Tomadiho Namona be Baibel Ia Matauraia

IESU ese Dirava ena Hereva, Baibel ia matauraia. Diabolo ese ia tohoa neganai, Iesu ena haere dalana ese unai ia hamomokania. (Mataio 4:​4-​11) Hegeregere, Satani ese Iesu ia hamaoroa nadi be aniani gaudia dekenai ia halaoa neganai, Iesu be dahaka ia karaia? Ia be Mose ena hereva, Deuteronomi 8:3 ai oi duahia diba herevana, ia gaukaralaia unai hahetoho ia hanaia totona. Danu, Diabolo ese Iesu ia hamaoroa bema tomadiho karana ta ia karaia, tanobada ena basileia ibounai be ia dekenai do ia henia, to Iesu be dahaka ia karaia? Diabolo ena ura ia dadaraia bona Deuteronomi 6:​13 ai oi duahia diba hakaua herevana ia gwauraia.

Mani oi laloa: Herevana Iesu be Dirava ena Natuna, to ena hahediba lalonai Baibel ia gaukaralaia momo. Momokani, ia ese Dirava ena Hereva ia abia dae bona sene karadia ia dadaraia. (Ioane 7:​16-​18) To, iena negai idia noho tomadiho gunalaia taudia momo be Dirava ena Hereva idia matauraia lasi. Dahaka dainai? Badina idia be sene karadia idia laloa bada. Unai dainai, Iesu ese unai tomadiho gunalaia taudia ia gwau henia: “Umui ese emui sene karadia dainai Dirava ena hereva be anina lasi gauna ai umui halaoa. Umui be koikoi taudia! Isaia ese umui ia perovetalaia herevana be maoro, ia gwau, ‘Inai taudia be edia udu bibina amo Lau idia hanamoa, to edia kudouna be Lau amo ia daudau masemase. Lau idia tomadiho henia noho to unai be anina lasi, badina edia hahediba herevadia be taunimanima edia taravatu sibona.’ ”​​—⁠Mataio 15:​6-9, Holman Christian Standard Bible.

Tanobada hegegemadai, tomadiho momo​—⁠Keristani taudia bona Keristani lasi taudia⁠​—⁠​idia gwau Baibel idia matauraia. To, oi laloa tomadiho hida be Baibel ese ia taravatua sene karadia idia dadaraia? Haheitalai rua mani oi laloa.

SINADO: Tomadiho ena dagi ladadia.

BAIBEL BE DAHAKA IA HADIBAIA? Iesu be tomadiho gunalaia taudia ia gwauraia dika, badina idia ura dikadika dagi o ladana bada idia abia. Ia gwau, unai tatau be “aria idia karaia negadiai idia ura gabu namona dekenai idia helai, bona sinagoga dekenai vairana kahanai idia helai, bona maketi gabudia ai, idia ura haida ese idia hanamodia bona idia gwauraia ‘Rabi.’ ” Bena Iesu ese ena hahediba taudia ia hamaoroa: “Namo lasi umui idia gwauraia ‘Rabi’; badina emui Biaguna be tamona, bona umui ibounai be tadikaka. Bona tanobada ai tau ta umui gwauraia lasi emui tamana; badina emui Tamana be tamona, guba ai ia noho.”​​—⁠Mataio 23:​1-​10, New Catholic Edition of the Holy Bible.

HENANADAI: Inai tomadiho gunalaia taudia idia ura dagi ladadia idia abia bona taunimanima ese idia matauraia bada, a? Eiava Iesu ena sisiba idia badinaia dainai dagi idia tahua lasi, a?

SINADO: Tomadiho dekenai kaivakuku gaukaralaia karana.

BAIBEL BE DAHAKA IA HADIBAIA? “Laulau ta do umui karaia lasi, guriguri henia totona kaivakuku gauna ta, o gau ta ena laulau, guba gauna ta, o tanobada gauna ta, o ranu lalonai gauna ta. Laulau o kaivakuku ta dekenai do umui tomadiho henia lasi, bona iena hesiai gaukara do umui karaia lasi.”​​—⁠Esodo 20:​4, 5.

Aposetolo Ioane be Keristani taudia dekenai ia gwau: “Kaivakuku amo umui gini siri be namo.”​​—⁠1 Ioane 5:​21, Contemporary English Version.

HENANADAI: Inai tomadiho be Baibel ena taravatu ia badinaia dainai, Dirava tomadiho henia karana dekenai laulau o kaivakuku idia gaukaralaia lasi, a?

Dala Maorona Oi Davaria Diba

Ena be hari tomadiho be momo, to mauri dalana ia lao henia tomadihona oi davaria diba. “Dirava vairanai ia goeva bona ia miro lasi tomadiho” ena toana be momo. (Iamesi 1:​27, New Revised Standard Version) Inai kahana ai idia noho Baibel siridia ese oi do idia hadibaia unai tomadiho maorona oi diba totona.

Namona be Iehova ena Witnes taudia oi noia rau 3 ia lao 9 ai idia noho henanadai idia haerelaia totona. Witnes taudia idia gwauraia herevadia oi kamonai neganai, namona be aposetolo edia negai idia noho Berea taudia edia kara oi tohotohoa. Idia be Paulo ena haroro herevana idia kamonai murinai “Buka Helaga idia stadilaia, unai amo idia itaia Paulo ena hereva be ia momokani eiava lasi.” (Kara 17:​11, Today’s English Version) Berea taudia bamona, bema Baibel oi matauraia bona oi stadilaia namonamo, mauri dalana ia lao henia tomadihona do oi davaria. Unai dala dekenai oi raka ena abia hidi be oi sibona ese do oi karaia.

[Blurb on page 9]

Edena tomadiho ese taunimanima ia hagoadaia Baibel idia stadilaia, unai amo idia itaia idia dibaia gaudia be momokani eiava lasi?