Gau Ibounai Do Ia Hamatamataia—Ia Gwauraia Guna Bamona
“Helai gabuna badana latanai ia helai Diravana ia hereva, ia gwau, ‘Harihari be gau ibounai lau karaia matamata inai.’ Ma lau dekenai ia hereva, ia gwau, ‘Harihari inai hereva do oi torea, badina ia be maoromaoro bona momokani.’ ”—APOKALUPO 21:5.
1, 2. Dahaka dainai taunimanima momo idia ura lasi vaira negana idia gwauraia haraga?
NEGA haida oi gwau eiava oi laloa, ‘Daika be kerukeru do ia vara gauna ia diba, a?’ Oi lalo-parara diba, dahaka dainai taunimanima idia ura lasi vaira negana idia gwauraia haraga eiava mai ena goada danu vaira negana ia perovetalaia tauna ena hereva idia abidadama henia haraga lasi. Taunimanima be hegeregere lasi hua vairai eiava lagani vairai do ia vara gauna idia gwauraia maoromaoro.
2 Forbes ASAP magasin be nega ia herevalaia badabada. Ia lalonai, Robert Cringely, televisen ena sivarai ia gwauraia tauna ta, ia gwau: “Nega ese ita ibounai ia hahemaraia, to vaira negana idia perovetalaia toho taudia ia hahemaraia bada herea. Vaira negana gwauraia toho karana be gadara ta bamona, to ia lalonai kahirakahira nega ibounai ita kwalimu lasi. . . . To, idia gwauraidia diba bada taudia be vaira gaudia idia do gwauraia noho.”
3, 4. (a) Taunimanima haida ese lagani tausen negana matamatana be edena bamona idia laloa? (b) Ma haida edia lalohadai vaira negana dekenai be edena bamona?
3 Reana oi itaia lagani tausen negana matamatana idia herevalaia bada dainai, toana be taunimanima momo ese vaira negana idia laloa bada. Lagani 1999 ia matamaia neganai, Maclean magasin ia gwau: “Canada taudia momo dekenai lagani 2000 be reana kalenda ena lagani ta sibona, to reana unai be nega matamatana ta ena matamana danu.” York University ena Profesa Chris Dewdney be taunimanima momo idia laloa namo do ia vara ena badina ta ia herevalaia, ia gwau: “Lagani tausen ma ta ena anina be hegeregere lagani dika hereadia 100 amo iseda imana ita huria diba.”
4 Toana be unai hereva be lalohadai kava sibona, a? Canada dekenai tahua karana ta lalonai idia henanadai henia taudia amo, 22 pesen sibona “idia laloa lagani 2000 be tanobada ena nega matamatana ena matamana.” Momokani, idia ibounai amo kahirakahira kahana ta “idia laloa tanobada ibounai lalonai hepapahuahu badana ma ta—tanobada ibounai tuarina—be lagani 50 idia ore lasi lalonai do ia vara.” Ia hedinarai goevagoeva, momo idia laloa lagani tausen negana matamatana ai iseda hekwakwanai do idia ore lasi, gau ibounai do idia matamata lasi. Sir Michael Atiyah, Britain ena Royal Society ena presiden gunana ta, ia gwau: “Gau idauidau be idia idau haraga dainai . . . anina be lagani 2000 murinai taunimanima edia mauri lalonai hekwarahi gaudia do idia vara. Taunimanima edia namba ia bada daekau, durua gaudia be hegeregere lasi, tanobada idia hamiroa, bona ogogami ia bada ia lao, unai hekwakwanai be ita dekenai idia vara noho bona ita haorea haraga be gau badana.”
