Magasin Gaukaralaidia Namonamo
1 Niuspepa idia hoihoilaia sitoadia dekenai oi lao neganai komiki magasin idauidau bona saiens ia herevalaia magasin momo do oi itadia. Unai magasin ibounai do oi duahia haorea diba lasi. Unai magasin haida dekenai be heduru herevadia haida idia noho, to idia momo be namo lasi. Unai magasin momo be idia dika momokani dainai namona be ita duahidia lasi be gau badana.
2 To Gima Kohorona bona Noga! magasin be idia idau momokani. Unai magasin rua ese hereva momokani idia hahedinaraia bona Dirava ena lalokau dainai idia kamonai taudia be hahemauri do idia abia.
3 Noga! magasin be taunimanima idauidau edia lalona ia veria, badina gau idauidau ia herevalaia. Unai magasin ta ta iboudiai edia rau 4 ai inai hereva ia gwauraia, “ia ese ruma bese ibounai ia durudia diba.” Hereva idauidau ia hahedinaraia; taunimanima, tomadiho bona saiens ena kara ia tahua danu. Idia vara gaudia edia anina ia hahedinaraia. Gau badana be inai: “Unai magasin ese taunimanima ia durudia do idia diba momokani, gau ibounai ia karaia Diravana ese maino bona noho namo tanobada matamatana do ia karaia.”
4 Noga! magasin haida dekenai lalo-goada lasi ena hekwakwanai bona lalo-metau hanaia daladia haida idia gwauraia, hari inai negai taunimanima ese unai gaudia idia lalo-hekwarahilaia momo. Unai bamona lalo-hekwarahi karadia ese taunimanima momo edia lalona ia hahisihisia momokani. Bema unai magasin be idia dekenai ita hahedinaraia bona Bible ena sisiba ita hahedinaraia neganai, reana do idia ura kamonai. Tanobada matamatana dekenai taunimanima be unai bamona hekwakwanai do idia abia diba lasi herevadia be unai magasin amo ita gwauraia hedinarai neganai, do idia ura kamonai danu.
5 Tanobada hegegemadai Gima Kohorona be lada bada magasin ta, badina ia ese Dirava ena Basileia sivarai namona bona Paradaiso do ia havaraia sivaraina ia gwauraia. December 1 ena magasin ena hereva badana ta be bese idauidau edia kara ia herevalaia, bona bese idaudia dadaraia karana ena badina ia gwauraia. Tanobada hegegemadai unai hekwakwanai be ia bada, unai dainai haroro gaukara dekenai unai hereva ita gwauraia neganai momo do idia ura kamonai. Gima Kohorona magasin momo dekenai ruma bese ena mauri ia gwauraia danu, unai magasin ena hereva ese ita idia durua mauri ena lalo-hekwarahi gaudia momo idia lalohisihisilaia ruma besedia dekenai hereva ita hamatamaia totona.
6 Ita ura kamonai taudia ese hanaihanai unai magasin namodia rua do idia abia. Unai magasin ena namo be taunimanima danu ita kikilaia hebou neganai, namona be edia toana ita itaia idia be unai magasin idia ura henia momokani, eiava. Kamonai tauna oi davaria neganai, reana hanaihanai magasin matamatadia idia mai neganai ia dekenai oi abia lao ena lalona oi veria noho totona. Danu unai tau eiava hahine oi hamaoroa sabskripsen be ena post opesi dekenai do ia abia, lagani tamona lalonai kopi 24 idia mai ena davana be K6.00.
7 Namona be iseda magasin ita gwauraidia namo, badina edia namo ita diba dainai. Unai be gau namona ita dekenai, bona namona be Keriso bamona haida dekenai ita hadibadia danu.— Hereva Lada-isidia 3:27; Heb. 13:16.