Iehova Ena Hereva be Ia Mauri Noho
Lalohisihisi Ena Ane Bukana Ena Hereva Badadia
IEREMIA be lagani 40 lalodiai ia perovetalaia hahemaoro herevana ena guguru negana ia itaia. Ieremia ena hemami be edena bamona unai lalokau hanuana idia hadikaia neganai? Greek gado Septuagint ese Lalohisihisi ena Ane ia herevalaia neganai, ia gwau: “Ieremia be ia helai diho bona Ierusalema hanua totona ia tai dikadika.” Ieremia ese Lalohisihisi ena Ane bukana be lagani 607 B.C.E. ai ia torea, unai nega ai Babulonia ese Ierusalema be hua 18 lalonai idia hagegea, bena gabeai idia gabua karana ia do laloatao noho. Lalohisihisi ena Ane bukana ese Ieremia ena lalohisihisi ia hahedinaraia goevagoeva. (Ieremia 52:3-5, 12-14) Histori lalonai hanua badana ta ena moru be unai bamona hebogahisi bona taitai dalanai idia gwauraia lasi.
Lalohisihisi ena Ane bukana lalonai ane 5 idia torea. Karoa ginigunadia foa be taitai anedia. Heberu gado ai idia torea neganai, karoa ginigunadia foa be dala idauna ai idia torea. Siri ta ta be Heberu gado ena alfabet 22 ena leta idauidau amo idia hamatamaia. Ena be karoa namba 5 ena siri ibounai be 22 bona Heberu gado ena alfabet ia badinaia diba, to inai karoa dekenai alfabet dalana idia badinaia lasi.—Lalohisihisi ena Ane 5:1.
“EGU MATANA BE TAITAI DAINAI IDIA KEPULU BAMONA”
(Lalohisihisi ena Ane 1:1–2:22)
“Ierusalema hanua madi ia dika. Gunaguna taunimanima momo be ia lalonai idia noho, to hari ia be anina lasi gabuna. Gunaguna Ierusalema be ia bada, bese idauidau edia huanai, to hari ia be mai lalohisihisi danu, vabu hahine bamona. Guna ia be hanua ibounai edia huanai, hanua namo herea momokani, edia kwini bamona, to hari ia ese hesiai gaukara mai guia danu ia karaia noho.” Unai hereva amo Ieremia ese Ierusalema ia taitailaia matamaia. Ieremia ese unai dika ena badina ia gwauraia: “Siona ena kara dika momo herea dainai, Lohiabada ese ia hisihisi henia vadaeni.”—Lalohisihisi ena Ane 1:1, 5.
Ierusalema be ena tau bona ena natudia idia mase vabu bamona ia gwau: “Lau do umui itaia, egu hisihisi hegeregerena, be ta ese nega ta ia abia, a?” Iena inai taudia dainai Dirava ia guriguri henia, ia gwau: “Edia kara dika ibounai, be oiemu vairanai do oi hedinaraia. Unai neganai edia dika davana do oi henia, egu dika davana oi henia hegeregerena. Badina be lau tai bada noho, bona egu kudouna ia manoka lao noho.”—Lalohisihisi ena Ane 1:12, 22.
Mai lalohisihisi bada ida, Ieremia ia gwau: “Israela ena goada ibounai, be Lohiabada ena badu siahuna ese ia haorea vadaeni. Idau bese tuari taudia be tuari totona idia mai neganai, Lohiabada ese Iuda ia durua lasi. Iakobo ena tano, be Lohiabada ese lahi dekena amo ia gabua, bona gau ibounai ia hadikaia.” Ieremia ena daradoko be inai bamona ia gwauraia: “Egu matana be taitai dainai idia kepulu bamona. Egu kudouna be ia makohia vadaeni. Egu laumana be ia hisihisi bada noho.” Dala dekenai idia raka hanaia taudia be idia hoa bada, idia gwau: “Ia, inai be hairai bada herea hanua, bona, tanobada ibounai hamoalea hanua, a?”—Lalohisihisi ena Ane 2:3, 11, 15.
Baibel Henanadaidia Edia Haere:
1:15—Edena dala ai Iehova ese Iuda “bese taudia ia moia diho, vain huahua be vain moia gabuna idia moia diho bamona”? Babulonia ese Ierusalema hanua ia hadikaia neganai, ia bubua rara ena bada be hegeregere vain huahua be vain moia gabuna idia moia diho bamona. Iehova ese unai dika do ia vara ia gwauraia bona ia vara neganai ia koua lasi. Unai dainai, ita gwau diba Iehova ese Iuda “bese taudia ia moia diho, vain huahua be vain moia gabuna ia moia diho bamona.”
2:1—Edena dala ai “Siona ena hairaina be guba dekena amo tano ena kahu dekenai ia negea diho vadaeni”? “Badina guba be tanobada ena ataiai daudau herea hegeregerena,” mai hairai bada gauna be ena hairai amo ia moru neganai, idia gwau ia be “guba dekena amo tano ena kahu dekenai ia negea diho” bamona. “Siona ena hairaina”—Iehova ese ia hanamoa neganai ia abia hairai bona goada—be Babulonia ese Ierusalema bona Iuda ia hadikaia neganai, tano ena kahu dekenai idia negea diho.—Isaia 55:9.
