Keristani Witness Taudia, Edia Hanua Korikori be Guba
“Iseda hanua korikori be guba.”—FILIPI 3:20.
1. Iehova ena palani namo hereana taunimanima haida totona be dahaka?
TAUNIMANIMA haida be king bona hahelaga taudia ai do idia lao, guba lalonai aneru danu do idia lohiadia. (1 Korinto 6:2, 3; Apokalupo 20:6) Hoa gauna unai! To, Iehova ena palani be unai, bona ia sibona ese ia havaraia Natuna tamona, Iesu Keriso, ena amo do ia karaia. Dahaka dainai Dirava be unai bamona do ia karaia? Keristani tauna ta be unai ia diba dainai, hari inai negai unai ena anina ia dekenai be dahaka? Mani Baibel ena haere do ita tahua.
2. Ioane Bapatiso ia gwau Iesu be dahaka kara matamatana do ia karaia, bona dahaka totona do ia karaia?
2 Ioane Bapatiso ese Iesu ena dala ia lailaia neganai, ia gwau Iesu ese kara matamatana ta do ia karaia. Baibel ia gwau: “[Ioane] ia haroro, ia gwau, ‘Tau ta lauegu murinai dohore ia mai, iena siahu ia bada, lauegu siahu ia maragi. Inai tau ena tamaka varona, lau be hegeregere lasi lau ruhaia. Lau ese umui lau bapatisoa ranu dekenai, to dohore inai tau ese umui do ia bapatisoa Lauma Helaga dekenai.’ ” (Mareko 1:7, 8) Ela bona unai nega, lauma helaga amo bapatisoa karana be lasi. Unai be lauma helaga gaukaralaia dalana matamatana; unai dala amo Iehova ese taunimanima do ia hahegaegaea, guba dekenai king dagidia do idia abia totona.
“Vara Lou”
3 Hanuaboi ta Farisea tauna badana ta ladana Nikodemo be Iesu dekenai ia lao hehuni, bena Iesu ese unai palani herevana ma ta ia hamaorolaia. Ia gwau: “Bema taunimanima ta be ia vara lou lasi, ia be Dirava ena Basileia do ia itaia diba lasi.” (Ioane 3:3) Nikodemo be Farisea tauna ta dainai Heberu Revarevadia ia tahua vadaeni, unai dainai Dirava ena Basileia sivaraina namona ia diba. Daniela ena buka ia gwau Dirava ese Basileia be tau ta do ia henia, iena “toana be taunimanima edia toana bamona,” bona “Ataiai Momokani Dirava ena helaga taudia” danu do ia henidia. (Daniela 7:13, 14, 27) Unai Basileia ese basileia iboudiai do ia “hamakohia, bona haorea momokani,” bena do ia gini ela bona hanaihanai. (Daniela 2:44) Reana Nikodemo ia laloa unai peroveta herevadia be Israela besena dekenai do idia momokani; to Iesu ia gwau, bema ta ia vara lou lasi, Dirava ena Basileia do ia itaia diba lasi. Nikodemo ena lalona ia parara lasi dainai, Iesu be ma ia gwau: “Taunimanima be ranu dekena amo bona Lauma Helaga dekena amo bema ia vara lasi, ia be Dirava ena Basileia lalonai do ia vareai diba lasi.”—Ioane 3:5.
4. Lauma helaga amo idia vara taudia be Iehova ena dahaka ai idia lao?
4 Ioane Bapatiso ese lauma helaga amo bapatisoa karana ia herevalaia guna, bena Iesu ese unai hereva ia habadaia unai, ia gwau ta be Basileia lalonai do ia vareai totona, lauma helaga amo do ia vara guna be namo. Unai dala idau hereana amo, goevadae lasi taudia, tatau bona hahine, be Iehova Dirava ena natuna ai idia lao. Baibel ia gwau: “[Iesu] idia abia dae taudia dekenai siahu ia henia, idia be Dirava ena natudia idia lao totona. Dirava ena natuna idia vara, be headava ena kara dekena amo idia vara bamona lasi, idia be tanobada tamana dekena amo idia vara lasi. Dirava sibona be idia edia Tamana.”—Ioane 1:12, 13; Roma 8:15.
