taunimanima do umui lalokau henia danu.” (2 Petero 1:​5-7) Petro ese ia gwauraia gaudia ita lalodia tao be gau badana. Namona be ia gwauraia gaudia ita tahua.

Abidadama Ena Kara Badadia

⁵ Petro ia gwau kara namona, diba, tauanina ena ura biagua namonamo, haheauka, Dirava badinaia kara, tadikaka hebogahisi henia, bona lalokau karadia be iseda abidadama ena kara badadia. Iseda abidadama lalonai unai mai anina bada karadia idia noho totona ita hekwarahi bada be gau badana. Hegeregere, kara namona bona abidadama idia hesiriu tamona bamona. Diksenari hereva haboua tauna W. E. Vine ia gwau 2 Petero 1:​5 ai, unai hereva “kara namona idia torea badina ia be gau badana abidadama kara dekenai.” Petro ia gwauraia karadia ma haida be iseda abidadama ena kara danu.

5, 6. Kara namona ena anina be dahaka, bona edena bamona iseda abidadama dekenai ita atoa diba?

⁶ Gau ginigunana be, ita abidadama sibona lasi to kara namona ita karaia danu. Unai anina be Dirava ia gwauraia kara namodia ita karaia. Greek gado amo unai hereva idia hahanaia “kara namona,” Baibel haida idia hahanaia “kara maorona.” (New International Version; The Jerusalem Bible; Today’s English Version) Kara namona ese ita ia doria dika gaudia ita dadaraidia totona eiava taunimanima ita kara dika henidia lasi totona. (Salamo 97:10) Danu, ita ia hagoadaia gari lasi dekenai kara namodia ita karaia bena unai amo taunimanima ita durudia lauma dalanai, tauanina dalanai, bona haida edia lalona idia goada totona.

7. Dahaka dainai abidadama bona kara namona ita karaia sibona lasi to diba ita abia danu be gau badana?

⁷ Dahaka dainai Petro ese ita ia hagoadaia abidadama bona kara namona ita hahedinaraia sibona lasi, to diba ita abia danu? Iseda abidadama kara ia tohoa gaudia be momo, unai dainai kara maorona bona kara kererena edia toana ita diba totona, diba ita abia be gau badana. (Heberu 5:14) Baibel stadi amo bona Dirava ena Hereva badinaia karana amo bona iseda mauri dina ta ta iboudiai lalonai aonega ita gaukaralaia neganai, iseda diba ita habadaia. Ma danu, unai ese ita ia durua hedibagani ita abia neganai iseda abidadama ia goada noho bona kara namona ita hahedinaraia noho diba.​—Hereva Lada-isidia 2:​6-8; Iakobo 1:​5-8.

8. Tauanina biagua ena anina be dahaka, bona haheauka danu ia noho hebou ena dala be dahaka?

⁸ Mai abidadama danu hetoho ita hanaidia totona, gau badana be diba ita abia sibona lasi, to tauanina biagua kara ita hahedinaraia danu. Greek gado ai “tauanina biagua kara” ena anina be ita siboda eda kara ita biagua namonamo. Unai be Dirava ena lauma huahuana ta bona ita ia durua iseda lalohadai, hereva, bona kara ita biagua totona. Bema ita goada karaia tauanina biagua totona, unai ena anina be ita haheauka. Greek gado ai “haheauka” ena anina be gari lasi dekenai oi gini auka, ita gwau lasi ena anina be vairana oi huaia karana oi koua diba lasi kara aukana dainai. Iesu be ia vairanai do ia abia moalena ia laloa dainai ia ese au dekenai mase ena hisihisi ia haheaukalaia diba. (Heberu 12:2) Dirava ese ita ia henia goadana bona iseda haheauka ese iseda abidadama kara ia hagoadaia bona ita ia durua hetoho lalonai ita moale diba totona, hedibagani ita dadaraia totona, bona dagedage negadiai dala maorona ita abia isi noho totona.​—Filipi 4:13.

9. (a) Dirava badinaia kara ena anina be dahaka? (b) Dahaka dainai Dirava badinaia kara sibona lasi, to tadikaka hebogahisi henia kara ita hahedinaraia noho danu be namo? (c) Iseda tadikaka ita hebogahisi henidia sibona lasi, to ita lalokau henidia danu ena dala be dahaka?

