Manoka, Dika Momokani, Bona Helalo-Kerehai Dibadia Dalana

KARA dika be Keristen taudia ese idia inai henia gauna​—Iehova ena kara maoromaoro badinaia lasi karana unai. (Heberu 1:9) Madi, ita ibounai be nega haida ita kara dika. Ita ibounai be manoka bona goevadae lasi dainai ita hekwarahi. To, kahirakahira nega iboudiai, bema Iehova dekenai iseda kara dika ita gwauraia hedinarai bona ita hekwarahi mai goada ida unai kara dika ita karaia lou lasi totona, ia ita lou henia diba mai lalo-goeva ida. (Roma 7:​21-24; 1 Ioane 1:​8, 9; 2:​1, 2) Iehova ita tanikiu henia badina, Iesu ena boubou gauna ena davana dainai, iseda hesiai gaukara helagana ia abia dae.

Bema ia manoka dainai ta be kara dika badana ia karaia, heduru ia abia haraga be gau badana. Iakobo 5:​14-16 ai karaia dalana ia herevalaia: “Umui ta ia gorere, a? Ia ese ekalesia gunalaia taudia do ia boiria be namo . . . Lohiabada ese iena mauri do ia hanamoa, bona iena kara dika do ia gwauatao. Unai dainai umui ta ta dekenai emui kara dikadia do umui gwauraia hedinarai, bona umui ta ta totona do umui guriguri. Vadaeni unai neganai Dirava ese emui mauri do ia hanamoa.”

To ia gwauhamata vadaeni Keristen tauna be kara dika rohoroho ia karaia neganai, Iehova dekenai ia gwauraia hedinarai sibona be hegeregere lasi. Kongregesen ena goeva bona ena maino ia do noho totona, elda taudia be gau ma haida idia karaia be gau badana danu. (Mataio 18:​15-17; 1 Korinto 5:​9-11; 6:​9, 10) Reana elda taudia be inai do idia tahua: Kerere tauna ia helalo-kerehai, eiava? Dahaka ia vara guna, bena kerere ia karaia? Nega sisina mo ia manoka dainai ia kerere, a? Unai kara dika ia manadalaia vadaeni, a? Nega haida unai idia dibaia be do ia auka, bona idia lalo-pararalaia namonamo be gau badana.

To, dahaka do ia vara bema ta be kara dika momokani dalana ia tahua mai ena ura ida dainai kerere ia karaia? Unai neganai, elda taudia edia maduna idia daradaralaia lasi. Korinto kongregesen ai kara dika badana idia hamaoroa toho neganai, aposetolo Paulo ia hamaorodia: “Unai kara dika tauna emui orea dekena amo umui atoa siri.” (1 Korinto 5:13) Keristen kongregesen lalonai lalona idia dika taudia be mai edia gabu lasi.

Manoka, Dika Momokani, bona Helalo-Kerehai Edia Toana

Ta ia helalo-kerehai neganai, elda taudia be edena bamona unai do idia dibaia?a Henanadai aukana unai. Mani, Pavapava David oi laloa. Ia heudahanai bena unai dainai ala-ala karana ia karaia. To Iehova ese ia hamasea lasi. (2 Samuel 11:​2-24; 12:​1-14) Anania bona Sapira danu oi laloa. Aposetolo taudia idia koia toho, mai koikoi ida kohu hariharilaia badabada karana ena toana idia hahedinaraia. Kerere badana, a? Oibe. To ala-ala bona heudahanai edia dika hegeregerena, a? Lasi! To, Anania bona Sapira be edia mauri idia haboioa, edia kerere ena davana.​—Kara 5:​1-11.

Dahaka dainai hahemaoro idaudia idia abia? David be kara dika badana dekenai ia moru badina ia manoka dainai. Ia vairanai iena kara idia gwauraia hedinarai neganai, ia helalo-kerehai, bona Iehova ese ena dika ia gwauatao​—to ena ruma bese lalonai ia davaridia hekwakwanai be matahakani aukana ia dekenai. Anania bona Sapira idia kara dika badina palani idia karaia Keristen kongregesen do idia koia toho, bona unai amo ‘idia koikoi lauma helaga dekenai bona Dirava dekenai.’ Unai be kudou dikana ena toana ia hedinarai. Unai dainai, hahemaoro auka herea idia abia.