2:17—Iehova be ia gwau dahaka do ia karaia bona ia ese ia karaia vadaeni? Inai hereva be Levitiko 26:17 ena hereva ida ia hegeregere. Ia gwau: “Lauegu vairana be umui dekena amo do lau giroa, bona unai dainai umui dekenai idia tuari henia taudia ese umui do idia halusia. Bona umui dekenai idia badu henia taudia ese umui do idia biagua. Tau ta ese umui ia lulua lasi neganai umui be do umui heau.”
Ita Dibaia Gaudia:
1:1-9. Ierusalema be hanuaboi ai ia taitai dikadika, bona ena matana ranu idia diho. Ena magu iduara dekenai taunimanima idia helai lasi, bona ena hahelaga taudia idia taitai noho. Ena rami-hebou kekenidia be idia lalohisihisi bada, bona Ierusalema be ia daradoko. Dahaka dainai? Badina Ierusalema be kara dika bada herea ia karaia, bona iena miro karana be ibounai ese idia itaia. Kara dika ese moale ia havaraia lasi, to taitai, lalohisihisi bona daradoko ia mailaia.
1:18. Iehova be kara dika taudia ia panisidia neganai, hanaihanai kara maoromaoro ia badinaia.
2:20. Israela taudia be idia diba vadaeni, bema Iehova ena hereva idia kamonai lasi, dika bada do idia davaria. Unai dika ta be ‘edia natudia do idia ania.’ (Deuteronomi 28:15, 45, 53) Momokani, Dirava gwau-edeede henia karana be aonega karana lasi!
“EGU TAITAI OI KAMONAI HENIA”
(Lalohisihisi ena Ane 3:1–5:22)
Lalohisihisi ena Ane karoa 3 ese Israela besena be tau ta bamona ia herevalaia. Ena be inai tauna be dika ia davaria, inai ane ia abia: “Lohiabada idia abidadama henia taudia, be Lohiabada ese ia hanamodia noho.” Unai tau be Dirava momokani ia guriguri henia, ia gwau: “Oi dekenai lau noinoi neganai, egu taitai oi kamonai henia.” Iehova ia noia iena inai taudia edia kara dika do ia itaia, ia gwau: “Lohiabada e, oi ese edia dika davana do oi henia. Edia kara hegeregerena, davana do oi henia.”—Lalohisihisi ena Ane 3:1, 25, 56, 64.
Ieremia be Babulonia tuari taudia ese hua 18 lalonai Ierusalema idia hagegea dainai idia vara dika ia taitailaia: “Egu bese taudia edia dika davana, ese Sodoma bona Gomora edia dika davana ia hanaia vadaeni, badina Sodoma taudia edia dika, be Dirava ese ia haorea haraga.” Ieremia ma ia gwau: “Tuari dekenai idia mase taudia edia moale ese, hitolo dekenai idia mase taudia edia moale ia hereaia. Edia tauanidia be metairametaira idia ore lao, idia mase, uma edia anina be lasi dainai.”—Lalohisihisi ena Ane 4:6, 9.
Karoa 5 be Ierusalema taudia edia taitai herevadia ia gwauraia. Idia gwau: “Lohiabada e, ai dekenai idia vara gaudia, mani do oi laloatao. Ai do oi itaia, aiemai hemarai mani do oi itaia.” Idia davaria dika idia tai bona idia anelaia, bona Iehova idia noia: “Oi, Lohiabada e, oi be king ela bona hanaihanai. Oiemu King siahuna be do ia noho nega ibounai, doko lasi. Lohiabada e, ai ura oi dekena do ai giroa lou. Mani emu kara, ai do oi abia dae lou. Aiemai mauri do oi hamatamataia lou, dina gunadia hegeregere.”—Lalohisihisi ena Ane 5:1, 19, 21.
Baibel Henanadaidia Edia Haere:
3:16—“Ia ese nadi maragidia dekena amo, egu isena ia hamakohia” ena anina be dahaka? Buka ta ia gwau: “Iuda taudia be Babulonia dekenai idia raka lao neganai, edia paraoa be tano lalonai idia gabua bona tano be edia paraoa lalonai ia vareai.” Unai bamona paraoa be ta ese ia ania neganai, ena isena ia makohia diba.
4:3, 10—Dahaka dainai Ieremia ese Israela hahinedia be “uda kokokoko” ida ia hahegeregeredia? Iobu 39:16 ia gwau: “Kokokoko ese iena natuna ia dagedage henia, bona idia dekenai ia karaia, idia be iena natuna lasi bamona.” Edia natudia idia vara murinai, edia sinana be kokokoko ma haida ida ia lao bona natudia be kokokoko tau ida ia rakatanidia. Dika idia davaria neganai be edena bamona? Kokokoko tau bona hahine be idia heau bona maragidia idia rakatania. Guna sina be edia natudia idia lalokau henia, to Babulonia taudia ese Ierusalema idia hagegea bona doe ia vara neganai, edia natudia idia hadikaia, kokokoko ia karaia bamona. Uda sisia ese ena natudia ia naria namonamo karana be kokokoko edia kara amo ia idau.