Dirava Ena Natuna Taudia
5 Iesu ese Nikodemo ia do hereva henia lasi neganai, lauma helaga be Iesu latanai ia diho vadaeni, ia horoa, gabeai Dirava ena Basileia lalonai do ia pavapava totona, bona Dirava ese Iesu ia gwauraia hedinarai, ia be Iena Natuna. (Mataio 3:16, 17) Pentekoste 33 C.E. ai, Iehova ese lauma natuna ma haida ia havaradia. Hahediba taudia mai edia kamonai, Ierusalema dekenai atai daiutuna ta lalonai idia hebou taudia, be lauma helaga amo ia bapatisodia. Unai neganai lauma helaga amo idia vara lou, Dirava ena lauma natuna ai idia lao. (Kara 2:2-4, 38; Roma 8:15) Inai danu, lauma helaga amo ia horodia, gabeai edia ahuna be guba lalonai do idia abia totona, bona lauma helaga amo ena maka be idia latanai ia atoa, nega ginigunana; edia guba helarona hamomokania toana be unai.—2 Korinto 1:21, 22.
6. Iehova ena palani guba Basileiana dekenai be dahaka, bona dahaka dainai taunimanima be edia ahuna unai palani lalonai idia abia be maoro?
6 Goevadae lasi taudia, Dirava ese ia abia hidi Basileia lalonai do idia vareai taudia, ginigunadia be unai. Ia abidia hidi, do idia mase bena do idia toreisi lou murinai, guba Basileiana oreana lalonai do idia vareai; unai orea ese taunimanima bona aneru do ia lohiaia. Iehova ena palani be, unai Basileia amo iena ladana hereadaena do ia hahelagaia bona ena lohia siahuna do ia hamomokania, aneru bona taunimanima vairadiai. (Mataio 6:9, 10; Ioane 12:28) Taunimanima be edia ahuna unai Basileia lalonai idia abia be maoro! Gunaguna, Eden umana lalonai Satani ese Iehova ena lohia siahuna ia gwau-edeede henia matamaia neganai, taunimanima ia gaukaralaidia, bona hari inai negai Iehova ena palani be taunimanima do ia gaukaralaidia, unai gwau-edeede herevana haerelaia karana lalonai. (Genese 3:1-6; Ioane 8:44) Unai Basileia lalonai do idia lohia totona Dirava ese ia abia hidi taudia haida be aposetolo Petero ese ia tore henia, ia gwau: “Dirava, iseda Lohiabada Iesu Keriso ena Tamana do ita hanamoa bada. Iena bogahisihisi be bada herea. Ia ese Iesu Keriso mase dekena amo ia hatorea isi lou. Bona unai dainai ita be matamata vadaeni, ita vara lou. Vadaeni mauri korikori ena ura namona laloa ese iseda lalona ia hahonua. Dirava ese ita ia abia hidi, guba dekenai mauri do ita abia. Inai mauri ia noho hanaihanai, ia be goevagoeva, ia bodaga diba lasi. Inai mauri be guba dekenai umui totona ia noho hegaegae.”—1 Petero 1:3, 4.
7. Lauma helaga amo ia bapatisoa taudia sibodia mo be Iesu ena dahaka ai idia lao?
7 Dirava ese unai Keristani taudia ia abia hidi bona ena natuna ai ia halaodia dainai, idia be Iesu Keriso ena tadina ai idia lao. (Roma 8:16, 17; 9:4, 26; Heberu 2:11) Dirava ese Aberahamo dekenai ia gwauhamatalaia Garana, abidadama taudia do ia hanamodia tauna, be Iesu, unai dainai unai Keristani taudia, lauma amo ia horoa taudia, be unai Garana ena kahana ai idia lao, Iesu henunai. (Genese 22:17, 18; Galatia 3:16, 26, 29) Abidadama taudia ia hanamodia dalana be dahaka? Kara dika amo ia hamauridia, bena Dirava ese ia abidia dae, bona ena hesiai idia lao henia hari ela bona hanaihanai. (Mataio 4:23; 20:28; Ioane 3:16, 36; 1 Ioane 2:1, 2) Horoa Keristani taudia tanobada dekenai ese edia lauma kakana Iesu Keriso bona edia Tamana, Iehova Dirava, idia harorolaia, unai dala amo lalo-maoromaoro taudia idia hakaua lao unai hahenamo dekenai.—Kara 1:8; Heberu 13:15.
