Iehova Ia Laloa Bada Mamoedia Naridia Namonamo

ELDA taudia idia kamonai namonamo. Idia be Efeso amo ia lao Mileto dekenai kilomita 50 idia mai aposetolo Paulo amo hahediba herevadia idia abia totona. Hari idia lalohisihisi badina idia kamonai unai be nega ginigabena do idia itaia. Unai dainai idia diba ia gwauraia herevadia be mai anina bada herea: “Umui sibona umui naria namonamo, bona mamoe orea ibounai danu. Inai orea naria taudia Lauma Helaga ese umui ia halaoa vadaeni. Dirava ena ekalesia, iena lalokau Natuna ena rarana amo ia hoia gauna, umui ubua.”​—Kara 20:​25, 28, 30.

Paulo be mamoe naria taudia ia gwauraidia sisina dainai unai ese gau momo Efeso elda taudia dekediai ia hadibaia. Unai tano dekenai mamoe naria gaukara idia itaia momo. Idia diba Heberu Revarevadia ese mamoe naria taudia ia herevalaidia momo. Bona idia diba Iehova be sibona ia gwauraia ia be iena bese taudia edia Mamoe Naria Tauna bamona.​—Isaia 40:​10, 11.

Paulo ese ia gwauraidia “mamoe orea” ena “gunalaia taudia,” bona “ekalesia” ena “orea naria taudia.” Unai hereva “naria taudia” ese ia hahedinaraia edia gaukara be dahaka, to unai hereva “orea naria taudia” ese ia hahedinaraia edena dala ai unai naria gaukarana do idia karaia. Oibe, naria taudia be lalokau dalanai kongregesen taudia iboudiai do idia naridia mamoe naria tauna be iena mamoe ia naridia dalana hegeregerena ai.

Hari inai negai, elda taudia haida sibona be mamoe korikoridia naridia dalana idia diba. To Baibel be nega momo mamoe bona mamoe naria taudia ia herevalaidia, laulau dalanai danu, unai dainai Paulo ena hereva ena anina be ia ore lasi. Bona idaunegai Dirava ese ia ura henidia mamoe naria taudia edia sivarai amo diba ita abia. Edia haheitalai namodia dainai hari inai nega ena elda taudia do idia diba dahaka karadia idia habadaia be namo Dirava ena ekalesia lalonai mamoe taudia idia naridia totona.

Gari Lasi Mamoe Naria Tauna David

Baibel ena negai mamoe naria taudia ita lalodia neganai, sedira David ita laloa, badina ia be guna mamoe naria tauna ta. David ena mauri amo ita diba gauna ginigunana be mamoe naria tauna be dagi badana ta lasi. Peroveta tauna Samuel ia mai bona Iese ena natuna ta ia horoa gwauraia Israel ena king ai ia lao totona. Unai neganai idia be tau matamatana David idia laloaboio. Iehova ese iena kakadia 7 ia dadaraidia murinai sibona David idia laloa, ia be uma dekenai “mamoe ia naridia.” (1 Samuel 16:​10, 11) To, David be lagani momo lalodiai mamoe ia naridia dainai unai ese ia hegaegaelaia Israel bese taudia naridia gaukarana ia karaia totona. Salamo 78:​70, 71 ia gwau: “[Iehova] ese ena hesiai tauna David ia abia hidi, mamoe magudia amo ia abia . . . ena orea taudia, Iakobo besena naridia totona.” David be Salamo 23 ena hereva namodia ia torea be maoro, inai hereva amo hereva ia matamaia, ia gwau: “Lau ia naria tauna, Mamoe Naria Tauna bamona, be Iehova.”

David bamona, namona be Keristen kongregesen ena elda taudia be Iesu henunai manau mamoe naria taudia bamona idia karaia, namo lasi sibodia edia dagi idia habadaia toho kava. Aposetolo Paulo be Timoteo dekenai ia torea hegeregerena, unai mamoe naria gaukarana idia tahua taudia be “gaukara namona ta [idia] ura,” ladana badana ta idia tahua lasi.​—1 Timoteo 3:​1, NW.

Ena be David be mamoe naria gaukara ia karaia bona unai be ladana bada lasi gaukarana, to nega haida gari lasi momokani dalana ai ia karaia be namo. Hegeregere, iena tamana ena seri amo nega ta leona bona ma nega ta ai bea be mamoe ta idia henaodia gwauraia neganai, David be gari lasi dekenai ia koudia bona unai dagedage animal ia hamasedia. (1 Samuel 17:​34-36) Unai be gari lasi karana momokani, badina ita diba leona be sibona ena bada ia hereaia momokani animal ia hamasedia diba. Bona Suria ena brown bea be guna Palestine dekenai ia loaloa, ena metau be 140 kilogram, ia ese ena imana goadana amo dia ta ia hamasea diba.

