Tiokratik Haroro Sikuli Ena Riviu
Inai henanadai be Tiokratik Haroro Sikuli dekenai do ita herevalaia, February 23, 2004 ia matamaia purana ai. Sikuli naria tauna ese miniti 30 lalonai riviu do ia karaia, unai gaudia be January 5 ia lao February 23, 2004 wiki herevadia dekenai. [Itaia: Bema henanadai edia dokona ai buka ta idia torea lasi, sibona emu tahua karana oi karaia be namo haere oi davaria totona.—Haroro Sikuli bukana, rau 36-7 itaia.]
HEREVA KARANA
1. Dahaka ita karaia diba helai taudia ese ita herevalaia gauna ena namo idia abia totona bona unai ese idia ia durua bada diba? [2, be rau 158 par. 2-4] (1) Iseda hereva ena matamana amo, namona be kamonai taudia ta ta idia laloa unai hereva be idia totona. (2) Idia badinaia daladia be iseda hereva ibounai lalonai ita herevalaia be namo, hereva ena dokona dekenai ita gwauraia sisina sibona lasi. (3) Namona be hereva idia badinaia daladia ita herevalaia dalana amo kamonai taudia edia lalona ita hagoadaia bona ‘lalokau dekena amo kara namodia do idia karaia.’—Heb. 10:24.
2. Dahaka dainai hereva ita abia hidi namonamo be namo? [4, be rau 160 par. 1 bona maua iharuana] Hereva be mai siahu bona lalohisihisi ia havaraia eiava hagoadaia herevadia ia henia diba. (Aon. 12:18, 25) Iseda hereva be mai ena siahu ma haida edia kara dekenai dainai, namona be “hagoadaia herevadia” ita tahua.—Had. 12:10.
3. Korinto Ginigunana 14:9 ai ia hahedinaraia, hereva namona dekenai mai anina bada gauna be dahaka, bona iseda hadibaia karana ai edena bamona unai hakaua herevana ita badinaia diba? [5, be rau 161 par. 1-4] Kamonai taudia ese iseda hereva idia lalo-pararalaia haraga be namo. Abia hidi namonamo bona auka lasi herevadia, bona sentens kwadogidia be mai edia siahu bona auka lasi lalo-parara totona. Idia lalo-pararalaia haraga herevadia ita gaukaralaia neganai, ita hahedinaraia kamonai taudia ita laloa bona ia auka lasi ita gwauraia herevana idia laloatao totona.
4. Mataio 5:3-12 bona Mareko 10:17-21 ai ita itaia bamona, Iesu ena hadibaia dalana dekenai ita tohotohoa diba kara badana ta be dahaka? [6, be rau 162 par. 4] Iesu ena hadibaia lalonai hereva momo ia gaukaralaia lasi. Hereva kwadogina ita gaukaralaia karana amo Hadibaia Tauna Badana ita tohotohoa diba. Iseda hereva ese iseda lalohadai ia hahedinaraia be namo, ia hunia lasi. Hereva momo ita gwauraia kava lasi neganai, ma haida ese diba maoromaoro idia abia bona dogoatao be auka lasi.
5. Iseda haroro gaukara ai eiava kongregesen hebou ai ita haere neganai, dahaka dainai hereva ita hamauria, hemami idia havaraia, bona lalona ai laulau idia havaraia herevadia ita ura gaukaralaia be namo? (Mat. 23:37, 38) [7, be rau 163 par. 3–rau 164 par. 1] Lalohadai idia hahedinaraia goevagoeva herevadia bona lalona ai laulau idia havaraia herevadia ese kamonai taudia ia durua ita herevalaia gauna idia laloa namonamo totona, unai amo unai gaudia be ita bona idia dekenai ia mauri bamona. Ita abia hidi namonamo hereva ese kudouna ia hamarerea diba, helaro ia henia, lalohisihisi tauna ia hagoadaia, bona Havaraia Tauna dekenai lalokau ia habadaia.
HEREVA NAMBA 1
6. Hereva ta ena sinado be dahaka, bona hereva ta henia totona hereva oi abia hidi bona hegaegaelaia neganai, edena bamona sinado ita laloa noho ese ita ia durua diba? [1, be rau 39 par. 6–rau 40 par. 1] Hereva ta ena sinado be oi henia hereva ibounai lasi, to ia be oi herevalaia gauna ena lalohadai badana eiava kahana badana. Sinado lalonai mai anina bada herevadia ita laloa bona buka lalonai tahua karana ita karaia lalonai sinado ita laloa, unai ese ita do ia durua ita hegaegaelaia gauna ena badina ita laloa noho totona.
7. (a) Lauma dalanai ita goeva ena anina be dahaka, bona dahaka dainai ita gwau diba lauma dalanai goeva karana be mai anina bada? Lauma dalanai ita goeva ena anina be tomadiho momokani ita badinaia bona tomadiho koikoi amo ita gini siri, ia lalonai ita vareai lasi eiava ia be tomadiho momokani ida ita hakapua lasi. Mauri hanaihanai ita abia totona lauma dalanai do ita goeva noho. (2 Kor. 6:17; Apok. 18:4) (b) Inai tanobada ena goeva lasi karadia abia dae karana be Keristani taudia ese edena bamona idia dadaraia diba? [2, w02 2/1 rau 5-6] Goeva lasi karadia abia dae karana be ta ena moale karadia bona dabua abia hidi karana dekenai ia hahedinaraia diba. Baibel ena kara maoromaoro taravatudia idia utua moale karadia be Keristani taudia ese idia dadaraia be namo. Danu Keristani taudia ese dabua, unai ese ma haida edia lalona ia veria tauanina idia laloa totona, idia karaia lasi be namo, to mai hemataurai ida dabua idia atoa be namo.
