“Dirava ese Unai Bamona Ita Ia Lalokau Henia”
“Dirava ese unai bamona ita ia lalokau henia dainai, namona be
ita ta ta dekenai do ita lalokau henia, ani?”—1 IOANE 4:11.
SUNDAY, March 23, 1997 ai, dina do ia diho murinai, tanobada ibounai lalonai taunimanima 13,000,000 mai kahana be Kingdom Hall bona Iehova ena Witness taudia edia hebou gabudia ma haida dekenai do idia hebou. Badina be dahaka? Badina be Dirava ese taunimanima ia lalokau henidia karana bada hereana ena mamina be edia lalona ai idia abia dainai. Iesu Keriso ese unai kara, Dirava ena lalokau ia hahedinaraia karana hereadaena, ia herevalaia, ia gwau: “Dirava ese inai tanobada ia lalokau henia bada dainai, iena Natuna tamona sibona ia vara, ia henia vadaeni ita dekenai, do idia abidadama henia taudia ibounai be do idia mase lasi, to mauri hanaihanai do idia abia.”—Ioane 3:16.
2 Dirava ese ia hahedinaraia lalokauna do ita laloa neganai, namona be ita sibona eda lalona ai do ita henanadai, ita gwau, ‘Lau be momokani Dirava ese ia karaia karana lau laloa bada, a? Egu mauri lau gaukaralaia dalana ese unai ia hahedinaraia, eiava?’
“Dirava be Lalokau”
3 Lalokau hahedinaraia be kara idauna lasi Dirava dekenai, badina be “Dirava be lalokau.” (1 Ioane 4:8) Lalokau be iena kara korikori badana. Tanobada be taunimanima ese do idia noholaia totona ia hegaegaelaia neganai, ororo ia hadaedia bona ranu be gohu bona davara ai ia haboua neganai, ena siahu ia hahedinaraia badabada. (Genese 1:9, 10) Dirava ese ranu bona hodahoda gaukaralaia loulou daladia ia havaraia neganai, bona mauri gaudia maragimaragidia momo herea bona tubutubu gaudia idauidau, tano ena anina be taunimanima edia aniani ai do idia halaoa gaudia, ia havaraia neganai, bona iseda tauanina edia hemami gaudia be tanobada ena dina bona hua edia lata ida ia hahegeregeredia neganai, unai ese ena aonega bada hereana ia hahedinaraia. (Salamo 104:24; Ieremia 10:12) To, ia karaia gaudia lalodiai ia hedinarai badabada gauna be Dirava ena lalokau.
4 Au huahua magena mai mamina namona ita koria neganai, iseda malana ese Dirava ena lalokau be ita idia hamaoroa, badina be ia hedinarai ia ese ia karaia, ita do ia ubua totona sibona lasi, to ita do ia hamoalea totona danu. Iseda matana ese ena lalokau ena toana idia itaia, dina ia diho negadiai, hanuaboi ai hisiu momo be guba ai idia hedinarai negadiai, palaoapalaoa edia toana idauidau bona edia kala namodia lalodiai, animal maragidia edia gadara lalonai, bona iseda turana edia kiri lalodiai. Iseda udu baubauna ese ita dekenai idia hadibaia, palaoapalaoa edia bonana namona ita bonaia neganai. Iseda taiana idia kamonaia gaudia amo mamina ia hedinarai, ororo amo ia aru diho ranuna ena regena, manu edia tai, bona iseda lalokau taudia edia gadona ita kamonai negadiai. Ena mamina ita abia, iseda lalokau tauna ta ese ita ia rosia neganai. Animal haida be taunimanima idia itaia, kamonaia, eiava bonaia diba lasi gaudia idia itaia, kamonaia, eiava bonaia diba. To Dirava ese taunimanima ia karadia ia sibona ena laulau hegeregerena, unai dainai idia ese Dirava ena lalokau ena mamina idia abia diba, animal ta ese ia abia diba lasi dalanai.—Genese 1:27.
