Ma Haida Durudia Dirava Ena Ura Idia Diba Totona
“Do lau karaia be Dirava ese ia oda vadaeni. Bema Sivarai Namona lau harorolaia lasi neganai, madi, lau be dika momokani!”—1 KORINTO 9:16.
1, 2. (a) Iehova ia ura edena gaukara mai ena kahana rua ita karaia? (b) Kudou-maoro taudia be Dirava ena Basileia henunai idia noho totona, namona be dahaka idia diba?
IEHOVA be mai ena sivarai namona taunimanima iboudiai totona. Ia be mai ena Basileia, bona ia ura gabu iboudiai dekenai taunimanima ese unai Basileia ena sivarai do idia kamonai! Unai sivarai namona ita diba vadaeni murinai, Dirava ia ura ma haida dekenai do ita gwauraia. Inai be kahana rua gaukarana. Ginigunana be, Dirava ena Basileia sivaraina namona do ita harorolaia. Iesu ese “tanobada dokona” ia perovetalaia neganai, ia gwau: “Basileia ena Sivarai Namona be tanobada ibounai dekenai do idia harorolaia. Vadaeni unai murinai, dokona be do ia ginidae.”—Mataio 24:3, 14.
2 Gaukara ena kahana iharuana be unai Basileia harorolaia karana idia abia dae taudia hadibaia. Iesu ia toreisi lou murinai, ia ese ena hahediba taudia edia orea badana ta ia hamaorodia, ia gwau: “Unai dainai do umui lao, bese ibounai be diba tahua taudia do umui halaoa, bona Tamana, Natuna, bona Lauma Helaga ena ladanai do umui bapatiso henia idia dekenai. Bona idia dekenai do umui hadibaia, umui dekenai lau henia hereva ibounai be do idia badinaia. Bona do umui kamonai bona laloa noho, lau be hanaihanai umui danu ita noho ela bona tanobada dokona.” (Mataio 28:19, 20) ‘Iesu ese ia henia hereva’ be iena amo lasi; ma haida ia hadibaia Dirava ena hahegani, o ura, do idia badinaia. (Ioane 14:23, 24; 15:10) Ma haida ita hadibaia ‘Keriso ia henia hereva do idia badinaia’ ena anina be ita durudia Dirava ena ura do idia diba. Lalo-momokani taudia ese Dirava ena ura karadia idia karaia be namo iena Basileia henunai idia noho totona.
3. Dirava ena Basileia be dahaka, bona dahaka do ia karaia dainai Basileia sivaraina be sivarai namona?
3 Dirava ena Basileia be dahaka? Dahaka do ia havaraia dainai Basileia sivaraina be sivarai namona? Dirava ena Basileia be guba gavamanina ta. Iehova ese ia laloa bada, badina be ia amo ia ese sibona ena ladana do ia hahelagaia, bona ena ladana hadikaia gaudia iboudiai do ia kokia. Unai Basileia be Iehova ese do ia gaukaralaia iena ura be tanobada dekenai do idia karaia, guba dekenai idia karaia hegeregerena. Unai dainai Iesu ese ita ia hadibaia Dirava ena Basileia ena mai do ita gurigurilaia bona do ita tahua guna iseda mauri lalonai. (Mataio 6:9, 10, 33) Vadaeni, umui diba dahaka dainai Iehova ia ura ena Basileia herevana ma haida dekenai do ita herevalaia, a?
Gaukara Badana ta to Maduna Metauna Lasi
4. Dahaka haheitalai amo ita hahedinaraia diba iseda sivarai namona harorolaia gaukarana be maduna metauna ta lasi?
4 Inai sivarai namona ita harorolaia be maduna metauna, a? Lasi vaitani! Haheitalai ta be inai: Tamana ta ese ruma bese taudia tauanina dalanai ia naridia be iena maduna korikorina. Unai ia karaia lasi be Keristani abidadama ia dadaraia hegeregerena. Aposetolo Paulo ia gwau: “Bema tau ta ese iena varavara ia naria lasi, o iena ruma taudia ia ubua lasi neganai, ia ese iena abidadama Keriso dekenai ia negea vadaeni. Iena dika ese abidadama lasi murimuri tauna ena dika ia hanaia vadaeni.” (1 Timoteo 5:8) Unai be maduna metauna Keristani tauna dekenai, a? Bema ena famili ia lalokau henia unai be maduna metauna, badina be unai neganai do ia ura idia ia naria.
