Hahediba Taudia Halaoa Gaukarana Badana Ita Laloa Noho

¹ Iesu ese tanobada ia do rakatania lasi neganai, ena hahediba taudia ia hagania ‘bese ibounai be diba tahua taudia do idia halaoa’ totona. Ena anina be haroro bona hadibaia gaukarana badana do idia karaia bona tanobada ena kahana ibounai dekenai edia gaukara do idia habadaia. (Mat. 28:​19, 20; Kara 1:8) Idia laloa edia gaukara be metau gauna, idia huaia diba lasi gauna, a? Aposetolo Ioane be unai bamona ia laloa lasi. Lagani 65 lalonai hahediba taudia halaoa gaukarana ia karaia murinai, ia gwau: “Badina be Dirava ita lalokau henia ena anina be inai: Dirava ena taravatu do ita badinaia. Iena taravatu be metau lasi.”​—1 Ioa. 5:3.

² Baibel lalonai idaunegai Keristani taudia edia sivarai ese ia hamomokania hahediba taudia halaoa gaukarana idia karaia goadagoada. (2 Tim. 4:​1, 2) Unai idia karaia badina ia be edia gaukara dainai sibona lasi, to mai lalokau ida idia ura Dirava idia hanamoa bona ma haida dekenai hahemauri helarona idia henia. (Kara 13:​47-49) Unai murinai, hahediba taudia ai idia lao taudia be hahediba taudia halaoa gaukarana idia karaia dainai, aposetolo edia nega lalonai Keristani kongregesen be ia bada ia lao haraga.​—Kara 5:14; 6:7; 16:5.

³ Hahediba Taudia Halaoa Gaukarana Ia Heau Haraga: Hari inai negai hahediba taudia halaoa gaukarana hereadaena ita karaia noho! Ema bona hari, taunimanima milioni momo ese sivarai namona idia abia dae bona idia badinaia. (Luka 8:15) To inai nega ena dokona be ia mai haraga dainai, “hesiai tauna mai ena kamonai, bona mai ena kara maoromaoro” be ita dekenai tulu idauidau ia henia, kudou maoro taudia be hereva momokani idia diba haraga totona.​—Mat. 24:45.

⁴ Lagani 1995 ai, Diba ese Mauri Dekenai Ita Ia Hakaua Lao bukana ita abia, bona unai murinai, lagani 1996 ai, Dirava Ia Ura Dahaka Ita Karaia? buklet ita abia danu. January 15, 1996, Gima Kohorona, rau 14 dekenai, Diba bukana ia herevalaia, ia gwau: “Inai rau 192 bukana be nega kwadogina lalonai idia stadilaia ore diba, bona idia abia dibana amo ‘mauri hanaihanai abia totona taudia’ be Iehova dekenai edia mauri do idia gwauhamatalaia bona idia bapatiso.”​—Kara 13:48.

⁵ June 1996 Iseda Basileia Gaukara pepana lalonai idia udaia gauna, “Diba Bukana amo Hahediba Taudia Halaoa Dalana,” ese inai tahua gauna ia gwauraia: “Emu stiuden ena mauri dalana bona diba hegeregerena, reana karoa momo be . . . hora tamona bamona lalonai, . . . do umui haorea diba, to namo lasi umui karaia haragaharaga. Bema wiki ta ta ai stiuden tauna bona tisa tauna ese stadi ena nega idia reaia lasi, stiuden do ia goada ia lao haraga.” Unai hereva be ma ia gwau: “Ta ese Diba bukana ia stadilaia ore murinai, ita laloa iena kara momokani bona iena Dirava hesiai henia urana do ia hedinarai.” October 1996 Iseda Basileia Gaukara pepana ena Henanadai Mauana dekenai ia gwau: “Ai laloa nega kwadogi murinai, hadibaia tauna namona ese kudou maoro stiuden tauna ia durua bona iena diba do ia hegeregere ena lalona ia hadaia Iehova do ia hesiai henia.”

⁶ Diba Bukana ese Anina Ia Havaraia: Haneulato ta be ia bapatiso neganai, Diba bukana ia stadilaia karana ia herevalaia. Nega daudau, Mauri Hanaihanai bukana ia stadilaia. Diba bukana idia halasia neganai, ia stadi henia taihuna be unai buka matamatana dekenai ia hanaia. Nega daudau lasi murinai, ia lalo-parara kara ta do ia abia hidi be namo, bona unai nega murinai ia goada ia lao haraga. Unai haneulato, hari ia be iseda taihu, ia gwau: “Mauri Hanaihanai bukana ese lau ia durua Iehova lau lalokau henia totona, to Diba bukana ese lau ia durua ia do lau hesiai henia karana lau abia hidi totona.”

⁷ Ma hahine ta ese hereva momokani ia dibaia haraga mani ita laloa. Ena stadi iharuana murinai, sekit naria tauna ia vadivadi neganai, hebou ta totona Kingdom Hall dekenai ia lao. Unai pura ai, ena stadi ihatoina dekenai, sekit naria tauna ia hamaoroa ena mauri be Iehova dekenai ia gwauhamatalaia vadaeni bona ia ura bapatiso lasi pablisa ai ia lao. Elda taudia ida ia hebou, bona gwaumaoro idia henia pablisa ai ia lao totona, bona pura gabena ai ia haroro matamaia. Ena Baibel stadi ia moalelaia momokani dainai, nega sisina ena moni gaukarana amo ia laga-ani, pura tamona lalonai nega rua eiava toi ia stadi bona ena haroro gaukara ia habadaia. Nega haida, stadi tamona lalonai karoa rua eiava toi idia karaia. Ia dibaia gaudia ia badinaia dainai ena kara ibounai ia hanamoa, pura hani lalonai Diba bukana ia stadilaia ore, bona ia goada ia lao dainai ia bapatiso!

