Iehova Ena Witness Taudia Tanobada Hegegemadai—Colombia

COLOMBIA be South America tanona ta bona ia be idau sisina. Unai tanobada ena kahana ta dekenai Atlantic davara ia noho bona kahana ta dekenai Pacific davara ia noho. Kone bona taora be siahu gabudia, to Andes Ororodia ena atai gabudia be keru bada sinou gabudia.a

Colombia dekenai golo bona emerald nadidia be momo, to ena taunimanima be unai tano ena davana bada gaudia. Hari inai negai, Iehova ese iena lauma rumana be hairai amo ia hahonua. Mai edia hairai taudia, tomadiho taudia namodia, be tanobada ena kahana ibounai amo unai ruma dekenai idia raka lao noho, Colombia taudia danu.​—Hagai 2:7.

Bisinesi Biagudia Idia Hoa

Sunday, November 1, 1992 ai, Facatativá ai, kilomita 42 Bogotá ena notwest kahanai amo, Watch Tower Society ena brens opesi matamatana bona printa rumana idia hahelagaia. Vadivadi taudia be unai ruma itaia totona idia raka loaloa neganai, idia hoa bada herea. Vadivadi tauna ta be ia gaukara faktori gabuna dekenai ia giroa lao neganai, mai moale danu ena faktori naria taudia ia hamaorodia unuseniai do idia lao bona unai orea idia haheaua dalana do idia itaia totona, ia gwau idia ‘gaukara namonamo, heiriheiri lasi, bona gaukara taudia idia moale.’ Idia lao neganai, unai faktori naria taudia be gau ibounai idia itaia namonamo bona edia henanadai be momo.

Unai faktori naria taudia idia ura idia henunai dagi idia abia taudia, hegeregere, superintendent, supervisor, bona foremen​—oibe, gaukara taudia iboudiai danu—​be unai ruma dekenai do idia loaloa, idia itaia totona. Pura ta ta iboudiai, edia sediual hegeregerena, gaukara taudia 15 ia lao 25 idia siaidia lao, siaidia lao, ela bona gaukara taudia iboudiai 1,300 be unai ruma dekenai idia vadivadi bona orea haheaua dala namona idia itaia vadaeni.

Unai faktori ena gaukara taudia handred momo be brens rumadia dekenai idia mai bona video ta, ladana Jehovah’s Witnesses​—The Organization Behind the Name, idia itaia. Idia hoa orea ena bada bona tanobada hegegemadai Basileia ena haroro gaukara idia diba neganai, bona idia hoa Society ese ia gaukaralaia gaukara kohudia idia itaia neganai. Ruma amo idia raka lasi neganai, momo idia gwau edia mamina be ‘Paradaiso gabuna idia rakatania bamona, bona heiriheiri tanobadana dekenai idia giroa lao.’

Taunimanima Idauidau be Hereva Momokani Idia Kamonai

Taunimanima idauidau ese sivarai namona idia kamonai. (1 Timoteo 2:3, 4) Hegeregere, guna tau ta be ane ia torea bona heavy-metal rok ben ta ia gunalaia, to Baibel ena hereva momokani ia abia dae, bona ena mauri dalana ia haidaua, bona daudau lasi murinai ia be regular pioneer gaukara ia karaia. Gabeai, hesiai tauna dagina ia abia. Guna, taunimanima haida be gavamani hamorua oreadia edia memba taudia, to hari idia be Iehova ena Basileia dekenai idia abidadama bona edia helaro be ia dekenai. Harihari idia ese mai ena maino tanobada matamatana ena sivarai harorolaia gaukarana idia karaia.

Drag idia ania bona drag idia hoihoilaia taudia haida danu be hereva momokani idia abia dae. Hari, tauhau ta be Witness tauna, to guna, lagani ima lalodiai, ia be uda dekenai drag dikadia hatubua umana bona cocaine karaia faktori ia naridia, to gabeai unai gaukara ia rakatania. Baibel ena taravatu ia diba bona ia badinadia neganai moale ia davaria. Dibura rumana ta dekenai, ala-ala taudia haida be mai edia lalona ibounai ida Baibel idia stadilaia, bona mai edia kudouna ibounai ida Iehova idia guriguri henia, edia kara dika do ia gwauatao bona ena hesiai taudia ai do ia halaodia totona.

Taunimanima idauidau be Basileia ena sivarai idia abia dae. Colombia dekenai, gabu idauidau ai hegeregerena, Iehova be hairai amo iena ruma ia hahonua.

[Footnotes]

[Box on page 8]

TANO RIPOTINA Hesiai Laganina 1993

HARORO TAUDIA EDIA NAMBA BADANA: 60,854

WITNESS TAUNA TAMONA INAI NAMBA AI: 558

MEMORIAL AI IDIA HEBOU TAUDIA: 249,271

PIONEER TAUDIA EDIA AVERES: 8,487

BAIBEL STADI EDIA AVERES: 100,927

BAPATISO ABIA MATAMATA TAUDIA: 5,183

KONGREGESEN EDIA MOMO: 751

BRENS OPESI: FACATATIVÁ

[Picture on page 9]

Brens opesi taudia bona misinari taudia, lagani 1956 ai

[Picture on page 9]

Peleini amo brens opesi laulauna