Basileia Harorolaia Ripoti

Hereva Momokani be Iboudiai Dekenai Idia Harorolaia

APOSETOLO Paulo ese Dirava ena Basileia ia harorolaia goadagoada. Ena be haida ese idia koua toho, to Dirava ena hahegani hegeregerena “Sivarai Namona” ia harorolaia noho. (1  Korinto 9:​16; Kara 13:50-​52) Paulo ese haida ia hamaorodia iena kara do idia tohotohoa be namo.​—⁠1 Korinto 11:1.

Tanobada ibounai lalonai taunimanima idia diba Iehova ena Witness taudia idia haroro goadagoada. Momokani, “nega namodia” bona “nega dikadia” ai danu, haida idia hereva henia, Dirava ese idia ia henia gaukarana, ‘taunimanima be diba tahua taudia ai idia halaoa’ gaukarana, hagugurua totona. (2 Timoteo 4:2; Mataio 28:19, 20) Haida ese idia koudia toho tanodia ai danu, Dirava ena Basileia sivaraina mai anina bada be lalo-momokani taudia dekenai idia abia lao, inai ekspiriens ese idia hahedinaraia hegeregerena.

◻ Pacific ena west kahana ena motumotu ta dekenai Iehova ena Witness taudia edia gaukara idia taravatua. Unuseniai lagani 12 merona ta ese ia davaria ena bamona sikuli dekenai edia kara be dika. Idia momo be kuku idia ania, kara bodaga sivaraidia idia duahia, tisa idia dagedage henidia, bona idia heatu. Unai dika ia bada ia lao, bena unai mero ese ena tamana ia noia sikuli ma ta dekenai do ia hanai lao. To ena tamana ese ia hamaoroa unai bamona do ia kara be namo lasi, badina be ia laloa kahirakahira idia noho sikulidia dekenai memero edia kara be idau lasi. To, ia ese ena natuna be edena bamona do ia durua?

Tamana ia laloatao buka ta, memero kekeni edia, be ruma lalonai. Iena varavarana ta, Iehova ena Witness tauna, ese ia henia gauna unai. Unai dainai buka ia tahua, bena ia davaria neganai, ena natuna ia henia. Ena ladana be Memero Kekeni Edia Henanadai​—⁠Haere Maorodia.a Mero ia davaria, karoa ta ladana “Egu Bamodia Edia Lalo-Ani be Edena Bamona Do Lau Haheaukalaia Diba?” ese ia durua bada. Ia hadibaia do ia hemarailaia karadia do ia karaia lasi be gau badana, bona haida edia lalo-ani dikana dadaraia dalana ia hadibaia danu. Unai mero ese Baibel ena hakaua herevadia, buka lalonai ia davaria gaudia, ia badinaia dainai, ena bamona edia lalo-ani ia dadaraia diba.

Iena tamana ese ia itaia ena kara be unai bamona bona ma dala haida ai ia hanamoa, unai dainai ena lalona ia hadaia buka do ia duahia. Buka ena sisiba namona ia hoalaia dainai, Iehova ena Witness taudia ia noia, ena ruma ai Baibel stadi do ia abia. Gabeai ena famili taudia ma haida danu idia stadi. Unai dainai dahaka ia vara? Hari inai negai unai mero, bona iena tadina, iena tamana, bona ena tubuna rua danu be Iehova ena Witness taudia.

◻ Unai tano tamona ai, Iehova ena Witness taudia rua idia hadiburaia, Baibel ena hereva idia badinaia namonamo dainai. To ia vara gauna ese idia ia koua lasi, Dirava ena Basileia idia harorolaia noho mai edia goada ida. Dibura rumana naria tauna ta idia noia Lohiabada ena Adorahi Anibouna be unuseniai do idia karaia, bena gwaumaoro ia henia. Idia moale bada, badina be dibura taudia 14 idia gwau Baibel idia ura henia, bona unai hebou mai anina bada dekenai idia ida idia hebou dainai! Idia ruhadia murinai, idia haida be Baibel idia stadilaia noho bona Iehova ena Witness taudia idia bamoa noho.

Tano 25 bona ma haida ai, Iehova ena Witness taudia be hisihisi idia ania, badina be edia gaukara idia taravatua o idia koudia toho, o idia dagedage henidia dainai. To, aposetolo taudia hegeregerena, “Iesu Keriso ena Sivarai Namona idia gwauraia noho. Inai gaukara idia hadokoa lasi.”​—⁠Kara 5:​42.

[Footnotes]