Iehova be Iseda Kudouna Ia Hereaia

SALAMO torea tauna ia gwau: “Lohiabada ese, ia dekenai idia gari henia taudia ia moalelaia noho.” Oibe, Havaraia Tauna ia moale bada, bema ia itaia iena hesiai taudia ta ta be idia hekwarahi iena kara maoromaoro taravatudia idia badinaia totona. Dirava ese iena abidadama taudia ia hanamoa, ia hagoadaia, bona hisihisi negadiai ia durudia. Ia diba ia idia tomadiho henia taudia be goevadae lasi, unai dainai ia ura idia karaia gauna be ia laloa danu.​​—⁠Salamo 147:⁠11.

Reana Iehova ese ena hesiai taudia ia lalokau henia karana be ita daradaralaia lasi. To, haida be sibona edia kerere idia laloa momo dainai, idia laloa Iehova be idia do ia lalokau henia diba lasi. Reana idia gwau: “Lau be goevadae lasi momokani, unai dainai Iehova be lau ia lalokau henia diba lasi.” Oibe, nega ta ta ita ibounai be lalohadai kerere ita abia diba. To haida be hanaihanai idia hekwarahi badina idia laloa idia be anina lasi.

Lalo-Metau Bada Karana

Baibel negadia ai, abidadama taudia haida idia lalo-metau bada. Iobu be mauri ia inai henia bada bona ia laloa Diravana ese ia rakatania vadaeni. Nega ta Samuela ena sinana, Hana, be natuna ta ia do havaraia lasi dainai, ia lalo-metau bona ia taitai bada. Davida be ena ‘kwarana ia atoa diho, bona ia moru diho,’ bona Epafrodito ia lalo-metau badina ena tadikaka be iena gorere sivaraina idia kamonai vadaeni.​​—⁠Salamo 38:6; 1 Samuela 1:​7, 10; Iobu 29:​2, 4, 5; Filipi 2:​25, 26.

Hari inai negai, Keristani taudia be edena bamona? Reana haida be gorere, buruka, eiava gau idauidau ma haida dainai, hesiai gaukara helagana be edia ura bamona idia karaia diba lasi. Unai dainai reana idia laloa Iehova bona edia tadikaka vairanai idia hegeregere lasi. Eiava haida be guna kara kereredia idia karaia dainai sibona dekenai idia samania hanaihanai, idia daradara Iehova be edia dika ia gwauatao, eiava. Reana ma haida be ruma bese lalonai idia vara hekwakwanai dainai, idia laloa taunimanima ese idia lalokau henidia diba lasi. Edena bamona unai ia vara diba?

Haida idia tubu daekau ruma besena lalonai, lalokau be edia kara badana lasi, to hekokoroku, maumau, bona gari. Reana idia be tamana ta, ia lalokau henia, dala ia tahua hahenamo bona goada ia henia, kerere ia laloa lasi bona ia hegaegae kara dika badadia ia gwauatao, bona ena hebogahisi bada ese ruma bese ibounai ia durua tamana idia diba lasi. Idia edia tanobada tamana be lalokau tauna lasi dainai, guba tamana ese idia ia lalokau henia ena anina idia lalo-pararalaia be auka.

Hegeregere, Fritz ia gwau: “Egu lalokau lasi tamana ena kara ese lauegu tubu daekau bona matamata negana idia hadikaia momokani.a Nega ta lasi hereva namodia ia gwauraia, bona ia kahirakahira dekenai lau lao diba lasi. To, nega momo ia dekenai lau gari.” Unai dainai, ena be hari Fritz ena mauri lagani be 50 ia hanaia vadaeni, to ia laloa noho ia hegeregere lasi. Bona Margarette ia gwau: “Lauegu tama sina be hebogahisi bona lalokau taudia lasi. Baibel lau stadilaia matamaia neganai, lau hekwarahi bada lalokau tamana ta ena kara be edena bamona lau lalo-pararalaia totona.”