5. Vaira negana ia gwauraia namonamo herevadia be edeseniai ita davaria diba?
5 Reana oi gwau, ‘Taunimanima ese iseda vaira negana idia gwauraia diba lasi dainai, vaira negana do ita laloa lasi be namo, a?’ Haere be “Lasi!” Momokani, ena be taunimanima ese vaira negana idia perovetalaia maoromaoro diba lasi, to namo lasi ita gwau ia gwauraia diba tauna ta be lasi. Vadaeni, daika ese ia gwauraia diba, bona dahaka dainai do ita laloa bada? Peroveta herevadia hani ese oi do idia durua, unai henanadai edia haere maorodia oi diba totona. Idia be taunimanima momo herea ese idia abia bona duahia bukana, bona idia daradaralaia momo bona idia laloa momo lasi bukana dekenai idia torea—ia be Baibel. Herevana Baibel be edena dala ai oi laloa, bona herevana oiemu diba ia dekenai be edena bamona, to sibona dekenai namo oi abia totona unai hereva badadia hani oi tahua be gau badana. Idia ese vaira negana namona idia gwauraia hedinarai. Danu, unai peroveta herevadia hani ese oiemu bona emu lalokau taudia edia vaira negana ia gwauraia hedinarai namo herea.
6, 7. Edena nega ai Isaia ia peroveta, bona edena dala badana ai ena peroveta herevana ia guguru?
6 Ginigunana be Isaia karoa 65 lalonai do oi davaria. Ita do duahia lasi lalonai, namona be inai oi laloa guna—unai sivarai be edena negai idia torea bona dahaka ia herevalaia. Dirava ena peroveta tauna Isaia be unai hereva ia torea, Iuda basileiana ena dokona ia do ginidae lasi neganai lagani 100 mai kahana gunanai ia noho. Iehova ese unai abidadama lasi Iuda taudia ia rakatania neganai dokona ia ginidae, bona Babulonia taudia ese Ierusalema idia hadikaia bona ena taunimanima idia abia lao. Lagani handred mai kahana gunanai Isaia ese unai kara ia perovetalaia vadaeni.—2 Sivarai 36:15-21.
7 Unai peroveta herevana ia do guguru lasi negana ena sivarai bema ita laloa, namona be ita laloatao Dirava ena heduru amo Isaia be Babulonia do ia hamorua tauna, ia do vara lasi Parasa tauna ena ladana, Kurese, ia perovetalaia vadaeni. (Isaia 45:1) Kurese ese dala ia kehoa lagani 537 B.C.E. ai, Iuda taudia be edia hanua dekenai idia giroa lou totona. Hoa gauna be, Isaia ese unai hanamoa lou karana ia perovetalaia guna, Is karoa 65 dekenai do ita duahia bamona. Ia ese idia giroa lou Israela taudia ese edia gabu ai do idia moalelaia gaudia ia herevalaia.
8. Isaia ese dahaka moale negana ia gwauraia, bona dahaka hereva ese iseda lalona ia veria?
8 Isaia 65:17-19 ai ita duahia: “Lau ese tanobada matamata bona guba matamata lau karaia noho, bona kara gunadia be do idia laloa lou lasi, do idia laloaboio momokani. Lau ese lau karaia gauna dainai do umui moale bada ela bona hanaihanai. Ierusalema matamata, lau ese do lau karaia gauna, be moale gabuna momokani, iena taudia be mai moale danu do idia noho. Lau ese Ierusalema bona iena taudia do lau moalelaia. Unai Ierusalema lalonai do idia taitai lasi, bona lalohisihisi ena boiboi ta do idia kamonai lasi.” Momokani, Isaia ese ia herevalaia gaudia be Iuda taudia edia noho Babulonia dekenai idia hereaia momokani. Moale negana ia perovetalaia. Vadaeni, mani unai hereva “tanobada matamata bona guba matamata” oi itaia. Baibel lalonai, unai bamona hereva hani amo inai be ginigunana, bona unai hereva hani be mai anina bada, bona iseda vaira negana idia perovetalaia.
9. Idaunegai Iuda taudia dekenai Isaia 65:17-19 ena hereva be edena dala ai ia guguru?
9 Isaia 65:17-19 ena hereva be nega ginigunana ia guguru lalonai, Isaia ese ia perovetalaia maoromaoro hegeregerena, idaunegai Iuda taudia be edia hanua dekenai idia giroa lou, bona tomadiho momokani idia haginia danu. (Esera 1:1-4; 3:1-4) Namona be oi lalo-parara idia be tanobada idauna ta dekenai idia lao lasi, to idia rakatania gabuna dekenai idia giroa lou. Unai lalo-parara ese ita ia durua diba Isaia ese ia gwauraia guba matamata bona tanobada matamata edia anina ita diba totona. Ita moale badina be Nostradamus eiava vaira negana gwauraia toho taudia edia anina lasi peroveta herevadia ita lalohadailaia lasi, haida idia karaia bamona. Baibel sibona ese Isaia ia herevalaia gauna ena anina ia hahedinaraia namonamo.