5 Iehova Dirava ese taunimanima ginigunadia, Adamu bona Heva ia havaraia neganai, ena lalokau ena toana amo ia gegedia ahu. Uma ta ia hadoa, paradaiso ta unai, bona au idauidau be ia lalonai ia hatubua. Sinavai ta ia karaia hapariparia totona, bona manu bona animal namodia amo ia hahonua. Unai ibounai be Adamu bona Heva ia henidia, do idia noholaia totona. (Genese 2: 8-10, 19) Iehova ese ia kara henidia, iena natuna rua, iena bese badana taudia, hegeregeredia. (Luka 3:38) Unai taunimanima ginigunadia ruaosi edia Tamana guba ai ese Eden ia henidia, unai Paradaiso be mai edia moale ida do idia habadaia lao ela bona tanobada ena kahana iboudiai. Edia bese amo tanobada ibounai do idia hahonua.—Genese 1:28.
6 To nega daudau lasi, Satani ese Adamu bona Heva edia kamonai ia tohoa. Ta ese ia hahedinaraia Dirava ena lalokau idia dekenai be ia laloa bada lasi, bena ma ta ese unai ia hahedinaraia danu. Edia kara be dika rohoroho. Edia dika gwauatao dalana be lasi! Unai dainai Dirava ese ia dadaraidia, ena bese amo ia atodia siri, bona Eden amo ia luludia. Hari inai negai edia kara dika ena anina ena mamina ita do abia noho. (Genese 2:16, 17; 3:1-6, 16-19, 24; Roma 5:12) To edia kara sivaraina amo diba ita abia, a? Dirava ena lalokau dainai edena bamona ita kara noho? Dina ta ta ita abia hidi karadia o gaudia amo ita hahedinaraia ena lalokau ita laloa bada, a?—1 Ioane 5:3.
7 Ena be iseda tubuna roboadia ese dala dika rohorohona amo idia hahedinaraia Dirava be idia totona ia karaia karadia idia laloa lasi, to unai ese Dirava sibona ena lalokau ia koua lasi. Unai neganai idia do vara lasi taudia—anina be hari ita mauri noho taudia danu—ia hebogahisi henia dainai, Dirava ese dala ia kehoa Adamu bona Heva edia, do idia mase lasi neganai edia bese do idia havaraia guna. (Genese 5:1-5; Mataio 5:44, 45) Bema unai bamona ia kara lasi, ita ta do ia vara lasi. Dirava ese ena ura be metairametaira ia hahedinaraia, unai amo ia ese Adamu ena bese taudia momo, ia do idia abidadama henia taudia iboudiai, be helaro namona ia henidia. (Genese 3:15; 22:18; Isaia 9:6, 7) Dala ia karaia, unai dala amo bese iboudiai taudia ese Adamu ia haboioa gauna do idia abia lou; gauna be mauri goevadaena, Dirava ena bese badana taudia, ia lalo-namo henia taudia, edia. Ia karaia dalana be, edia mauri davana ia henia.
Dahaka Dainai Mauri Davana?
8 Edia mauri davana, taunimanima ta ena mauri unai, ia henia be mai badina korikorina, eiava? Bema Dirava ia gwau, ena be Adamu bona Heva be edia gwau-edeede dainai do idia mase, to edia bese taudia, Dirava do idia kamonai henia taudia, iboudiai do idia mauri diba ela bona hanaihanai, unai be hegeregere, a? Taunimanima edia aonega be bada lasi dainai, reana idia laloa unai be hegeregere. To Iehova ese ‘kara maoromaoro bona kota maorona ia ura henia.’ (Salamo 33:5) Adamu bona Heva be kara dika taudia ai idia lao murinai, natudia idia havaraia; unai dainai, unai natudia idia vara neganai idia ta lasi be ia goevadae. (Salamo 51:5) Iboudiai be kara dika idia abia, bona kara dika ena davana be mase. Bema Iehova ese unai ia laloa lasi, unai ese ena bese badana taudia dekenai be dahaka do ia haheitalaia? Sibona ena taravatu maoromaorodia ia laloa nege diba lasi. Kota maorona ena anina ia laloa bada. Dirava ese unai hekwakwanai ia hamaoromaoroa dalana be ta ese ia maumauraia maoromaoro diba lasi.—Roma 3:21-23.