5. Ena be haroro bona hahediba taudia halaoa gaukarana be maduna ta, dahaka dainai karaia totona ita moale be namo?
5 Unai hegeregerena, haroro bona hahediba taudia halaoa gaukarana be iseda maduna ta, Dirava ena ura ta, bona iseda mauri dekenai ia be mai anina bada. Paulo ese inai bamona ia herevalaia: “Do lau karaia be Dirava ese ia oda vadaeni. Bema Sivarai Namona lau harorolaia lasi neganai, madi, lau be dika momokani!” (1 Korinto 9:16; Esekiela 33:7-9 itaia.) To, iseda haroro ena badina korikori be lalokau, ia be maduna laloa karana sibona lasi. Dirava ita lalokau henia guna, to iseda dekena taudia ita lalokau henidia danu, bona ita diba sivarai namona do idia kamonai be gau badana. (Mataio 22:37-39) Idia dekenai nega vaira ena helaro namona ia henia. Kahirakahira Dirava ena Basileia ese kerere do ia hamaoromaoroa, haida hahisia karadia ibounai do ia haorea, bona maino bona lalo-tamona do ia havaraia—ena kara maoromaoro lohia siahuna henunai idia noho taudia do ia hanamodia ela bona hanaihanai. Ita moale dikadika unai sivarai namona be ma haida dekenai ita gwauraia diba dainai, ani?—Salamo 110:3.
6. Dahaka dainai haroro bona hahediba taudia halaoa gaukarana be mai ena hekwarahi danu?
6 To unai haroro bona hahediba taudia halaoa gaukarana be mai ena hekwarahi danu. Taunimanima be idauidau. Edia ura gaudia bona edia diba be idauidau, tamona lasi. Idia haida idia sikuli namonamo, to haida idia sikuli namonamo lasi. Duahiduahi—guna momo ese idia ura henia karana ta—be hari idia ura henia lasi gaukara aukana bamona. Aliteracy, anina be “ta ia duahiduahi diba to ia ura lasi ia karaia karana,” be hari ia bada noho hekwakwanaina ta, idia duahiduahi diba taudia momo herea idia noho tanodia ai danu. Vadaeni, unai bamona taudia mai edia mauri daladia bona ura idauidau be edena bamona ita durudia diba Dirava ena ura idia dibaia totona?—1 Korinto 9:20-23 itaia.
Hegaegae Namonamo Ma Haida Durua Totona
7. ‘Hesiai tauna mai ena kamonai bona kara maoromaoro’ be ita dekenai dahaka ia henia, haida ita durua Dirava ena ura karadia idia diba totona?
7 Gaukara ta mai ena hekwarahi oi karaia be auka momokani lasi bema oi be mai emu tulu bona gaukara gaudia maorodia. Gaukara ta karaia totona tulu ta hari ita gaukaralaia maoro be reana kerukeru do ita hanamoa eiava haidaua, badina be gaukara hagugurua dalana ia idau dainai. Dirava ena Basileia sivaraina ita harorolaia gaukarana danu be unai bamona. Lagani idia lao lalonai, “hesiai tauna mai ena kamonai, bona mai ena kara maoromaoro” ese tulu maorodia ia henia, Baibel stadi karaia neganai do ita gaukaralaia bukadia ia hegaegaelaia unai. (Mataio 24:45) Unai dainai ita be ita hegaegae “bese idauidau, iduhu idauidau, . . . bona gado idauidau” taudia ita durua Dirava ena ura idia dibaia totona. (Apokalupo 7:9) Nega ia heau lalonai, gaukara gaudia matamatadia ita abia tanobada ai gaukara do ita hagugurua dalana ia idau ia lao hegeregerena. Haheitalai haida mani ita laloa.
