“Hari Dirava Umui Diba” Dainai, Dahaka Do Umui Karaia?

1. Dahaka dainai pailot be peleini ia sekea neganai, lista ta ia badinaia?

PAILOT be peleini ia do taria lasi neganai, ia be hanaihanai peleini ia sekea namonamo guna. Ia ese lista ta ia badinaia, unai amo gau ibounai ia sekea diba. Bema peleini ia sekea namonamo lasi, gabeai aksiden ia vara diba. Danu, ena be ia be pailot namona, to unai lista ai idia noho gaudia ibounai do ia sekea be namo.

2. Dahaka ita sekea be namo?

² Pailot be lista ta ia badinaia hegeregerena, oi danu emu abidadama oi sekea totona, lista ta oi badinaia be namo. Unai amo nega dikadia ai emu abidadama be do ia goada noho. Ena be vanegai sibona ita bapatiso o lagani momo hereva momokani lalonai ita noho, to namona be iseda abidadama ita sekea loulou. Bema unai bamona ita karaia lasi, vadaeni hahetoho aukana ta ia vara neganai, iseda hetura karana Iehova ida ia dika diba. Baibel ia gwau: “Bema tau ta ia laloa ia gini goada noho, namona be ia naria namonamo, dika ia moru.”​—⁠1 Kor. 10:12.

3. Galatia kongrigeisen taudia ese dahaka idia karaia be namo?

³ Iesu ena mauri davalaia boubouna dainai, Keristani taudia be dala matamatana ta ai Dirava idia dibaia diba. Unai dala matamatana be inai, taunimanima be Dirava ena natudia ai idia lao diba! To, Galatia kongrigeisen taudia ese edia abidadama idia sekea loulou be gau badana. (Gal. 4:9) Edia kongrigeisen taudia haida idia gwau, Keristani taudia be kara maoromaoro taudia ai idia lao diba, bema Mose ena Taravatu idia badinaia noho. To, Dirava be unai Taravatu ia kokia vadaeni, unai dainai kongrigeisen lalonai idia noho Idau Bese taudia be unai taravatu ese ia biagua lasi! Namona be Galatia kongrigeisen ai Iuda bona Idau Bese taudia be hereva momokani lalonai idia goada idia lao. Bona do idia laloparara Dirava ena matanai, taunimanima ese Mose ena Taravatu idia badinaia be anina lasi.

DIRAVA DIBAIA TOTONA ITA KARAIA GAUDIA

4, 5. Paulo ese Galatia taudia dekenai edena sisiba ia henia? Dahaka dainai ita dekenai iena revareva be mai anina bada?

⁴ Aposetolo Paulo ese Galatia taudia dekenai ia torea revarevana be Keristani taudia ibounai ia hadibaia, Baibel amo idia dibaia hereva momokani do idia rakatania lasi. Ita rakatania vadaeni gaudia dekenai ita giroa lou lasi be namo. Paulo ese Galatia taudia dekenai ia torea revarevana ese ita ibounai ia durua, Iehova ita badinaia noho totona.

⁵ Ita ibounai ese Iehova ita hesiai henia matamaia negana ita laloatao be namo. Inai henanadai rua mani oi laloa: Bema oi ura bapatiso oi abia, dahaka gaudia oi karaia guna? Oi bona Dirava umui diba heheni negana oi laloatao, a? Unai be moale negana, badina Dirava ese oi ia durua hahediba hereva koikoidia oi dadaraia totona.

6. Inai stadi lalonai edena lista do ita herevalaia?

⁶ Ita be hereva momokani ita dibaia neganai, kara nain ita karaia. (Maua ladana “Bapatiso Totona Ita Karaia Gaudia ese Ita Idia Durua Ita Tubu Noho Totona” itaia.) Hanaihanai unai lista ita sekea be namo. Unai amo iseda abidadama do ia goada bona tanobada gaudia dekenai do ita giroa lou lasi. Pailot be hanaihanai ena lista ia sekea guna bena gabeai peleini ia taria hegeregerena, ita danu be hanaihanai eda lista ita sekea be namo.

