Baibel—Diba Maorona Ena Badina
Histori ai, mauri dala idauidau taudia idia abia dae Baibel be hereva momokani ena badina. Hari taunimanima milioni momo ese ena hadibaia dalana idia badinaia. To haida be Baibel idia dadaraia badina idia laloa ia be anina lasi eiava ia be gori bukana ta. Dahaka oi laloa? Hereva momokani be Baibel ai oi davaria diba, a?
BAIBEL OI ABIDADAMA HENIA DIBA
Edena dala ai oi diba oi be Baibel oi abidadama henia eiava lasi? Mani inai haheitalai oi laloa: Lagani momo lalonai emu turana ta be hanaihanai oi dekenai hereva momokani ia gwauraia neganai, do oi abia dae ena hereva be momokani. Oi laloa Baibel, be oi abidadama henia turana ta bamona, hanaihanai hereva momokani ia gwauraia, a? Haheitalai haida mani ita laloa.
Kara Momokani Taudia
Baibel idia torea taudia be idia kara momokani, edia kerere bona edia manoka gaudia idia gwauraia hedinarai. Hegeregere, peroveta tauna Iona ese ena kamonai lasi karana ia torea. (Iona 1:1-3) Momokani, Iona ena toretore dokona ai, Dirava ese ia matahakani henia dalana ia gwauraia hedinarai, to sibona ena kara ia hamaoromaoroa dalana be ia gwauraia lasi. (Iona 4:1, 4, 10, 11) Baibel idia torea taudia ibounai edia kara momokani amo idia hahedinaraia hereva momokani gwauraia karana idia laloa bada.
Oi Badinaia Dalana
Baibel be nega ibounai dala idauidau ai sisiba namodia ia henia, a? Oibe. Hegeregere, Baibel ese hetura karana namona hanamoa karana ia gwauraia dalana mani oi laloa: “Unai dainai, gau ibounai umui ura taunimanima ese umui dekenai idia karaia hegeregerena, idia dekenai danu unai bamona do umui karaia.” (Mataio 7:12) “Mai manau danu ia haere tauna, ese badu ia koua noho, to hereva auka ese badu ia havaraia noho.” (Aonega Herevadia 15:1) Oibe, Baibel idia torea dinana amo, hari ia be mai ena namo badinaia totona.
Histori
Idia hanaia laganidia ai, Akioleji taudia momo ese guna idia noho taunimanima bona gabu idauidau bona Baibel ese ia gwauraia sivaraidia idia hamomokania. Mani inai haheitalai kwadogina oi laloa. Baibel ia gwau, Nehemia ena negai, Turo taudia (Turo amo idia mai Poinikia taudia) be Ierusalema dekenai idia noho, idia “ese gwarume bona hoihoi gaudia idauidau be hanua badana lalonai idia abia vareai.”—Nehemia 13:16.
Hamomokania gauna ta ia noho inai Baibel siri ia durua totona, a? Oibe. Akioleji taudia ese Israel ai Poinikia kohudia idia davaria, idia laloa unai idaunegai bese rua be hoihoi karana idia karaia. Danu, Jerusalem ai, Mediterranean gwarume ena turia haida idia davaria. Akioleji taudia idia laloa inai gwarume be hoihoi taudia ese kone daudau amo idia abia mai. Unai hamomokania gauna idia tahua namonamo murinai, diba bada tauna ta ia gwau: “Nehemia 13:16 ai, Turo taudia ese Ierusalema ai gwarume idia hoihoilaia herevana be momokani.”
Saiens
Baibel be tomadiho bona histori bukana ta. To saiens gaudia ia herevalaia neganai, iena hereva be saiens ida ia hegeregere. Haheitalai ta mani oi laloa.
Lagani 3,500 gunanai, Baibel ia gwau tanobada be “gau lasi gabuna ena latanai” ia noho. (Iobu 26:7) Unai hereva be idia gwauraia gori sivaraina amo ia idau hegeregere, tanobada be ranu latanai ia noho eiava matabudi badana ese ia huaia. Iobu bukana idia torea bena lagani 1,100 murinai, taunimanima idia do abia dae noho tanobada be ia noho kava lasi, to ia be gau ta latanai ia noho. Lagani 300 gunanai, 1687 ai, Isaac Newton ese graviti dekenai tahua gaukara ia karaia bona ia gwau tanobada be gau ta latanai ia noho lasi. Inai saiens herevana be Baibel ese lagani 3,000 gunanai ia gwauraia herevana ia hamomokania!
Peroveta Herevana
Edena dala ai Baibel ena peroveta herevadia be momokani? Mani haheitalai ta oi laloa: Isaia ese Babulonia ena moru ia perovetalaia.
Peroveta Hereva: Lagani 800 B.C.E. gunanai, Baibel ia torea tauna Isaia ia gwau, Babulonia—gabeai hanua badana ena siahu bada herea gavamanina ai ia lao—be do idia hadikaia ore bona tau ta do ia noho lasi. (Isaia 13:17-20) Isaia ese inai gaukara do ia karaia tauna ena ladana ia gwauraia danu—Kurese. Danu, Kurese ese do ia karaia gauna ia herevalaia, ia gwau sinavai do idia “hakaukaua.” Bona ma ia gwau, hanua badadia edia magu iduara do ia kehoa.—Isaia 44:27–45:1.
Ia Guguru Negana: Lagani 200 bamona Isaia ena peroveta herevana murinai, Perese ena king ese Babulonia idia tuari henia. Iena ladana be, Kurese. Ena be ia auka Babulonia lalonai idia vareai totona, to Kurese ese hanua lalonai ia heau Euperate sinavaina ia gaukaralaia. Ena tatau be koupa badana ta idia geia, sinavai ena aru dalana idia haidaua lao gohu ta dekenai. Unai amo sinavai ia maragi bena Kurese ena tuari taudia be hanua ena magu badinai, sinavai dekenai idia raka lao. Hoa gauna be, Babulonia taudia ese sinavai ia lao henia geiti idia koua lasi! Bena Kurese ena tuari taudia idia vareai bona hanua idia hadikaia.
To, sivarai ta ia noho: Babulonia ia noho kava, a? Lagani handred haida lalonai, taunimanima be unai gabu dekenai idia noho. Hari inai negai Baghdad, Iraq dekenai, Babulonia ena nadi momorudia idia noho, unai ese peroveta herevana ia hamomokania. Oibe, ena be Baibel be vaira negai do idia vara gaudia ia gwauraia, to ena hereva idia vara momokani.