10. Isaia ese ia gwauraia “tanobada” matamata be edena bamona ita lalo-pararalaia?
10 Baibel lalonai, “tanobada” be nega ibounai iseda tanobada korikori ia gwauraia lasi. Hegeregere, Baibel ena hereva korikori Salamo 96:1 dekenai, ia gwau: ‘Tanobada ibounai e, Iehova dekenai ane umui abia.’ Ita diba iseda tanobada—tano kaukauna bona davara—be ane ia abia diba lasi. Taunimanima ese ane idia abia. Oibe, Salamo 96:1 be tanobada dekenai idia noho taudia ia kikilaia.a To Isaia 65:17 ese “guba matamata” ia herevalaia danu. Bema “tanobada” be edia tano dekenai idia giroa lou Iuda besena matamatana ia laulaulaia, vadaeni “guba matamata” be edena bamona?
11. “Guba matamata” ena anina be dahaka?
11 M’Clintock bona Strong edia buka, Cyclopedia of Biblical, Theological, and Ecclesiastical Literature, ia gwau: “Matahanai lalodiai, bema guba idia gwauraia, iena anina be . . . idia lohia siahu taudia ibounai . . . ataiai idia noho bona taunimanima idia lohiaia, guba korikori be ataiai ia noho bona tanobada ia lohiaia bamona.” Inai hereva “guba bona tanobada” dekenai Cyclopedia ia gwau, ‘peroveta herevadia dekenai, unai hereva be politikol noho dalana ai dagi idaudia taudia ia herevalaia. Guba be siahu taudia; tanobada be taunimanima, siahu taudia ese idia lohiaia taudia unai.’
12. Idaunegai Iuda taudia dekenai “guba matamata bona tanobada matamata” be edena dala amo ia momokani?
12 Iuda taudia be edia hanua dekenai idia giroa lou neganai, ita gwau diba idia be nega matamatana ta lalonai idia vareai. Unuseniai lohia oreana matamatana ia gini. Serubabele, Davida ena tubuna ta, be gavana tauna, bona Iosua be hahelaga tauna badana. (Hagai 1:1, 12; 2:21; Sekaraia 6:11) Idia be “guba matamata.” Dahaka idia lohia? Unai “guba matamata” be “tanobada matamata,” hari idia goeva besena, idia lohiaia, edia tano dekenai idia giroa lou, Ierusalema bona Iehova tomadiho henia dubuna haginia lou totona. Unai dainai, unai dala korikorina ai, guba matamata bona tanobada matamata edia anina be Iuda taudia dekenai ia guguru momokani.
13, 14. (a) Inai hereva “guba matamata bona tanobada matamata” ia hedinarai negana dahaka ita laloa danu be namo? (b) Dahaka dainai Petero ena peroveta herevana be mai anina hari inai negai?
13 Oi naria namonamo, unai hereva ena anina oi laloaboio garina. Unai hereva ita tahua be aonega dalanai Baibel ena hereva gwauraia hedinarai eiava sivarai gunadia ita diba sisina totona lasi. Inai bamona hereva “guba matamata bona tanobada matamata” ia hedinarai negana ma ta oi itaia neganai unai do oi diba. Petero Iharuana karoa 3 dekenai, unai do oi davaria bona do oi itaia iseda vaira negana dekenai ia be mai anina bada.