⁹ Haheauka ita hahedinaraia sibona lasi, to Dirava badinaia kara do ita hahedinaraia​—unai be Iehova ita matauraia, ita tomadiho henia, bona ena hesiai gaukara ita karaia. Dirava badinaia kara ita hahedinaraia neganai bona iena taunimanima ia kara henidia dalana ita itaia neganai, unai ese iseda abidadama ia habadaia. To, Dirava badinaia kara ita hahedinaraia totona, gau badana be tadikaka hebogahisi henia kara ita hahedinaraia. Badina “iena tadikakana, ia itaia diba tauna, bema ia ura henia lasi, edena bamona ia itaia diba lasi Diravana do ia ura henia diba.” (1 Ioane 4:20) Namona be iseda kudou ese ita ia doria Iehova ena hesiai taudia ma haida ita ura henidia momokani totona bona nega ibounai edia namo ita tahua totona. (Iakobo 2:​14-17) To dahaka dainai ita idia hagoadaia tadikaka ita hebogahisi henia sibona lasi, to lalokau ita hahedinaraia danu? Reana Petro ena hereva ena anina be iseda tadikaka mo sibona lasi, to taunimanima ibounai ita lalokau henidia be gau badana. Sivarai namona harorolaia karana bona lauma dalanai taunimanima durua karana be lalokau hahedinaraia dala badadia.​—Mataio 24:14; 28:​19, 20.

Kara Idauidau

¹⁰ Bema iseda abidadama dekenai kara namona, diba, tauanina biagua, haheauka, Dirava badinaia, tadikaka hebogahisi henidia, bona lalokau karadia idia noho, vadaeni, iseda lalohadai, iseda hereva, bona iseda kara be Dirava ena ura hegeregerena do ita karaia. Ma danu, bema sibona ia gwauraia Keristen tauna dekenai unai kara be lasi, lauma dalanai ia be matakepulu tauna. Dirava ena amo ‘ia abia diari dekenai ena matana ia koua,’ bona ia laloaboio Dirava ese iena kara dika gunadia ia huria ore vadaeni. (2 Petero 1:​8-10; 2:​20-22) Namo lasi unai bamona ita karaia bona iseda abidadama Dirava ena gwauhamata dekenai do ita haboioa.

11. Ita laloa abidadama horoa taudia be dahaka idia karaia be namo?

¹¹ Abidadama horoa Keristen taudia be Iehova ena gwauhamata herevadia dekenai idia abidadama, bona ia boridia bona ia abidia hidi dainai idia goada karaia davana namona idia abia totona. Ena be hekwakwanai idia davaridia, to ita diba Dirava ia gwauraia kara namodia do idia hahedinaraidia. Abidadama horoa taudia be do idia toreisi lou, bona lauma maurina guba dekenai do idia abia neganai, idia be ‘Iesu Keriso ena noho hanaihanai Basileia lalonai do idia vareai.’​—2 Petero 1:11.

12. Petero Iharuana 1:​12-15 ena anina be dahaka?

¹² Petro ia diba kahirakahira do ia mase, bona ia laloa gabeai do ia toreisi lou bona guba maurina do ia abia. To ‘ia mauri noho lalonai’ ia bamoa taudia ia durudia abidadama kara idia abia totona, bona dahaka do idia karaia Dirava ese idia do ia lalo-namo henidia totona, ia hadibadia. Ia mase murinai, lauma dalanai Petro ena tadikaka bona taihu ese iena hereva idia laloatao, unai amo edia abidadama idia hagoadaia diba.​—2 Petero 1:​12-15.

Peroveta Hereva Idia Abidadama Henia

¹³ Dirava ese abidadama hagoadaia herevana ia gwauraia, ia gwau Iesu be “mai ena siahu bada, bona mai ena hairai danu” do ia mai. (Mataio 24:30; 2 Petero 1:​16-18) Kaivakuku tomadiho henia pris taudia be edia dirava idia sivarailaia koikoi, to Petro, Iakobo, bona Ioane be idia bamona idia karaia lasi, edia matana amo idia itaia Keriso ena toana ia idau neganai ena hairai idia sivarailaia. (Mataio 17:​1-5) Ena hairai idia itaia bona Dirava ena hereva idia kamonai, ia gwau Iesu be Iena lalokau Natuna. Ia dekenai unai bamona ia hereva bona hairai bada ia abia ena anina be Dirava ese ia hanamoa bona ia hahairaia. Dirava ena amo unai kara ia hedinarai dainai, reana Petro ese unai gabu, Heremona ai, ia gwauraia “helaga ororona.”​—Esodo 3:​4, 5 itaia danu.

