“Beibi Maragidia Edia Uduna Amo”

SAMUEL be mero maragina neganai, taravatu maorodia ia badinadia ena be Hahelaga Tauna Badana Eli ena natudia memero idia kara dika. (1 Samuel 2:22; 3:1) Elisaia ena nega lalonai, Suria taudia ese Israel kekeni maragina ta idia abia bona ia be gari lasi danu iena biaguna hahine dekenai ia haroro. (2 Hanua Pavapavadia 5:​2-4) Iesu ena mauri lagani be 12 neganai, gari lasi dekenai Israel ena hahediba taudia ia hereva henidia; kamonai taudia be ena henanadai bona haere dekenai idia hoa. (Luka 2:​46-48) Idaunega amo ema bona hari, ia hedinarai Iehova ena abidadama hesiai memero kekeni ese ia idia hesiai henia.

Hari inai negai, memero kekeni be unai bamona abidadama karana idia hahedinaraia danu, a? Oibe, idia hahedinaraia momokani! Watch Tower Society ena brens opesi edia ripoti ese idia hahedinaraia idia abidadama memero kekeni be “sibodia idia henia” Iehova ena hesiai gaukara idia karaia totona. (Salamo 110:3) Edia kara edia huahua namodia ese Keristen iboudiai, memero kekeni bona burukadia ia hagoadadia, “kara namodia [idia] karaia be namo, [idia] hesiku lasi” totona.​—Galatia 6:9.

Haheitalai namona ta be Japan kekeni maragina ta ladana Ayumi. Ena mauri lagani be 6 neganai, ia be pablisa ta ai ia lao bena ena lalona ia hadaia ena klas memero kekeni iboudiai do ia haroro henidia totona. Gwaumaoro ia abia ena sikuli laiberi dekenai buka haida do ia atodia totona, bona ia hegaegae ena sikuli turadia edia henanadai ia haere henidia totona. Ena tisa bona kahirakahira ena klas memero kekeni ibounai be unai buka idia diba. Lagani 6 unai sikuli dekenai ia lao negana lalonai, Ayumi be Baibel stadi ibounai 13 ia karaia. Greid 4 ia karaia lalonai ia bapatiso bona ia stadi henia turana ta be greid 6 ia karaia neganai ia bapatiso. Bona ena Baibel stadi kekeni ena sinana bona kakadia rua idia stadi bona idia bapatiso danu.

Kara Namo be Haroro Namona

Aposetolo Petero ia gwau: “Dirava idia diba lasi taudia edia vairanai kara namodia do umui karaia.” Keristen memero kekeni be unai oda herevana idia badinaia momokani. (1 Petero 2:12) Unai dainai, nega momo edia kara namodia be haroro karana namona. Africa tanona ta Cameroon dekenai, tau ta be ena nega iharuana Iehova ena Witness taudia edia kongregesen hebouna dekenai ia lao bona kekeni maragina ta ena mauri lagani 6 ena badinai ia helai. Hereva ia henia tauna ese helai taudia ia hamaorodia Baibel siri ta idia itaia neganai, ia itaia unai kekeni maragina be haraga momokani sibona ena Baibel dekenai unai siri ia davaria bona idia duahia neganai ia badinaia danu. Unai tau ese ena kara dekenai ia hoa bada dainai, hebouhebou murinai ia lao hereva ia henia tauna ia hamaoroa, ia gwau: “Unai kekeni maragi ena kara dainai, lau ura oi ida Baibel lau stadilaia.”

South Africa ena sikuli ta dekenai natudia ibounai amo 25 be Iehova ena Witness taudia natudia. Edia kara namodia dainai Iehova ena Witness taudia edia ladana ia hanamoa. Tisa ta ese Witness sina ta ia hereva henia, ia gwau, ia diba lasi edena bamona Witness taudia ese edia natudia idia hadibadia namo herea, badina ena dubu be memero kekeni idia durudia diba lasi. Tisa matamatana ta ia mai unai sikuli dekenai ia gaukara totona neganai, haraga momokani Witness natudia edia kara namo ia itaia. Vadaeni, Witness merona ta ia nanadaia edena bamona ia be Iehova ena Witness ta ai do ia lao diba. Ia hamaoroa ia ese Baibel do ia stadilaia, bona iena tama sina ia hamaoroa unai tisa idia lou henia totona.

Costa Rica dekenai, Rigoberto ena klas memero rua ese ena henanadai, Toi Tamona, souli, bona hel dekenai be Baibel amo idia haerelaidia neganai, ia diba unai be hereva momokani. Idia herevalaia gaudia ia abia dae momokani badina idia ese Baibel idia gaukaralaia namonamo sibona lasi, to ia itaia edia kara namodia be Kerisendom edia kara amo idia idau vaitani. Ena be ena ruma bese taudia ese idia koua toho, to Rigoberto be ena Baibel stadi ia do goadalaia noho.