8. (a) “Let God Be True” bukana ese dahaka ia havaraia Baibel edukeisini habadaia karana ai? (b) Baibel stadi gaukarana lalonai lagani 1968 ai edena gaukara gauna idia abia, bona dahaka totona idia hegaegaelaia? (c) Hereva Momokani bukana ese hahediba taudia halaoa gaukarana be edena bamona ia durua?
8 Lagani 1946 ia lao 1968 lalonai, “Let God Be True” be gaukara gauna mai siahuna Baibel hadibaia gaukarana dekenai, bona gado 54 ai kopi 19,250,000 bamona idia halasia. Lagani 1968 ai idia halasia bukana, Mauri ia Lao Henia Hereva Momokanina be lagani momo lalonai anina havaraia dalana ai idia gaukaralaia kamonai taudia ida Baibel stadilaia totona. Guna, haida be Iehova ena Witness taudia ida lagani ta ta idia hanaia lalonai idia stadi to bapatiso idia abia lasi, bona unai ia vara momo. To unai buka idia karaia stiuden ena lalona do ia hagoadaia ia dibaia gaudia do ia badinaia. Unai dainai dahaka ia vara? Jehovah’s Witnesses—Proclaimers of God’s Kingdom bukana ia gwau: “Hesiai laganidia toi, September 1, 1968, amo ia lao August 31, 1971, lalonai taunimanima 434,906 idia bapatiso—nega rua amo hesiai lagani gunadia toiosi lalonai idia bapatiso taudia edia namba ia hanaia!” Idia halasia negana amo, Hereva Momokani bukadia momo herea momokani idia hariharilaia vadaeni—107,000,000 ia hanaia, gado 117 dekenai.
9. Mauri Hanaihanai bukana ese dahaka gau idauna ia hahedinaraia, bona ena anina be dahaka Basileia harorolaia taudia dekenai?
9 Lagani 1982 ai Mauri Hanaihanai Paradaiso Lalonai bukana be Baibel stadi karaia neganai idia gaukaralaia momo bukana. Unai tulu be mai ena laulau 150 ia hanaia, bona idia ta ta be mai edia hereva namodia kwadogidia, ia hadibaia lalohadai badana hahedinaraia totona. October 1982 ena Iseda Basileia Gaukara pepana (English gado gauna) ia gwau: “Lagani 20 bamona lalonai ‘Let God Be True’ be iseda stadi bukana badana neganai (lagani 1946 ia lao lagani 1960 huanai), Basileia harorolaia taudia matamatadia 1,000,000 be iseda orea lalonai idia vareai. Bena ma pablisa 1,000,000 idia vareai, Mauri ia Lao Henia Hereva Momokanina bukana be lagani 1968 ai idia halasia murinai. Inai stadi buka matamatana, Mauri Hanaihanai Paradaiso Lalonai, ita gaukaralaia neganai, iseda orea lalonai Basileia harorolaia taudia be unai bamona do idia momo daekau, a? Oibe, bema unai be Iehova ena ura!” Momokani unai be Iehova ena ura, badina lagani 1982 ia lao lagani 1995, Basileia harorolaia taudia 2,700,000 mai kahana be orea lalonai idia vareai!
10. Dahaka tulu matamatana be lagani 1995 ai idia henia, bona dahaka dainai Baibel stiuden taudia do ia durua lauma dalana ai idia goada haraga totona?
10 Iesu ia gwau: “Uiti ena anina abia negana ia ginidae vadaeni, to utua taudia be momo lasi.” (Mataio 9:37) Momokani gogoa gaukarana be bada herea. Gaukara bada ia do noho. Tano haida dekenai taunimanima be Baibel stadi idia abia gwauraia taudia edia lista ai edia ladana idia torea bona idia naria. Unai dainai Dirava ena diba halasia haraga totona, lagani 1995 ai ‘hesiai tauna mai ena kamonai bona kara maoromaoro’ ese tulu matamata ta idia henia, rau 192 bukana Diba ese Mauri Dekenai Ita Ia Hakaua Lao unai. Inai gaukara gauna be hahediba hereva koikoidia ia herevalaia badabada lasi. Baibel ena hereva momokani be do idia laloa maoromaoro dalana ai ia herevalaia. Aiemai ura be Baibel stiuden do ia durudia lauma dalanai idia goada haraga totona. Diba bukana be tanobada ena gabu momo herea lalonai idia gaukaralaia noho; kopi ibounai 45,500,000 idia printaia gado 125 ai bona ma gado 21 ai idia hahanaia noho.