9 Vadaeni, Adamu ena bese taudia, do idia hahedinaraia Iehova idia kamonai henia mai edia lalokau ida taudia, hamauria dalana be Dirava ese edena bamona do ia karaia? Bema taunimanima goevadaena ta be boubou gauna bamona do ia mase, kota maorona hegeregerena unai mauri goevadaena ese abidadama ai unai hahemauri karana idia abia dae taudia edia kara dikadia do ia koua. Tau tamona, Adamu, ena kara dika ese taunimanima iboudiai be kara dika taudia ai ia halaodia dainai, taunimanima goevadaena ma ta ena rarana, ia bubua gauna, be kota maorona ai ia hegeregere diba. (1 Timoteo 2:5, 6) To unai bamona tauna be edeseniai do ia davaria diba?
Ena Davana Ena Bada be Edena Bamona?
10 Adamu ena bese taudia bogaragidiai, ta ia hegeregere lasi Adamu ese ia haboioa maurina hoia lou ena davana do ia henia totona. “Tau ta ese sibona ena mauri, be moni dekena amo ia hoia diba lasi. Ia be hegeregere lasi, Dirava dekenai moni do ia henia, iena mauri davaria totona. Lasi momokani. Badina be iena mauri ena davana be bada herea, bona tau ta ena moni be hegeregere lasi. Unai dainai tau ta ese, Dirava ena lalona ia veria diba lasi, iena mauri hadaudaua totona. Ia be dala lasi mase ena bodaga bona guria gabuna, dekena amo do ia heau.” (Salamo 49:7-9) Taunimanima sibodia be mai edia dala lasi, unai dainai Iehova ese ia durudia mai ena hebogahisi ida.
11 Iehova ese aneru ta be tanobada dekenai ia siaia lasi, ia abia tauanina do ia atoa diho neganai ia be ia mase momokani lasi to lauma ai do ia mauri noho totona. Lasi, hoa karana ta ia karaia, gau iboudiai ia karaia Diravana sibona mo ese ia karaia diba karana unai. Iena natuna ta guba dekenai, ena mauri siahuna bona ena lalona ena oromana be Iuda iduhu hahinena ta, Heli ena natuna Maria, ena bogana lalonai ia atoa vareai. Dirava ena gaukara siahuna, iena lauma helaga unai, ese unai mero ia naria ena sinana ena bogana lalonai, bena ia vara neganai ia be taunimanima goevadaena ta. (Luka 1:35; 1 Petero 2:22) Ia be mai ena mauri goevadaena, Dirava ena kota maorona hegeregerena taunimanima do ia davalaidia vaitani diba gauna.—Heberu 10:5.