8. Dirava ese ena natuna, lauma amo ia havaraia taudia, ia ‘hahedinaraia,’ anina be dahaka?
8 Dirava ese lauma amo iena natuna ai ia halaoa taudia ‘hahedinaraia’ negana be Baibel ese ia gwauraia. (Roma 8:19) Basileia lalonai do idia vareai, king ai do idia lao Iesu ida, bena ia ida Satani ena tanobada oreana do idia hadikaia ore. Unai murinai, lagani 1,000 lalodiai, do idia durua, ena boubou ena hahenamo be taunimanima henidia totona; do idia hanamodia ela bona mauri goevadaena, Adamu ese ia haboioa gauna, do idia abia. (2 Tesalonika 1:8-10; Apokalupo 2:26, 27; 20:6; 22:1, 2) Do ia hahedinaraidia anina be unai. Abidadama taudia ese unai idia naria mai edia ura bada ida.
9. Baibel ese horoa Keristani taudia edia orea tanobada hegegemadai be edena bamona ia gwauraia?
9 Horoa Keristani taudia edia orea tanobada hegegemadai be “Dirava ena vara guna natuna taudia” edia ekalesia, “edia ladana be guba dekenai idia torea vadaeni.” (Heberu 12:23) Iesu ese ena boubou amo ia hanamoa taudia ginigunadia be idia. Idia be “Keriso ena tauanina”; unai ese ia hahedinaraia idia be edia bamodia ida bona Iesu ida idia lalo-tamona. (1 Korinto 12:27) Paulo ia gwau: “Keriso be tauanina tamona bamona, mai ena kahana momo. Inai tauanina ena kahana be momo, to ibounai be tauanina tamona sibona. Oibe, ita ibounai Lauma tamona lalonai ita idia bapatisoa, vadaeni tauanina tamona ita lao vadaeni. Ita be Iuda taudia, Iuda lasi taudia, idia guia taudia, bona ura kwalimu taudia. To Dirava ese ita ibounai dekenai Lauma tamona ia henia vadaeni, ia dekena amo ita inua totona.”—1 Korinto 12:12, 13; Roma 12:5; Efeso 1:22, 23; 3:6.
“Dirava Ena Israela”
10 Iesu be gwauhamata Mesiana bamona ia do mai lasi neganai, lagani 1,500 bona ma haida lalodiai, Israela besena be Iehova ena bese korikorina. Ena be ia hadibadia loulou, to idia badinaia lasi. Iesu ia hedinarai neganai, unai bese ese ia dadaraia. (Ioane 1:11) Unai dainai Iesu ese Iuda tomadiho gunalaia taudia ia hamaoroa, ia gwau: “Dirava ena Basileia be Dirava ese umui dekena amo do ia abia siri, bona Basileia ena huahua do ia havaraia besena dekenai do ia henia.” (Mataio 21:43) Unai “Basileia ena huahua do ia havaraia besena” ita diba be namo, hahemauri do ita abia totona.
10, 11. Aposetolo edia negai, dahaka dainai Israela matamatana ia vara be namo, bona daidia be unai bese matamatana lalonai?