DIRAVA IA DIBA TAUDIA BE IDIA GOADA IDIA LAO

7. “Hereva momokani” be dahaka? Bona dahaka dainai sibona ita sekea be namo?

⁷ Pailot be peleini ia do taria lasi neganai, gau haida ia sekea namonamo guna. Unai hegeregerena, namona be ita danu ese sibona ita sekea, ita be hereva momokani ai ita goada noho, eiava lasi. Paulo be Timoteo dekenai ia gwau: “Lau amo oi kamonai hereva momokani ena lalohadai badana be oi dogoatao noho mai abidadama bona mai lalokau ida, badina Keriso Iesu ida oi hakapua.” (2 Tim. 1:13) Paulo ese ia gwauraia “hereva momokani” be Baibel lalonai idia noho. (1 Tim. 6:3) Laulau penia tauna ta ese ia torea laulau ese ita do ia durua, gau ta ena toana ita lalopararalaia totona. Unai hegeregerena, “hereva momokani” ese ita do ia durua, Iehova ena ura ita dekenai ita lalopararalaia totona. Hari, bapatiso totona ita karaia gaudia do ita herevalaia. Bona do ita sekea, ita be hereva momokani ena dala ita badinaia noho, eiava lasi.

8, 9. (a) Dahaka dainai eda diba ita habadaia noho bona eda abidadama ita hagoadaia noho be mai anina bada? (b) Dahaka dainai ita goada ela bona lo Keristani tauna ai ita lao, be mai anina bada? Bona edena dala ai unai be au ena tubu dalana hegeregerena?

⁸ Ita karaia gauna ginigunana be diba ita abia, bena unai amo eda abidadama ia goada. To, namona be unai diba ita habadaia noho bona eda abidadama ita hagoadaia noho. (2 Tes. 1:3) Danu, ita bapatiso murinai, eda hetura karana Dirava ida ita hagoadaia noho be gau badana.

⁹ Unai be au ta ena tubu dalana ida ita hahegeregerea diba. Au ia tubu dalana be hoa gauna, badina ena ramuna idia goada neganai, au be ia lata herea. Hegeregere, Lebanona ena sida au hairaidia haida edia lata be stori 12 rumana ena lata bamona. Unai au tamona ena gabana be bada dainai, mita 12 varona tamona amo idia hagegea diba. (Sol. 5:15) Matamanai, au be ia tubu haraga. To, ena ramuna be tano lalonai idia diho bona au amo idia daudau neganai, au ia lata bona ena gabana ia bada. Gabeai, au ia tubu dalana ita itaia haraga lasi. Ita Keristani taudia be hereva momokani lalonai ita goada ita lao karana be unai bamona danu. Baibel ita stadilaia matamaia neganai, reana eda mauri lalonai gau momo ita haidaua, bena ita bapatiso. Hereva momokani lalonai ita goada ita lao karana be kongrigeisen taudia ese idia itaia diba. Reana ita painia o kongrigeisen ai maduna haida ita abia. Lagani momo murinai, reana hereva momokani lalonai ita tubu noho karana be ma haida ese idia itaia haraga lasi. To, namona be ita ibounai ese eda diba bona abidadama ita habadaia noho “ela bona tau badana bamona ai ita lao,” anina be lo Keristani taudia ai ita lao. (Efe. 4:13) Unai dainai, ita goada ela bona lo Keristani tauna ai ita lao neganai, unai be hegeregere uhe maragina ta be gabeai au badana ta ai ia lao bamona.

10. Dahaka dainai lo Keristani taudia be hereva momokani lalonai idia tubu noho be namo?

¹⁰ Hereva momokani lalonai ita tubu noho be gau badana. Baibel amo ita abia diba bona eda abidadama be au ena ramuna bamona, ita idia durua ita gini goada totona. To, namona be iseda diba ita habadaia, bona eda abidadama ita hagoadaia noho. (Aon. 12:3) Tadikaka taihu momo be unai bamona idia karaia noho. Lagani 30 mai kahana lalonai elda gaukara ia karaia tadikaka ta ia gwau, ia be hereva momokani lalonai ia do tubu noho. Ia gwau: “Baibel ena hereva lau ura henia bada. Lau davaria Baibel ena hakaua herevadia bona taravatu be dala idauidau ai lau badinaia diba. Danu, egu haroro gaukara lau moalelaia noho.”

