Hari Inai Negai Dirava Idia Gorea

“Dirava be lasi lalohadaina be taunimanima ese idia abia dae, bona idia sibodia be edia mauri idia naria toho, herevana namo eiava dika do idia davaria.”​—One Hundred Years of Debate Over God​—The Sources of Modern Atheism.

ENA be au lata hereana ta be matamanai ita hoalaia, to gabeamo, ita manadalaia neganai, ena lata ita laloa momo lasi.

Dirava be lasi lalohadaina be unai bamona. Ena be guna taunimanima ese idia hepapahuahulaia, to hari idia laloa momo lasi. Hari inai negai, unai lalohadai idia abia dae taudia bona Dirava idia abidadama henia taudia be maino ai idia haheauka heheni.

To momo ese Dirava idia gorea vaitani lasi. America, Europe, bona Asia tanodia 11 ai, idia davaria taunimanima 100 100 amo rua rua sibodia be idia gwau idia laloa Dirava be lasi. To, idia laloa Dirava ia mauri noho taudia bogaragidiai danu, momo ese unai bamona lalohadaina idia hahedinaraia.

Dirava Ena Siahu Idia Gorea

Idia haida, ena be idia laloa Dirava ia mauri noho, to edia mauri dalana amo idia dadaraia. Idia ese Dirava ena taravatu idia lalodia lasi. Dirava be nega ta idia laloa lasi.

Oibe, haida idia gwau Dirava be lasi, bona ma haida ese ena lohia siahuna idia dadaraia. Ena siahu idia dadaraia taudia be Baibel ese inai bamona ia gwauraidia: “Idia gwau Dirava idia diba, to edia kara amo idia gorea.”​—Tito 1:​16, NW; ma danu Salamo 14:1 itaia.

Taunimanima ginigunadia ruaosi ese Dirava ena lohia siahuna dadaraia karana idia hamatamaia. Eva ia diba Dirava ia noho; to, ia ura ‘Dirava bamona do ia noho, kara namona bona kara dikana do ia diba.’ Anina be, sibona ena taravatu do ia atodia. Gabeai Adam danu ese Dirava ena siahu ia dadaraia.​—Genese 3:​5, 6.

Hari inai negai taunimanima momo ese unai lalohadai idia badinaia, a? Oibe. Buka ta ladana One Hundred Years of Debate Over God​—The Sources of Modern Atheism ia gwau: “Hari inai negai taunimanima idia ura lasi Dirava ese do ia biagudia. . . . Idia ura do idia noho mai edia ura-kwalimu ida.” Idia gwau Baibel ena taravatu idia kerere. Momo edia lalohadai be Aigupito ena Farao ena hegeregerena; ia be mai ena hekokoroku ida ia gwau: “Iehova be daika? Badina dahaka iena hereva dohore lau kamonai? . . . Iehova be lau diba lasi.” Ia ese Iehova ena siahu ia dadaraia.​—Esodo 5:2.

Kerisendom ese Dirava Ia Gorea

Kerisendom ena haroro taudia ese dala dika rohorohona amo Dirava ena siahu idia dadaraia; Baibel ena hereva idia negedia, bona edia gabu ai edia sene herevadia idia atodia. (Mataio 15:9 itaia.) Vanegai tuari bada hereadia idia durudia; unai amo idia ese Baibel ena hahegani, lalokau momokani do idia hahedinaraia haheganina, be idia dadaraia.​—Ioane 13:35.

Unai haroro taudia ese Dirava idia gorea dalana ma ta be inai: Iena taravatu idia dadaraidia. Unai ia hamomokania gauna be, fada taudia momo idia samanidia, memero kekeni idia kara bodaga henidia dainai. Kerisendom be idaunegai Israel bona Iuda hegeregeredia. “Tano be rara ai ia honu . . . badina be idia gwau: ‘Dirava ese tano ia rakatania vadaeni; Iehova ese ia itaia lasi.’ ” (Esekiel 9:9; ma danu Isaia 29:15 itaia.) Taunimanima momo ese Kerisendom ena tomadiho oreadia idia rakatanidia vaitani be hoa gauna lasi! To Dirava abidadama henia karana idia negea be namo, a?

Edia Lalohadai be mai Badina Maorodia, A?

Herevana tomadiho taudia edia koikoi idia itaia eiava lasi, taunimanima momo idia gwau, tanobada ai hisihisi ia vara dainai, idia abia dae diba lasi Dirava ia mauri noho. Simone de Beauvoir ia gwau: ‘Dirava be lasi lalohadaina lau abia dae be haraga, tanobada ena heiriheiri iboudiai ia havaradia Diravana lau laloa be auka.’

Tanobada ena kara kereredia ese idia hamomokania Dirava be lasi, a? Mani inai oi laloa: Bema tau ta ese kaia ta ia gaukaralaia ma tau ta haberoa o hamasea totona, unai ese ia hamomokania unai kaia karaia tauna be lasi, a? Lasi, ani? Ia hahedinaraia ta ese ia gaukaralaia kerere, ani? Unai hegeregerena, taunimanima edia hisihisi momo ese idia hahedinaraia taunimanima ese edia diba, Dirava ese ia henidia gauna, bona tanobada danu, be idia gaukaralaidia kerere.

