Inai Hereva “Keristani Tauna” Ena Anina Ia Boio Gwauraia, A?
TA BE Keristani tauna ena anina be dahaka? Edena bamona do oi haere? Tano idauidau ai taunimanima haida dekenai unai henanadai idia henia, bona inai be edia haere haida:
“Iesu murinai oi raka bona tohotohoa.”
“Oi be taunimanima namona bona ma haida oi durua.”
“Oi abia dae Keriso be Lohiabada bona Hahemauri Tauna.”
“Mass dekenai oi lao, Rosary oi gwauraia, bona Holy Communion oi abia.”
“Lau laloa lasi dubu dekenai oi lao neganai sibona oi be Keristani tauna.”
Diksenari lalodiai danu, unai hereva ena anina be idauidau dainai ita daradara. Buka ta lalonai, inai hereva “Keristani tauna” henunai hereva idauidau 10 idia torea, idia ta be “Keriso ena tomadiho abia dae eiava badinaia tauna” bona idia ma ta be “taunimanima namona o idia abia dae tauna.” Ta be Keristani tauna ena anina idia herevalaia totona momo idia hekwarahi be hoa gauna lasi.
Lalohadai Idauidau Idia Abia Dae
Hari inai negai, sibodia idia gwauraia Keristani taudia huanai—dubu tamona taudia huanai danu—hereva badadia, hegeregere Baibel be Dirava ena lauma amo ia vara, evolusen lalohadaina, dubu be politikol karadia lalonai idia vareai, bona ma haida dekenai abidadama gwauraia karana dekenai ta ese lalohadai idauidau ia davaria diba. Mauri taravatudia, hegeregere bogana lalonai natuna hamasea, tatau o hahine idia sihari heheni, bona tau bona hahine idia headava lasi to idia noho hebou karadia dekenai, be nega momo idia hepapahuahulaia. Ia hedinarai goevagoeva gauna be lalohadai idauidau idia abia dae.
Hegeregere, magasin ta ladana Christian Century ese ia hahedinaraia vanegai Protestan dubu ta ena kota taudia idia vouti, bena tomadiho ena maoro “tatau ia sihari henia elda tauna ta be edia hakaua oreana lalonai idia abia hidi” karana idia abia isi. Tomadiho idia stadilaia taudia haida idia gwau hahemauri abia totona Iesu abidadama henia karana be anina lasi. Sivarai ta The New York Times niuspepa lalonai ia gwau, idia abia dae Iuda taudia, Muslim taudia, bona ma haida be “reana [Keristani taudia hegeregerena] guba dekenai do idia vareai.”
Mani oi laloa, bema Marx ena lalohadai ia badinaia tauna ta ese kapitalisim ia hanamoa o demokratik tauna ta ese lohia siahuna aukana ia hanamoa o tanobada ena ranu bona hodahoda naria karana ia laloa momo tauna ese au utua karana ia durua be edena bamona. Do oi gwau—bona oi hereva maoro—“unai tauna be Marx ena lalohadai ia badinaia tauna, o demokratik tauna, o tanobada bona hodahoda naria karana ia laloa momo tauna korikorina lasi.” To, hari inai negai sibodia idia gwauraia Keristani taudia edia lalohadai idauidau oi laloa neganai, oi itaia idia abia dae herevadia idia idau momokani bona nega momo idia be Keristani tomadihona ia haginia Tauna, Iesu Keriso, ena hahediba herevadia amo idia idau. Unai ese idia badinaia Keristani dalana dekenai dahaka ia hahedinaraia?—1 Korinto 1:10.
Do ita itaia, nega daudau lalonai taunimanima idia ura bada Keristani hahediba herevadia idia haidaua, edia nega taudia edia lalohadai ida ia hegeregere totona. Dirava bona Iesu Keriso be unai haidaua karana dekenai dahaka idia laloa? Keriso amo idia mai lasi hahediba herevadia idia abia dae dubu idauidau be sibona idia gwauraia Keristani dubu be maoro, a? Hereva gabena ese unai henanadai do ia herevalaia.