Hekwakwanai Tanobadana ai Maino Oi Davaria Diba, A?
OI BE maino ai oi noho, a? Momo idia gwau, idia be maino ai idia noho lasi. Idia noho gabudia dekenai tuari, gavamani huanai heiriheiri karadia, bese idia dagedage heheni o terorist karadia idia vara momo. Ena be emu noho gabuna ai unai bamona gaudia oi davaria lasi, to taravatu utua karadia, ta hahisia karana, bona bisinesi turadia o dekena tauna ida heai havaraia karadia ese maino ia hadikaia diba. Danu nega momo ruma bese lalonai heai ia vara dainai maino be lasi.
Taunimanima momo idia ura maino ai idia noho. Unai dainai dubu dekenai idia lao eiava gau ma haida idia karaia. Ma haida be maino idia davaria totona, gabu haida dekenai idia lao idia laga-ani, ororo gabudiai bona taunimanima idia noho lasi gabudia dekenai idia loaloa, eiava ranu siahu ia lohilohi gabudia dekenai idia lao. Ena be unai taudia haida be lalomaino idia davaria, to idia laloparara unai bamona maino be ia noho daudau lasi.
Unai dainai edeseniai maino korikorina oi davaria diba? Iehova Dirava, iseda Havaraia Tauna, be maino ena badina. Dahaka dainai? Badina Ia be “maino ia henia Diravana.” (Roma 15:33) Kahirakahira Iena Basileia ena lohia henunai, “maino do ia bada.” (Salamo 72:7, BHğ; Mataio 6:9, 10) Unai maino be taunimanima ese idia havaraia maino bamona lasi. Badina taunimanima ese idia havaraia maino be ia noho daudau lasi, to tuari bona dagedage karadia idia vara. To Dirava ese tuari bona heiriheiri do ia haorea momokani bona maino do ia havaraia. Momokani, ta be tuari karadia do ia dibaia lou lasi. (Salamo 46:8, 9) Unai nega ai, ita ibounai be maino korikorina do ita moalelaia!
Unai be helaro namo hereana ta dainai, hari be nega namona unai maino oi tahua goadagoada totona. Inai hekwakwanai negana ai, dala ta ia noho lalomaino oi abia totona, a? Ita moale badina Baibel ese maino davaria dalana be ita dekenai ia hahedinaraia. Aposetolo Paulo ese Filipi taudia dekenai ia torea hakaua hereva haida mani ita laloa. Emu Baibel ai Filipi karoa 4 Filipi karoa 4 siri 4 ia lao Filipi karoa 4 13 oi duahia.
“Dirava Ena Maino”
Filipi karoa 4 Siri 7 ia gwau: “Dirava ena maino ese taunimanima edia diba ia hanaia momokani. Keriso Iesu umui danu ia hakapua tamona dainai, inai maino ese emui laloa gaudia, bona emui kudouna idia mamia gaudia ibounai do ia gimaia namonamo.” Dirava ena maino be laloa dobu karana o ta be ena kara ia hanamoa amo ia vara lasi, to unai maino be Dirava amo ia mai. Dirava ena maino be mai siahu bada dainai “taunimanima edia diba ia hanaia momokani.” Unai maino ese ita lalohekwarahilaia gaudia, iseda diba, bona iseda lalohadai ia hereaia momokani. Ena be ita itaia iseda hekwakwanai haorea dalana be lasi, to Dirava ena maino ita abia bona Baibel ena hereva—nega ta hekwakwanai do idia ore—ita diba dainai, unai ese ita ia hagoadaia.
Oi laloa unai maino do ia vara, a? Taunimanima ese unai idia karaia be ia auka; to “Dirava ese gau ibounai ia karaia diba.” (Mareko 10:27) Dirava ita abidadama henia karana ese ita ia durua ita lalohekwarahilaia gaudia ita laloa momo lasi totona. Sitoa badana ta lalonai ia boio natu maragina ta mani oi laloa. Ia diba momokani ena sinana do ia davaria neganai, gau ibounai do idia namo. Unai natu maragina be ena sinana ese ia davaria neganai, ia rosia bona ia hanamoa. Unai hegeregerena, ita diba momokani Dirava be ita do ia abia dae bona ita do ia durua ita lalohekwarahilaia gaudia ita hanaia totona.