14. Iesu ena toana ia idau karana be edena bamona iseda abidadama ia hagoadaia be namo?

¹⁴ Iesu ena toana ia idau karana be edena bamona iseda abidadama ia hagoadaia be namo? Petro ia gwau: “Unai dainai ai daradara lasi momokani, to ai diba peroveta taudia edia hereva be momokani. Umui danu peroveta taudia edia hereva do umui badinaia be namo. Edia hereva be lamepa dibura gabuna ia hadiaria bamona, ela bona daba ia rere, bona daba ena hisiu bada ese emui lalona do ia hadiaria.” (2 Petero 1:19) “Peroveta taudia edia hereva” be Heberu Revareva lalonai Mesia ia perovetalaia herevadia sibona lasi, to ia be Iesu ena hereva “mai ena siahu bada, bona mai ena hairai” do ia mai peroveta herevana danu. Iesu toana ia idau karana be edena bamona peroveta ‘hereva ia hamomokania’? Unai ia vara karana ese Keriso be mai ena hairai bona mai ena Basileia siahuna danu do ia mai ena peroveta herevana ia hamomokania.

15. Peroveta herevadia ita lalodia totona dahaka do ita karaia?

¹⁵ Iseda abidadama ita hagoadaia totona, gau badana be peroveta herevadia ita lalodia. Unai ena anina be peroveta hereva ita stadilaia, Keristen heboudia dekenai ita kikilaia, bona ena sisiba ita badinaia. (Iakobo 1:​22-27) Namona be unai hereva be iseda lalona ia hadiaria “dibura gabunai lamepa ese diari ia halasia” bamona. (Efeso 1:​18, NW) Unai neganai sibona ita do ia hakaua ela bona ‘dina ena hisiu,’ eiava, “hisiu bada, daba rere neganai ia diaridiari gauna,” Iesu Keriso, be mai ena hairai do ia hedinarai. (Apokalupo 22:16) Ia hedinarai neganai abidadama lasi taudia do idia mase bona mai edia abidadama taudia ese hahenamo do idia davaria.​—2 Tesalonika 1:​6-10.

16. Dirava ena Hereva lalonai iena gwauhamata hereva iboudiai do idia guguru be edena bamona ita abidadama henia diba?

¹⁶ Dirava ena peroveta taudia be laloa namonamo bona aonega peroveta hereva gwauraia hedinarai taudia mo sibona lasi, badina Petro ia gwau: “Tau ta ese sibona ena laloa hegeregerena peroveta hereva Buka Helaga lalonai ena anina do ia gwauraia lasi. Badina be peroveta hereva gunadia be tau ta ese sibona ena ura dekenai ia gwauraia lasi. Lasi momokani. To Lauma Helaga ese helaga taudia ia hasiahua momokani dainai, idia ese Dirava ena hereva idia gwauraia.” (2 Petero 1:​20, 21) Hegeregere, David ia gwau: “Iehova ena lauma siahuna be lauegu uduna amo ia hereva.” (2 Samuel 23:​1, 2) Bona Paulo ia torea ia gwau: “Buka Helaga ena hereva ibounai be Dirava ena Lauma ese ia havaraia.” (2 Timoteo 3:16) Dirava ena peroveta taudia be iena lauma siahuna amo idia hereva, unai dainai ita diba iena Hereva lalonai ia gwauhamatalaia hereva iboudiai do idia guguru.

Dirava Ena Gwauhamata Herevadia Dekenai Idia Abidadama

¹⁷ Iehova ena gwauhamata herevadia dainai, Keristen ena nega ia do mai lasi neganai iena witness ‘taudia hutuma bada’ be idia abidadama diba. (Heberu 11:1–12:1) Hegeregere, Dirava ia gwauhamata ‘garana’ be “gaigai” kwarana do ia botaia, bona Abel be unai hereva dekenai ia abidadama. Dirava ena hahemaoro herevana Abel ena tamana bona sinana dekenai do ia guguru ena hamomokania gauna ia noho. Eden murimuri kahanai, Adam bona ena ruma bese taudia be gaukara ena hekwarahi varahuna amo paraoa idia ania, badina ia dainai tano ia dika, ginigini bona ava dikadia amo ia honu. Reana Abel ese Eva ena ura iena adavana dekenai ia itaia bona Adam ese ia biagua ia itaia danu. Reana ia ese ena mara hisihisina ia gwauraia hedinarai. Bona mai edia lahi kaia danu kerubi be Eden ena uma vareai gabuna idia koua. (Genese 3:​14-19, 24) Unai kara be ‘matana dekenai ia itaia’ gaudia, bona Abel ia diba Dirava ia gwauhamatalaia garana amo hahemauri do ia vara. Mai ena abidadama amo, Abel be Dirava dekenai boubou gauna ia henia, bona ia bouboulaia gauna ena namo be Kain ia bouboulaia gauna ena namo ia hereaia.​—Heberu 11:​1, 4.