Inai kerere ruaosi dekenai, Iehova ese hahemaoro ia karaia, bona taunimanima edia lalona ia tahua diba dainai, hahemaoro maorona ia karaia diba. (Hereva Lada-isidia 17:3) Elda taudia be unai idia karaia diba lasi. Unai dainai, kara dika badana ta be manoka dainai eiava lalona ia dika momokani dainai ia vara be edena bamona idia dibaia diba?

Momokani, kara dika ibounai be dika momokani, to kara dika idia karaia taudia iboudiai lasi edia lalona ia dika momokani. Ena be edia kerere be hegeregere, to reana ta ese ia karaia ia manoka dainai, bona ma ta ese ia karaia lalona ia dika momokani dainai. Momokani, nega momo ta ia kara dika badina nega tamona ai ia manoka sisina bona lalona ia dika sisina. Kerere karaia tauna ese ena kara ia laloa dalana bona dahaka do ia karaia be gau badana ta. Helalo-kerehai toana ia hahedinaraia, a? Namona be elda taudia be lalo-parara idia abia unai idia dibaia totona. Lalo-parara be edena bamona do idia abia diba? Timoteo dekenai aposetolo Paulo ia gwauhamata: “Lauegu hereva ena anina do oi laloa, badina be Lohiabada ese edia anina korikori oi dekenai do ia hadibaia.” (2 Timoteo 2:7) Bema elda taudia be Paulo bona Baibel idia torea taudia edia hereva idia “laloa”, lalo-parara do idia abia bona dala maorona ai kongregesen lalonai idia kerere taudia do idia lalodia. Unai neganai, dahaka do idia karaia be Iehova ena laloa dalana hegeregerena, sibodia edia laloa dalana hegeregerena lasi.​—Hereva Lada-isidia 11:2; Mataio 18:18.

Edena bamona unai idia karaia diba? Dala ta be Baibel dekenai lalona ia dika momokani taudia herevalaia dalana idia stadilaia, bena ena hereva be kerere tauna ena toana dekenai idia hahegeregerea.

Maduna Abia Dae Bona Helalo-Kerehai

Dika momokani dalana idia abia hidi taunimanima ginigunadia be Adam bona Eva. Ena be idia goevadae bona Iehova ena taravatu idia dibaia namonamo, to Dirava ena lohia siahuna idia dadaraia. Idia vairanai Iehova ese edia kerere ia gwauraia hedinarai neganai, edia kara ita laloa​—Adam ese Eva ia samania, bona Eva ese gaigai ia samania! (Genese 3:​12, 13) Mani edia kara be David ena manau momokani karana danu oi hahegeregerea. Ena kerere idia gwauraia hedinarai neganai, ena maduna ia abia dae bona gwauatao abia totona ia noinoi, ia gwau: “Iehova lau kara dika henia vadaeni.”​—2 Samuel 12:13; Salamo 51:​4, 9, 10.

Elda taudia be lo tauna ena kara dika badana idia hamaoroa toho neganai, namona be unai haheitalai rua idia laloa namonamo. Kerere tauna be​—David bamona, ia diba momokani ia kerere neganai—​kerere ese ia havaraia maduna ia abia dae bona mai helalo-kerehai ida Iehova ia tahua ia durua bona ia gwauatao totona, eiava ena kerere ena dika ia gwauraia maragi bamona bona ma ta ia samania? Momokani, reana kerere tauna ia ura dahaka ia vara guna bena kerere ia vara ia herevalaia, bona elda taudia ese durua dalana idia tahua neganai reana guna eiava hari idia vara gaudia idia laloa be namo. (Hosea 4:14 itaia danu.) To ia abia dae be namo gaudia be inai: ia be kerere ia karaia tauna bona Iehova vairanai ia be mai ena maduna. Laloaboio lasi: “Iehova be lalohisihisi taudia kahirakahira dekenai ia noho; daradoko taudia ia ese ia hamauridia.”​—Salamo 34:18.

Kara Dikana Manadalaia

Salamo bukana lalonai siri momo be lalona ia dika momokani taudia idia herevalaia. Unai siridia amo, elda taudia be heduru idia abia bena taunimanima ta ia manoka eiava lalona ia dika momokani idia dibaia diba. Hegeregere, Baibel lalonai Pavapava David ena guriguri ita laloa: ‘Lalona ia dika momokani taudia bona hisihisi karadia idia manadalaia taudia danu lau oi abia lao lasi, edia bamodia danu maino idia herevalaia to edia lalona ai dika ia noho taudia.’ (Salamo 28:3) Ita itaia lalona ia dika momokani taudia bona “hisihisi karadia idia manadalaia taudia” be nega tamona idia herevalaia. Manoka dainai kara dika ia karaia tauna be ia laloa namonamo matamaia neganai, maoromaoro do ia hadokoa. To bema tau ta be dika ia manadalaia vadaeni bona unai be vaia ena kara, reana unai be kudou dikana momokani ena toana.