David be gari lasi dekenai iena tamana ena mamoe ia lalodia bada karana be haheitalai namona Keristen kongregesen ena mamoe naria taudia dekediai. Aposetolo Paulo be Efeso taudia dekenai sisiba ia henidia, ia gwau “uda sisia dikadia” dainai do idia naria, ia gwau “mamoe orea do idia hadikaia.” (Kara 20:29) Hari inai nega lalonai danu, nega haida Keristen mamoe naria taudia be gari lasi dekenai idia karaia Iehova ena mamoe taudia be lauma dalanai idia naridia namonamo totona.

Mamoe taudia be gari lasi dekenai idia naridia, to danu namona be kara manada dekenai idia kara henidia, lalokau mamoe naria tauna David bona Mamoe Naria Tauna Namona, Iesu Keriso, edia kara hegeregeredia. (Ioane 10:11) Idia diba mamoe seri be Iehova ena, namo lasi elda taudia be mamoe taudia idia kara auka henidia, ‘lohia bamona Dirava ena orea idia gunalaia’ lasi.​—1 Petero 5:​2, 3; Mataio 11:​28-30; 20:​25-27.

Kota Do Ia Abia

Idaunegai bese kwarana tauna Iakobo be mamoe naria tauna badana ta. Ia laloa ia naridia mamoe iboudiai be ia sibona ia naridia be namo. Iena ravana, Labana, ena mamoe be lagani 20 lalodiai ia naridia namonamo dainai, Iakobo ia hereva diba: “Oiemu mamoe bona oiemu nani hahine idia mara dika lasi, oiemu nani tatau danu ta lau abia lasi, lau ania lasi. Uda boroma ese bero idia henia gaudia lau mailaia lasi oi dekenai, lau sibona bero lasi gauna lau henia edia gabu abia totona. Henaoa taudia ese dinai idia henaoa o hanuaboi idia henaoa gaudia danu edia davana be lau dekenai oi tahua.”​—Genese 31:​38, 39.

Keristen kongregesen lalonai naria taudia ese Mamoe Naria Tauna Badana, Iehova Dirava, be “iena lalokau Natuna ena rarana amo ia hoia” mamoedia idia lalodia bada. (Kara 20:28; 1 Petero 5:4) Paulo ia gwau unai be maduna bada herea, ia be Heberu Keristen taudia ia hamaorodia lou kongregesen lalonai gunalaia taudia be “emui lauma idia naria noho nega ibounai. Gabeai idia ese Dirava ena vairanai edia gaukara ibounai ena anina do idia gwauraia hedinarai.”​—Heberu 13:17.

Iakobo ena haheitalai be danu ia hahedinaraia mamoe naria tauna ena gaukara dokona ena nega be lasi. Ia be dina bona hanuaboi gaukarana ta, bona nega momo sibona ena ura ia dadaraia. Ia ese Labana ia hadibaia: “Lau noho unai bamona, dinai, dina ena siahu ia hadikaia lau dekenai, hanuaboi keru ia hadikaia lau dekenai, lauegu matana danu idia mahuta lasi.”​—Genese 31:40.

Unai be momokani hari inai negai lalokau Keristen elda taudia momo dekenai, inai sivaraina ta ese ia hahedinaraia hegeregerena. Tadikaka ta be hosipele ai gorere bada taudia gabuna ai idia atoa badina ia be harana gorere ena operesen ta ia abia bona kerere haida idia vara. Iena ruma bese taudia be dala idia karaia dina bona hanuaboi ai ia ida hosipele dekenai idia noho. Ia durudia bona ia hagoadadia totona, elda ta be iena sediual ia haidaua dina ibounai ia be unai gorere tauna bona iena ruma bese taudia ia vadivadi henidia totona. To, hosipele be gorere hanamoa dalana ena sediual dainai, ia be nega haida dina lalonai ia vadivadi henidia diba lasi. Unai dainai nega momo elda tauna be hanuaboi momokani ia vadivadi henidia. To mai moale ida hanuaboi ibounai unuseniai ia lao. Unai elda ia gwau: “Lau diba gorere tauna dekenai ia hegeregere negana ai lau vadivadi henia be namo, lau dekenai ia hegeregere negana be namo lasi.” Unai tadikaka ena gorere ia namo sisina bena hosipele ena gabu ma ta ai idia atoa neganai, elda tauna be do dina ibounai iena hagoadaia vadivadi ia karaia noho.