14 Iuda taudia be edia hanua dekenai idia giroa lou bena lagani 500 mai kahana murinai, aposetolo Petero ese iena revareva ia torea. Petero be Iesu ena aposetolo tauna dainai, Keriso, 2 Petero 3:2 dekenai ia gwauraia “Lohiabada,” ena murinai idia raka taudia ia tore henia. 2Pe 3 Siri 4 ai, Petero be Iesu ena “giroa mai” herevana ia gwauraia hedinarai dainai, ita diba hari inai negai inai peroveta herevana be mai anina bada. Idia vara gaudia ese idia hahedinaraia, Tanobada Ibounai Tuarina Ginigunana negana amo Iesu be ia noho vadaeni, anina be Dirava ena guba Basileia lalonai Lohia ena siahu ia abia. (Apokalupo 6:1-8; 11:15, 18) Petero ese inai karoa dekenai ia perovetalaia gauna ta dainai unai be mai anina bada.
15. Petero ese ia perovetalaia “guba matamata” be edena bamona ia guguru?
15 Petero Iharuana 3:13 dekenai ita duahia, ia gwau: “Dirava ese ia gwauhamata vadaeni, guba matamata bona tanobada matamata do ia havaraia. Inai totona do ita naria noho. Unai gabu dekenai be kara maoromaoro sibona do ia noho.” Reana oi diba vadaeni, Iesu, hari guba dekena ia noho, be “guba matamata” ena Lohia badana. (Luka 1:32, 33) To, Baibel ena siri ma haida idia gwau ia sibona do ia lohia lasi. Iesu ia gwauhamata, aposetolo taudia bona idia bamona taudia ma haida be guba dekenai do idia noho danu. Heberu bukana lalonai, aposetolo Paulo ia gwau unai bamona taudia be “guba maurina totona ia boiria taudia.” Bona Iesu ia gwau, unai orea taudia be ia danu guba dekenai terona latadiai do idia helai. (Heberu 3:1, NW; Mataio 19:28; Luka 22:28-30; Ioane 14:2, 3) Anina be ma haida be Iesu ida guba matamata lalonai do idia lohia. Vadaeni, Petero ese ia gwauraia “tanobada matamata” ena anina be dahaka?
16. Hari ia noho vadaeni “tanobada matamata” be dahaka?
16 Idaunegai ia guguru karana—Iuda taudia be edia tano dekenai idia giroa lou—hegeregerena, hari 2 Petero 3:13 ena hereva be guba matamata ena lohia siahuna henunai idia manau taudia dekenai do ia guguru. Oi ese hari inai negai unai lohia siahuna henunai idia manau taudia milioni momo oi itaia diba. Idia be unai lohia dalana ena hadibaia gaukarana amo namo idia davaria bona idia hekwarahi ena taravatu Baibel lalonai idia badinaia totona. (Isaia 54:13) Idia be “tanobada matamata” ena badina taudia, ena anina be idia be tanobada bese badana ta lalonai, tano, gado, bona bese idauidau amo, bona King, Iesu Keriso, ena lohia henunai idia gaukara hebou. Unai orea tauna ai oi lao diba!—Mika 4:1-4.
17, 18. Dahaka dainai 2 Petero 3:13 ena hereva ese badina ia henia vaira negana ita laloa totona?
17 Oi laloa lasi dokona be unai, bona vaira negana ita dibaia namonamo totona dala be lasi. Momokani, Petero Iharuana karoa 3 ena hereva oi laloa neganai, do oi itaia vaira negana be idau momokani. 2Pe 3 Siri 5 bona 6 lalonai, Petero be Noa ena negai ia vara Abata sivaraina ia torea, unai Abata ese unai tanobada dikana ia haorea momokani. 2Pe 3 Siri 7 lalonai, Petero ia gwau “harihari idia noho guba bona tanobada,” lohia taudia bona taunimanima, be ‘idia noho hegaegae, ela bona Kota Badana Dinana dekenai, bona Dirava idia negea taudia be do idia boio.’ Unai ese ia hahedinaraia, unai hereva “guba bona tanobada” be guba bona tanobada korikoridia ia herevalaia lasi, to taunimanima bona edia lohia taudia ia herevalaia.