Iehova idia tomadiho henia taudia momo be hahetoho badadia lalonai Dirava ena maino idia mamia vadaeni. Hegeregere, Nadine oi laloa, ena beibi be ena bogana lalonai ia mase. Ia gwau: “Egu hemami lau herevalaia be auka, bona egu lalohekwarahi gauna be ma haida dekenai lau hahedinaraia lasi. To egu lalona be ia hisihisi bada. Dina ta ta ibounai lalonai, egu lalohekwarahi gaudia be Iehova dekenai lau gurigurilaia bona Ia lau noia lau ia durua totona. Guriguri karana be mai ena siahu, badina lau lalometau bona lau laloa egu lalohekwarahi gauna do lau hanaia diba lasi neganai, guriguri karana ese lau dekenai lalomaino ia henia. Lau mamia guriguri karana ese lau ia gimaia bona ia hagoadaia.”
Emu Kudouna Bona Lalona Oi Gimaia
Filipi 4:7 ita itaia lou. Unai siri ia gwau, Dirava ena maino ese iseda kudouna bona laloa gaudia do ia gimaia. Gadi tauna be gabu ia gimaia hegeregerena, Dirava ena maino ese iseda kudouna ia gimaia, unai amo moni momo ura henia lalohadaina, anina lasi gaudia lalohekwarahilaia, bona Dirava hamoalea lasi karadia ese iseda lalona do ia veria lasi. Haheitalai ta mani oi laloa.
Inai tanobada ai, taunimanima momo idia laloa idia moale bona idia noho namonamo totona, moni momo idia haboua bona ruma namodia ai idia noho be namo. Haida be bisinesi taudia edia sisiba idia badinaia dainai, edia moni habadaia totona bisinesi idia karaia. To maino idia davaria, a? Lasi. Badina idia hekwarahi dina ta ta ai edia bisinesi gaukaradia idia sekea loulou totona, idia laloa gau ma haida do idia hoihoilaia, do idia hoia eiava edia moni idia habadaia sibona. To edia bisinesi ia dika neganai, idia gari. Baibel ese moni habadaia karana ia taravatua lasi, to inai sisiba namona ita dekenai ia henia: “Moni ia ura henia noho tauna ese moni do ia abia, to unai moni ena bada be hegeregere lasi ia dekenai, vadaeni ma haida ia tahua noho. Bona kohu momo ia ura henia noho tauna ese iena kohu do ia habadaia, to ena bada be hegeregere lasi ia dekenai. Inai kara danu be anina lasi. Gaukara tauna ena bogana do ia kunu, o do ia hitolo, to iena mahuta be do ia namo. To kohu momo tauna ena gau momo dainai ia laloa hekwarahi, bona ia mahuta namonamo lasi.”—Hadibaia Tauna 5:10, 12.
Filipi 4:7 ia gwau, ‘Keriso Iesu ita danu ia hakapua tamona dainai,’ Dirava ena maino ese iseda kudouna bona laloa gaudia ia gimaia. Edena dala ai Keriso Iesu bona Dirava ena maino idia gaukara hebou? Dirava ena ura hagugurua karana be Iesu ese ia gunalaia. Iesu be ena mauri ia henia, unai amo ita be kara dika bona mase amo ia hamauria. (Ioane 3:16) Danu, ia be Dirava ena Basileia ena King. Iena gaukara ita dibaia karana ese ita dekenai lalomaino ia henia. Edena dala ai?
Bema eda kara dika amo ita helalo-kerehai bona Dirava ita noia Iesu ena boubou karana dainai eda dika ia gwauatao totona, Ia ese eda dika do ia gwauatao. Unai ese iseda lalona bona kudouna ai maino do ia havaraia. (Kara 3:19) Hari inai negai mauri do ita moalelaia momokani lasi ela bona Keriso ena Basileia do ia mai. Ita be unai ita diba dainai ita ura lasi vaira negana idia laloa lasi taudia bamona ita noho. (1 Timoteo 6:19) Oibe, ita be hekwakwanai idauidau ita davaria, to ita diba kahirakahira mauri namona do ia vara dainai, unai ese ita ia hagoadaia ita haheauka totona.