11. Dahaka tulu namona idia henia, duahiduahi diba lasi bona duahiduahi namonamo lasi taudia durua totona, bona tanobada hegegemadai iseda hahediba gaukarana ai edena dala ai anina bada herea ia havaraia?
11 Nega ta ta ai, “hesiai tauna mai ena kamonai” be tulu ta ia henia, taunimanima orea ta durua totona idia karaia. Hegeregere, sene mauri daladia eiava tomadiho dainai dala idauna ta ai heduru do idia abia taudia be edena bamona? Edena bamona ita durudia diba Dirava ena ura karadia idia diba totona? Lagani 1982 ai unai durua gauna korikori ita abia—rau 32 buklet Mauri Hanaihanai Tanobada Dekenai Oi Abia! Unai laulau amo ia honu buklet be anina bada ia havaraia tulu namona, duahiduahi diba lasi eiava duahiduahi namonamo lasi taudia idia hadibaia neganai. Auka lasi bona lalo-parara haraga dalana ai Baibel ena hahediba herevadia ia hahedinaraia. Idia halasia negana amo, Mauri Hanaihanai buklet be tanobada hegegemadai hahediba gaukarana ai idia gaukaralaia gauna badana ta. Kopi 105,100,000 mai kahana idia printaia gado 239 ai, unai dainai ia be hari Watch Tower Society ese gado momo herea ai ia halasia gauna!
12, 13. (a) Lagani 1990 amo, “hesiai tauna mai ena kamonai” ia henia gauna be dahaka dala matamatana amo taunimanima momo ia hadibaia? (b) Society ena vidio be haroro gaukarana ai edena bamona ita gaukaralaia diba? (c) Dahaka tulu matamatana be vanegai idia henia iseda hahediba taudia halaoa gaukarana durua totona?
12 Idia printaia bukadia idia halasia, to danu lagani 1990 amo ia matamaia “hesiai tauna mai ena kamonai” ese hadibaia gauna ma ta ita ia henia, unai dala matamatana amo taunimanima momo be diba idia abia—vidio kaset unai. Unai lagani October ai, miniti 55 ia heau vidio kaset ladana Jehovah’s Witnesses—The Organization Behind the Name idia halasia—Watch Tower Society ese ia halasia vidio kaset ginigunana. Unai vidio mai ena hairai, bona gau idauidau ia hahedinaraia gauna, be gado 35 ai idia halasia. Unai vidio ese ia hahedinaraia Iehova ena tanobada hegegemadai oreana taudia mai edia kamonai be Iesu ena hahegani idia badinaia noho, tanobada ibounai dekenai sivarai namona idia harorolaia. Unai vidio idia karaia iseda hahediba taudia halaoa gaukarana durua totona. Basileia harorolaia taudia idia naria lasi to unai tulu be maoromaoro edia haroro gaukarana ai idia gaukaralaia. Haida ese edia buka baege lalonai idia abia loaloa, kamonai taudia dekenai do idia hahedinaraia totona eiava idia henia bena gabeai idia abia. Idia halasia bena daudau lasi murinai, vadivadi loaloa elda tauna ta be inai ia torea: “Vidio be iseda nega lalonai taunimanima milioni momo edia lalona bona kudouna hamarerea dalana ta, unai dainai iseda ura be inai vidio ginigunana sibona murinai Society ese ma haida do ia karaia bona gaukaralaia tanobada hegegemadai Basileia gaukarana habadaia totona.” Momokani, ma vidio haida ita abia, bona idia haida be kahana toi gauna The Bible—A Book of Fact and Prophecy bona Jehovah’s Witnesses Stand Firm Against Nazi Assault. Bema Society ena vidio be emui gado ai oi abia diba, haroro gaukara ai oi gaukaralaia vadaeni, a?a
13 Vanegai, tulu matamatana ta, Dirava Ia Ura Dahaka Ita Karaia? buklet, idia halasia hahediba taudia halaoa gaukarana ai ita ia durua totona. Dahaka dainai idia halasia? Edena bamona ita gaukaralaia diba?