18, 19. Abraham bona Sara be edena daladia amo edia abidadama idia hahedinaraia?

¹⁸ Idaunegai bese kwaradia Abraham, Isako, bona Iakobo danu be Iehova ena gwauhamata herevadia dekenai idia abidadama. Dirava ia gwauhamata Abraham dekena amo tanobada bese iboudiai be hahenamo do idia davaria bona iena tubudia be tano ta do idia abia, bona Abraham be unai hereva dekenai ia abidadama. (Genese 12:​1-9; 15:​18-21) Iena natuna Isako bona iena tubuna Iakobo danu be “unai gwauhamata Dirava dekena amo idia abia.” Mai ena abidadama dainai Abraham be “Dirava ia gwauhamatalaia tanona dekenai idau bese tauna bamona ia noho” bona “hanua badana ta” ia naria noho, unai be Dirava ena guba Basileia bona iena siahu amo do ia toreisi lou tanobada ai do ia mauri lou totona. (Heberu 11:​8-10) Oi be unai bamona abidadama goadana oi abia, a?

¹⁹ Abraham adavana, Sara, ena lagani be 90 bamona bona natuna havaraia negana be ia ore vadaeni, to Dirava ena gwauhamata herevana dekenai ia abidadama, bona “ia rogorogo” bona Isako ia havaraia. Unai dainai, ena be “iena mase be kahirakahira,” ia buruka momokani bona natuna ma ta ia havaraia diba lasi, to lagani 100 tauna Abraham dekena amo, “bese bada herea ia vara. Edia momo be guba ena hisiu idia momo hegeregerena.”​—Heberu 11:​11, 12; Genese 17:​15-17; 18:11; 21:​1-7.

20. Ena be idaunegai bese kwaradia be Dirava ena gwauhamata herevadia haida idia dekenai idia davaria lasi, to dahaka idia karaia?

²⁰ Unai idaunegai abidadama bese kwaradia be Dirava ena gwauhamata herevadia idia dekenai idia do davaria lasi neganai idia mase. To, “daudau herea dekena amo unai gwauhamata gaudia idia itaia, bona idia moale bada, idia gwau, ‘Ai be gabu idau taudia bamona inai tano dekenai ai noho. Ai be inai tanobada dekenai do ai noho daudau lasi.’ ” Uru momo idia mase ore murinai Abraham ena tubudia ese Gwauhamata Tanona idia abia. To, edia mauri ibounai lalonai, Dirava idia gari henia idaunegai bese kwaradia be Iehova ena gwauhamata herevadia dekenai idia abidadama. Edia abidadama kara idia haboioa lasi, unai dainai daudau lasi do idia toreisi lou bona Dirava ia hegaegaelaia “hanua badana ta,” Mesia ena Basileia unai, ena tanobada kahana dekenai mauri do idia abia. (Heberu 11:​13-16) Unai hegeregerena, ena be Iehova ena gwauhamata hereva namodia haida idia do guguru lasi, to ia dekenai ita do abidadama henia. Iseda abidadama dainai Dirava ena hereva ita badinaia, Abraham ia karaia hegeregerena. Ia ese lauma gaudia ena natudia dekenai ia hadibadia hegeregerena, ita ese iseda natudia ita durudia diba Iehova ena gwauhamata herevadia dekenai do idia abidadama totona.​—Heberu 11:​17-21.

Abidadama be Gau Badana Keristen Taudia Dekenai

²¹ Abidadama kara ena anina be ita abia dae Iehova ena gwauhamata do idia guguru, to unai sibona lasi. Taunimanima edia histori lalonai, dala idauidau ai abidadama idia hahedinaraia Dirava ese ia lalo-namo henidia totona. Paulo ese ia hahedinaraia bema ta ese “[Iehova] Dirava ia abidadama henia lasi neganai ia hegeregere lasi Dirava ena ura do ia badinaia. Badina be bema tau ta be Dirava kahirakahira ia ura lao neganai, ia ese Dirava ia mauri noho do ia abidadama henia guna. Bona unai tau ena abidadama be inai bamona, Dirava idia tahua taudia ibounai be davana namona Dirava ese do ia henidia.” (Heberu 11:6) Hari inai negai, Iehova be tau ta ia lalo-namo henia totona, gau badana be unai tau be Iesu Keriso bona ia dekena amo Dirava ia hegaegaelaia boubou gauna idia abia dae. (Roma 5:8; Galatia 2:​15, 16) Unai be Iesu ia hereva bamona, ia gwau: “Dirava ese inai tanobada ia lalokau henia bada dainai, iena Natuna tamona sibona ia vara, ia henia vadaeni ita dekenai, do idia abidadama henia taudia ibounai be do idia mase lasi, to mauri hanaihanai do idia abia. Ena Natuna ia abidadama henia tauna ese mauri hanaihanai do ia abia, to ena Natuna ia kamonai henia lasi tauna be mauri do ia itaia lasi, to Dirava ena badu be iena latanai do ia noho.”​—Ioane 3:​16, 36.