11 Unai bese matamatana be horoa Keristani taudia edia ekalesia, Pentekoste 33 C.E. lalonai ia vara oreana. Unai orea taudia ginigunadia be Iuda taudia; idia be Iesu ena hahediba taudia, ia idia abia dae edia guba Pavapavana. (Kara 2:5, 32-36) To, idia be Dirava ena bese matamatana taudia ai idia lao, badina be Iuda besena lalonai idia vara dainai lasi, to Iesu idia abidadama henia dainai. Unai dainai Dirava ena Israela matamatana be idau vaitani—lauma besena ta unai. Iuda taudia momo ese Iesu idia dadaraia neganai, Samaria taudia ia boiria bena Idau Bese taudia ia boiria, unai bese matamatana lalonai do idia vareai. Idia gwauraia “Dirava ena Israela.”—Galatia 6:16.
12, 13. Edena bamona ia hedinarai Israela matamatana be Iuda tomadiho oreana ta mo lasi?
12 Israela gunana lalonai, Iuda lasi taudia be Iuda taudia ai idia halaoa neganai, idia haganidia Mose ena Taravatu do idia badinaia, bona unai ena toana hegeregerena tatau bona memero edia kopina do idia utua. (Esodo 12:48, 49) Iuda Keristani taudia haida idia laloa unai be mai anina Iuda lasi taudia dekenai, Dirava ena Israela lalonai. To Iehova ena lalohadai be idau. Lauma helaga ese aposetolo Petero ia hakaua lao Iuda Lasi tauna Korenelio ena ruma dekenai. Korenelio bona ena ruma taudia ese Petero ena hereva idia abia dae neganai, lauma helaga idia abia—ranu lalonai bapatiso idia do abia lasi neganai. Unai ese ese ia hahedinaraia goevagoeva, ena be Iehova ese unai Iuda Lasi taudia be Dirava ena Israela lalonai ia abia dae, to ia haganidia lasi Mose ena Taravatu do idia badinaia.—Kara 10:21-48.
13 Keristani taudia haida ese unai idia abia dae lasi dainai, nega daudau lasi aposetolo bona elda taudia Ierusalema dekenai ese idia herevalaia hebou. Lauma helaga be Iuda lasi kamonai taudia latadiai ia diho sivaraina be unai siahu taudia ese idia kamonai, bena Baibel idia tahua neganai, idia davaria unai ese Dirava ena amo peroveta herevadia ia hamomokania. (Isaia 55:5; Amosa 9:11, 12) Edia lalohadai maorona be inai: Iuda lasi Keristani taudia ese Mose ena Taravatu do idia badinaia lasi. (Kara 15:1, 6-29) Unai dainai, lauma Israelana be momokani bese matamatana ta; ia be Iuda tomadiho oreana ta mo lasi.
14. Iamesi ese Keristani ekalesiana ia gwauraia “iduhu 12 taudia, tano idauidau ai idia noho”; unai ena anina be dahaka?
14 Unai hegeregerena, hahediba tauna Iamesi ese unai horoa Keristani taudia ia tore henia neganai, ena revareva lalonai ia gwau ia tore henia taudia be ‘iduhu 12 taudia, tano idauidau ai idia noho.’ (Iamesi 1:1, NW; Apokalupo 7:3-8) To, momokani, Israela matamatana taudia be iduhu ta ta lalodiai idia atoa lasi. Israela besena gunana be mai ena iduhu 12, to lauma Israelana be unai bamona lasi. To, Iamesi ena hereva ese ia hahedinaraia, Iehova ena matana ai Dirava ena Israela ese Israela gunana ena iduhu 12 edia gabu ia abia vaitani. Israela besena lalonai ia vara tauna ta bema unai bese matamatana lalonai ia vareai—ena be ia be Iuda iduhuna tauna o Levi iduhuna tauna—to unai be herevana.—Galatia 3:28; Filipi 3:5, 6.