12 Iehova ese guba ai ena natuna milioni momo amo edena be unai gaukara ia henia? Baibel lalonai iena “Natuna tamona” ia gwauraia tauna dekenai ia henia. (1 Ioane 4:9) Taunimanima ta bamona ia vara neganai ia abia dagina be unai hereva amo idia gwauraia lasi, to ia be guna guba lalonai ia abia dagina be unai bamona idia gwauraia. Ia sibona mo be Iehova sibona ese ia havaraia, ta ese ia durua lasi neganai. Ia be ia karaia gaudia iboudiai edia Roboana. Dirava ese ia gaukaralaia, mauri gaudia oredia iboudiai havaraia totona. Adamu be Dirava ena natuna ta, unai hegeregerena aneru be Dirava ena natuna. To Ioane ia gwau, Iesu ena “hairai be Dirava ese ia henia, badina ia be Dirava ena Natuna tamona sibona.” Ma ia gwau ia be “Tamana dekenai momokani ia noho.” (Ioane 1:14, 18) Ia be Tamana ida idia hebamo heheni mai edia abidadama bona mai edia lalokau ida. Iena Tamana hegeregerena ia ese taunimanima ia lalokau henidia. Tamana ena lalokau hari Natuna dekenai bona Natuna ena lalokau taunimanima dekenai be Aonega Herevadia 8:30, 31 ese ia hahedinaraia: “Dina ibounai Dirava be lau dekenai ia moale, bona lau be iena vairana dekenai, lau moale noho nega ibounai. [Lau, Iesu, Iehova ena gaukara tauna hereadaena, aonega ena anina korikori tauna, be] Dirava ena tanobada . . . ena noho taudia ibounai dekenai lau moale noho.” Hari Natuna namo hereana be Dirava ese tanobada dekenai ia siaia, mauri davana do ia henia totona. Unai dainai Iesu ena hereva be mai anina bada: “Dirava ese inai tanobada ia lalokau henia bada dainai, iena Natuna tamona sibona ia vara, ia henia”!—Ioane 3:16.
13 Unai ena anina be ita dekenai do ia hadibaia sisina totona, lagani 3,890 bamona idia lao vadaeni, nega daudau ia do noho ela bona Iesu be tanobada dekenai ia mai neganai, Dirava ese Aberahamo ia hagania, ia gwau: “Oiemu natuna oi abia, oi sibona oiemu natuna korikori, Isako, oi lalokau henia merona. Moraia tano dekenai do umui lao. Unuseni oi do lau hamaoroa, ororo ta ena ataiai, mero be lahi boubou gauna do oi halaoa.” (Genese 22:1, 2) Abidadama ai, Aberahamo ese ia kamonai henia. Bema oi be Aberahamo, bona bema unai be emu natuna, oi lalokau henia bada merona tamona, be edena bamona? Boubou lahina audia oi siria, bena dina haida lalodiai Moraia tanona oi lao henia, bena emu natuna be boubou patana latanai oi atoa neganai, emu hemami be edena bamona?
14 Dahaka dainai tama mai ena hebogahisi be unai bamona hemami ia abia? Genese 1:27 ia gwau Dirava ese taunimanima be Iena toana hegeregerena ai ia karaia. Iseda lalokau bona hebogahisi ese Iehova sibona ena lalokau bona hebogahisi toana ia hahedinaraia, to iseda be mai hetoana. Aberahamo ia haheitalaia karana ai, Dirava ese ia koua dainai Isako be ia bouboulaia lasi. (Genese 22:12, 13; Heberu 11:17-19) To, Iehova sibona ia karaia karana ai, ia be unai mauri davana henia karana ia koua lasi, herevana unai ia karaia ena hisihisi be bada herea ia bona ena Natuna dekenai. Ia karaia karana be iena maduna ia huaia totona lasi, to unai amo ena hariharibada herea ia hahedinaraia. Unai ita laloa bada, a?—Heberu 2:9.
Ia Dainai Idia Vara Diba Gaudia
15 Unai heduru, Dirava be mai ena lalokau ida ia henidia heduruna, ese abidadama ai idia abia dae taudia edia mauri ia haidaudia vaitani. Guna kara dika dainai idia be daudau Dirava dekena amo. Iena Hereva ia gwau, unai neganai idia be ena inai taudia, badina be ‘kara dikadia idia laloa.’ (Kolose 1:21-23) To, ‘iena Natuna ia mase dekena amo Dirava bona idia be turana vadaeni.’ (Roma 5:8-10) Edia mauri dalana idia haidaua bona Dirava ena kara, Keriso ena boubou idia abidadama henia taudia edia dika gwauatao karana, idia abia dae, unai dainai edia lalona idia goeva.—Heberu 9:14; 1 Petero 3:21.