Tulu Matamatana ta Ita Laloa
14, 15. Dahaka Ita Karaia? buklet be daika totona idia karaia, bona ia lalonai be dahaka ia noho?
14 Inai buklet matamatana Dirava Ia Ura Dahaka Ita Karaia? idia karaia Dirava idia abia dae bona Baibel idia laloa bada taudia totona. Distrik bona sekit naria taudia bona Gilead misinari taudia, lagani momo lalonai idia do goada lasi tanodia ai idia gaukara taudia, idia heduru inai buklet idia hegaegaelaia neganai. Ia be stadi kosi kwadogina ta, Baibel ena hahediba hereva badadia ia herevalaia. Idia torea herevadia be namo, auka lasi, bona kwadogi. To danu, ena hereva ibounai idia hamanokaia kava lasi. Ia be Dirava ena Hereva amo “rata” sibona ia henia lasi to “aniani korikori” ia henia danu, taunimanima momo ese do idia lalo-pararalaia dalana ai.—Heberu 5:12-14.
15 Basileia harorolaia taudia tano momo dekenai ese idia noia buklet korikorina. Hegeregere, Watch Tower Society ena brens opesi Papua New Guinea dekenai be inai bamona idia torea: “Taunimanima be tomadiho edia hahediba hereva idauidau dainai idia daradara. Do idia durua gauna be hereva momokani kwadogidia, Baibel siridia haida ese idia hamomokania bona sibodia edia Baibel lalonai unai idia hamomokania diba. Namona be idia dekenai do ia hedinarai namonamo bona goevagoeva Dirava ena ura Keristani momokani taudia dekenai be dahaka bona edena kastom bona kara idauidau be ia ese ia abia dae lasi.” Dahaka Ita Karaia? buklet be unai bamona taudia durua gauna korikorina, Dirava ena ura do idia dibaia totona.
16. (a) Edena bamona taudia be buklet matamatana ena auka lasi herevadia amo heduru idia abia diba? (b) Oiemu noho gabuna taudia be Dahaka Ita Karaia? buklet amo edena bamona heduru do idia abia diba?
16 Inai buklet be edena bamona do oi gaukaralaia? Dala ginigunana be, idia duahiduahi namonamo diba lasi taudia eiava idia ura lasi idia duahiduahi momo taudia ida stadi oi karaia diba.b Unai bamona taudia be buklet lalonai idia noho auka lasi herevadia ese do ia durudia. Watch Tower ena brens ofesi haida be buklet ena kopi ginigunadia idia itaia murinai, inai idia torea: “Inai buklet be inai tano ena kahana momo ai do ai gaukaralaia badabada, taunimanima idia ura lasi idia duahiduahi momo gabudia unai.” (Brazil) “Tano ma ta amo idia hanaia mai taudia momo be edia gado idia duahia diba lasi bona French gado idia duahia namonamo lasi. Inai buklet ai gaukaralaia diba unai bamona taudia ida ai stadi totona.” (France) Dahaka Ita Karaia? buklet amo heduru do idia abia diba taudia haida emu gabu dekenai oi laloa diba, a?