Herevana dahaka dainai unai bamona hemami ita abia, to nega haida unai hemami dainai Dirava ena hesiai gaukara ita karaia be lalokau amo lasi, to lalo-metau bona gari amo ita karaia. Toana be iseda hesiai gaukara namona be anina lasi. Ita ura Iehova bona iseda tadikaka ita hamoalea toho dainai, reana ita laloa gau ma ta do ita karaia diba lasi. Unai dainai, reana iseda tahua gauna do ita hagugurua lasi, ita sibona do ita samania, bona do ita lalo-manoka.

Dahaka ita karaia be namo? Reana Iehova ena lalokau ena bada ita laloa be namo. Dirava ena lalokau ia lalo-pararalaia namonamo tauna ta be aposetolo Ioane.

“Dirava be Iseda Kudouna Ia Hereaia”

Lagani 100 C.E. be kahirakahira neganai, Ioane be iena tadikaka ia tore henidia, ia gwau: “Unai amo do ita diba ita be hereva momokani amo ita mai, bona ia vairanai iseda kudouna do ita hagoadaia momokani iseda kudouna ese ita ia samania diba gaudia ibounai dekenai, badina Dirava be iseda kudouna ia hereaia bona gau ibounai ia diba.” Dahaka dainai Ioane ese unai hereva ia torea?​​—⁠1 Ioane 3:​19, 20, NW.

Ioane ia diba goevagoeva Iehova ena hesiai taudia edia kudouna ese idia ia samania diba. Reana Ioane danu be unai bamona hemami ia abia. Ioane be tau matamata bona badu haraga tauna, unai dainai nega haida Iesu Keriso ese ia durua toho ma haida ia kara namo henidia totona. Momokani, Iesu ese Ioane bona ena kakana Iamesi “dekenai ladana matamata ia henia, ladana be Boanere, anina be, ‘Guba boiboi natudia.’ ”​​—⁠Mareko 3:​17; Luka 9:​49-​56.

Lagani 60 idia hanaia murinai, Ioane ena kara ia idau bona ia be laloa namonamo, lalokau, bona hebogahisi Keristani tauna. Unai aposetolo tauna ginigabena ese iena revareva ginigunana ia torea neganai, ia diba Iehova be ena hesiai taudia ta ta edia kara kerere ibounai hegeregerena davana do ia henia lasi. To, ia be lalokau, hariharibada, bona hebogahisi Tamana, ia idia lalokau henia bona momokani ai ia idia tomadiho henia taudia ia lalokau henia. Ioane ia gwau: “Dirava be lalokau.”​​—⁠1 Ioane 4:⁠8.

Iehova Totona Ita Karaia Gaudia Dainai Ia Moale

Dirava be iseda manoka bona dabu gaudia ia diba, bona unai ia laloa bada. Davida ia gwau: “Ia diba, ita be tanobada ena kahu dekena amo ita ia karaia. Bona ita dekenai ia laloa noho, ita be kahu sibona.” Iehova ia diba iseda mauri gunana be mai anina iseda kara dekenai. Momokani, ita ia diba namonamo, to ita be sibona ita diba namonamo lasi.​​—⁠Salamo 103:⁠14.

Ia diba ita momo ita ura iseda kara ia idau, to ita be goevadae lasi bona unai ita haidaua diba lasi. Iseda mauri be aposetolo Paulo ena bamona, ia gwau: “Kara namodia lau ura karaia neganai, be lau karaia diba lasi. Bona kara dikadia lau ura lasi karaia neganai, be lau karaia inai.” Ita ibounai be unai bamona ita hekwarahi bada. Nega haida, reana unai dainai iseda kudouna ese ita ia samania.​​—⁠Roma 7:​19.