Dirava Ena Maino Davaria Dalana
Edena dala ai Dirava ena maino oi davaria diba? Filipi 4:4, 5 ia gwau: “Nega ibounai do umui moale, Lohiabada lalonai umui noho dainai. Ma lau gwau lou: Do umui moale. Emui manau bona manada kara taunimanima ibounai edia vairanai do umui hedinaraia. Lohiabada be kahirakahira do ia ginidae.” Paulo be dibura ruma ai ia noho neganai, unai hereva ia torea. (Filipi 1:13) Paulo be ia davaria hisihisi ia herevalaia lasi, to iena tadikaka ia hagoadaia hanaihanai Lohiabada lalonai do idia moale totona. Ia be ena noho dalana dainai lasi, to Dirava ia tura henia dainai ia moale. Unai dainai ena be iseda noho daladia be idauidau, to Dirava ita hesiai henia dainai ita moale danu. Bema Iehova ita dibaia namonamo bona Iena ura ita badinaia, vadaeni mai moale ida Ia do ita hesiai henia. Bona unai ese ita dekenai lalomaino do ia henia.
Ma danu, Paulo be ita ia hagoadaia laloa maoromaoro karana ita hahedinaraia totona. Bema unai kara ita habadaia, vadaeni ita sibona be gau ibounai do ita karaia namonamo lalohadaina do ita abia lasi. Ita diba ita be goevadae lasi taudia; gau ibounai ita karaia goevagoeva diba lasi. Unai dainai, namo lasi ita laloa ita karaia gauna do ita karaia goevagoeva o ita karaia gauna be ma haida ese idia karaia gauna do ia hereaia. Danu, namo lasi ita laloa ma haida be gau ibounai idia karaia goevagoeva be namo. Unai dainai, edia kara ese ita idia hahisia neganai, ita manau be gau badana. Bona ita ta ta be sibona eda ura hegeregerena ai abia hidi ta ita karaia neganai, namona be mai laloa maoromaoro ida unai ita karaia bona ma haida ida ita hepapahuahu lasi. Badina hepapahuahu karana ese ita dekenai namo ta do ia mailaia lasi bona ita bona ma haida huanai maino do ia havaraia lasi.
Filipi 4:5 ia gwau: “Lohiabada be kahirakahira do ia ginidae,” toana be unai hereva ena anina be ia idau sisina. Kahirakahira Dirava ese inai tanobada dikana do ia haorea bona ena Basileia henunai noho namona do ia havaraia. To hari inai negai, Iehova be ia idia hesiai henia taudia kahirakahira ia noho. (Kara 17:27; Iamesi 4:8) Ita diba Dirava be ita kahirakahira ia noho dainai, ita moale bona ita laloa maoromaoro. Unai sibona lasi, to Filipi 4:6 ena hereva bamona, hari dina o vaira negai do idia vara hekwakwanai ita lalohekwarahilaia lasi.
Filipi 4:6, 7 ita duahia neganai, ita itaia guriguri karana amo Dirava ena maino ita abia diba. Haida idia laloa guriguri be laloa dobu karana ena kahana ta, unai dainai idia laloa guriguri karana ese lalomanau ia havaraia. To, Baibel ia gwau unai be Iehova ida ita herevahereva karana, hegeregere natu ta be ia moalelaia gaudia bona ia lalohekwarahilaia gaudia be ena lalokau tama o sina dekenai ia herevalaia. Ita diba ita “dekenai hegeregere lasi gaudia” be Dirava dekenai ita gwauraia hedinarai diba, unai be hagoadaia gauna, ani? Iseda lalona ai idia noho gaudia be eda guba Tamana dekenai ita herevalaia diba.
Filipi 4:8 ese ita ia hagoadaia lalohadai namodia sibona ita abia totona. To, lalohadai namodia sibona ita abia be hegeregere lasi. Filipi karoa 4 Siri 9 ese ia hahedinaraia bamona, namona be Baibel ena sisiba namodia ita badinaia danu. Unai bamona ita karaia neganai, lalona ena mamina do ia goeva.
Oibe, lalomaino oi davaria diba. Iehova ese unai maino be Ia kahirakahira idia lao bona ena hakaua dalana idia badinaia taudia dekenai ia henia. Iehova ena Hereva, Baibel, oi tahua namonamo karana amo, Iena lalohadai do oi dibaia namonamo. Iena hakaua daladia oi badinaia be mai ena hekwarahi. To, bema oi gaukara goada namo bada do oi davaria, badina ‘maino ia henia Dirava be oi danu do ia noho.’—Filipi 4:9.
[Blurb on page 10]
“Dirava ena maino ese . . . emui kudouna idia mamia gaudia ibounai do ia gimaia namonamo.”
[Blurb on page 12]
Ita diba ita “dekenai hegeregere lasi gaudia” be Dirava dekenai ita gwauraia hedinarai diba, unai be hagoadaia gauna, ani?