Dala Dekenai Haroro Gaukara Namona amo Kamonai Taudia Tahudia
1 Iesu ese ena hahediba taudia ia hadibadia kara namo taudia idia tahudia Basileia ena sivarai namona do idia kamonai henia diba totona. (Mat. 10:11) To, hari inai negai, gabu idauidau momo dekenai, taunimanima haida sibona be edia ruma dekenai ita davaria. Vadaeni, ita davaria lasi kara namo taudia be edena bamona do ita davaridia diba?
2 Ruma-ta-ruma-ta gaukara dekenai ita davaria lasi taudia be reana haroro gaukara dala dekenai ita davaridia diba. Haroro gaukara dala dekenai karaia totona, ita gini diba basi gabudiai, mai ena sekuriti ruma badadia kahirakahira dekenai, maketi, bona taunimanima idia loaloa momo gabudiai.
3 Haroro gaukara dala dekenai idia gwauraia neganai, haida idia gari. Reana idia ura lasi unai gaukara idia karaia badina idia be hemarai taudia, eiava idia laloa Basileia ena sivarai idia ura lasi kamonai taudia ese do idia dadaraidia. To nega momo idia lalo-hekwarahi kava. Unai gaukara idia manadalaia taudia idia gwau, dala dekenai ita haroro bona ruma ta ruma ta dekenai ita haroro ena hekwarahi be idia hegeregere. Oibe, idia gwau dala dekenai taunimanima ita hereva henidia neganai idia hoa lasi, badina kara idauidau dainai taunimanima be dala dekenai idia hereva henidia, bona idia haida be dala dekenai idia ura kiki eiava idia kamonai, to reana edia ruma dekenai ita pidipidi neganai idia ura lasi kamonai. Vadaeni, bema sibona ita ‘hagoadaia’ unai gaukara do ita karaia totona, anina namona do ita davaria dainai do ita moale.—1 Tes. 2:2.
4 Haroro gaukara dala dekenai be edena bamona do ita karaia namonamo diba? Ita hegaegae guna be gau badana. Magasin ita duahidia guna, bona do ita davaridia taudia edia lalona veria totona, magasin amo sivarai tamona eiava rua ita abia hidi hegaegae. Sekoni 30 bamona ita hereva be ia hegeregere. Ita ura taunimanima ita hereva henidia, unai dainai, taunimanima momo idia raka lao bona raka mai gabuna dekenai ita gini. Ena be pablisa ma ta be reana kahirakahira ia noho be namo, to ita sibona sibona ita gini be ia namo. Bema pablisa taudia be rua rua idia gini, reana do idia kiki momo bona Basileia ena sivarai idia ura kamonai taudia haida do idia reaia.
5 Gabu tamona dekenai ita gini bona magasin ita hahedinaraidia be namo, to taunimanima dekenai ita raka lao be namo momokani. Namona be taunimanima ita hereva henidia neganai edia matana ita itaia. Mai iseda ura, moale, bona gari lasi dekenai kiki ita hamatamaia toho. Nega haida, ita hereva henia tauna danu ita raka lao ia danu ita kiki totona. Bema ia ura kamonai, magasin ita henia toho. Bema ia ura lasi magasin ia abia, pepapepa ta ita henia.
6 Nega momo, dala namona be hereva kwadogina amo lalona veria henanadai ta eiava hereva ma ta ita hegaegaelaia. Bema idia ura kamonai, edia ladana, address, bona ena telefon namba ita abia, do ita lou henia diba totona. Reana inai bamona do oi hereva diba: “Bema oi ura hereva ma haida do oi kamonai, mai moale danu lau ura oiemu ruma dekenai lau mai eiava dala lau hegaegaelaia diba Witness tauna ma ta do ia mai totona.”
7 Elda ta be dala dekenai ia haroro neganai hahine ta ia davaria, bena hahine ia gwau nega ta lasi ena ruma dekenai Witness taudia ia hereva henidia. Buka ta ia abia bona ia ura Witness taihu ta be nega namona dekenai ena ruma dekenai do ia lao. Bema dala dekenai haroro gaukara ita karaia namonamo neganai, kara namo taudia momo ita davaridia diba.—Kara 17:17.