16 Idia haida sibona, orea maragina, be Iehova ese ena harihari bada dainai ia abidia hidi, guba Basileiana lalonai iena Natuna ida do idia lohia, Dirava ena palani tanobada totona, matamanai ia laloa gauna, ena anina do idia havaraia totona. (Luka 12:32) “Bese ibounai, gado ibounai, hanua ibounai, bona kopina idauidau taudia ibounai” bogaragidia amo ia abidia, “vadaeni idia be Basileia ta. Bona Dirava ena hahelagaia taudia, be [ia] ese idia [ia] halaoa vadaeni, bona idia ese tanobada do idia gunalaia.” (Apokalupo 5:9, 10) Unai orea taudia be aposetolo Paulo ese ia tore henidia, ia gwau: “Dirava ese umui ia henia Laumana ese Dirava ena natuna umui ia halaoa vadaeni. Unai dainai Lauma ena siahu dekena amo, Dirava dekenai ita hereva henia neganai, ‘Tamagu e, lauegu Tamana lalokau e!’ ita gwauraia diba. Dirava ena Lauma, bona iseda lauma danu idia hereva hebou, idia gwauraia, ita be Dirava ena natuna. Bema ita be Dirava ena natuna neganai, ita ese Dirava ena bese taudia do idia abia hanamoa gaudia be ita danu do ita abia, bona Dirava ese Keriso ia henia hanamoa gaudia do ita abia danu.” (Roma 8: 15-17) Dirava ese idia be ena natuna ai ia halaodia neganai, Adamu ese ia haboioa dagina namona ia henidia; to Dirava ese unai iena natuna be guba dagi danu do ia henidia—Adamu ese ia abia lasi dagina unai. Unai dainai aposetolo Ioane ia gwau: “Mani do umui laloa, iseda Tamana ese lalokau bada ita dekenai ia henia vadaeni, badina ia ese iena natuna ita ia gwauraia noho”! (1 Ioane 3:1) Unai bamona taudia be Dirava ese ena lalohadai maorodia dainai ia vara lalokauna (a·gaˈpe) sibona ia henidia lasi, to ia ura henidia mai ena hebogahisi (phi·liˈa) ida danu, tura korikoridia edia hetura ena toana hegeregerena.—Ioane 16:27.
17 Iehova Dirava ese dala ia kehoa ma haida dekenai danu—Iesu Keriso ena amo ia hamauridia dalana idia abidadama henia taudia iboudiai dekenai—Adamu ese ia haboioa dagina namona do idia abia. Aposetolo Paulo ia gwau: “Dirava ese ia karaia gaudia [taunimanima, Adamu ena amo idia vara taudia] edia helaro be Dirava ena natuna do ia hahedinaraidia [anina be, nega idia naria, unai neganai do ia hedinarai goevagoeva Dirava ena natuna, Keriso ida guba Basileiana idia abia taudia, be taunimanima durudia totona idia kara noho]. Badina be ia karaia gaudia be anina lasi maurina lalonai ia atodia [kara dika lalonai idia vara dainai edia dokona be mase, bona sibodia do idia ruhaia dalana be lasi], sibodia edia ura dainai lasi, to ia atodia tauna ena amo, helaro dainai [Dirava ese ia henidia helarona unai]. Unai helaro be ia karaia gaudia danu be bodaga ena igui amo do ia ruhadia nege, bona Dirava ena natuna edia ura kwalimu hereadaena do idia abia.” (Roma 8:19-21, NW) Unai ura kwalimu ena anina be dahaka? Anina be kara dika bona mase edia igui amo idia do ia ruhaia. Edia lalona bona edia tauanina do idia goevadae. Paradaiso lalonai do idia noho, bona mauri hanaihanai do idia abia, unai mauri lalonai edia goevadae do idia moalelaia bona Iehova, Dirava momokanina tamona, do idia tanikiu henia. Unai ibounai be dahaka dainai do ia vara diba? Dirava sibona ese ia havaraia Natuna tamona ena boubou dainai.
