Dahaka Dainai Hereva Momokani Ita Tahua be Namo?

TOMADIHO oreadia momo idia gwau hereva momokani be idia dekenai, bona taunimanima dekenai idia henia toho mai edia lalo-goada ida. To, edia “hereva momokani” be idauidau momo, taunimanima hadaradaradia herevadia. Inai ese ia hamomokania, hereva momokani be mai anina idauidau taunimanima idauidau dekenai dainai, hereva momokani korikori be lasi, a? Lasi.

Ena buka ladana The Art of Thinking lalonai, Profesa V. R. Ruggiero ia gwau ia hoa, badina be lalo-parara taudia haida idia gwau hereva momokani korikori be lasi. Ma ia gwau: “Bema taunimanima ta ta iboudiai be sibodia edia hereva momokani idia haginia, ta ena lalohadai ese ma ta ena lalohadai ia hereaia lasi. Anina be idia ibounai idia hegeregere. Bona, bema lalohadai ta ese ma lalohadai ta ia hereaia lasi, hereva ta ita tahua ena anina be dahaka? Idaunegai gaudia dibaia totona tano geia karana ena namo be dahaka? Middle East dekenai taunimanima idia inai heheni karana ena badina tahua karana ena namo be dahaka? Kensa gorerena hanamoa muramurana tahua karana ena namo be dahaka? Hisiu tahudia karana ena namo be dahaka? Bema unai kara amo idia davaria haeredia haida ese ma haida idia hereaia, bona bema hereva momokani be idau, taunimanima ta ta edia lalohadai hegeregeredia lasi, vadaeni, unai negana sibona dekenai unai tahua karadia be mai anina.”

Gauna be, ta ia abia dae momokani lasi, hereva momokani be lasi. Hereva momokani korikori be lasi lalohadaina ia goadalaia tauna ese muramura, matematik, eiava siahu idauidau idia biagua taravatudia ia laloa neganai, do ia abia dae gau haida be momokani. Bema ita laloa guba padanai idia roho gaudia biagua taravatudia be momokani vaitani lasi, ita daika be peleini dekenai do ia gui? Ita hamomokania diba hereva momokanidia idia noho; idia be momo, bona idia dainai kara idauidau ita karaia.

Hereva Momokani Korikori be Lasi Lalohadaina Ena Davana

Taunimanima edia kara lalonai unai lalohadai ena kerere idia hedinarai, badina be unai bamona lalohadai ese edia kara momo ia hadikaia. The Encyclopedia Americana ia gwau: “Haida idia laloa taunimanima ese diba, eiava hereva momokani, idia abia dalana be lasi . . . To, hereva momokanina ta be inai: Bema taunimanima ese hereva momokani bona diba idia dadaraia badina be idia laloa tahudia karadia be anina lasi bona dika idia havaraia, unai neganai edia noho ia dika ia lao.”

Reana unai bamona dika oi itaia vadaeni. Hegeregere, Baibel ena hahediba herevadia ese idia hahedinaraia goevagoeva, heudahanai, sihari kava, bona unai bamona karadia be kerere, to hari inai negai taunimanima ta ta sibodia ese unai hereva idia hamomokania. Taunimanima momo edia lalohadai be inai: “Oi sibomu emu lalona oi hadaia dahaka be maoro oi totona.” Ta ia gwau diba lasi unai lalohadai ese dika ia havaraia lasi, ani? Tanobada hegegemadai, sihari kava ese ia havaraia goreredia, idia parara ruma besedia, bona idia rogorogo kava kekenidia ese unai idia hamomokania.

Hereva Momokani be Dahaka?

Vadaeni, unai lalohadai, ranu mirona bamona gauna, do ita rakatania, bona Baibel ese ia gwauraia ranuna goevana, hereva momokani ena, be nega sisina lalonai do ita tahua. (Ioane 4:14; Apokalupo 22:17) “Hereva momokani,” Baibel ese ia gwauraia gauna, be idau vaitani, tanobada ena aonega idia abia taudia ese idia hepapahuahulaia lalohadaina hegeregerena lasi.