18 Unai murinai Petero ese ia hahedinaraia Iehova ena dina badana ai hagoevaia gaukarana badana do ia karaia, unai amo dala do ia kehoa 2Pe 3 siri 13 dekenai ia gwauraia “guba matamata bona tanobada matamata” totona. Mani unai siri ena dokona oi laloa—“unai gabu dekenai be kara maoromaoro sibona do ia noho.” Unai ese ia hahedinaraia gau haida do idia idau momokani, namo havaraia totona, ani? Ia hahedinaraia gau matamatadia do idia vara, bona unai nega lalonai taunimanima ese mauri do idia moalelaia bada herea, hari inai nega ia hereaia, ani? Bema unai oi lalo-pararalaia, vadaeni oi be Baibel ia perovetalaia gaudia, taunimanima haida sibona idia diba gaudia, edia anina oi diba.
19. Dahaka ia vara bona Apokalupo bukana ese do idia vara “guba matamatana bona tanobada matamatana” ia herevalaia?
19 To, mani unai hereva ita habadaia. Ita be Isaia karoa 65 bona Petero Iharuana karoa 3 lalonai inai hereva, “guba matamata bona tanobada matamata” ita kikilaia. Hari, mani Apokalupo karoa 21 oi itaia, unai be Baibel dekenai unai hereva ia hedinarai gabuna ma ta. Idia vara guna gaudia ita lalo-pararalaia guna be gau badana. Apokalupo karoa 19 dekenai, laulau dalana ai tuari ta ia herevalaia—to unai be dagedage bada besedia rua edia tuari lasi. Kahana ta dekenai be “Dirava ena Hereva” ia noho. Reana oi diba unai ladana amo Iesu Keriso idia gwauraia. (Ioane 1:1, 14) Ia be guba dekenai, bona unai matahanai lalonai ia be guba tuari oreana ida ia noho. Idia be daidia idia tuari henia? Unai karoa ese “king,” “tuari biagudia,” bona dagi idauidau taudia, “badadia bona maragidia,” ia herevalaia. Unai tuari be Iehova ena dina badana lalonai do ia vara, unai neganai gwau-edeede kara dikadia be do ia haorea momokani. (2 Tesalonika 1:6-10) Bena, Apokalupo karoa 20 be “idaunegai gaigaina, ma iena ladana be ‘Diabolo’ bona ‘Satani’ ” do idia kokia herevana amo ia matamaia. Unai murinai Apokalupo karoa 21 ita laloa be namo.
20. Apokalupo 21:1 ese ia hahedinaraia bamona, dahaka be vaira negana ai do ia idau momokani?
20 Aposetolo Ioane be inai moale herevana amo ia hamatamaia, ia gwau: “Vadaeni guba matamatana bona tanobada matamatana lau itaia. Badina be guba gunana bona tanobada gunana be idia lao ore vadaeni. Davara danu be ia ore vadaeni.” Isaia karoa 65 bona Petero Iharuana karoa 3 edia hereva dekenai ita itaia hegeregerena, ita diba unai hereva be guba korikori bona iseda noho gabuna, bona davara, do idia kokia karana ia herevalaia lasi. Karoa gunadia ese idia hahedinaraia, kara dika taudia bona edia lohia taudia, ita itaia diba lasi lohiana Satani danu, do idia kokia. Oibe, unai gwauhamata herevana ese tanobada dekenai taunimanima totona nega matamatana ta ia herevalaia.
21, 22. Dahaka hahenamo be Ioane ese ia gwauraia, bona matana ranu do ia dahua ena anina be dahaka?
21 Unai peroveta herevadia ita tahua noho neganai, unai do ita diba momokani. Apo 21 Siri 3 ena dokona ia gwau, nega do ia mai bona Dirava be taunimanima danu do ia noho, bona ena ura idia karaia taudia edia namo do ia laloa bada. (Esekiela 43:7) Ioane be Apo 21 siri 4 bona 5 dekenai ma ia gwau: “Ia [Iehova] ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni. Vadaeni helai gabuna badana latanai ia helai Diravana ia hereva, ia gwau, ‘Harihari be gau ibounai lau karaia matamata inai.’ Ma lau dekenai ia hereva, ia gwau, ‘Harihari inai hereva do oi torea, badina ia be maoromaoro bona momokani vadaeni, bona inai hereva do umui abidadama henia diba.’ ” Unai be hagoadaia peroveta herevana!