Spain dekenai Iehova ena Witness taudia rua​—ta ena mauri lagani be 9​—ese tau ta ladana Onofre idia vadivadi henia. Witness tauna badana ia hereva bona Baibel siri ia duahidia neganai, unai Witness merona be Baibel siri ia kehodia, ena lalona dekenai ia duahia bona Baibel siri haida be ena kwarana amo ia gwauraidia danu. Onofre ia hoa. Ena lalona ia hadaia unai mero maragina dekenai Baibel gaukaralaia namonamo dalana idia hadibaia gabuna dekenai do ia lao, ia danu Baibel do ia stadilaia. Vadaeni, wiki vairai Sunday dabai momokani, ia lao Kingdom Hall dekenai. Murimuri ai ia naria ela bona adorahi, bena Witness taudia be edia hebou totona idia ginidae. Unai dina murinai lauma dalanai ia goada ia lao ela bona vanegai ena gwauhamata toana ia hahedinaraia ranu bapatiso amo.

Memero Kekeni Witness Taudia Namodia

Oibe, Iehova ese matamata taudia bona taunimanima badadia ia gaukaralaidia kudou-namo taudia tahudia totona. Ekspiriens ta Hungary amo ese unai ia hahedinaraia. Hospital ta dekenai, nesi ta ia itaia vadivadi taudia ese mauri lagani 10 gorere kekeni idia vadivadi henia neganai, duahiduahi gaudia bona aniani idia mailaia danu. Ia hoa, ia ura diba unai kekeni maragi be dahaka gaudia ia duahia bena ia davaria ia duahia gauna be Baibel. Nesi ese kekeni maragi ia hereva henia bona gabeai ia gwau: “Ai herevahereva matamaia negana amo gau momo lau ia hadibaia.” Kekeni maragi ese hospital ia rakatania neganai, unai nesi ia boiria hebouhebou badana ta dekenai ia mai totona, to nesi ia ura lasi. To gabeai, “Gado Goevadaena” Distrik Hebouhebouna dekenai ia lao. Nega sisina murinai, Baibel stadi ia dekenai idia hamatamaia bena lagani ta murinai ia bapatiso​—inai ibounai ia vara badina kekeni maragina ta ese ena nega hospital dekenai ia gaukaralaia Baibel herevalaia bukadia ia duahidia dainai.

El Salvador dekenai, Ana Ruth be fom 2 ia karaia haisikuli dekenai. Vaia ena kara, ia be Baibel hadibaia bukadia ia atodia hegaegae ena gaukara patana dekenai bema haida idia ura, idia duahia diba totona. Ana Ruth ia itaia buka haida be nega sisina lalonai idia noho lasi bena idia giroa mai lou; ia davaria iena sikuli turana ta ladana Evelyn ese ia duahia noho. Nega sisina murinai, Evelyn dekenai Baibel stadi ia karaia bona kongregesen hebouhebou dekenai ia lao matamaia. Gabeai, ia bapatiso bona hari ia be nega ibounai heduru painia gaukara ia karaia. Ana Ruth be regula painia gaukara ia karaia.

Panama dekenai taihu ta ese hahine ta ia stadi henia matamaia to unai hahine ena adavana be hereva momokani ia ura lasi, bona kahirakahira unai hahine ese ena stadi ia hadokoa. To, metairametaira ena tau ena kara ia namo ia lao. Bena nega ta, iena kakana momokani, ia be Witness ta, ese ia nanadaia iena ruma dekenai burglar alarm do ia atoa totona. Unai ia karaia noho lalonai, iena kakana ena natuna kekeni, ena mauri lagani be 9, ia ginidae bona ena toana be ia moale lasi. Ia nanadaia dahaka dainai ena toana be unai bamona, bona kekeni maragi ia gwau, ia bona ena kakana idia lao Baibel stadi ta idia karaia totona, to unai tauna ia noho lasi, unai dainai ia be unai dina lalonai gau ta ia karaia lasi Iehova totona. Bena ena vavana ia gwau: “Vadaeni, lau dekenai oi haroro diba, ani? Unai amo oi ese gau ta oi karaia diba Iehova totona.” Mai moale danu kekeni maragi ia heau lao ena Baibel ia abia, bena stadi idia hamatamaia.

Iena sinana (unai tau ena nakimi) be ia kamonai noho. Ia laloa idia gadara sibona, to nega ibounai ena nakimi be edia ruma dekenai ia mai neganai, ena kakana ena natuna kekeni ia nanadaia Baibel stadi idia karaia totona. Kekeni maragi ena sinana ia itaia iena nakimi be ia ura momokani bona henanadai aukadia ia gwauraia neganai, ia ese Baibel stadi ia karaia bona ena natuna kekeni ia helai vareai danu. Wiki ta lalonai nega rua idia stadi bona haraga momokani lauma dalanai ia tubu. Vadaeni, lauma dalanai ia goada bona ia gwauhamata bena ia bona ena adavana be hebouhebou tamona dekenai idia bapatiso. Iena kakana ena natuna kekeni ena kara namo dainai.