22. Mesia ena Basileia be edena gwauhamata herevana do ia hagugurua?

²² Dirava ese Basileia ia gwauhamatalaia bona Keristen taudia idia gurigurilaia, bona Iesu be gau badana unai hereva hagugurua totona. (Isaia 9:​6, 7; Daniel 7:​13, 14; Mataio 6:​9, 10) Petro ese ia hahedinaraia hegeregerena, Iesu ena toana ia idau karana ese peroveta herevana ia hamomokania, ia gwau Iesu be mai ena Basileia siahuna bona hairaina lalonai do ia mai. Mesia ena Basileia ese Dirava ena gwauhamata herevana ma ta do ia hagugurua, badina Petro ia torea, ia gwau: “Dirava ese ia gwauhamata vadaeni guba matamata bona tanobada matamata do ia havaraia. Inai totona do ita naria noho. Unai gabu dekenai be kara maoromaoro sibona do ia noho.” (2 Petero 3:13) Unai bamona peroveta herevana ta ia guguru igui hesiai Iuda taudia Babulono dekenai be lagani 537 B.C.E. ai, edia tano korikori dekenai idia giroa lao neganai, unai neganai gavamani ena gavana tauna be Serubabele bona hahelaga tauna be Iosua. (Isaia 65:17) To Petro ese ia perovetalaia “guba matamata”​—unai be guba lalonai Mesia ena Basileia—​be “tanobada matamata” do ia lohiaia, inai tanobada dekenai kara maoromaoro taudia do idia noho unai.​—Salamo 96:1 itaia danu.

23. Kara namona dekenai dahaka henanadai do ita herevalaidia?

²³ Ita be Iehova ena abidadama hesiai taudia bona iena lalokau Natuna, Iesu Keriso, murinai ita raka dainai, Dirava ia gwauhamatalaia tanobada matamatana be mai iseda ura danu ita naria noho. Ita diba ia kahirakahira vadaeni, bona Dirava ena gwauhamata namodia iboudiai do idia guguru ita abidadama henia. Iseda Dirava vairanai do ita raka maoromaoro totona, gau badana be iseda abidadama kara do ita hagoadaia, unai ita karaia dalana be kara namona, diba, tauanina biagua, haheauka, Dirava badinaia, tadikaka hebogahisi henia, bona lalokau karadia amo.a Hari, inai henanadai ita laloa be namo, Kara namona be edena bamona ita hahedinaraia diba? Bona kara namona ita hahedinaraia neganai unai ese ita bona ma haida, Dirava ena gwauhamata dekenai idia abidadama taudia danu, ita bamoa Keristen taudia unai, be edena bamona ia durua diba?

[Footnotes]

Emu Haere be Dahaka?

◻ “Abidadama” ena anina be dahaka?

◻ Petero Iharuana 1:​5-7 ai, iseda abidadama kara dekenai dahaka kara ma haida do idia noho be namo?

◻ Iesu ena toana ia idau karana be edena bamona iseda abidadama ia durua be namo?

◻ Abel, Abraham, Sara, bona idaunegai taudia ma haida edia abidadama karana be edena bamona?

3. Horoa Keristen taudia be mai edia abidadama neganai dahaka do idia davaria?

10. (a) Bema iseda abidadama dekenai kara namona, diba, tauanina biagua, haheauka, Dirava badinaia, tadikaka hebogahisi henia, bona lalokau karadia ita atoa neganai dahaka do ita karaia? (b) Bema sibona ia gwauraia Keristen tauna dekenai unai karadia be lasi neganai, dahaka do ia vara?

13. Keriso ena mai sivaraina dekenai Dirava ia henia abidadama hagoadaia herevana be dahaka?

17. Edena gwauhamata hereva dainai Abel ia abidadama diba?

21. Hari inai negai, Dirava ese ita ia lalo-namo henia totona, iseda abidadama dekenai dahaka idia noho danu be gau badana?

Iesu ena toana ia idau karana be tau ta ena abidadama karana dekenai ena anina oi diba, a?

[Picture on page 15]

Do you know how Jesus’ transfiguration can affect a person’s faith?