Iesu ia gwau hereva momokani gwauraia hedinarai totona ia vara. Iuda taudia mai edia kamonai be lagani handred momo lalonai idia laloa bada gauna ia herevalaia unai. Nega daudau lalonai, edia revareva helagadia lalonai Iuda taudia ese idia duahia “hereva momokani” be gau korikorina ta, lalohadai ta sibona lasi. Baibel lalonai, “hereva momokani” be inai Heberu gado herevana “ʼemethʹ” ida idia hahegeregerea; ena anina be ia gini auka gauna, gau aukana, bona momokani gauna.

Iuda taudia ese hereva momokani be unai bamona idia laloa be mai badina namona. Edia Dirava, Iehova, be hereva “momokani ena Dirava” idia gwauraia. (Salamo 31:5) Badina be iena gwauhamata iboudiai ia hamomokania. Ena lauma amo ia havaraia peroveta herevadia ia hamomokania. Ena hahemaoro herevadia edia anina ia havaraia. Unai idia vara momokani gaudia be Israela taudia milioni milioni ese edia matadia amo idia itaia. Baibel torea taudia, lauma helaga ese ia hasiahua taudia, ese unai gau edia sivarai idia torea, ta ese ia hakoikoia diba lasi sivaraidia unai. Baibel be taunimanima ese idia gwauraia bukadia helagadia idaudia hegeregerena lasi; iena sivarai be gori lasi. Ena sivarai be momokani​—idaunegai sivaraidia, bona akioleji taudia ese idia davaria gaudia, bona saiens taudia ese idia davaria gaudia, bona taunimanima bogaragidiai idia vara gaudia ese ena sivarai idia hamomokania. Unai dainai salamo torea tauna ese Iehova be inai bamona ia hereva henia: “Oiemu taravatu be nega ibounai do ia momokani. . . . Oiemu taravatu ibounai be momokani. . . . Oiemu hereva ibounai edia anina be momokani”!​—Salamo 119:​142, 151, 160.

Iesu Keriso ese Iehova ia guriguri henia neganai, salamo torea tauna ena hereva ia gwauraia lou, ia gwau: “Oiemu hereva be hereva momokani.” (Ioane 17:17) Iesu ia diba ena Tamana ese ia gwauraia herevadia ibounai be haidaua diba lasi herevadia momokanidia. Unai hegeregerena, Iesu be “hereva momokani dekenai ia honu momokani.” (Ioane 1:14) Ia murinai idia raka taudia ese idia itaia gaudia amo idia diba ia gwauraia herevadia ibounai be momokani vaitani, bona idia haida ese buka lalonai unai idia torea, uru gabedia iboudiai hadibaia totona.a

To, Iesu ese Pilato ia hereva henia neganai, ia ese hereva momokanina tamona ia laloa, unai dainai ia gwau hereva momokani gwauraia hedinarai totona tanobada dekenai ia mai. Unai hereva amo Pilato ena henanadai ia haerelaia; ena henanadai be inai: “Oi be king ta, a?” (Ioane 18:37) Iesu be tanobada dekenai ia noho neganai, Dirava ena Basileia, bona Iesu ena King dagina unai Basileia lalonai, be ia hahedibalaia momo. (Luka 4:43) Iena hahediba herevadia​—Basileia ese Iehova ena ladana do ia hahelagaia, ena lohia siahuna do ia hamomokania, bona kamonai taudia be mauri hanaihanai mai moalena do ia henidia​—be “hereva momokani,” Keristani korikori taudia ibounai idia naria gauna. Dirava ena gwauhamata iboudiai hamomokania lalonai Iesu ena gaukara be mai anina bada, bona Iesu dainai Dirava ena peroveta herevadia ibounai be “Amen” ai idia lao, anina be idia momokani. Unai dainai Iesu be inai bamona ia hereva be maoro: “Dala be lau, hereva momokani be lau, mauri danu lau.”​—Ioane 14:6; 2 Korinto 1:20; Apokalupo 3:14.