Unai siri lalonai, David be dika momokani ena toana ma ta ia herevalaia. Anania bona Sapira bamona, lalona ia dika momokani tauna ena uduna amo gau namodia ia herevalaia, to ena lalona ai gau dikadia idia noho. Reana ia be kara koikoi tauna​—Farisea taudia Iesu ena nega lalonai bamona, ‘taunimanima ese idia itaia be kara maoromaoro taudia bamona, to edia lalona be koikoi bona kerere idia honu momokani.’ (Mataio 23:28; Luka 11:39) Iehova ese kara koikoi ia inai henia. (Hereva Lada-isidia 6:​16-19) Bema ta be mai koikoi ida ena kara dika badadia ia gorea toho hahemaoro komiti vairanai, eiava ena kerere ibounai lasi to mai maumau danu taunimanima idia diba vadaeni gaudia sibona ia gwauraia hedinarai, reana unai be kudou dikana momokani ena toana.

Mai Heagi ida Iehova Ia Matauraia Lasi

Salamo 10 be lalona ia dika momokani tauna ena kara ma haida ia herevalaia. Unuseniai ita duahia: “Lalona ia dika momokani tauna be mai heagi ida hisihisi ia ania tauna ia lulua lao; . . . Iehova ia matauraia lasi.” (Salamo 10:​2, 3) Ia gwauhamata vadaeni Keristen tauna dekenai dahaka ita laloa bema mai heagi ida Iehova ia matauraia lasi? Momokani, unai laloa dalana be dika momokani. Manoka dainai ia kerere tauna be, ia diba ia kerere eiava ia dekenai ma ta ese ia hahedinaraia murinai, do ia helalo-kerehai bona ia hekwarahi bada ena kara ia haidaua totona. (2 Korinto 7:​10, 11) To idau gauna be, bema tau ta ese kerere ia karaia badina Iehova ia matauraia lasi vaitani dainai, dahaka ese unai tau do ia koua ena kara dika ia karaia loulou lasi totona? Ena be mai manau ida sisiba idia henia to ia do heagi noho, ia dekenai manau be edena bamona ia noho diba do ia helalo-kerehai momokani totona?

David ena hereva, gabeai unai salamo tamona lalonai ia herevalaia, mani oi laloa: ‘Lalona ia dika momokani tauna ese Dirava ia matauraia lasi ena badina be dahaka? Ena lalona ai ia gwau: “Davana do oi henia lasi.” ’ (Salamo 10:13) Keristen kongregesen lalonai, lalona ia dika momokani tauna be namo bona dika edia idau ia diba, to bema ia laloa ena kerere ena davana do ia abia lasi, kara haraga unai dika do ia karaia. Ia laloa ma ta ese ena kerere do ia hahedinaraia diba lasi neganai, ena ura dikadia iboudiai ia hagugurudia toho. David bamona lasi, bema iena kerere ia hedinarai, mai koikoi ida do ia hekwarahi bada ena davana ia abia lasi totona. “Ena matana dekenai Dirava gari henia karana be lasi. . . . Dika ia dadaraia lasi.”​—Salamo 36:​1, 4.

Ma Haida Hahisidia

Vaia, kerere ta be tau tamona sibona lasi, to ma haida danu ia hahekwakwanaia. Hegeregere, heudahanai tauna be Dirava ia kara dika henia; ena adavana bona natudia ia hahisidia; bema ia danu ia kerere hahinena ia headava, ena bese danu ia hahisia; bona kongregesen ena ladana ia hamiroa. Unai ibounai be edena bamona ia laloa? Ena lalona ia gwadaia momokani lalohisihisina bona helalo-kerehai korikorina toana ia hahedinaraia, a? Eiava Salamo 94 ese ia herevalaia karana ia hahedinaraia: “Hisihisi karadia idia manadalaia taudia be idia sibodia idia heagilaia. Iehova e, emu bese taudia idia moidia tao bona emu tano idia hadikaia noho. Vabu bona idau tauna idia aladia, bona tamadia lasi memero idia alaia mase. Bona idia gwau: ‘Iehova ia itaia lasi; Iakob ena Dirava ia lalo-pararalaia lasi’ ”?​—Salamo 94:​4-7.