22 Mani Baibel ese ia gwauraia herevana oi laloa sisina. ‘Dirava ese matana ranu ibounai edia matana dekena amo do ia dahua.’ Unai be iseda matana korikorina ia huria mata ranuna eiava moale ena mata ranuna ia herevalaia lasi. Lasi, Dirava ese matana amo do ia dahua ranuna be hisihisi, taitai, lalohisihisi, bona lalo-metau dainai ia vara matana ranu ia herevalaia. Edena bamona unai ita diba momokani? Dirava ese matana ranu do ia dahua gwauhamatana be mai anina ‘mase, lalohisihisi, taitai, bona hisihisi do idia ore’ karana dekenai.—Ioane 11:35.
23. Ioane ena peroveta herevana hegeregerena, dahaka gaudia be do idia ore?
23 Unai ena anina be kensa, tauanina ena kahana ta ia mase, kudou goreredia, bona mase danu do ia haorea momokani, ani? Gorere, aksiden, eiava hekwakwanai ta dainai, ita ibounai ese lalokau taudia ita haboioa, ani? Iniseni Dirava ia gwauhamata mase do ia ore, anina be iena gwauhamata ese ia hahedinaraia unai negai do idia vara natudia be do idia tubu daekau bona do idia buruka lasi—bena do idia mase lasi. Danu, unai peroveta herevana ena anina be, kwara ena gorere, turia gorere, tiuma, glokoma, eiava katarak gorere—buruka taudia momo edia gorere—do idia ore danu.
24. Edena dala ai ‘guba matamata bona tanobada matamata’ be hahenamo badana, bona hereva gabena ai dahaka do ita kikilaia?
24 Oi abia dae mase, buruka, bona gorere do idia ore neganai, taitai bona hisihisi danu be do idia ore. To, ogogami, natuna hahisia, bona bese eiava kopina ena kala dainai idia inai heheni kava karana be edena bamona? Bema unai bamona gaudia—hari idia vara momo karadia—be do idia vara noho neganai, hisihisi bona taitai be do idia ore lasi. Unai dainai, “guba matamatana bona tanobada matamatana” henunai do ia vara maurina be hari lalohisihisi idia havaraia karadia ese do idia hadikaia lasi. Gau ibounai do idia idau momokani! Baibel lalonai, inai bamona hereva “guba matamata bona tanobada matamata” be nega hani ia noho, to idia toi sibona be ita kikilaia vadaeni. Idia ta be ita tahua vadaeni herevadia bamona, bona ia hahedinaraia Dirava ese ‘gau ibounai do ia hamatamataia’ gwauhamatana ia hagugurua negana bona dalana ita naria noho be mai ena badina. Hereva gabena ese unai peroveta herevana bona ena anina iseda moale havaraia totona ia herevalaia.
[Footnote]
a Hiri Motu Buka Helaga dekenai Salamo 96:1, ia gwau: “Tanobada dekenai noho taudia ibounai e, Lohiabada dekenai ane do umui abia.” The Contemporary English Version ia gwau: “Inai tanobada dekenai umui noho taudia ibounai e, LOHIABADA dekenai ane umui abia.” Ia hedinarai goevagoeva, Isaia ese ia herevalaia “tanobada matamata” be edia tano ai idia noho Dirava ena taunimanima ia herevalaia.
Oi Laloatao, A?
• Baibel ese inai bamona hereva “guba matamata bona tanobada matamata” ia gwauraia negadia toi be dahaka?
• Idaunegai Iuda taudia dekenai “guba matamata bona tanobada matamata” be edena dala ai idia guguru?
• Petero ese ia gwauraia “guba matamata bona tanobada matamata” edia guguru negana be edena bamona ita lalo-pararalaia?
• Edena dala ai Apokalupo karoa 21 ese vaira negana namona ia gwauraia hedinarai?
[Picture on page 10]
Iehova ia gwau bamona, lagani 537 B.C.E. ai, Kurese ese dala ia kehoa Iuda taudia be edia tano dekenai idia giroa lou totona