Hari inai negai Keristani taudia ese unai hereva idia abia dae, ia be idia abidadama henia vaitani diba herevana momokanina; unai be mai anina bada idia dekenai. Anina be edia abidadama, Dirava idia abidadama henia karana, bona edia helaro, iena gwauhamata edia anina idia naria karana, be mai edia badina korikoridia.

Hereva Momokani Hegeregerena Idia Kara

Unai hegeregerena, Baibel ese ia hahedinaraia hereva momokani ese kara ia havaraia. (1 Samuela 12:24; 1 Ioane 3:18) Dirava idia gari henia Iuda taudia idia laloa hereva momokani be herevalaia kava gauna lasi; ia be mauri dalana ta. Heberu gado ai, “hereva momokani” ena anina ta be “abidadama,” bona ena hereva ia hamomokania dainai idia abidadama henia tauna be unai hereva amo idia gwauraia. Iesu ese ia murinai idia raka taudia ia hamaoroa idia danu ese hereva momokani be unai bamona do idia laloa be namo. Ia ese Farisea taudia edia koikoi ia gwauraia dika mai ena badu ida, badina be sibodia idia gwauraia maoro herevadia be idau bona edia kara dikadia be ma idau vaitani. Bona haheitalai namona ia hahedinaraia​—ia hadibaia herevadia momokanidia be ena mauri lalonai ia badinaia.

Namona be Keriso murinai idia raka taudia iboudiai danu be unai bamona idia karaia. Dirava ena Hereva momokani bona Iesu Keriso be Dirava ena Basileia lalonai ia lohia sivaraina namona, be mai anina bada herevadia idia dekenai; idia be hadibaia herevadia mo lasi. Unai hereva momokani ese ia hasiahudia dainai, kara idia karaia; edia mauri lalonai idia badinaia bona haida dekenai idia hadibaia. (Ieremia 20:9 itaia.) Aposetolo edia negai Keristani ekalesia taudia ese Keriso murinai idia raka lalonai idia badinaia dalana, be nega haida idia gwauraia “hereva momokani” eiava “hereva momokani ena dala.”​—2 Ioane 4; 3 Ioane 4, 8; 2 Petero 2:2.

Kohu Namo Hereana Ta

Momokani, ta ese Dirava ena Hereva momokanidia ia abia dae dainai, hekwarahi haida ia davaria danu. Gau ginigunana be inai: Ta ese hereva momokani ia dibaia neganai, unai ese ena lalona ia hahekwarahia diba. Buka ta ladana The Encyclopedia Americana ia gwau: “Momo ese hereva momokani idia ura henia lasi, badina be ia ese edia lalohadai aukadia eiava gori herevadia ia hamomokania lasi.” Ita abia dae herevadia edia koikoi be ta ese ia hahedinaraia neganai, unai ese iseda lalona ia hahisia diba, bona bema unai hereva be iseda tomadiho gunalaia taudia, ita abidadama henia taudia, ese ita idia hadibaia gaudia, unai ese iseda lalona ia hahisia bada. Reana haida idia gwau unai ia vara neganai, ia be hegeregere ta ese ia davaria, ena tamana sinana, ia abidadama henia taudia, be kara dika karaia hehuni taudia. Tomadiho ena hereva momokani ita davaria be namo, ita ia koia herevana ita badinaia noho be dika, ani? Hereva maorodia ita diba be namo, hereva koikoidia amo ita idia hakererea be dika, ani?b​—Ioane 8:32; Roma 3:4 itaia.

Gau iharuana be inai: Tomadiho ena hereva momokani hegeregerena bema ita noho, reana iseda turana gunadia haida ese ita do idia dadaraia. Hari inai negai taunimanima momo ese “Dirava ena hereva momokani idia negea, bona hereva koikoi idia abia dae” dainai, idia laloa Dirava ena Hereva momokani idia badinaia taudia be idia kava, bona nega haida idia dadaraidia.​—Roma 1:25; 1 Petero 4:4.