Gwauhamata Matamatana
15 Iehova ena matana ai, Israela lasi taudia unai bese matamatana lalonai be lauma Iuda taudia korikoridia! Aposetolo Paulo ia gwau: “Bema tau ta ia gwau ia be Iuda tauna, kopina utua kara ia karaia sibona dainai, ia be Iuda momokani lasi, bona iena kopina utua be tauanina gauna sibona. To tau ta be Iuda tauna korikori bema iena lalona dekenai ia be Iuda tauna. Iena kopina utua kara korikori danu be iena kudouna lalonai ia vara gauna, kopina gauna sibona lasi. Inai be taunimanima idia torea taravatuna badinaia gauna lasi. Lasi, inai be Dirava ena Lauma ese ia havaraia gauna. Oibe, inai bamona tauna, iena kudouna be Dirava ena, bona Dirava ese ia do ia hanamoa, to taunimanima ese sedira ia do idia hanamoa lasi.” (Roma 2:28, 29) Idau Bese taudia idia boiridia neganai, idia momo be Dirava ena Israela taudia ai idia lao, bona unai ese Baibel ena peroveta herevadia ia hamomokania. Unai hereva ta, peroveta tauna Hosea ese ia torea herevana, be inai: “Lauegu bese lasi taudia be do lau hereva henia, do lau gwau: ‘Umui be egu bese’; bona idia be do idia gwau: ‘Oi be egu Dirava.’ ”—Hosea 2:23, NW; Roma 11:25, 26.
15, 16. (a) Iehova ena matana ai, Iuda lasi taudia Dirava ena Israela lalonai be edena bamona? (b) Edena dala amo Israela matamatana ia haginia?
16 Lauma Israela taudia be Mose ena Taravatu gwauhamatana henunai idia noho lasi; vadaeni, edena dala amo idia be unai bese matamatana taudia ai idia lao? Iehova ese Iesu ena amo gwauhamata matamatana be unai lauma besena ida ia karaia. (Heberu 9:15) Nisan 14, 33 C.E. ai, Iesu ese ena mase laloa lou dalana ia hamatamaia neganai, paraoa bona uaina be aposetolo taudia 11 mai edia kamonai ia henidia, ia gwau uaina be “gwauhamata ena rara” ena toana. (Mataio 26:28, NW; Ieremia 31:31-34) Luka be ena sivarai lalonai ia gwau Iesu ia gwau uaina kapusina be “gwauhamata matamatana” ena toana. (Luka 22:20) Iesu ena hereva hegeregerena, Pentekoste dinana ai lauma helaga ia bubua bona Dirava ena Israela ia vara neganai, Dirava ese Basileia be Israela gunana amo ia kokia, bena bese matamatana, lauma gauna, ia henia. Israela gunana ena gabunai, unai bese matamatana be Iehova ena hesiai tauna ai ia lao; ia lalonai be ena witness taudia.—Isaia 43:10, 11.
“Ierusalema Matamatana”
17 Guba idia lao taudia do idia abia hairaina be dahaka bada! Guba dekenai do idia abia hahenamodia be Apokalupo bukana lalonai ita dibaia neganai, ita hoa bona ita moale bada! Apokalupo 4:4 ia gwau: “Helai gabudia ibounai 24 ese [Iehova ena] helai gabuna badana idia hagegea, bona badana taudia 24 be unai helai gabudia latanai idia helai. Dabua kurokuro idia karaia, bona edia kwaradia latanai be edia dagi toana, golo kwara gaudia, idia noho.” Unai badana taudia 24 be horoa Keristani taudia, idia toreisi lou bena Iehova ese idia dekenai ia gwauhamatalaia dagidia idia abia. Edia kwara gaudia bona edia terona be edia pavapava dagidia edia toana. Mani oi laloa, Iehova ena terona idia gegea ahu lalonai ena hesiai idia lao henia be hahenamo bada hereana idia dekenai!
17, 18. Horoa Keristani taudia ese do idia abia hairaina be Apokalupo bukana ese edena bamona ia gwauraia?