⁸ Taihu ta ena adavana be sibona ia gwauraia “abidadama lasi adavana ta.” Dina ta ai, tadikaka ta ese ia nanadaia bema ia ura Diba bukana do ia stadilaia bona ia hamaoroa bema stadi ginigunana murinai eiava ma nega ta ai ia ura stadi ia hadokoa, do ia karaia diba. Ena be ia matamata neganai ia be stiuden namona lasi bona lagani 20 lalonai tomadiho bukana ta ia stadilaia lasi, to unai tau ia gwau do idia stadi. Dahaka ia laloa Diba bukana stadilaia karana dekenai? Ia gwau: “Lau moale badina lau itaia unai Baibel herevalaia bukana ena hereva be idia dobu momokani lasi. Ena hereva be idia hedinarai goevagoeva bona lalo-parara idia havaraia dainai, nega daudau lasi murinai, mai egu ura bada ida egu stadi lau naria. Lau ia hadibaia tauna ese hahediba taudia halaoa gaukarana totona Society ia halasia herevadia ia badinaia namonamo, bona Iehova ena lauma ena heduru dainai, hua hani murinai bapatiso lau abia. Mai momokani ida lau gwau diba, bema hahediba taudia halaoa gaukarana ita ura henia, haroro gaukara dekenai kudou maoro taudia ita tahua noho, Diba bukana bona Society ese idia henia Baibel herevalaia bukadia ma haida ita gaukaralaia, bona gau badana be Iehova ena hakaua herevadia totona ita guriguri, haida do ita durua diba hahediba taudia ai idia lao totona.” Ataiai ai torea sivaraidia be sivarai idaudia momokani. Stiuden taudia momo be hereva momokani idia abia dae haraga lasi.

⁹ Stiuden Taudia be Dala Tamona ai Idia Goada Idia Lao Lasi: Namona be ita abia dae Dirava ena Hereva idia hadibaia taudia bona idia stadilaia taudia edia diba be idauidau. Lauma dalana ai do idia tubu haraga eiava metairametaira sibona. Stiuden taudia haida be idia goada idia lao haraga, to ma haida be unai bamona lasi. Ta be lauma dalana ai do ia tubu iena edukeisen, lauma gaudia ia laloa bada, bona Iehova ia lalokau henia ena bada hegeregerena. Ita stadi henia taudia haida sibona be dina ta ta iboudiai Baibel stadilaia karana “idia ura henia,” idaunegai Berea taudia bamona.​—Kara 17:​11, 12.

¹⁰ Unai dainai April 1998 Iseda Basileia Gaukara pepana lalonai idia udaia gauna, “Baibel Stadi Ma Haida Ita Tahua,” ese inai hereva namona ia gwauraia: “Momokani, Baibel stiuden taudia iboudiai be nega tamona ai idia goada idia lao lasi. Haida be lauma gaudia idia laloa bada lasi, ma haida hegeregerena, bona idia dibaia gaudia idia lalo-pararalaia haraga lasi. Ma haida idia bisi bada herea bona nega idia atoa diba lasi pura ta ta dekenai karoa tamona idia haorea totona. Unai dainai, reana karoa haida be stadi negadia rua o toi lalonai oi haorea be namo, bona ma hua haida do oi gaukaralaia buka oi haorea totona.”

¹¹ Hahediba Taudia Halaoa Gaukarana Idia Karaia Taudia Idia Laloa Namonamo Noho: Gau badana be stiuden tauna ena noho dalana bona ena diba hegeregerena ena stadi ita karaia. Ita idia hagoadaia Dahaka Ita Karaia? buklet dekenai stadi ita hamatamaia dainai, reana hua rua eiava toi lalonai do ita karaia bena gabeai Diba bukana ita stadilaia. Bema June 1996 Iseda Basileia Gaukara pepana lalonai idia udaia gauna ena hadibaia herevadia iboudiai ita gaukaralaia namonamo, reana ma hua 6 eiava 9 lalonai Diba bukana do ita stadilaia ore. Vanegai Diba bukana idia stadilaia matamaia taudia haida be Dahaka Ita Karaia? buklet dekenai idia hanaia Baibel ena hereva badadia idia dibaia haraga totona. Gabeai, Diba bukana dekenai stadi idia hamatamaia lou. Bema stadi be Diba bukana lalonai ita hamatamaia bona idia goada idia lao, reana unai stadi ia ore neganai, Dahaka Ita Karaia? buklet ita stadilaia be namo, bena Dirava ena Hereva ena hadibaia hereva badadia do ita laloa lou. To, namo lasi ita ura stadi ita haorea haraga dainai iseda stiuden tauna be Baibel ena hereva momokani ia lalo-pararalaia namonamo lasi. Namona be stiuden taudia iboudiai edia abidadama matamatana be badina aukana latanai idia haginia.

¹² Ita diba edena nega ai ita noho dainai, namona be harihari ma haida ita durua haraga hereva momokani idia dibaia totona guna ita karaia bamona lasi. Baibel stadi hamatamaia totona ita guriguri sibona lasi, to ita ida idia stadi noho taudia totona ita guriguri danu be namo. Bena iseda moale gauna be ma hahediba taudia momo do ita bapatisoa “ela bona tanobada dokona.”​—Mat. 28:20.