Natudia Edia Gari Lasi Kara be Haroro Namona

Baibel ia gwau: “Oi gari lasi bona emu kudouna oi hagoadaia. Oibe, Iehova oi naria.” (Salamo 27:14) Unai hereva be mai anina Dirava ena hesiai taudia ibounai dekenai, bona ia hanaia lagani lalonai, memero kekeni bona taunimanima badadia ese unai hereva idia badinaia. Australia dekenai, mauri lagani 5 kekeni be sikuli matamata dekenai ia lao neganai, iena sinana ia lao ena tisa dekenai Iehova ena Witness taudia edia hahediba ia gwauraia hedinarai totona. Tisa ia gwau: “Umui abidadama henia gaudia lau diba vadaeni. Oiemu natuna kekeni ese lau dekenai gau ibounai ia gwauraia hedinarai vadaeni.” Unai kekeni maragi ia gari lasi ia sibona ia lao bona ia abidadama henia gaudia ia gwauraia hedinarai ena tisa dekenai.

Romania dekenai, mauri lagani 5 kekeni Andrea be gari lasi toana ia hahedinaraia danu. Ena sinana be Otodoks Dubu Oreana ia rakatania bona Witness hahinena ai ia lao neganai, iena dekena taudia idia ura lasi idia kamonai henia. Nega ta Kongregesen Buka Stadi dekenai, Andrea ia kamonai haroro naria tauna ia gwau iseda dekena taudia ita haroro henidia be mai anina bada. Unai hereva ia lalohadailaia auka, bena ruma dekenai idia giroa neganai, iena sinana ia hamaoroa ia gwau: “Sinagu, oi lao gaukara murinai, do lau toreisi, buka do lau hegaegaelaidia egu baege lalonai oi ese oi karaia bamona, bena do lau guriguri Iehova dekenai lau ia durua iseda dekena taudia dekenai hereva momokani lau harorolaia totona.”

Unai dina murinai, Andrea ia gwauhamata bamona ia karaia. Bena gari lasi dekenai, ena dekena hahine ena iduara belo ia hataia. Ena dekena hahine ese iduara ia kehoa neganai, unai kekeni maragi ia gwau: “Lau diba lauegu sinana be Witness hahinena ai ia lao neganai, oi ura henia lasi. Nega momo oi ia hereva henia toho, to oi ura lasi oi kamonai. Unai dainai ia lalohisihisi, to lau ura oi diba ai be oi ai lalokau henia.” Bena Andrea ese ia haroro henia namo herea. Unai dina tamona lalonai, ia ese buka 6, magasin 6, buklet hani, bona pepapepa hani ia henia. Unai nega amo ema bona hari ia be hua iboudiai ia lao haroro.

Rwanda dekenai tuari ia vara dainai iseda tadikaka be gari lasi toana idia hahedinaraia be gau badana. Nega ta, Witness ruma bese ta be daiutu ta lalonai idia atodia tuari taudia ese idia hamasedia totona. Unai ruma bese taudia idia noinoi bema namo idia guriguri guna. Gwaumaoro idia abia neganai, iboudiai be edia lalodia dekenai idia guriguri, to kekeni maragi Deborah, ena mauri lagani be 6, sibona ia guriguri badabada. Ripoti ta ia gwau, ia guriguri badabada ia gwau: “Iehova e, inai wiki lalonai, lau bona Papa be magasin ima ai henia taunimanima dekenai. Edena bamona do ai giroa lou idia dekenai hereva momokani ai hadibadia, bona ai durudia idia mauri totona? Unai sibona lasi, to hari lau be edena bamona pablisa ta ai do lau lao? Lau ura lau baptaiso oi lau hesiai henia totona.” Tuari tauna ta ese unai ia kamonai neganai, ia gwau: “Umui do ai hamasea lasi inai kekeni maragina dainai.” Deborah ia gwau: “Tanikiu.” Unai ruma bese taudia idia hamasedia lasi.

Iesu ena tanobada maurina ena dokona kahirakahira dekenai, Ierusalem dekenai pavapava bamona ia raka vareai neganai, taunimanima hutuma ese idia hanamoa, mai moale ida. Unai hutuma taudia be taunimanima badadia bona natudia maragidia danu. Unai sivarai idia torea neganai, idia gwau, mero maragidia be “Dubu Helaga lalonai idia boiboi, idia gwau, ‘Hosana, Davida ena natuna ita hanamoa!’ ” Dubu biagudia bona taravatu hadibaia taudia ese unai idia badulaia neganai, Iesu ese ia gwau henidia, ia gwau: “Umui be nega ta Buka Helaga umui duahia lasi, a? ‘Natudia maragidia, rata idia inua memero, edia uduna dekenai Dirava idia hanamoa namonamo.’ ”​—Mataio 21:​15, 16.

Ita moale bada badina Iesu ena hereva be hari inai nega lalonai danu ia momokani, ani? “Natudia maragidia, rata idia inua memero”​—bona memero kekeni, uhau bona ulato danu​—ese Iehova idia imodaia noho. Oibe, Iehova imodaia karana dekenai emu lagani be maragi eiava bada be anina lasi.​—Ioel 2:​28, 29.