To haida idia laloa ta ia abia dae Dirava ia mauri noho be kerere, badina be ita itaia diba lasi. To hodahoda, rege, bona gau edia bonadia be edena bamona? Ena be ita itadia diba lasi, to ita diba idia noho, badina be eda baragina bona eda taiana bona eda udu-baubauna ese ita idia hadibaia dainai. Momokani, bema hamomokanilaidia gaudia idia noho, ita abia dae ita itadia diba lasi gaudia be idia noho.

Tanobada gaudia edia anidia gaudia maragimaragidia bona taunimanima ena harana be ia lalodia namonamo murinai, saiens tauna Irving William Knobloch ia gwau: “Lau laloa Dirava ia mauri noho, badina be unai gau edia oromadia idia vara badina tamona be unai.” (Salamo 104:24 itaia.) Unai hegeregerena, saiens tauna ma ta Marlin Books Kreider ia gwau: “Lau be taunimanima ta, taunimanima oredia hegeregeredia, bona saiens dalana amo diba lau tahua momo danu; unai dainai lau laloa Dirava ia mauri noho, ia lau daradaralaia lasi.”

Unai hegeregerena, saiens tauna Henry Margenau ia gwau: “Saiens taudia hereadia momo lasi idia laloa Dirava be lasi.” Ena be idia ese edia diba idia habadaia noho bona tomadiho oreadia idia hegeregere lasi, to ita be unai dainai Dirava abidadama henia karana ita negea be namo lasi.

Tomadiho Momokani be Idau

Lagani 1803 ai, United States ena presiden Thomas Jefferson ia gwau: “Keristen tomadihona hagagevaia karadia lau inai henidia, to Iesu sibona ena hereva momokanidia lau inai henidia lasi.” Oibe, Kerisendom be idau bona Keristen tomadihona be ma idau. Kerisendom ena hahediba herevadia momo be taunimanima edia. To Keristen tomadiho momokanina ena hereva be Baibel sibona amo. Unai hegeregerena, Paulo ese Kolose taudia ia hamaorodia, namona be diba maorona, aonega, bona lalo-diari do idia abidia.​—Kolose 1:​9, 10.

Keristen taudia momokanidia be unai bamona idia karaia be maoro, badina be Iesu ese ia murinai idia raka taudia ia haganidia, ia gwau: “Bese ibounai be diba tahua taudia do umui halaoa, bona . . . umui bapatiso henia idia dekenai. Bona idia dekenai do umui hadibaia, umui dekenai lau henia hereva ibounai be do idia badinaia.”​—Mataio 28:​19, 20.

Hari inai negai, Iehova ena Witness taudia ese unai hahegani be tano 231 lalodiai idia badinaia. Baibel be gado 12 ai idia hahanaia vadaeni bona 74,000,000 mai kahana idia printadia vadaeni. Bona Baibel stadi amo taunimanima 4,500,000 bamona be edia ruma ai idia hadibadia noho, ‘Iesu ese ia henidia haheganidia iboudiai do idia badinadia.’

Hari hahediba gaukarana ese anina bada ia havaraia. Lalo-diari momokani ia havaraia, badina be ia lalonai Dirava ena aonega idia hahedibalaia, taunimanima edia lalohadai lasi. (Hereva Lada-isidia 4:18) Taunimanima edia “Lalo-Diari” ese ia karaia diba lasi gauna be ia ese ia karaia; bese idauidau taudia ia durudia, bena “mauri matamata” idia atoa dainai, idia lalokau heheni momokani.​—Kolose 3:​9, 10.

Hari inai negai tomadiho momokani be ia kwalimu noho. Dirava bona ena siahu ia goredia lasi. Inai do oi itaia totona, Iehova ena Witness taudia mani oi vadivadi henidia, edia Kingdom Hall ta lalonai.

[Box on page 6]

DIRAVA BE LASI LALOHADAINA ENA RAMUNA IDIA HAGOADADIA

Lagani 1747 C.E. lalonai, aonega tauna Denis Diderot be gaukara ta idia henia; ensaiklopidia bukana ta be English gado amo do ia torea hanai France gado ai. To unai gaukara ia habadaia momokani. Lagani 25 lalodiai ia ese ena Encyclopédie ia karaia; ena buka 28 lalodiai unai nega taudia edia lalohadai ia hahedinaraidia.

Ena be Encyclopédie lalonai be hahediba herevadia namodia momo, to taunimanima edia aonega ia herevalaia momo. Buka ma ta ladana Great Ages of Man ia gwau: “Lalohadai matamatana bona idau hereana ia hahedinaraia; lalohadaina be inai: Bema taunimanima ese abidadama idia negea bena sibodia edia aonega ese ia hakaudia, edia noho do idia hanamoa diba.” Dirava herevana ta be lasi. Buka ma ta ladana The Modern Heritage ia gwau: “Idia abidia hidi herevadia amo edita taudia ese idia hahedinaraia idia laloa tomadiho be anina lasi.” Unai dainai tomadiho oreana ese Encyclopédie halasia karana idia koua toho. Gavamani tauna ta ia gwau unai buka ese politik, kara maoromaoro, bona tomadiho idia hadikadia.

To, taunimanima 4,000 bamona ese Diderot ena Encyclopédie idia oda karaia​—unai be hoa gauna, badina be ena davana be bada herea. Bena nega daudau lasi ena lalohadai ia bada ia lao, ela bona momo idia hereva hedinarai, idia gwau Dirava be lasi.