Sekit Hebouhebou Ena Program Matamata
1 Iseda Biaguna ia gwau iena hahediba taudia ese dika idauidau do idia davaria. (Mat. 24:9) Hahetoho idauidau be edena bamona ita lalodia be namo? Dahaka ese ita do ia durua dika idauidau ita haheaukalaia totona? Lagani 2004 ena sekit hebouhebou ena program ese unai henanadai do ia haerelaia. Iena sinado be “Helaro Moalelaia. Dika Idauidau Haheaukalaia.”—Roma 12:12, NW.
2 Kahana Rua mai Edia Hereva Foa: Kahana ginigunana ladana “Mai Haheauka ida Huahua Havaraia” ese huahua ita havaraia daladia do ia herevalaia. Pablisa taudia haida do idia inteviu henidia, edena bamona karaharaga lalohadaina ida haroro bona hadibaia gaukarana idia karaia. Tama sina do idia ura bada kahana ta ladana “Iehova ese Matahakani Ia Henia Neganai” idia kamonai henia, unai kahana ese do ia hahedinaraia edena dala ai tama sina ese edia natudia idia durua diba. Unai hereva foa edia hereva henia tauna ginigabena ese do ia hahedinaraia dahaka ita karaia be namo, unai amo tanobada gaudia ese ita do idia koua lasi bona huahua do ita atoa totona.—Mareko 4:19.
3 Kahana iharuana ena sinado be “Heau Helulu Lalonai mai Haheauka ida Ita Heau.” Unai kahana ese do ia hahedinaraia goevagoeva edena dala ai iseda mauri dalana be heau helulu ta bamona. Dahaka dainai gadara ena taravatu hegeregerena ita heau be namo? Edena bamona ita idia hametaua gaudia ibounai ita negea diba bona mauri totona ita heau helulu neganai ita haheauka bona ita hesiku lasi be namo? Nega korikori ai do idia henia Baibel sisiba herevadia ese ita ibounai do idia durua, mai haheauka ida ita heau noho totona.
4 Haheauka ese Dirava Ena Lalo-Namo Ia Havaraia: Sekit bona distrik naria taudia ese idia henia herevadia idia kamonai bona idia badinaia taudia edia abidadama do ia hagoadaia momokani. Distrik naria tauna ena hereva ta ena ladana be “Ita Haheauka Dainai Dirava Ena Lalo-Namo Ita Abia.” Pablik tok ese inai henanadai do ia haerelaia: Tanobada besedia be daika ena ladana dekenai idia abidadama be namo, bona dahaka idia karaia danu be namo? Hereva dokona, “Umui Haheauka Dainai, Mauri Do Umui Abia,” ese do ia hahedinaraia edena bamona Iesu be kara gageva ia haheaukalaia bona ia lalohisihisi lasi.
5 Laloaboio lasi, emu Haroro Sikuli bukana bona unai pura ena Gima Kohorona oi mailaia totona. Namona be hereva haida oi torea, unai amo oi do idia durua oi kamonai bona vaira negadia ai oi gaukaralaidia diba totona. Gabeai, kongregesen ai hebouhebou ena program do idia riviulaia.
6 Iehova sibona ese inai lauma aniani ena aria ia hegaegaelaia. Umui mai! Umui aniani! Mai moale ida do ita boiboi badabada bema program ibounai ita lao henia bona namo bada ita abia.—Isa. 65:14.