18 Nisan 14, 33 C.E. ai, atai daiutuna ta lalonai Ierusalema ai, Iesu ese ena mase laloa lou karana, Memorial, ia hamatamaia. Lagani ta ta amo ena mase laloa lou karana be mai anina bada, Keristani taudia momokanidia iboudiai edia mauri lalonai. Iesu sibona ese ia haganidia, ia gwau: “Inai bamona do umui karaia, lau dekenai do umui laloa totona.” (Luka 22:19) Lagani 1997 lalonai Memorial be March 23 ai do ita karaia, dina do ia diho murinai (Nisan 14 ena matamana unai). Unai dina ai, Memorial totona do ita hebou be mai anina bada, kara idauna ta ena anina ese do ia hereaia lasi.
Edena Bamona Do Oi Haere?
◻ Edena dala idauidau amo Dirava ese ia hahedinaraia taunimanima ia lalokau henidia bada?
◻ Dahaka dainai taunimanima ta ena mauri goevadaena sibona be hegeregere Adamu ena bese taudia do ia davalaia?
◻ Iehova ese mauri davana ia henia neganai, dahaka ia lalohisihisilaia bada?
◻ Mauri davalaia gauna dainai, dahaka ia vara diba?
[Study Questions]
1. March 23 ai, dina do ia diho murinai, dahaka dainai taunimanima milioni momo be Kingdom Hall bona hebou gabudia ma haida ai do idia hebou, tanobada hegegemadai lalonai?
2. Dirava ena lalokau dainai ita karaia karadia be iseda lalona ai edena bamona do ita henanadailaia be namo?
3. (a) Dahaka dainai lalokau hahedinaraia karana be kara idauna lasi Dirava dekenai? (b) Siahu bona aonega be edena bamona idia hedinarai, ia karaia gaudia lalodiai?
4. Ia karaia gaudia lalodiai, dahaka ese Dirava ena lalokau ia hahedinaraia dainai, unai do ita itaia bona do ita laloa bada be namo?
5. Iehova ese edena bamona ia hahedinaraia Adamu bona Heva ia lalokau henidia bada?
6. (a) Adamu bona Heva edia gwau-edeede be edena bamona oi laloa? (b) Dahaka ese reana ia hahedinaraia Eden ai ia vara gauna sivaraina amo diba ita abia bona unai diba amo namo ita davaria?
7. Ena be Adamu bona Heva be unai bamona idia karaia, to Iehova ese edena bamona ia hahedinaraia edia bese taudia ia lalokau henidia?
8. Dahaka dainai Dirava ia gwau diba lasi, ena be Adamu bona Heva do idia mase, to edia natudia, kamonai taudia unai, do idia mase lasi?
9. Dirava ena kota maoromaorona hegeregerena, edena bamona davana sibona be hegeregere?
10. Dahaka dainai Adamu ena bese taudia ese unai davana idia henia diba lasi?
11. Edena dala amo Iehova ese taunimanima ena mauri goevadaena, taunimanima ia davalaidia diba gauna, ia havaraia?
12. (a) Iesu be Dirava ena “Natuna tamona,” anina be dahaka? (b) Dirava ese ia siaia, mauri davana do ia henia totona neganai, unai ese Iena lalokau ita dekenai be edena bamona ia hahedinaraia goevagoeva?
13, 14. Aberahamo ese Isako ia bouboulaia toho sivaraina Baibel lalonai ese edena bamona ita ia durua, Iehova ena kara do ita laloa bada totona? (1 Ioane 4:10)
15. Mauri davalaia karana ese haida edia mauri be edena bamona ia haidaua, hari inai nega lalonai?
16. Dahaka hahenamo be orea maragina ia henidia, mauri davalaia karana idia abidadama henia dainai?
17. (a) Mauri davalaia karana idia abidadama henia taudia iboudiai edia dala ia kehoa, dahaka do idia abia totona? (b) Idia dekenai “Dirava ena natuna edia ura kwalimu hereadaena” ena anina be dahaka?
18. March 23 ai, dina do ia diho murinai, dahaka do ita karaia, bona dahaka dainai?
[Picture on page 10]
Dirava ese ena Natuna tamona sibona ia henia