Dahaka Dainai Tanobada Dekenai Gari Karana be Bada?

DAIKA ia ura mai gari danu ia noho? Taunimanima momo idia ura idia noho namo, idia ura lasi edia mauri bona edia kohu do idia haboioa garina idia gari. Unai dainai, idia momo be taravatu utua kara momo gabudia amo idia siri. To, gabu iboudiai dekenai taunimanima hagaria karadia idia noho.

Niuklia tuari kohu bona niuklia siahu idia haboua gabudia dekenai aksiden idia vara dainai taunimanima idia laloa dika bada do idia davaria. Dagedage karana ia bada ia lao haraga dainai gari ia havaraia. Hari inai negai, taunimanima momo idia gari badina idia laloa lagani 2000 ia do mai lasi neganai, AIDS ena daihanai gorerena amo taunimanima momo herea do idia mase. Tanobada, davara, bona hodahoda idia hadikaia be gari gauna danu. Unai gari ia vara be mai ena badina, a? Gabeai, gari lasi tanobadana do ita noholaia diba, a?

Tanobada Hegegemadai Gari Karana be Mai Anina Bada

Hari inai negai, tanobada hegegemadai gari karana ia noho, bona ena badina be Baibel ese ia perovetalaia. Dina gabedia edia nega ia perovetalaia neganai, Iesu Keriso ese gari do ia havaraia gaudia ia gwauraidia hedinarai. Ia gwau: “Bese ta ese do ia toreisi, bese ta do ia tuari henia. Bona basileia ta ese do ia toreisi, basileia ta do ia tuari henia. Gabu idauidau dekenai hitolo bada do ia vara, tano danu do ia mareremarere.” Danu, Iesu ia gwau “kara dikadia danu do idia vara gabu idauidau dekenai.” Lagani 1914 murinai, tuari, doe, tano mareremarere, bona kara dika karadia idia vara badabada dainai, taunimanima idia gari dikadika bona momo idia mase.​—Mataio 24:​7-14.

Hari inai negai, taunimanima edia kara be mai garina. Aposetolo Paulo ena peroveta herevana 2 Timoteo 3:​1-4 dekenai ita duahia, ia gwau: “Nega dokonai metau dikadia momo do idia vara. Badina taunimanima ese idia edia ura sibona do idia tahua, moni do idia mataganigani henia, do idia hekokoroku bona heagi. Do idia hereva dika, edia tamana bona sinana do idia kamonai henia lasi, tanikiu henia kara do idia diba lasi, helaga karadia do idia negea. Idia be lalokau do idia diba lasi, do idia [hebogahisi] lasi, haida edia ladana do idia hadikaia kava, do idia lebulebu, do idia dagedage, kara namodia do idia ura henia lasi. Edia turana do idia samania henia, do idia kara kava. Do idia gwau idia be tau badadia momokani, vadaeni lebulebu karadia idauidau do idia ura henia bada, to Dirava do idia ura henia maragi.” Hari inai negai, unai bamona kara idia karaia taudia ese ita idia gegea, unai dainai gari be bada!

Tanobada Dekenai Do Idia Vara Gaudia

Iesu ese hari inai nega be Noa ena nega dokona ida ia hahegeregerea. Reana, unai nega lalonai gari be bada, badina Baibel be unai idaunegai sivarai ia torea, ia gwau: “Taunimanima ibounai be dika momokani Dirava ena vairana dekenai, bona edia dika be gabu ibounai dekenai.” Unai dainai, “Dirava ese Noa dekenai ia hereva, ia gwau, Mauri gaudia ibounai do lau haorea. Ibounai do lau hamasea haorea, badina tanobada be edia kara dika dekenai ia honu momokani.” (Genese 6:​11, 13) Unai tanobada dekenai kara dika mai dagedagena be bada herea dainai, Dirava ese Abata amo ia haorea. To, Iehova Dirava be mai ena lalokau dainai, kara maoromaoro tauna Noa bona ena ruma bese taudia ia hamauridia.​—2 Petero 2:5.

Vadaeni, hari inai negai, tanobada dekenai dagedage karadia be bada dainai, dahaka do ia davaria? Taunimanima be taunimanima ma haida edia noho namo idia hadikaia neganai, ita diba Dirava ese unai kara ia ura lasi momokani. Unai ia hedinarai goevagoeva salamo torea tauna ena hereva dekenai, ia gwau: “Iehova sibona ese kara maoromaoro taudia bona kara dika taudia ia tahudia; ia ese dagedage karadia ia ura henia tauna Ia inai henia.” (Salamo 11:5) Iehova ese Noa ena negai ia noho dagedage tanobadana ia haorea. Vadaeni, hari inai tanobada be gari havaraia dagedage karadia amo ia honu dainai, ita diba Dirava ese do ia haorea danu, ani?