Hanaihanai inai oi laloatao: Ita sibona ita laloa dalana be gau badana lasi, to Iehova ese ita ia laloa dalana be gau badana. Bema ia itaia ita be ia ita hamoalea toho, ia be unai ia laloa sisina sibona lasi, to ia moalelaia danu. (Aonega Herevadia 27:11) Ena be iseda matana dekenai ita karaia gauna be gau maragina sibona, to iseda ura bada bona kara namodia dainai ia moale bada. Ia be ita karaia ore gauna sibona ia laloa lasi; to ita ura karaia gauna be ia laloa namonamo; ia be iseda ura bona lalohadai ia diba. Iehova be iseda kudouna ia diba momokani.​​—⁠Ieremia 12:3; 17:⁠10.

Hegeregere, Iehova ena Witnes taudia momo be idia hemarai bona idia ura lasi taunimanima vairanai idia hedinarai momo. Unai bamona taudia ese ruma ta ruma ta dekenai sivarai namona idia harorolaia be mai ena hekwarahi. To, idia ura Dirava ena hesiai gaukara idia karaia bona edia dekena tauna idia durua dainai unai hemarai taudia danu be edia dekena tauna lao henia bona Baibel herevalaia dalana idia dibaia. Reana idia laloa idia karaia gauna be gaukara maragina sibona, bona unai dainai idia moalelaia lasi. Reana edia kudouna ai idia gwau edia haroro gaukara be anina lasi. To unai bamona taudia be mai edia goada ibounai ida hesiai gaukara idia karaia dainai, Iehova ia moale bada. Danu, idia diba lasi hereva momokani ena uhe be edena negai bona edeseniai do ia hedinarai, tubu daekau, bona huahua do ia havaraia.​​—⁠Hadibaia Tauna 11:6; Mareko 12:​41-​44; 2 Korinto 8:​12.

Witnes taudia ma haida be nega daudau lalonai gorere idia hisihisilaia eiava idia buruka idia lao. Unai taudia ese hanaihanai Kingdom Hall ai idia karaia hebou dekenai idia lao be hisihisi bona hekwarahi gauna. Reana haroro gaukara herevana ta idia kamonai neganai, guna idia karaia gaudia bona hari idia ura karaia to gorere dainai idia karaia diba lasi gaudia idia laloa. Unai bamona taudia be reana idia lalohisihisi badina sisiba namona be edia ura hegeregerena idia badinaia diba lasi dainai. To, Iehova be edia abidadama bona haheauka karana ia laloa bada. Ia idia badinaia negana ibounai lalonai, edia abidadama karadia do ia laloaboio lasi.​​—⁠Salamo 18:25; 37:⁠28.

“Iseda Kudouna Do Ita Hagoadaia Momokani”

Reana Ioane ia buruka neganai, ia be Dirava ena lalokau karana ia lalo-pararalaia namonamo. Oi laloatao, ia gwau: “Dirava be iseda kudouna ia hereaia bona gau ibounai ia diba.” Danu, Ioane ia gwau namona be “iseda kudouna do ita hagoadaia momokani.” Ioane ia gwauraia herevana ena anina be dahaka?

Vine’s Expository Dictionary of Old and New Testament Words ia gwau, Greek herevana ta iniseniai idia hahanaia “hagoadaia momokani” ena anina be “lalona veria karana gaukaralaia, doria eiava haidaua, lalona veria.” Unai dainai, iseda kudouna do ita hagoadaia momokani ena anina be iseda kudouna ita haidaua, ita veria Iehova ese ita ia lalokau henia lalohadaina ita abia dae totona. Edena dala amo?

