Headava Ena Hekwakwanai Haheaukalaia

MARGARITA bona ena adavana, Raúl, be Iehova ena hesiai taudia bona lagani momo lalonai painia gaukara idia karaia.a To edia natuna ginigunana ia vara murinai, Raúl be Iehova amo ia daudau matamaia. Gabeai, Raúl be matabodaga karadia ia karaia dainai, Keristani kongrigeisen amo idia atoa siri. Margarita ia gwau: “Unai ia vara neganai lau laloa do lau mase. Lau lalometau bada bona lau diba lasi dahaka do lau karaia.”

Jane ia headava bena daudau lasi murinai, ena tau ese ia abidadama henia lasi bona lalokau henia lasi. Ena tau ese ia dagedage henia matamaia. Jane ia gwau: “Nega ginigunana lau ia paisia neganai, lau hoa bona lau hemarai. Nega momo lau ia botaia neganai, lau ia noia ena dika lau gwauatao totona. Lau laloa lau be Keristani hahinena dainai, nega ibounai ena dika lau gwauatao bona laloaboio be maoro. Danu, lau laloa bema emai hekwakwanai be ta dekenai​—⁠egu kongrigeisen elda taudia dekenai danu​—⁠lau gwauraia hedinarai be hemataurai karana lasi. Lagani momo lalonai lau ia dagedage henia bona ena dika lau gwauatao. To lau laloa reana gau ma haida lau karaia be namo, unai amo egu tau ese lau do ia lalokau henia. To ia ese lau bona emai natuna kekenina ia rakatania neganai, lau lalohisihisi bada. Lau laloa gau ta lau karaia lasi o lau hereva lasi dainai, emai headava ia dika.”

Margarita bona Jane bamona, reana oi danu be emu tau ena kara dainai oi lalometau, moni ena hekwakwanai oi davaria, bona emu hetura karana Iehova ida ia dika. Eiava oi be tau, bona emu hahine ena kara dainai oi lalohisihisi bona metau oi davaria. Momokani, Baibel ese ia perovetalaia hegeregerena, ita be “metau dikadia momo do idia vara” negana lalonai ita noho. Inai peroveta herevana ese ia hahedinaraia inai “nega ena dokona dekenai,” ruma bese momo lalonai lalokau do ia noho lasi. Haida be Dirava ena hesiai gaukara do idia karaia koikoi. (2 Tim. 3:​1-5) Keristani taudia momokanidia dekenai danu be unai bamona hekwakwanai idia vara. Unai dainai, bema emu tau o hahine ese oi ia hahisia, dahaka ese oi ia durua diba oi haheauka totona?

Iehova Oi Tohotohoa

Matamanai, reana do oi gwau: “Dahaka dainai lau lalokau henia tauna be unai bamona ia karaia bona lau ia hahisia bada?” Reana iena kara dika dainai, oi laloa unai be oiemu kerere.

To laloatao, goevadae tauna Iesu danu be ia abidadama henia bona ia lalokau henia tauna ese ena ladana ia hadikaia. Iesu be ia guriguri murinai, ena turana namodia haida ia abia hidi, aposetolo taudia ai idia lao totona. Ita gwau diba, aposetolo taudia 12 be Iehova ena hesiai taudia namodia. Unai dainai, Iuda be “Iesu ena mase dala ia karaia” neganai, Iesu be ia lalohisihisi bada. (Luka 6:​12-​16) To, Iehova ia gwau lasi, unai be Iesu ena kerere.

Momokani, headava taudia ibounai be idia goevadae lasi. Nega momo idia kerere diba. Salamo torea tauna ia gwau: “Bema oi ese aiemai kara dika ibounai oi duahia neganai, daika ese oiemu kota lalonai ia kwalimu diba?” (Sal. 130:⁠3) Unai dainai, namona be tau bona hahine be Iehova idia tohotohoa, idia hekwarahi ta ta edia dika idia gwauatao totona.​​—⁠1 Pet. 4:⁠8.

To, “Dirava ese ita ibounai ta ta be iseda kara hegeregerena do ia hahemaoro henia.” (Roma 14:​12, NW ) Bema tau o hahine be hanaihanai hereva mirodia ia gwauraia o ia dagedage, Iehova ese iena kara hegeregerena do ia hahemaoro henia. Iehova be dagedage bona hereva mirodia ia inai henia dainai, tau bona hahine idia lalokau heheni bona hemataurai heheni be gau badana. (Sal. 11:5; Efe. 5:​33; Kol. 3:​6-8) Momokani, bema Keristani tau o hahine be hanaihanai ena adavana ia dagedage henia bona ena kara ia haidaua lasi, Keristani kongrigeisen amo idia atoa siri be namo. (Gal. 5:​19-​21; 2 Ioa. 9, 10) Unai dainai, elda taudia dekenai emu adavana ena kara dika oi herevalaia neganai oi lalohisihisi lasi. Oibe, Iehova be hisihisi taudia ia hebogahisi henia.