Lauma helaga ese ia rohea dainai, aposetolo Petero ese Keriso ena lou mai, bona hari inai tanobada dikana dekenai dika do ia mailaia ia perovetalaia. Ia torea, ia gwau: “Nega dokonai, tauanina ena ura sibona idia karaia taudia be do idia hedinarai. Dirava badinaia kara do idia kirikirilaia. Vadaeni, umui dekenai do idia gwau, ‘Iesu ia gwauhamata, do ia giroa mai, a? Edeseni ia noho? Do ia mai lasi. Badina be iseda tubuna idia mase vadaeni, to tanobada ia karaia negana ia mai bona harihari gau ta be idau lasi.’ ” Bena murinai, Petero be goevadae lasi taudia edia lohia dalana taunimanima dekenai ia gwauraia “guba,” bona kara maoromaoro lasi taudia ia gwauraia “tanobada.” Ia gwau: “Idia ura laloaboio, kara be inai: Dirava ese guba bona tanobada, sibona ena oda hereva dekena amo ia karaia. Tanobada be ranu dekena amo ia karaia, bona ranu ese ia hagegea. To Dirava ese unai tanobada [Noa ena negai] gunana ranu dekena amo ia hadikaia ore, abata badana dekena amo. To harihari idia noho guba bona tanobada be Dirava ese, ena oda hereva dekena amo ia naridia noho. Oibe, idia noho hegaegae ela bona Kota Badana Dinanai. Unai neganai lahi badana ese tanobada bona guba do ia araia ore, bona Dirava idia negea taudia be do idia boio.”​—2 Petero 3:​3-7.

Unai hegeregerena, Paulo ese ia hahedinaraia Keriso bona iena siahu bada anerudia be “Dirava ura lasi taudia bona Lohiabada Iesu ena Sivarai Namona idia abia dae lasi taudia dekenai davana metau do ia henidia. Edia davana be . . . idia do ia haorea momokani, bona inai bamona do idia noho hanaihanai.” (2 Tesalonika 1:​6-9) Baibel ena buka ginigabena lalonai ia gwau bese iboudiai do idia haboudia “Siahu Ibounai Diravana ena Dina Badana neganai do idia tuari hebou totona” bona Iehova ese “tanobada idia hadikaia vadaeni taudia do [ia] alaia ore.”​—Apokalupo 11:18; 16:​14-16.

Gari Lasi, to Moale Negana

Baibel ese inai tanobada dekenai do idia vara gaudia ia perovetalaia herevadia dainai ita gari lasi, to kara maoromaoro taudia idia moale be mai ena badina. Iehova be kahirakahira inai kara dika tanobadana do ia haorea, unai do ia karaia kara maoromaoro idia ura henia taudia ese namo do idia davaria totona. Dirava ese inai nega dikana ia haorea murinai, dahaka do ia vara? Dirava ena guba Basileia ena siahu henunai nega matamatana do ia vara, Iesu ese ena hahediba taudia ia hadibadia unai Basileia totona do idia guriguri! Ia gwau: “Inai bamona do umui guriguri. ‘Aiemai Tamana e, guba dekenai oi noho, oiemu ladana do ai hahelagaia. Oiemu Basileia do ia mai, oiemu ura gauna tanobada dekenai do ai karaia, guba dekenai idia karaia bamona.’ ” (Mataio 6:​9, 10) Tanobada dekenai Dirava ena ura idia karaia neganai, dahaka kara do idia noho lasi?

Tuari bona ia havaraia gari dikadika karadia do idia ore. Salamo 46:9 ia gwau: “[Iehova Dirava ese] tuari ia hadokoa ela bona tanobada dokona. Peva ia hamakohia bona io ia utua maragimaragi; [tuari] kariota be lahi dekenai ia gabua.” Unai neganai taunimanima be “ta ta ena vain au bona ena fig au henunai do idia helai, bona tau ta ese idia do ia hagaria lasi.”​—Mika 4:4.

Gorere dikadia abia garina do idia gari lasi, badina gorere ese taunimanima do idia hamasedia lasi. Dirava ena gwauhamata be inai: “Unuseniai idia noho tauna ta lasi do ia gwau: ‘Lau gorere.’ ” (Isaia 33:24) Unai be moale bada havaraia gauna!

Taravatu utua bona dagedage karadia garina do idia gari lasi danu, unai be idia ore kara gunadia. Salamo 37:​10, 11 ena gwauhamata herevana be inai: “Nega sisina murinai, kara dika tauna do ia ore; ena gabu do oi tahua, to do oi davaria lasi. To manau taudia ese tanobada do idia abia, bona maino bada idia moalelaia dikadika.”

