Iehova Ena Goada amo Emu Lalona Hagoadaia
“Egu lalona ia hekwarahi momo neganai, oi ese lau oi hagoadaia, bona egu lauma oi hamoalea noho.”—SALAMO 94:19.
LALO-MAINO idia tahua taudia ibounai dekenai, Baibel ese lalona hagoadaia herevadia ia henia. Unai dainai ita hoa lasi The World Book Encyclopedia ia gwau “daradara bona hekwakwanai negadiai, taunimanima momo herea idia lao Baibel dekenai lalona hagoadaia, helaro, bona hakaua herevadia davaria totona.” Badina be dahaka?
Badina be iseda Havaraia Tauna mai ena lalokau ese ena lauma amo Baibel ia havaraia. Ia be “durua ibounai ia henia Diravana,” bona “hisihisi ibounai lalonai ia ese [ita] ia durua noho.” (2 Korinto 1:3, 4) Ia be ‘goada henia Diravana.’ (Roma 15:5) Iehova ese iseda hisihisi do ia haorea dalana ia henia neganai, haheitalai namona ia karaia. Ia sibona ia havaraia Natuna tamona, Iesu Keriso, ia siaia tanobada dekenai, helaro ia henia bona eda lalona ia hagoadaia totona. Iesu ese taunimanima ia hadibaia, ia gwau: “Dirava ese inai tanobada ia lalokau henia bada dainai, iena Natuna tamona sibona ia vara, ia henia vadaeni ita dekenai, do idia abidadama henia taudia ibounai be do idia mase lasi, to mauri hanaihanai do idia abia.” (Ioane 3:16) Baibel ia gwau Iehova be “dina ibounai iseda maduna metaudia ia huaia noho. Ia ese ita ia hamauria noho.” (Salamo 68:19) Dirava gari henia taudia be mai lalo-goada ida idia gwau diba: “Lohiabada be lau dekenai ia noho. Ia be lau kahirakahira dainai, gau ta ese lau ia hagaria lasi.”—Salamo 16:8.
Unai bamona Baibel siridia idia hahedinaraia Iehova Dirava ena lalokau ita taunimanima dekenai be bada herea. Ia hedinaraia goevagoeva ia ura momokani—bona ena goada ia hegeregere—lalona hagoadaia gaudia momo herea ia henia bona nega dikadia dekenai ita mamia hisihisi do ia hanamoa. “Manoka bona hesiku taudia be Lohiabada ese ia hagoadaia noho, bona goada lasi taudia edia goada ia habadaia noho.” (Isaia 40:29) Edena dala ai Iehova ena goada amo lalona hagoadaia dalana do ita davaria diba?
Iehova Ena Naria Karana ese Hisihisi Ia Hamaragia
Salamo torea tauna ia gwau: “Oiemu laloa hekwarahi be Lohiabada dekenai do oi henia, bona ia ese idia dekena amo oi do ia durua. Ia ese kara maoromaoro taudia ia durua noho. Idia be do idia moru lasi, lasi momokani.” (Salamo 55:22) Oibe, Iehova Dirava ese taunimanima ia laloa bada. Aposetolo Petero ese Keristani ginigunadia ia hagoadaia, ia gwau: “Ia [Dirava] ese umui ia naria noho.” (1 Petero 5:7) Dirava ese taunimanima ia laloa bada herea karana be Iesu ese ia gwauraia hedinarai, ia gwau: “Manu maragidia 5 edia davana be toea rua sibona, ani? To Dirava ese idia ta ia laloaboio lasi. Umui emui kwarana huina ibounai ia ese ia duahia ore. Unai dainai, do umui gari lasi, umui ese manu maragidia momo edia davana umui hanaia.” (Luka 12:6, 7) Dirava dekenai ita be mai anina bada dainai iseda kahana maragimaragi ia laloa danu. Ia diba gaudia be ita sibona ita diba gaudia ia hanaia badina ita ta ta ia laloa bada.