18 Apokalupo 14:1 ai, ita itadia lou: “Ma lau itaia, Mamoe ena Natuna be Siona Ororo dekenai ia gini. Ia danu be taunimanima 144,000 idia gini, iena ladana, bona iena Tamana ena ladana be edia baguna dekenai Dirava ese ia torea.” Ita itaia, unai horoa taudia edia momo be mai ena hetoana—idia be 144,000 mo. Idia be Iehova ese pavapava siahuna ia henia tauna, “Mamoe ena Natuna,” Iesu, ida idia gini hebou—unai ese ia hahedinaraia idia danu be pavapava. Bona idia be guba ena Siona Ororona dekenai. Tanobada ena Siona Ororona dekenai be Ierusalema, Israela pavapavadia edia hanua badana. Guba ena Siona Ororona be Iesu bona ia ida edia ahuna idia abia taudia edia dagi badadia edia toana. Idia be guba ena Ierusalema.—2 Sivarai 5:2; Salamo 2:6.
19, 20. (a) Horoa Keristani taudia be dahaka guba oreana lalonai do idia vareai? (b) Lagani hida lalodiai Iehova ese guba dekenai do idia noho taudia ia abia hidi?
19 Unai hegeregerena, horoa taudia, idia edia guba hairaina idia abia taudia, be idia gwauraidia “Ierusalema matamatana” danu. (Apokalupo 21:2) Guna, tanobada ena Ierusalema be “King badana ena hanua,” bona dubu helaga be unuseniai. (Mataio 5:35) Guba ena Ierusalema Matamatana be Basileia oreana; unai orea amo Pavapava Badana, Iehova, bona ia abia hidi Pavapavana, Iesu, be idia lohia. Unai orea taudia edia hahelaga gaukaradia dainai, hahenamo badadia be Iehova ena terona amo do idia aru lao, taunimanima hanamodia totona. (Apokalupo 21:10, 11; 22:1-5) Mata hanai ma ta lalonai Ioane ia kamonai, horoa taudia mai edia kamonai, idia toreisi lou vadaeni taudia, be idia gwauraidia ‘Mamoe ena Natuna ena adavana.’ Unai ese ia hahedinaraia idia be Iesu ida do idia hetura heheni namo herea, bona ia do idia kamonai henia mai edia ura ida! Mani oi laloa—idia ginigabena ese ena davana guba dekenai do ia abia neganai, unuseniai do idia moale bada herea! Bena “Mamoe ena Natuna ena headava” do idia karaia diba! Unai neganai unai pavapava oreana guba dekenai do ia guguru.—Apokalupo 19:6-8.
20 Oibe, unai orea taudia ese hahenamo hereadaedia do idia abia. Aposetolo Paulo ese ia gwauraidia, ia gwau: “Iseda hanua korikori be guba.” (Filipi 3:20) Kahirakahira lagani 2,000 lalodiai, Iehova ese ena lauma natuna taudia ia abia hidi bona ia hahegaegaea, guba lalonai edia ahuna do idia abia totona. Idia vara gaudia ese idia hahedinaraia unai abidia hidi bona hahegaegaedia gaukarana be kahirakahira do ia guguru. To Iesu ese mata hanai ma ta lalonai Ioane ia hadibaia unai murinai ma gau haida do idia vara; unai mata hanai be Apokalupo karoa 7 lalonai ia torea. Vadaeni, namona be Keristani taudia edia orea ma ta be stadi herevana gabena lalonai do ita herevalaia.
Oi Laloatao A?
◻ Guba do idia lao taudia be lauma helaga ese edena dala idauidau ai ia kara henidia?
◻ Horoa taudia be Iehova ena dahaka ai idia lao? bona Iesu ena dahaka ai idia lao?
◻ Baibel lalonai, horoa Keristani taudia edia ekalesia edena bamona idia gwauraia?
◻ Dirava ena Israela be edena dala amo ia haginia?
◻ Horoa Keristani taudia ese dahaka hahenamo guba lalonai do idia abidia?
3. Iesu ese Nikodemo be guba Basileiana ia hamaorolaia neganai, dahaka gau matamatadia ia gwauraia?
5. Edena negai hahediba taudia ginigunadia mai edia kamonai be lauma helaga amo ia bapatisoa, bona unai neganai dahaka danu be lauma helaga amo ia havaraia?
[Pictures on page 10]
Kahirakahira lagani 2,000 lalodiai, Iehova ese guba Basileiana lalonai do idia lohia taudia ia abia hidi