EMU HETURA KARANA DIRAVA IDA OI HAGOADAIA

11. Edena dala ai iseda hetura karana Iehova ida ita hagoadaia diba?

¹¹ Hereva momokani lalonai ita goada ita lao totona, Iehova kahirakahira ita lao noho be gau badana. Natu ta be tama lalokauna kahirakahira ia noho, eiava ita be eda tura namona ta ida ita noho hegeregerena, Iehova ia ura ia kahirakahira ita noho. Unai neganai, do ita mamia ia be ita ia lalokau henia bona ia ura ita ia gimaia. To, iena lalokau bona gimaia karana ita mamia totona, nega daudau lalonai gau haida ita karaia be namo. Unai dainai, namona be dina ta ta ai nega oi atoa Baibel, magasin, buka, bona buklet oi duahidia. Unai ese oi do ia durua, Iehova oi dibaia namonamo bona emui hetura karana do ia goada.

12. Dahaka ita karaia be namo iseda hetura karana Dirava ida ia goada totona?

¹² Eda guriguri bona hebamo namona ese ita idia durua diba, eda hetura karana Dirava ida ia goada totona. (Malaki 3:16 duahia.) Dirava ena turadia be ia idia guriguri henia neganai, “edia guriguri” ia kamonai. (1 Pet. 3:12) Guriguri amo Iehova ena heduru ita noia neganai ia kamonai, unai dainai namona be guriguri karana ita hadokoa lasi. (Roma 12:12) Bema Dirava ena heduru ita noia lasi, iena turana ai ita lao diba lasi. Bema Dirava guriguri henia karana ita hadokoa, ia amo goada do ita abia lasi. Reana, inai tanobada dikana ai ita davaria hekwakwanai dainai ita lalomanoka diba, eiava hedibagani ta dainai kerere ita karaia diba. To, bema heduru totona Dirava ita noia, ia be mai ena ura ida ita do ia durua. Iehova oi guriguri henia neganai, ia be emu turana namona ta bamona oi hereva henia, a? Emu guriguri karana oi hanamoa diba, a?​—⁠Ier. 16:19.

13. Dahaka dainai hanaihanai hebou ita lao be gau badana?

¹³ Ita ese kongrigeisen ita bamoa noho be namo, unai amo Iehova idia tura henia taudia ita bamoa diba. Ia ese idia ia lalokau henia, badina ia idia “abidadama henia” noho. (Nah. 1:7) Tanobada dikana ai ita noho dainai, tadikaka taihu ita bamoa be gau badana, unai amo ta ta ita hagoadaia ita gini goada totona. Danu, idia ese ita do idia hagoadaia ma haida dekenai lalokau, bona “kara namodia” ita hahedinaraia totona. (Heb. 10:24, 25) Bema kongrigeisen taudia ita bamoa lasi, Paulo ena sisiba ita badinaia be auka. Unai dainai, hanaihanai hebou ita lao bona ita haere be gau badana.

14. Dahaka dainai hanaihanai ita noho hegaegae ita helalo-kerehai bona eda kara ita haidaua totona?

¹⁴ Keristani tauna ai ita lao neganai, ita helalo-kerehai bona eda kara dika ita rakatania. To, namona be hanaihanai ita noho hegaegae ita helalo-kerehai, bona eda kara ita haidaua totona. Badina ita be goevadae lasi taudia bona mai eda manoka gaudia, bona nega haida kara dika do ita karaia. Kara dika be gaigai ta bamona ia noho hegaegae ita ia koria totona. (Roma 3:9, 10; 6:12-14) Namo lasi ita laloa ita be kerere ita karaia diba lasi. To, Iehova be ita dekenai ia haheauka, bona nega ia henia eda manoka gaudia ita hanaia bona eda kara ita haidaua totona. (Fili. 2:12; 2 Pet. 3:9) Namona be emu nega bona goada oi gaukaralaia, Iehova oi hesiai henia totona. Bona namo lasi oi sibona emu ura oi atoa guna. Taihu ta ia gwau: “Lau be hereva momokani lalonai lau vara, to lau tubu daekau neganai Iehova lau gari henia bada, bona lau laloa ia lau hamoalea diba lasi.” Daudau lasi murinai, taihu ia manoka bona kerere momo ia karaia. Ma ia gwau: “Unai bamona ia vara badina ena be Iehova lau lalokau henia, to ia lau diba namonamo lasi.” Unai dainai, Dirava ena heduru ia noia bona ena mauri ai gau haida ia haidaua. Ia gwau: “Lau davaria Iehova ese lau be natuna ta bamona ia hakaua, bona hanaihanai mai hebogahisi ida lau ia durua, egu hekwakwanai ta ta lau hanaia totona.”