Svetlana, hereva gunana dekenai ai kikilaia ariara kekenina, ese Iehova ena laloa bada karana ia lalo-pararalaia dainai unai ese ena lalona ia hagoadaia bada. Sibona do ia hamasea gwauraia neganai, Iehova ena Witnes taudia ese idia vadivadi henia. Bena Baibel stadi ia abia dae bona unai ese ia durua Iehova ia diba totona, bona ia davaria ia be turana korikorina bona iena namo ia laloa bada. Unai ese ena kudouna ia hamarerea bada, bona ia durua iena mauri dalana ia haidaua bona Dirava dekenai ena mauri ia gwauhamatalaia totona. Danu, Svetlana be sibona ia laloa maoromaoro matamaia bona unai ese ia durua iena hekwakwanai idauidau ia haheaukalaia bona iena mauri dekenai lalohadai maorona ia abia totona. Hari ia gwau: “Lau diba momokani Iehova ese lau do ia rakatania lasi. Lau diba 1 Petero 5:7 ena hereva be momokani. Ia gwau: ‘Ia ese umui ia naria noho. Unai dainai emui laloa hekwarahi gaudia ibounai be [Iehova ena] imana dekenai do umui atoa.’ ”
Baibel Helarona be Lalona Ia Hagoadaia
Dirava ena lalona hagoadaia dalana ta be iena Hereva amo, vaira negana ena helaro namona ia henia. Aposetolo Paulo ia gwau: “Buka Helaga dekenai idia torea hereva be ita dekenai hadibaia totona idia torea, vadaeni do ita gini goada, bona Dirava ena namo dekenai do ita naria, mai haheauka danu.” (Roma 15:4) Paulo ia hahedinaraia goevagoeva helaro korikorina bona lalona hagoadaia dalana idia gaukara hebou, ia gwau: ‘Tamana Dirava ese ita ia lalokau henia noho. Ena hariharibada ese ita ta ta iseda lalona ia hagoadaia noho, bona unai dainai Dirava ena helaro namona ita naria noho, mai haheauka danu. Bona ia ese umui do ia haginia auka, mai goada danu. Vadaeni nega ibounai kara namodia do umui karaia, bona hereva namodia do umui gwauraia.’ (2 Tesalonika 2:16, 17) Unai ‘helaro namona’ lalonai, tanobada paradaisona dekenai mauri goevadaena, mauri hanaihanai mai moalena, abia dalana ia noho.—2 Petero 3:13.
Unai bamona helaro namona bona momokanina ese raka diba lasi bona inuinu kekero karana ia manadalaia tauna Laimonis ia hagoadaia. Sivarai ginigunana lalonai ia ai herevalaia vadaeni. Iehova ena Witnes taudia idia printaia gaudia, Baibel idia herevalaia buka bona magasin, ia duahia bena Dirava ena Basileia henunai do ia noho tanobada matamatana ia dibaia bona moalelaia. Unuseniai iena tauanina be do ia namo momokani lou. Baibel lalonai hoa dalanai gorere hanamoa karana do ia vara gwauhamatana ia duahia: “Matakepulu taudia ese do idia itaia diba, bona taia kudima taudia, be do idia kamonai diba. Edia aena idia dika taudia be do idia roho bona mavaru, bona hereva diba lasi taudia, be mai moale bada do idia boiboi.” (Isaia 35:5, 6) Ia hegeregere unai Paradaiso dekenai ia noho totona, Laimonis ese gau momo ia haidaua iena mauri lalonai. Kekero muramura ia rakatania. Iena dekena taudia bona turadia idia itaia iena kara ia haidaua. Hari Baibel stadi haida ia karaia, ma haida dekenai Baibel ia henia helarona bona lalona hagoadaia herevadia ia gwauraia.
Guriguri Ena Anina
Badina ta dainai iseda kudouna ia hisihisi bada neganai, Iehova ita guriguri henia diba, iseda lalona ia hagoadaia totona. Unai ese ita ia hametaua gauna ia kokia diba. Ita guriguri goadagoada neganai, Dirava ena Hereva ia gwauraia gaudia laloa lou karana ese iseda lalona ia hagoadaia diba. Baibel lalonai salamo lata hereana be guriguri hairaina ta bamona. Torea tauna ese inai ane ia abia: “Lohiabada e, oiemu oda hereva gunadia lau laloatao, bona idia ese lau idia hagoadaia.” (Salamo 119:52) Nega dikadia ai, hegeregere ta ia gorere bada neganai, reana hekwakwanai ibounai do ia hanamoa haere tamona ia noho lasi. Bema iseda goada dekenai ita tabekau, reana dahaka do ita karaia ita daradaralaia. Momo idia davaria idia karaia diba gaudia iboudiai idia karaia, bena Dirava dekenai idia guriguri murinai, edia lalona ia hagoadaia bada, bona nega haida guna idia laloa do ia vara lasi to hanamoa dalana idia davaria.—1 Korinto 10:13.
Pat idia abia lao haraga hospital ena emergency daiutuna dekenai, bona ia ese guriguri amo lalona hagoadaia siahuna ia mamia. Iena gorere ia ore murinai, ia gwau: “Iehova dekenai lau guriguri bona lau diba namona be egu mauri be iena imana dekenai lau rakatania, bona mai abidadama danu lau laloa iena ura hegeregerena do ia vara be namo. Unai nega lalonai lau gari lasi; Dirava ena maino Filipi 4:6, 7 ese ia herevalaia gauna, lau mamia.” Unai siri ese ita ibounai idia hagoadaia diba! Unuseniai Paulo ese ita ia sisiba henia, ia gwau: “Gau ta totona do umui laloa hekwarahi lasi. To umui dekenai hegeregere lasi gaudia do umui abia totona, Dirava do umui noia. Bona umui noia negadia ibounai, mai tanikiu danu do umui guriguri henia. Dirava ena maino ese taunimanima edia diba ia hanaia momokani. Keriso Iesu umui danu ia hakapua tamona dainai, inai maino ese emui laloa gaudia, bona emui kudouna idia mamia gaudia ibounai do ia gimaia namonamo.”
