Dala Hereadaena ai Ia Kwalimu

EMU abidadama dainai dagedage oi davaria​​—⁠reana gaukara gabunai, sikuli dekenai, ruma bese lalonai, eiava gavamani ena taravatu dainai, a? Oi lalomanoka lasi. Iehova ena Witnes taudia momo ese unai bamona hahetoho idia davaria vadaeni, to idia kwalimu. Mani Erna Ludolph ena haheitalai oi laloa.

Erna be lagani 1908, Lübeck, Germany dekenai ia vara. Ena famili lalonai ia sibona be Iehova ia hesiai henia. Lagani 1933 ai, Hitler ena gavamani ese siahu ia abia neganai, Iehova ena Witnes taudia ese hahetoho momo idia davaria matamaia. Erna ena gaukara turadia ese ia idia gwauraia dika badina Hitler ia saluti henia lasi, bona unai murinai Nazi edia pulisi ese idia dogoatao. Lagani eit lalonai dibura ruma idauidau dekenai ia noho, hegeregere Hamburg-Fuhlsbüttel, Moringen, Lichtenburg, bona Ravensbrück dekenai ia noho danu. Erna be Ravensbrück dekenai ia noho neganai, gau ta ia vara bona ia be unai dala amo ia kwalimu.

Ruma Hagoevaia Hahine Namona

Profesa Friedrich Holtz bona ena adavana, Alice, be Berlin dekenai idia noho. Idia be Nazi pati taudia lasi bona unai gavamani ena lalohadai idia abia dae lasi. To, SS gadi edia ofesa badana be edia varavara ta, bona ia be dibura kamepadia ia naria danu. Unai dainai, profesa bona ena adavana be ruma hagoevaia hahine ta idia tahua neganai, unai SS gadi ofesa ese maoro ia henia dibura hahine ta do idia abia hidi totona. Bena, March 1943 ai, Alice be Ravensbrück dekenai ia lao ruma hagoevaia hahine ta do ia abia hidi totona. Daika ia abia hidi? Erna Ludolph ia abia hidi. Erna be Alice bona ena ruma bese ida ia noho, bona ia idia kara namo henia. Tuari ia ore murinai, ia be unai ruma bese ida ia lao, German ena siti ta Halle dekenai, ia be Saale ena sinavai kahanai. Unuseniai, Erna be East Germany ena Socialist gavamani taudia amo ma dagedage ia davaria lou. Lagani 1957 ai, Alice mai ena bese ida be idia siaidia West Germany dekenai, bona Erna be idia danu ia lao. Unai nega ai, gau ta ese Erna ia koua lasi ena abidadama ia gwauraia hedinarai totona.

Erna be edena dala hereadaena ai ia kwalimu? Erna ena kara namodia bona Baibel ena hereva ia harorolaia namonamo dainai, Alice Holtz bona ena natuna faiv be bapatiso idia abia bona Iehova ena Witnes taudia ai idia lao. Bona danu, Alice ena tubuna ibounai 11 be Iehova ena Witnes taudia. Rua be hari Iehova ena Witnes taudia edia brens opesi, Selters, Germany dekenai idia gaukara noho. Alice ena natuna kekenina ta, Susanne ia gwau, “Erna ena haheitalai namona dainai, emai ruma bese taudia momo be hereva momokani lalonai idia noho.” Erna ena haheauka karana dainai davana namona ia abia. Oi be edena bamona? Nega aukadia lalonai emu abidadama karana dainai unai bamona anina namona oi havaraia diba. Oibe, emu kara bona hahediba dalana namona ese oi ia durua diba dala hereadaena ai oi kwalimu totona.a

[Footnote]

[Picture on page 19]

Erna Ludolph (sea dekenai ia helai) bona Holtz ruma bese taudia