Fritz, inai kahana dekenai ita kikilaia vadaeni tauna, be lagani 25 mai kahana lalodiai Iehova ena Witnes taudia edia kongregesen ta ai elda gaukara ia karaia, bona ia davaria sibona ena stadi karana ese Iehova ena lalokau karana dekenai iena kudouna ia hagoadaia lou. “Hanaihanai Baibel bona iseda buka idauidau lau stadilaia namonamo. Unai ese lau ia durua guna gaudia lau laloa lasi totona, to iseda vaira negana namona lau lalohadailaia goevagoeva diba. Nega haida, lauegu mauri gunana dainai lau lalo-metau, bona lau mamia Dirava be lau ia lalokau henia diba lasi. To, nega momo lau itaia hanaihanai stadi karana be lauegu kudouna ia hagoadaia, egu abidadama ia habadaia, bona lau ia durua lau moale bona laloa namonamo totona.”

Momokani, Baibel duahia bona laloa dobu karana be iseda hekwakwanai korikori do ia haidaua lasi. To, unai ese iseda hekwakwanai ita laloa dalana ia haidaua diba. Iseda kudouna lalonai Dirava ena Hereva amo ita abia lalohadaina ita atoa neganai, unai ese ita ia durua ena lalohadai bamona ita laloa totona. Danu, stadi karana ese ita ia durua Dirava ena lalokau karana dekenai iseda lalo-parara ita habadaia totona. Bena sisina do ita abia dae, Iehova be iseda maragi negana maurina dainai bona iseda gorere dainai ita ia samania lasi. Ia diba nega momo ita momo ese ita huaia lalo-metau gaudia​​—⁠herevana hemami eiava tauanina dalanai​​—⁠be ita sibona iseda kara dainai idia vara lasi, bona ena lalokau dainai unai ia laloa.

Guna ita herevalaia hahinena, Margarette, be edena bamona? Iehova ia diba namonamo neganai, Baibel stadilaia karana ese ia durua bada danu. Fritz bamona, iena lalohadai tamana ena kara dekenai ia haidaua. Guriguri ese Margarette ia durua, ena stadi amo ia dibaia gaudia ia lalo-pararalaia totona. Margarette ia gwau: “Gau ginigunana be, Iehova be egu turana korikori bamona lau laloa, badina lalokau turadia edia kara lau diba, to lalokau tamana ena kara lau diba lasi. Metairametaira, egu hemami, daradara, lalo-metau, bona hekwakwanai be Iehova dekenai lau gwauraia hedinarai karana lau dibaia. Guriguri amo ia lau hereva henia loulou, bona ia dekenai lau dibaia gau matamatadia lau haboua noho, ta ese gau maragidia amo laulau ta ia haboua bamona. Gabeai, Iehova dekenai egu mamina ia namo momokani, bona hari lauegu lalokau Tamana bamona ia lau laloa be auka lasi.”

Lalo-Hekwarahi Gaudia Ibounai amo Ita Ia Durua

Inai tanobada dikana ena nega ibounai lalonai, tau ta ia gwau diba lasi lalo-hekwarahi gaudia amo ia kwalimu vadaeni. Keristani taudia haida dekenai, unai ena anina be lalo-hekwarahi eiava daradara ena mamina do ia hedinarai lou bona lalo-metau do ia vara. To namona be ita abia dae, Iehova be iseda kara namodia bona iseda goada iena hesiai gaukara lalonai ia diba momokani. Iena ladana dainai ita hahedinaraia lalokauna be do ia laloaboio lasi.​​—⁠Heberu 6:​10.

Kahirakahira Mesia ena Basileia ese ia lohia tanobada matamatana ai, abidadama taudia ibounai be Satani ena nega dikana lalonai idia davaria metau gaudia amo do idia kwalimu. Unai be hahenamo bada! Bena Iehova ena lalokau idia hamomokania gaudia ma haida do ita itaia. Ela bona unai nega, namona be ita ibounai ita diba, “Dirava be iseda kudouna ia hereaia bona gau ibounai ia diba.”​​—⁠1 Ioane 3:​20, NW.

[Footnote]

[Blurb on page 30]

Iehova be kara auka tauna lasi, to lalokau bona hebogahisi Tamana

[Picture on page 31]

Dirava ena Hereva stadilaia karana ese ita ia durua iena lalohadai bamona ita laloa totona