Mamoe Naria Gaukara Dekenai Mose Ia Diba Gaudia

Baibel ese Mose ia gwauraia “tanobada taudia iboudiai bogaragidiai ia mo sibona be manau herea.” (Numera 12:3) To, unai sivarai ese ia hahedinaraia guna ia be unai bamona lasi. Ia be tau matamatana neganai, ia be Aigupito tauna ta ia hamasea badina Israel tauna ta ia botaia dainai. (Esodo 2:​11, 12) Unai be manau tauna ena kara ta lasi! To, gabeai Dirava ia ura Mose do ia gaukaralaia tano gagaena lalonai taunimanima milion momo besena ta ia hakaudia lao Gwauhamata Tanona dekenai. Ia hedinarai momokani Mose be ena diba ia habadaia noho be namo.

Ena be “Aigupito taudia edia aonega ibounai [Mose] dekenai idia hadibaia,” to Iehova ena mamoe orea ia naridia totona ma gau haida ia diba be namo. (Kara 7:22) Unai diba habadaia daladia ma haida be edena bamona? Lagani 40 lalodiai, Dirava be ia koua lasi dainai Mose be Midian tanona ai ladana bada lasi mamoe naria tauna ena gaukara ia karaia. Iena ravana, Ietero, ena mamoe oreadia ia naridia lalonai, Mose be kara namodia ia manadalaidia, hegeregere haheauka, manada, manau, boga-auka, badu lasi, bona sibona biagua karana. Danu, Iehova naria karana dekenai diba ia abia. Oibe, mamoe korikoridia ia naridia dainai Mose ia hegeregere Israel besena ena mamoe naria aonega tauna ai ia lao totona.​—Esodo 2:​15–3:1; Kara 7:​29, 30.

Hari inai nega lalonai elda tauna ese Dirava ena taunimanima ia naridia totona unai karadia ia karaia be namo, ani? Oibe, badina Paulo ese Timoteo ia hadibaia lou, “Lohiabada ena hesiai tauna be do ia heai lasi, to taunimanima ibounai dekenai do ia [hebogahisi] henia. Ia be hadibaia tauna namona, mai ena haheauka. Ia ese, iena hereva idia utua taudia do ia sisiba henidia mai ena manau danu. Badina be bema ia manau neganai sedira Dirava ese idia do ia durua, vadaeni edia laloa do idia giroa, bona hereva momokani do idia davaria.”​—2 Timoteo 2:​24, 25.

Sedira nega haida elda tauna ia laloa ia hegeregere lasi badina unai karadia ia karaia namonamo lasi. To, namo lasi ia hesiku. Mose bamona, sedira nega bada murinai mamoe naria tauna ena kara iboudiai ia manadalaidia diba. To, sedira gabeai, unai hekwarahi bada ena davana do ia abia.​—1 Petero 5:10 itaia danu.

Ena be oi be elda ta to sedira ma haida bamona oi dekenai gaukara momo idia henia lasi. Sedira, Mose dekenai bamona, Iehova be nega ia henia noho oi be kara badadia haida oi manadalaidia noho totona, ani? Oi laloaboio lasi Iehova “ese umui ia naria noho.” To, ita laloatao danu namona be ‘do ita laloa manau badina Dirava ese hekokoroku taudia edia dala ia koua, to manau taudia dekenai iena hariharibada ia henia.’ (1 Petero 5:​5-7) Bema oi hekwarahi bada bona Iehova ese oi ia hadibaia dalana oi abia dae, oi dekenai ia henia gaukara do ia habadaia, Mose dekenai ia karaia bamona.

Iehova Ena Mamoe Iboudiai Ita Lalodia Bada

Baibel ena nega lalonai, idia gaukara namonamo, lalokau mamoe naria taudia idia diba edia maduna be mamoe iboudiai dekenai. Namona be lauma dalanai mamoe naria taudia danu be unai bamona. Unai ia hedinarai Paulo ena hereva dekenai: “Umui sibona umui naria namonamo, bona mamoe orea ibounai danu.” (Kara 20:28) “Mamoe orea ibounai” taudia be daidia?