5:7—Tama edia kara dika dainai Iehova ese natudia ia panisidia, a? Lasi, Iehova be tama edia kara dika dainai natudia ia panisidia lasi. Baibel ia gwau: “Ita ibounai ta ta ese, iseda kara ena badina, be Dirava ena vairana dekenai do ita gwauraia hedinarai.” (Roma 14:12) To, tama ese idia karaia kara dika ena hisihisi be uru gabedia ese idia davaria diba. Hegeregere, idaunegai Israela besena be kaivakuku idia tomadiho henidia, unai dainai gabeai abidadama Israela taudia haida ese idia ura kara maoromaoro idia badinaia, to idia hekwarahi bada.—Esodo 20:5.
Ita Dibaia Gaudia:
3:8, 43, 44. Ierusalema be dika ia davaria neganai, Iehova ia ura lasi Ierusalema ena hanua taudia edia taitai, idia do ia durua totona ia kamonai. Dahaka dainai? Badina unai taudia be Iehova idia gwau-edeede henia bona idia helalo-kerehai lasi. Bema ita ura Iehova ese iseda guriguri do ia haere henia, ita kamonai henia be gau badana.—Aonega Herevadia 28:9.
3:21-26, 28-33. Edena dala ai hisihisi bada ita haheaukalaia diba? Ieremia ese haere ia henia. Namona be ita laloatao Iehova ena noho hanaihanai lalokauna be do ia ore lasi bona iena hebogahisi be ia doko diba lasi. Gau badana be ita laloatao ita mauri noho dainai, iseda helaro ia goada noho be namo bona ita maumau lasi, to mai haheauka ida hahemauri totona Iehova ita naria noho. Danu, ‘iseda vairana be tano dekenai do ita atoa,’ unai ena anina be mai manau ida hahetoho do ita haheaukalaia, bona ita laloparara Dirava be badina namona dainai unai hahetoho ia koua lasi.
3:27. Eregabe tauna ta ese ena abidadama dainai hahetoho do ia davaria. Ia ese hevaseha bona nega aukadia do ia haheaukalaia. To, ia do ‘eregabe neganai unai bamona metau ia huaia be namo.’ Dahaka dainai? Badina ia do eregabe lalonai hisihisi ia haheaukalaia karana ese ia do ia hagoadaia, gabeai laganidia ai hekwakwanai do ia hanaia totona.
3:39-42. Ita kara dika dainai hisihisi ita davaria neganai, mai badu ida ita hereva be aonega karana lasi. Namo lasi iseda kara kerere ena hisihisi dainai ita maumau, to “namona be iseda dala do ita tohoa, bona iseda kara do ita tahua, bona Lohiabada dekenai do ita giroa lou.” Aonega dalana be do ita helalo-kerehai bona iseda kara ita hamaoromaoroa.
Iehova Oi Abidadama Henia
Lalohisihisi ena Ane bukana ese Iehova ena lalohadai, Babulonia ese Ierusalema bona Iuda hanua ia hadikaia karana dekenai ia hahedinaraia. Lalohisihisi ena Ane bukana lalonai Israela taudia edia kara dika ia gwauraia, bona ia hahedinaraia edia kara dika dainai, Iehova ese idia ia panisia. Danu, inai buka ese ia hahedinaraia Israela taudia be mai edia helaro Iehova dekenai bona idia ura dala maorona dekenai do idia giroa lou. Ena be taunimanima momo be unai bamona idia laloa lasi, to unai hereva ese Ieremia bona helalo-kerehai taudia edia hemami ia hahedinaraia.
Lalohisihisi ena Ane bukana lalonai Ierusalema ese ia davaria dika dekenai Iehova ena lalohadai ia hahedinaraia. Bona unai amo ita be mai anina bada gaudia rua ita dibaia. Gau ginigunana be, Ierusalema bona Iuda idia hadikaia karana ese ita ia hadibaia, Iehova ita kamonai henia bona iena sisiba herevadia ita badinaia be gau badana. (1 Korinto 10:11) Gau iharuana be Ieremia ena haheitalai amo ita dibaia. (Roma 15:4) Unai gauna be, ena be nega aukadia idia vara bona Ieremia be ia daradoko, to hahemauri totona Iehova dekenai ia tabekau. Oibe, Iehova bona ena Hereva ita abidadama henia momokani be mai anina bada!—Heberu 4:12.
[Picture on page 29]
Peroveta tauna Ieremia be ia harorolaia hahemaoro herevana ena guguru negana ia itaia
[Picture on page 30]
Inai Korea Witnes taudia be edia Keristani gini siri karana dainai hahetoho idia davaria