Reana, kongregesen lalonai idia hamaoroa kereredia be ala-ala bamona lasi. To elda taudia ese kerere ena badina idia tahua neganai reana unai laloa dalana​—ia laloa ma ta do ia hahisia ia sibona ena namo totona be namo​—do idia itaia namonamo. Unai danu be heagi karana, lalona ia dika momokani tauna ena toana. (Hereva Lada-isidia 21:4) Keristen korikorina ta be ena mauri do ia atoa diho ena tadikaka totona dainai, ena laloa dalana be idau vaitani.​—Ioane 15:​12, 13.

Dirava Ena Hakaua Herevadia

Ena be unai hakaua herevadia idia henia lasi taravatu bamona, to Iehova ena matana ai dahaka be dika momokani idia hahedinaraia matamaia. Kerere ese ia havaraia maduna ia dadaraia, a? Kerere tauna, mai gwau-edeede ida, ese guna unai kara dekenai ia abia sisiba ia laloa lasi, a? Kara dika momokani ia manadalaia momokani, a? Ia hahedinaraia Iehova ena taravatu ia laloa lasi momokani, a? Ena kerere hunia totona palani ia karaia, bona, nega tamona ai, ma haida ia hakaudia kerere, a? (Iuda 4) Iena dika ia hedinarai matamaia neganai, kerere hunia karana ia goadalaia, a? Iehova ena ladana bona ma taunimanima haida ia hadikaia vadaeni; to unai ia laloa bada lasi, a? Ena laloa dalana be edena bamona? Mai hebogahisi ida Baibel ena sisiba idia henia murinai, ia heagi o hekokoroku, a? Ia ura dikadika lasi unai kerere do ia karaia lou lasi, a? Bema elda taudia ese unai bamona karadia idia itaia, helalo-kerehai lasi toana unai, reana do idia laloa ena kerere be dika momokani ena toana, manoka ena toana lasi.

Ena be toana be tau ta ena ura gaudia be dika momokani, to elda taudia ese do idia hagania noho kara maoromaoro ia tahua totona. (Heberu 3:12) Lalona ia dika momokani taudia be reana do idia helalo-kerehai bona edia kara do idia haidaua. Bema unai be momokani lasi, dahaka dainai Iehova be Israel taudia ia haganidia, ia gwau: “Kara dika tauna ese ena dala ia rakatania, bona kara gagevagageva tauna ena lalohadai ia rakatania be namo; bona Iehova dekenai ia giroa be namo, badina ia dekenai do ia hebogahisi. Bona iseda Dirava dekenai ia giroa be namo, badina ia ese ena dika do ia gwauatao”? (Isaia 55:7) Reana, hahemaoro hebouna ta lalonai ena helalo-kerehai toana dainai, elda taudia do idia itaia diba ena lalona ia haidaua vadaeni.

To mamoe naria taudia bamona, elda taudia be Kongregesen murimuri ai tau ta idia atoa siri neganai danu, ia do idia hagoadaia ia helalo-kerehai bona Iehova dekenai ia giroa lou totona. Unai “kara dika tauna” Korinto ai oi laloa. Ena kara ia haidaua; murinai, Paulo ia gwau namona be orea lalonai ia idia abia dae lou. (2 Korinto 2:​7, 8) Pavapava Manase danu oi laloa. Iena lalona be dika momokani, to gabeai, ia helalo-kerehai neganai, Iehova be ena helalo-kerehai karana ia abia dae.​—2 Hanua Pavapavadia 21:​10-16; 2 Sisiga 33:​9, 13, 19.

Momokani, idia gwauatao diba lasi kara dikana ia noho​—lauma helaga kara dika henia karana. (Heberu 10:​26, 27) Iehova sibona be daika ese unai bamona kara dika idia karaia vadaeni ia gwauraia diba. Taunimanima be unai idia gwauraia diba lasi. Elda taudia edia maduna be kongregesen ena goeva idia naria, bona idia helalo-kerehai vadaeni kara dika taudia idia durudia. Mai lalo-parara bona manau ida unai idia karaia bona edia hahemaoro herevadia dekenai Iehova ena aonega idia gaukaralaia neganai, Iehova ese edia mamoe naria gaukarana unai kahana dekenai do ia hanamoa.

[Footnotes]

[Picture on page 29]

Anania bona Sapira be lauma helaga dekenai idia koikoi dainai lalona dikana momokani ena toana idia hahedinaraia