Hari inai negai, ita idia hagaria gaudia be edena bamona do idia ore bona maino momokani bona noho namo do ia vara? Kara maoromaoro gavamani tamona​—Dirava ena Basileia ese unai do ia havaraia. Daniel 2:44 ese hari inai nega ia gwauraia, ia gwau: “Unai pavapava edia negai guba Diravana ese basileia ta do ia haginia, nega ta ai do idia hadikaia ore diba lasi gauna. Bona unai basileia be idau taudia haida dekenai do idia henia lasi. Ia ese unai basileia iboudiai be do ia hamakohidia maragimaragi bona do ia haoredia, bena ia sibona do ia gini ela bona hanaihanai.” Iehova ese ia abia hidi Pavapavana, Iesu Keriso, be ‘do ia lohia ela bona Dirava ese tuari taudia ibounai iena aena henunai do ia atodia.’ (1 Korinto 15:25) Iesu ese ena Lagani 1,000 Lohia Negana lalonai, Dirava ena ura do ia hagugurua, Iena ura be taunimanima be mai moale danu tanobada paradaisona lalonai do idia noho ela bona hanaihanai.​—Luka 23:43; Apokalupo 20:6; 21:​1-5.

Unai tanobada Paradaisona lalonai, gari namona tamona sibona do ia noho. Unai be “Iehova ita gari henia.” (Hereva Lada-isidia 1:7) Namona be hari, Dirava ita gari henia, unai ena anina be mai hoa danu ita tomadiho henia badina ita ura lasi ita habadua, bona iena lalokau-hebogahisina bona ena namo karadia ita moalelaidia dainai. Ita gari henia ena anina be Iehova dekenai ita abidadama momokani, bona mai iseda kamonai danu iena hereva ita badinadia.​—Salamo 2:11; 115:11.

Hari inai nega dokona lalonai, gari gaudia idauidau idia vara. To, bema iseda lalokau Dirava dekenai ita hamomokania, ita gari lasi to ita moale. Baibel ena peroveta herevadia ese idia hahedinaraia Dirava be kahirakahira inai tanobada do ia haorea. Bona Iehova Dirava ese ia gwauhamatalaia kara maoromaoro tanobadana matamatana ese ena gabu do ia abia. (2 Petero 3:13) Oibe, Basileia ena lohia siahuna henunai, tanobada dekenai gari karadia be lasi, Dirava sibona ita gari henia.

[Box on page 6]

Magasin Tamona Ena Siahu

TOMASZ be Poland tauhauna, bona kerere ta dainai ena tanobada amo ia heau siri. Hua 6 lalodiai taunimanima idauidau edia motuka dekenai ia guia bona Europe ena tanobada idauidau ia hanaia, palai rumana lalonai ia mahuta bona moni gaukara idauidau ia karaia. Unai nega lalonai, inai henanadai tamona ia lalohadailaia noho: Mauri ena badina be dahaka?

Tomasz dekenai Poland gado Gima Kohorona idia henia neganai, ia ese ena henanadai ena haere ia davaria. Unai magasin ia duahia loulou bona ia diba ia tahua noho hereva momokanina ia gwauraia. Tomasz be taunimanima edia motuka dekenai ia guia bona kilomita 200 ia lao Watch Tower brens opesi Selters/Taunus, Germany dekenai. Monday hanuaboi ai ia ginidae, bona ena Gima Kohorona magasin ia abia isi bona ia gwau: “Lau ura tau ta ese inai magasin ena hereva ma haida lau dekenai ia hadibaia. Dahaka do lau karaia be namo?”

Unai hanuaboi ai, Iehova ena Witness tatau rua ese Tomasz dekenai mauri ena badina be dahaka idia hadibaia, bona idia kiki neganai Baibel idia gaukaralaia. Tomasz ia ura dikadika hereva ma haida ia kamonai, unai dainai, unai pura ena dina ta ta iboudiai dekenai ia giroa lao brens opesi dekenai, bona Baibel bona Mauri Hanaihanai Paradaiso Lalonai bukana idia stadilaidia.

Ena be hekwakwanai do ia davaria diba, to Tomasz ia laloa namona be Poland dekenai ia giroa lao. Vadaeni, Friday ai, unai be Selters brens opesi dekenai ia ginidae ena dina hani murinai, Tomasz be ena tanobada dekenai ia giroa lao. Poland dekenai, karaharaga ia be Iehova ena Witness taudia ida ia stadi. Tomasz be ia goada ia lao haraga bona mai moale danu stadi amo ia diba gaudia be taunimanima ma haida dekenai ia hadibadia. October 1993 ai, unai be Selters ia vadivadi henia ena hua hani murinai, bapatiso ia abia bona Iehova ena Witness tauna ta ai ia lao.

Gima Kohorona tamona sibona ese unai tauhau ia durua mauri ena badina be dahaka ia tahua totona!

[Picture on page 7]

Iesu Keriso ena lohia siahuna henunai, tanobada dekenai gari karana do ia vara lou lasi