Iesu be haheitalai ta ia gwauraia, tau ta be mai ena mamoe handred tamona, to ta ia boio neganai maoromaoro ia lao mamoe orea dekenai ia hakaua giroa mai totona. (Mataio 18:​12-14; Luka 15:​3-7) Unai hegeregerena namona be naria tauna ese kongregesen taudia iboudiai ia lalodia. Haroro gaukara ia karaia lasi eiava Keristen hebou dekenai ia mai lasi neganai, ita gwau lasi unai mamoe be mamoe orea tauna ta lasi. Ia be do “mamoe orea ibounai” tauna ta, bona ia dainai elda taudia be Mamoe Naria Tauna Badana, Iehova, “kota henia Diravana ena vairanai dohore idia gini.”

Elda edia orea ta ena elda taudia idia laloa momo badina edia kongregesen taudia haida be haroro gaukara idia karaia lasi. Unai taudia edia lista ta idia torea, bona idia hekwarahi bada idia vadivadi henidia bona idia durudia Iehova ena mamoe orea dekenai idia giroa totona. Unai elda taudia be Dirava dekenai idia moale bada badina lagani rua bona kahana ta lalonai unai taunimanima 30 idia durudia diba Iehova ena hesiai gaukara idia karaia lou totona. Idia durua tauna ta be lagani 17 lalodiai ia haroro lasi!

Unai maduna ena metau be naria taudia dekenai idia gwauraia bada badina unai mamoe be “[Dirava ena] lalokau Natuna ena rarana amo ia hoia.” (Kara 20:28) Unai mamoe namodia totona ma davana hereana ta ia henia diba lasi. Bona mamoe bamona taudia iboudiai davaria bona durua totona ena nega bona hekwarahi oi laloa! Namona be unai bamona ma idia hekwarahi danu Dirava ena mamoe orea lalonai idia noho totona, ani? Momokani, kongregesen ena mamoe ta ta iboudiai be mai edia anina bada.

Mamoe orea tauna ta be kerere badana ta ia karaia neganai danu, elda taudia edia maduna ia idau lasi. Idia be do mamoe idia lalodia bada mamoe naria taudia, bema dala ia noho, kara kerere tauna idia durua toho kara manada dalanai bona mai edia manau ida. (Galatia 6:​1, 2) Madi, nega haida ia hedinarai kongregesen tauna ta be ia kara dika neganai Dirava ena ladana ia hadikaia dainai ia lalohisihisi lasi. Baibel ia gwau lalokau mamoe naria taudia be mai edia maduna mamoe orea taudia ma haida idia naridia unai tauna ese ia hadikadia garina.​—1 Korinto 5:​3-7, 11-13.

To, Iehova Dirava ese haheitalai hereadaena ia karaia idia boio mamoe taudia dekenai hebogahisi ia hahedinaraia totona. Iseda Mamoe Naria Tauna Badana be mai hebogahisi ia gwau: “Ia boio gauna do lau tahua, bona ia raka kava gauna do lau abia lou, bona ena aena ia dika gauna do lau kumia bona ia manoka gauna do lau hagoadaia.” (Esekiel 34:16; Ieremia 31:10) Unai haheitalai hereana idia tohotohoa dainai, hari inai nega lalonai, lalokau dalana amo mamoe naria taudia be kongregesen murimurinai idia atoa taudia idia vadivadi henidia lauma dalanai idia durudia totona, bona sedira hari idia be heduru do idia abia dae. Unai hebogahisi karana amo idia bamona boio mamoedia idia hakaudia lou gaukarana amo huahua namodia idia havaraia. Kongregesen dekenai ia vareai lou taihu ta ia gwau: “Elda taudia idia mai neganai, lau be goada lau abia lau giroa lou totona.”

Mileto dekenai, Paulo ena hereva Efeso elda taudia dekediai be momokani mai anina bada herea​—idia dekenai bona hari inai nega ena naria taudia dekediai. Mamoe naria taudia ia herevalaidia dainai ita be naria taudia idia karaia karadia ita lalodia​—hegeregere, manau bona gari lasi karadia, mamoe naria bona king dagina ia abia tauna, David, ese ia haheitalaia bamona; Iakobo be dina bona hanuaboi ena hesiai karana ese ia hahedinaraia bamona, unai tauna ia diba ia be mai ena maduna bona ia naridia be namo; bona Mose ese ia hahedinaraia hegeregerena, ia ura mai haheauka ida iena diba ia habadaia noho. Momokani, Baibel amo unai haheitalai ese kongregesen elda taudia do idia durudia idia be unai kara idia habadaia bona idia hahedinaraia totona, bena idia “naria namonamo, bona mamoe orea ibounai danu. . . . Dirava ena ekalesia, iena lalokau Natuna ena rarana amo ia hoia gauna” be kara manada dekenai idia naridia namonamo.