To hereva momokani abia totona, unai hekwarahi rua ita hekwarahilaia be herevana. Hereva momokani ita diba dainai, hereva koikoi, lalohadai kereredia, bona gari kava amo ita ia ruhaia. Bona hereva momokani hegeregerena ita noho neganai, ita ia hagoadaia, hisihisi idauidau do ita haheaukalaia totona. Dirava ena hereva momokani be mai ena badina namona bona ita abidadama henia momokani diba, bona ia ese helaro ia henia ita dekenai; unai helaro dainai, herevana dahaka hetoho ita davaria, to ita gini auka diba. Unai dainai aposetolo Paulo ia gwau, hereva momokani be beleta lababana, tuari taudia ese idia kwatua gauna aukana, bamona!​—Efeso 6:​13, 14.

Baibel ena aonega herevana ta be inai: “Hereva momokani do oi hoia mai, bona tau haida dekenai do oi hoia lao lasi. Aonega bona diba namona bona lalona kehoa, danu do oi hoia, do oi abia.” (Aonega Herevadia 23:23) Bema ta ia ura lasi hereva momokani do ia tahua badina be ia laloa ia be mai anina idauidau taunimanima idauidau dekenai, eiava ia laloa ia be lasi, ita ia hamoalea bada diba gauna ia reaia unai. Hereva momokani ita davaria anina be helaro ita davaria; ita dibaia bona ita ura henia, anina be guba bona tanobada ia havaraia Diravana bona ena Natuna, ia sibona ese ia havaraia Natuna tamona, ita dibadia bona ita ura henia; iseda mauri lalonai ita badinaia, anina be iseda mauri be mai anina bona iseda lalona idia hekwarahi lasi, harihari ela bona hanaihanai.​—Aonega Herevadia 2:​1-5; Sekaraia 8:19; Ioane 17:3.

[Footnotes]

[Box on page 6]

Hereva Momokani Ia Senisi A?

ENA buka ladana The Art of Thinking lalonai, V. R. Ruggiero be unai bamona ia henanadai. Ia haere, ia gwau, lasi. Ma ia gwau: “Reana nega haida toana be ia senisi, to ta ese ia tahua namonamo neganai ia davaria ia senisi lasi.”

Ia gwau: “Baibel ena buka ginigunana, Genese, torea karana mani oi laloa. Lagani handred momo lalonai Keristani taudia bona Iuda taudia idia abia dae tau tamona ese ia torea. Gabeai haida ese unai lalohadai idia hepapahuahulaia, bena lalohadai idauna idia abia dae; idia gwau tatau ima bamona ese Genese idia torea. Bena lagani ima lalonai Genese ena hereva idia tahua namonamo murinai, lagani 1981 lalonai idia gwau toana be . . . tau tamona ese ia torea, gunaguna idia laloa bamona.

“Genese torea karana herevana momokanina be ia senisi, a? Lasi. Iseda lalohadai sibona ia senisi. . . . Hereva momokani be iseda diba eiava iseda lalo-duhu ese ia senisia diba lasi.”

[Box on page 7]

Hereva Momokani Matauraia Karana

“HARI inai negai haida ese gau ta idia hamomokania lasi, to gau iboudiai edia kerere idia ‘hahedinaraia’ toho, badina be idia laloa tau ta lasi be mai ena momokani ida ia gwau diba, hereva momokani be ia dekenai o hereva ta be momokani. Hereva momokani matauraia karana be unai bamona lasi. Hereva momokani ia matauraia tauna ia diba hereva momokani davaria dalana ia noho, bona herevana edena negai eiava edena gabu ai ia hedinarai, to ia abia dae mai ena manau ida. Hereva momokani Diravana idia tomadiho henia taudia ese hereva momokani be unai bamona idia abia dae be namo; bona hereva momokani ia matauraia tauna ese ena dekena tauna ia kara henia bona ia hereva henia mai ena momokani ida. Ita itaia vadaeni hegeregerena, T[aravatu] G[unana] bona T[aravatu] M[atamatana] ruaosi ese unai lalohadai idia hamomokania.”​—The New International Dictionary of New Testament Theology, Volume 3, rau 901.

[Pictures on page 7]

Saiens taudia ese edia diba idia habadaia, badina be saiens ena hereva momokani idia davaria

[Picture on page 8]

Hereva momokani lalonai be Basileia bona ena hahenamo herevadia