Bema headava tau o hahine ia heudahanai, ia be ena adavana sibona lasi, to Iehova ia kara dika henia danu. (Mat. 19:​4-9; Heb. 13:⁠4) Namona be Baibel ena hereva ia badinaia tau o hahine ia gwau lasi ena kerere dainai ena adavana ia heudahanai.

Oi laloatao gauna be inai: Iehova be emu hemami ia diba. Iehova ia gwau ia be Israela besena ena adavana bamona, bona Baibel lalonai Iehova ena hereva momo ese idia hahedinaraia Iehova ia lalohisihisi badina Israela besena be lauma dalanai idia heudahanai bamona. (Isa. 54:​5, 6; Ier. 3:​1, 6-​10) Unai dainai namona be inai oi diba, bema emu adavana ena kara dainai oi tai neganai, Iehova be emu taitai ia itaia. (Mal. 2:​13, 14) Ia diba oi ese heduru bona lalogoada oi abia be namo.

Iehova Ena Heduru Daladia

Dala ta be, Iehova be Keristani kongrigeisen amo heduru ia henia. Jane be unai bamona heduru ia abia. Ia gwau: “Sekit naria tauna be egu lalometau negana lalonai ia vadivadi. Ia diba lau lalometau bada badina egu adavana ia ura emai headava ia hadokoa. Sekit naria tauna be lau ia hagoadaia 1 Korinto 7:​15 ena hereva lau laloa dobu totona. Unai bamona Baibel siridia bona iena hagoadaia herevadia ese egu lalomamina ia hanamoa bona lalomaino lau abia.”b

Ita herevalaia taihuna, Margarita, ia diba Iehova be Keristani kongrigeisen amo heduru ia henia. Margarita ia gwau: “Egu tau be ena kara amo ia helalo-kerehai lasi dainai, egu natudia lau abia bona siti ma ta dekenai ai lao. Unai siti dekenai ai ginidae neganai, daiutu rua ai rentaia. Dina iharuana ai, lau be mai taitai danu baege amo emai dabua lau kokia lalonai, ta be iduara dekenai ia pidipidi. Lau laloa unai be ruma ena biaguna. Lau hoa badina iduara lau kehoa neganai, unai be taihu ta, bona guna ia be egu sinana ia stadi henia bona emai ruma bese ia durua hereva momokani ai dibaia totona. Ia be ruma hahinena ena stadi karaia totona ia mai, to unuseniai lau ia davaria. Ia lau itaia neganai, egu matana ranu ia diho bona lalogoada lau abia. Lauegu hekwakwanai be ia dekenai lau herevalaia neganai, ai tai hebou. Maoromaoro dala ia karaia, unai dina ai kongrigeisen hebou dekenai ai lao. Kongrigeisen taudia be ai idia welkam henia, bona elda taudia ese egu ruma bese idia durua ai goada noho totona.”

Ma Haida ese Heduru Idia Henia Dalana

Momokani, kongrigeisen taudia be dala idauidau ai heduru idia henia diba. Hegeregere, Margarita ese moni gaukara ia tahua neganai, kongrigeisen ai ruma bese ta be Margarita idia hamaoroa ena natudia be sikuli murinai idia giroa mai neganai do idia naria.

Margarita ia gwau: “Lau moalelaia bada gauna be, haroro negadiai tadikaka bona taihu ese lau bona egu natudia idia bamoa ai gaukara hebou totona.” Unai bamona heduru amo, tadikaka taihu be ta ta dekenai heduru idia henia, bona ‘Keriso ena taravatu idia badinaia.’​​—⁠Gal. 6:⁠2.

Ma haida edia kara dika dainai idia hisihisi taudia be inai bamona heduru namodia idia abia neganai, idia moale. Monique ena tau ese natudia foa ia rakatania sibona lasi, to ena abiatorehai 15,000 dola ia rakatania Monique ese ia haloua totona. Monique ia gwau: “Tadikaka taihu edia kara be namo herea. Idia ese lau idia durua dainai egu hekwakwanai lau hanaia. Lau laloa Iehova ese unai bamona tadikaka taihu namo hereadia ia henia, badina idia ese egu natudia idia naria danu. Unai bamona heduru dainai, egu natudia be orea lalonai idia goada bona lo taudia ai idia lao, bona unai lau moalelaia. Heduru lau tahua neganai, elda taudia ese lau idia durua. Lau hereva neganai, idia kamonai namonamo.”​​—⁠Mar. 10:​29, 30.