Lauma Helaga ese Lalona Ia Hagoadaia
Iesu ia do mase lasi hanuaboina ginigabena ai, ena aposetolo taudia dekenai ia hahedinaraia goevagoeva kahirakahira idia do ia rakatania. Idia ese unai idia lalo-hekwarahilaia bona idia lalohisihisilaia. (Ioane 13:33, 36; 14:27-31) Iesu ia itaia namona be edia lalona ia hagoadaia noho, unai dainai ia gwauhamata: “Lau ese Tamana do lau noia, ia ese Durua [eiava, lalona hagoadaia] Tauna ta do ia henia umui dekenai, umui dekenai do ia noho hanaihanai.” (Ioane 14:16) Iesu ese Dirava ena lauma helaga ia herevalaia. Dirava ena lauma ese gau idauidau ia karaia, unai gau ta be aposetolo taudia be hahetoho idia davaria neganai idia ia durua bona idia ia hagoadaia Dirava ena ura idia karaia noho totona.—Kara 4:31.
Angie, aksiden dikana lalonai kahirakahira ia mase tauna ena hahine, be ia davaria lalo-hekwarahi bona hisihisi ia haheaukalaia diba. Dahaka ese ia durua? Ia gwau: “Bema Iehova ena lauma helaga ese ai ia durua lasi, ai mamia gaudia dainai do ai goada noho diba lasi. Momokani Iehova ena goada be aiemai manoka amo ia hahedinaraia, bona aiemai lalohisihisi negana ai ia be kohoro goadana.”
Lalona Idia Hagoadaia Tadikaka Oreana
Herevana ta ena mauri be namo o dika, herevana edena hisihisi ia vara, ia ese Iehova ena kongregesen dekenai idia noho tadikaka amo lalona hagoadaia herevadia do ia davaria. Unai tadikaka oreana be ia lalonai idia noho taudia dekenai lauma dalanai heduru ia henia. Ia lalonai oi idia lalokau henia, laloa bada, bona emu lalona idia hagoadaia turadia do oi davaria. Unai taudia idia gini hegaegae bona idia ura lalohisihisi negadiai ma haida do idia durua.—2 Korinto 7:5-7.
Keristani kongregesen taudia idia hadibadia ‘taunimanima ibounai dekenai kara namodia do idia karaia. To Keriso abidadama henia taudia do idia durua bada herea be namo.’ (Galatia 6:10) Baibel amo idia abia dibana ese idia ia hagoadaia tadikaka bamona lalokauna idia hahedinaraia ta ta dekenai. (Roma 12:10; 1 Petero 3:8) Lauma tadikaka bona taihu kongregesen dekenai ia hagoadaia lalokau, lalona hagoadaia karana, bona hebogahisi idia hahedinaraia totona.—Efeso 4:32.
Joe bona Rebecca, edia natuna merona ia mase taudia, ese Keristani kongregesen amo unai bamona heduru idia abia. Idia gwau: “Nega aukana lalonai, Iehova bona ena kongregesen mai ena lalokau ese ai idia durua. Nega momo herea ai idia rini henia bona kadi bona revareva handred handred ai abia. Unai amo ai lalo-parara aiemai tadikaka bamona oreana be dava bada gauna. Ena be unai gau dikana ia vara dainai ai daradara bamona, to ai kahirakahira idia noho kongregesen taudia ese ai idia durua, aniani idia mailaia bona aiemai ruma idia hagoevaia.”
Lalo-Goada Noho!
Hekwakwanai be lai goadana bamona dika ia havaraia bona lalohisihisi be medu bona aisi nadi bamona oi ia botaia loulou neganai, Dirava ia gini hegaegae lalona hagoadaia dalana ai oi ia naria totona. Ita ia naria karana be salamo ta ese inai bamona ia herevalaia, ia gwau: “Lohiabada ese iena hanina dekena amo oi do ia koua, vadaeni iena naria dainai oi be do oi mauri.” (Salamo 91:4) Reana ia hahegeregerea gauna be ugava. Ia gwauraia manu ia diba dika ia mai bona ena hanina be ena natudia ataiai ia atodia idia ia naria totona. To anina badana be, Iehova be Naria Tauna korikorina roho mauri gabuna idia tahua taudia ibounai dekenai.—Salamo 7:1.
Bema oi ura Dirava ena kara, ena ura, bona ena lalona hagoadaia daladia dekenai diba ma haida oi abia, oi ai boiria ena Hereva oi stadilaia. Iehova ena Witnes taudia be mai moale ida oi do idia durua unai diba oi abia totona. Oibe, oi danu be Iehova ena goada amo lalona hagoadaia dalana oi davaria diba!
[Pictures on page 7]
Baibel ese nega vaira totona ia henia helaro namona ese iseda lalona ia hagoadaia diba