15. Iesu bona Iehova be dahaka idia itaia bona moalelaia?

¹⁵ Dirava ena aneru ese Petero bona aposetolo haida ia hamaoroa, sivarai namona do idia “herevalaia noho.” (Kara 5:19-21) Eda abidadama ia goada totona, namona be ita sekea bema wiki ta ta ai ita be haroro gaukara ita karaia. Iesu bona Iehova be eda abidadama karana idia itaia, bona eda haroro gaukara idia moalelaia. (Apok. 2:19) Haroro gaukara be iseda mauri ena kahana badana ta ai ita halaoa be namo.

16. Dahaka dainai nega ibounai iseda gwauhamata Dirava dekenai ita laloa be namo?

¹⁶ Nega ibounai emu gwauhamata Dirava dekenai oi laloa be namo. Iseda hetura karana Iehova ida be mai anina bada gauna. Iehova ia diba daidia be iena turadia. (Isaia 44:5 duahia.) Namona be emu hetura karana Iehova ida oi sekea loulou, bona ia oi noia emui hetura karana ia goada noho totona. Danu, emu bapatiso dinana ena deit oi laloatao be namo. Emu bapatiso karana amo ma haida dekenai oi hahedinaraia, emu mauri be Iehova dekenai oi gwauhamatalaia vadaeni. Unai bamona oi karaia neganai, do oi laloatao unai gwauhamata be mai anina bada.

IEHOVA KAHIRAKAHIRA ITA NOHO TOTONA ITA HAHEAUKA BE NAMO

17. Dahaka dainai Iehova kahirakahira ita noho totona ita haheauka be namo?

¹⁷ Paulo ese Galatia tadikaka ia hamaoroa do idia hesiku lasi. (Gal. 6:9) Ita danu ita haheauka be namo, badina hekwakwanai momo do ita davaria. To Iehova ese ita do ia durua. Ena be hekwakwanai idia ore lasi, to Dirava ena lauma helaga totona oi guriguri noho, unai amo oi do ia durua maino bona moale oi davaria totona. (Mat. 7:7-11) Laloatao: Iehova ese manu ia naridia, to ita be manu ita hereaia. Unai ese ia hamomokania, Iehova be ita ia lalokau henia bada. Ia ura oi do ia naria badina oi be ia oi lalokau henia, bona ia dekenai emu mauri oi gwauhamatalaia. (Mat. 10:29-31) Ena be hekwakwanai badadia oi davaria, to oi hesiku lasi. Namo lasi hereva momokani oi rakatania bona guna oi dadaraia gaudia dekenai oi giroa lou. Hari, Iehova be ita ia diba dainai, hahenamo momo ita abia.

18. Dirava idia diba vadaeni taudia ese dahaka idia karaia be namo?

¹⁸ Herevana oi be vanegai sibona o idaunegai oi bapatiso, dahaka oi karaia be namo? Namona be Iehova oi dibaia noho bona hereva momokani lalonai oi tubu noho. To, namo lasi oi laloa oi be Dirava oi diba namonamo dainai, emu hetura karana ia ida oi hanamoa noho be anina lasi. Ita herevalaia vadaeni lista dekenai idia noho gaudia be nega ta ta ai, oi sekea be namo. Unai bamona oi karaia neganai Iehova, iseda lalokau Tamana, Turana bona Dirava kahirakahira do oi noho.​—⁠2 Korinto 13:5, 6 duahia.