Oibe, tura korikorina be do ia diba edena nega be nega namona ma ta ida ena hekwakwanai idia herevalaia hebou totona. (Had. 3:⁠7) Margarita ia gwau: “Kongrigeisen matamatana ai, nega momo taihu haida ida lau herevahereva neganai, ai be haroro gaukara, emai Baibel stadi bona emai natudia ai herevalaia, to egu hekwakwanai lau herevalaia lasi. Lau moale badina egu hekwakwanai gunadia idia henanadailaia lasi, to lau idia durua egu mauri matamatana lau moalelaia totona.”

Emu Adavana Ena Kara Dika Davana Oi Henia Lasi

Nega haida, reana do oi gwau: ‘Reana egu kara be namo lasi dainai, egu adavana be kara dikadia ia karaia.’ Eiava do oi gwau: ‘Egu adavana ena kara dikadia dainai hisihisi lau davaria.’ Unai bamona lalohadai kereredia ese oi ia hamanokaia bena Iehova oi rakatania diba. Hegeregere, reana oi ura dala oi tahua emu adavana ena kara dika davana oi henia totona.

Bema oi laloparara oi be lalohadai kererena oi abia matamaia, namona be Iosua bona Kaleba edia haheitalai oi laloa. Unai abidadama taudia be edia mauri idia laloa lasi to Gwauhamata Tanona idia spai totona idia lao. To spai taudia ma haida be Iehova idia abidadama henia lasi dainai, taunimanima idia hakaua kerere, Iehova idia kamonai henia lasi totona. Iosua bona Kaleba ese Israela taudia idia hagoadaia Iehova do idia abidadama henia neganai, haida idia ura nadi amo Iosua bona Kaleba idia hodoa mase. (Num. 13:⁠25–​14:10) Israela taudia edia kara dainai, Iosua bona Kaleba be edia kerere dainai lasi, to ma haida edia kerere dainai lagani 40 lalonai Israela besena ida tano gagaena dekenai idia loaloa.

Ena be reana Iosua bona Kaleba idia lalohisihisi, to idia ura lasi edia tadikaka edia kerere idia laloa hanaihanai. Idia be Iehova ena hesiai gaukara sibona idia laloa bada. Lagani 40 murinai, Iosua, Kaleba, bona Levi taudia be tano gagaena idia rakatania bona Gwauhamata Tanona dekenai idia vareai.​​—⁠Num. 14:​28-​30; Ios. 14:​6-​12.

Momokani, reana emu adavana ena kara dainai, nega daudau lalonai do oi lalohisihisi. Reana emu headava ia dika dainai, hisihisi idauidau bona moni ena hekwakwanai oi davaria. To oi lalometau lasi, bona oi laloatao gauna be inai: Iehova be ena taravatu idia utua bona idia helalo-kerehai lasi taudia do ia panisia, idaunegai tano gagaena dekenai idia kamonai lasi Israela taudia edia haheitalai ese unai ia hahedinaraia.​​—⁠Heb. 10:​30, 31; 13:⁠4.

Oi Haheauka Diba!

Nega ibounai lalohadai kereredia oi negea, bona Iehova ena lalohadai sibona oi abia. Jane ia gwau: “Kaset dekenai idia rekodia The Watchtower bona Awake! edia hereva ese lau idia durua lau haheauka totona. Danu kongrigeisen heboudia amo goada lau abia. Hebou ena kahana idauidau lau durua karana ese lau ia durua egu hekwakwanai lau laloa momo lasi totona. Haroro gaukara amo goada lau abia danu. Ma haida lau durua Iehova do idia abidadama henia neganai, unai ese egu abidadama ia hagoadaia danu. Bona haida lau stadi henia karana ese lau ia durua mai anina bada gaudia lau laloa totona.”

Ita herevalaia taihuna, Monique, ia gwau: “Hanaihanai hebou lao henia karana bona haroro gaukara ese lau ia durua lau haheauka totona. Egu ruma bese lalonai bona kongrigeisen lalonai hetura karana ia noho. Egu hisihisi amo egu manoka gaudia lau lalopararalaia. Hahetoho lalonai Iehova ese lau ia durua lau haheauka totona.”

Oi danu be unai bamona hahetoho lalonai oi haheauka diba. Ena be emu adavana ena kara dika ese oi ia hahisia bada, to oi hekwarahi Paulo ena sisiba oi badinaia totona, ia gwau: “Kara namodia ita karaia be namo, ita hesiku lasi. Bema ita manoka lasi, nega do ia ginidae huahua do ita abia.”​​—⁠Gal. 6:⁠9.

[Footnotes]

[Picture on page 31]

Edia adavana ese idia rakatania taudia be haroro gaukara ai idia bamoa taudia edia heduru idia moalelaia