8. Baibel lalonai idia noho hakaua herevadia ibounai amo, edena be hakaua hereva badadia? [3, w02 2/15 rau 5 par. 1, 3, 4, 6] Baibel ena hakaua hereva badadia be iseda hetura karana Iehova ida ia herevalaia. Baibel ena hereva momokani badana ta be Iehova be iseda Havaraia Tauna Badana, Siahu Ibounai Diravana, bona Atai Momokani Diravana. (Sal. 83:18) Unai ese ia hahedinaraia, Ia sibona ese iseda mauri ia hakaua be namo.—1 Kor. 10:31.
9. Ma haida edia hemami laloa karana be dahaka, bona Iesu ese edena bamona unai kara ia hahedinaraia? [4, w02 6/1 rau 5 par. 4-5] Ma haida edia hemami laloa karana be iseda kudouna lalonai ma ta ena hisihisi ita mamia. Iesu Keriso ese ia hereva diba lasi taia kudima tauna ta ia hanamoa neganai, taunimanima vairanai ia karaia lasi, reana unai amo unai tauna do ia hahemaraia lasi eiava do ia hahoaia lasi. (Mar. 7:32-35) Iesu ese natuna ia guria gwauraia vabuna ta ia itaia neganai, ena hisihisi ia mamia, bona Dirava ena ura hegeregerena ena siahu ia gaukaralaia unai tau matamatana ia hatorea isi lou totona. (Luka 7:11-16) Hari, Iesu be iseda Hahelaga Tauna Badana, bona ita “manoka” dainai ita ia “bogahisihisi henia.”—Heb. 4:15.
10. Edena dala ai Aonega Herevadia 11:11 ena hereva be mai anina bada Iehova ena taunimanima edia kongregesen dekenai? [7, w03 3/1 rau 17 par. 1-3] Iehova ese hanua bamona kongregesen ia hanamodia, ia lalonai lauma gaudia idia laloa bada taudia ese ma haida idia durua bona iena ladana idia abia isi. Unai dainai, hagoadaia lasi herevadia bona ladana hadikaia herevadia ita kamonai lasi be namo, bona ita hekwarahi maino ita havaraia bona kara maoromaoro ita badinaia noho.
WIKI TA TA ENA BAIBEL DUAHIDUAHI
11. Genese 2:9 ese ia gwauraia “mauri ena au” ese dahaka ia laulaulaia? Unai au ese Dirava ena gwauhamata, iena huahua idia ania diba taudia be mauri hanaihanai do idia abia gwauhamatana, ia laulaulaia sibona. Unai dainai, Adamu bona Heva idia kara dika murinai, Eden amo ia luludia be namo bona unai uma dekenai do idia vareai lou lasi.—Gen. 3:22-24. [1, it-2-E rau 247 par. 4; w99 4/15 rau 7-8]
12. Dahaka dainai Lota ena adavana ese ena mauri ia haboioa? (Gen. 19:26) [4, w91 1/1 rau 19 par. 10] Iena kara amo ia hedinarai, ena ruma bona kohu Sodoma dekenai ia laloa bada to Dirava ia lalokau henia bada lasi.—Luka 17:31, 32.
13. Genese karoa 24 ena peroveta sivaraina dekenai, daidia ese (a) Aberahamo, (b) Isako, (c) Aberahamo ena hesiai tauna Eliesere, (d) kamelo ten, bona (e) Rebeka idia laulaulaia? (a) Aberahamo ese Iehova ia laulaulaia; (b) Isako ese Dirava ena Mamoe Natuna, Iesu ia laulaulaia; (c) Eliesere ese lauma helaga ia laulaulaia; (d) Kamelo ten ese Dirava ena Hereva goevadaena ia laulaulaia; bona (e) Rebeka ese Mamoe Natuna ena adavana, headava matamata kekeni oreana, idia ibounai be 144,000 ia laulaulaia. [5, w90 3/1 rau 27-8]
14. Dirava ese Iakobo bona Esau edia kara ia perovetalaia guna bena unai hereva hamomokania totona edia kara ia biagua, a? (Gen. 25:23) Unai hekapa be edia sinana ena bogana lalonai idia noho neganai, Dirava be edia mauri dalana ena toana ia diba. Reana unai ia laloa, ruaosi ta ta edia mauri daladia ia perovetalaia neganai. (Sal. 139:16) To Baibel ia gwau lasi, Dirava ia gwau gabeai idia ta do ia mauri hanaihanai eiava ta do ia mase hanaihanai, bona idia ta ta edia mauri lalodiai do idia vara gaudia ta ta edia dokona ia gwauraia guna lasi danu. [6, rs rau 299 par. 3]
15. Edena dala ai Rahela be haheitalai namona bona mai momokani ida ia gaukara goada dainai, Iehova ese ia hanamoa? (Gen. 30:1-8) [7, w02-E 8/1 rau 29-30] Rahela be ena ahuna ia laloa bada. Iehova ese Iakobo do ia hanamoa gwauhamatana ia diba namonamo. Iena taihuna Lea, Iakobo ena adavana ginigunana be natudia foa ia abia to Rahela be lasi. (Gen. 29:31-35) To sibona ena metau ia laloa momo lasi, guriguri amo Iehova ia noia loulou bona Dirava ena ura hegeregerena bona ena guriguri hegeregerena ia kara.