17. Edena dala ai buklet do idia gaukaralaia badabada tano momo ai, bona dahaka dainai?
17 Dala iharuana be, tano momo dekenai inai buklet be reana do idia gaukaralaia diba Dirava gari henia taudia ida Baibel stadi hamatamaia totona, herevana edia edukeisini ia bada eiava ia maragi. Momokani, namona be stadi be Diba ese Mauri Dekenai Ita Ia Hakaua Lao bukana ai do ita hamatamaia toho. To taunimanima haida dekenai, reana namona be stadi be inai buklet amo do ita hamatamaia. Bena nega maorona ai, unai ita rakatania bena Diba bukana, ita gwauraia hidi stadi bukana, amo idia do ita stadi henia. Watch Tower ena brens opesi haida be Dahaka Ita Karaia? buklet gaukaralaia dalana dekenai inai idia torea: “Baibel stadi hamatamaia be auka, bona toana be pablisa ese stadi hamatamaia dalana ia kehoa, buklet amo ia hamatamaia neganai.” (Germany) “Inai bamona buklet be Baibel stadi matamatadia hamatamaia karana ai anina bada do ia havaraia, bena unai stadi be Diba bukana amo do idia karaia noho diba.” (Italy) “Ena be Japan taudia be edukeisini bada idia abia taudia, to idia momo herea be Baibel bona ena hahediba herevadia dekenai edia diba be maragi momokani. Inai buklet ese idia do ia durua namo herea, bena Diba bukana dekenai do idia hanaia lao.”—Japan.
18. Dirava ena ura karadia ita badinaia lalonai dahaka do ita laloatao?
18 Society ena brens opesi tanobada hegegemadai be inai buklet idia ura, bona gwaumaoro idia abia gado 221 dekenai do idia hahanaia. Namona be inai buklet ese taunimanima ma haida ia durua Iehova Dirava ena ura karadia idia diba totona. Iseda kahana be inai: Namona be ita laloatao Dirava ena ura karadia, haroro bona hahediba halaoa haheganina danu, ita badinaia be dala namo hereana Iehova dekenai ita hahedinaraia ia ita lalokau henia. Oibe, Dirava ia ura dahaka ita karaia be maduna metauna lasi. Unai be mauri dalana hereadaena!—Salamo 19:7-11.
[Footnotes]
a Jehovah’s Witnesses—Proclaimers of God’s Kingdom ia gwau: “Vidio kaset be idia printaia bukadia eiava ta haroro henia karana edia gabu do ia abia lasi. Society ena buka ese sivarai namona halasia gaukarana ai kahana badana do idia hagugurua. Iehova ena Witness taudia edia ruma-ta-ruma-ta gaukarana be do idia karaia noho haroro dalana, Baibel ese ia hamomokania vaitani. To, vidio kaset be unai gaukara durua gaudia, bona tulu hegeregerena Iehova ena gwauhamata namodia abidadama henia karana ia havaraia bona iseda nega lalonai ia karaia noho karadia laloa bada karana ia habadaia.”
b Dahaka Ita Karaia? buklet amo edena bamona stadi oi karaia herevadia totona, inai magasin ena rau 16-17 ai hereva ladana “Tulu Matamatana ta Taunimanima Durua Bena Dirava Ena Ura Idia Diba Totona,” oi itaia.
Oi Herevalaia Diba A?
◻ Iehova ia ura iena hesiai taudia be edena kahana rua gaukarana idia karaia?
◻ Dahaka dainai iseda haroro bona hahediba taudia halaoa gaukarana be maduna metauna ta lasi ita dekenai?
◻ ‘Hesiai tauna mai ena kamonai bona kara maoromaoro’ be dahaka tulu idia henia hahediba taudia halaoa gaukarana ai ita gaukaralaia totona?
◻ Dahaka Ita Karaia? buklet be daika daika totona idia karaia, bona haroro gaukarana ai edena bamona ita gaukaralaia diba?
[Picture on page 24]
Iseda haroro bona hahediba taudia halaoa gaukarana be maduna metauna lasi
[Picture on page 26]
“Let God Be True” (1946, 1952 idia karaia lou): Kopi 19,250,000 gado 54 ai
“Mauri ia Lao Henia Hereva Momokanina” (1968): Kopi 107,000,000 gado 117 ai (France gado gauna ena laulau)
“Mauri Hanaihanai Paradaiso Lalonai” (1982): Kopi 80,900,000 gado 130 ai (Russia gado gauna ena laulau)
“Diba ese Mauri Dekenai Ita Ia Hakaua Lao” (1995): Kopi 45,500,000 gado 125 ai (Germany gado gauna ena laulau)