Headava ta be Taunimanima Milion Momo Ia Hanamodia
“[Iehova] iseda Dirava, Siahu Ibounai Diravana, ia sibona be king. . . . Ia sibona do ita hanamoa! Badina be Mamoe ena Natuna ena headava negana ia ginidae vadaeni. Bona iena adavana be headava totona ia hegaegae vadaeni.”—APOKALUPO 19:6, 7.
1. Apokalupo 19:6-8 dekenai ia noho peroveta anena be edena negai do idia abia matamaia? Badina be dahaka idia abia?
INAI hereva be peroveta kwalimu anena. Edena negai unai ane do idia abia? Iehova ena tomadiho dalana ena inai oreana idia hadikaia ore murinai—“Babulono badana,” tomadiho koikoi iboudiai ia laulaulaidia “ariara hahine badana.” Dirava ena hereva ia gwauraia kerere dainai namona be hahemaoro ia abia. Ia be politikol karadia lalonai ia vareai dainai taunimanima ia hakaudia kerere, ia be kohu ia mata-ganigani henia, bona ia ese Iehova ena tomadiho korikori taudia ia inai henidia bada!—Apokalupo 17:1-6; 18:23, 24; 19:1, 2; Iakobo 4:4.
2. (a) Iehova be edena dala ai Babulono Badana do ia hadikaia ore? (b) Iehova idia hanamoa lasi, to tomadiho koikoi idia hadikaia ore taudia be dahaka do idia karaia?
2 Nega kahirakahira, Iehova Dirava ese tanobada ena politikol biagudia do ia veridia unai “hahine” idia ese idia hadikaia ore totona. (Apokalupo 17:12, 16, 17) To tomadiho koikoi idia hadikaia ore taudia be kwalimu anena do idia abia lasi. Satana, eiava Gog, ena siahu henunai, idia be tomadiho korikori taudia do idia tuari henidia, unai taudia be maino taudia bona tanobada ena kara dika lalonai idia vareai lasi taudia unai.—Isaia 2:2-4; Esekiel 38:2, 8-12; Ioane 17:14; Iakobo 1:27.
3. Badina be dahaka Iehova ena hesiai taudia tanobada dekenai be guba anena do idia abia danu?
3 Unai kara amo politikol biagudia be Dirava do idia inai henia bona unai amo Aramagedono tuarina do ia matamaia. Unai tuari dekenai tomadiho idia ura henidia lasi besedia do idia hadikadia ore. Murinai, Satana bona ena demoni edia siahu be tanobada amo do ia ore. (Apokalupo 16:14, 16; 19:11-21; 20:1, 2) Edia kudou lalona amo idia moale dainai, do idia roho mauri taudia be guba taudia danu edia ane do idia abia, inai bamona: ‘Iehova hanamoa, umui taunimanima e, badina Iehova iseda Dirava, Siahu Ibounai Diravana, be pavapava bamona ia lohia hamatamaia.’ (Apokalupo 19:6) Momokani, unai kara ese tanobada toana do idia haidaua bona mauri dalana matamatana ta do idia hamatamaia. Iehova ese iena lohia dalana ena maoro do ia hamomokania bona tanobada amo iena lohia dalana dekenai idia gwau-edeede taudia be do ia kokidia. Vadaeni, unai neganai guba headava ena nega ia ginidae. Peroveta anena dekenai ia gwau: “Do ita moale, do ita moale bada! [Iehova] sibona do ita hanamoa! Badina be Mamoe ena Natuna ena headava negana ia ginidae vadaeni. Bona iena adavana be headava totona ia hegaegae vadaeni.”—Apokalupo 19:7, 8.
4. (a) Mamoe Natuna bona iena “hahine” ese daidia idia laulaulaidia? (b) Dahaka henanadai idia noho? Edena bamona haere ita abia diba?
4 Mamoe Natuna be hairai ia abia tauna, Iesu Keriso, bona iena “hahine” be abidadama horoa 144,000 taudia iboudiai, ia ida guba dekenai idia noho. Iesu bona ena adavana taudia be Guba Basileia taudia edia namba ibounai idia hagugurua, bona idia ese taunimanima do idia hanamodia, mase amo do idia hatoredia isi lou bona goevadae taudia ai do idia halaodia. (Apokalupo 5:8-10; 14:1-4; 20:4, 12, 13; 21:3-5, 9, 10; 22:1-3) Idia do headava lasi neganai, idia vara gaudia ese namo do idia havaraia, a? Unai headava be edena bamona oi ia durua? Unai henanadai edia haere ita abia totona, namona be Isako ena headava neganai idia vara gaudia ita itaia. Genese karoa 24 dekenai unai sivarai idia torea.
Dirava Ese Isako Ena Hahine Ia Abia Hidi
5 Sivarai ia hamatamaia Abraham ese ruma bese ia naria tauna, Eliesere, ia hadibaia neganai. (Genese 15:2; 24:2) Abraham ia gwau: “Iehova, . . . ena ladana dekenai, lau ura oi gwauhamata, bona lau dekenai oi hamaoroa, oi be lauegu natuna Isako ena adavana oi abia lasi Kanana taudia dekena amo, edia gabu [dekenai] lau noho inai.”—Genese 24:3, 4.
5, 6. Badina be dahaka Abraham ia ura lasi momokani Isako be Kanana taudia dekenai ia headava? Bona hari inai negai inai be haheitalai namona edena taudia dekenai?
6 Badina be dahaka Abraham ia ura lasi momokani iena natuna ese Kanana hahine ta ia adavaia? Badina Kanana taudia be Noa ese ia gwauraia dika tauna, Kanana, amo idia vara. (Genese 9:25) Bona danu, taunimanima momo idia diba Kanana taudia be miro karadia taudia, bona gau dikana be, Iehova idia tomadiho henia lasi. (Genese 13:13; Levitiko 18:3, 17-28) Abraham ia ura iena natuna be sibona ena bese amo hahine ta ia adavaia. Idia be Sem, Noa ese ia gwauraia namo tauna, amo idia vara taudia. (Genese 9:26) Inai be sisiba namona hari inai negai idia ura do idia headava taudia dekenai!—Deuteronomi 7:3, 4.
7 Unai dainai Eliesere be kilomita 800 ia lao Mesopotamia dekenai. Ia hegaegae namonamo, bona kamelo 10 dekenai harihari gaudia ia abidia lao. (Genese 24:10) Ma danu, ia ese iena biaguna ena hereva ia laloatao diba. Unai hereva ese iena abiadadama ia hagoadaia. “Iehova, Guba ena Dirava ese . . . ena aneru oiemu vairana dekenai do ia siaia, vadaeni unuseni adavana ta do oi davaria egu natuna [ena].”—Genese 24:7.
8, 9. (a) Eliesere be Nahoro hanua dekenai ia ginidae neganai, dahaka ia vara? (b) Dahaka hahetoho karana ia karaia bena headava kekenina ia abia hidi?
8 Gabeai, ia be Mesopotamia ena north kahana ena hanua, Nahoro, dekenai ia ginidae. Idia hesiku dainai, Eliesere ese kamelo ia hakaudia lao hanua murimurinai ia noho ranu guri dekenai, idia laga-ani totona. Unai be hahine ese ranu idia utua negana—dala ia noho Eliesere ese kekeni ta headava totona ia abia hidi! To ia be edena bamona kekenina? Hairai herea kekenina do ia abia hidi? Lasi. Eliesere ia ura bada gauna be kekeni ta ia abia hidi ia ese Dirava ena kara ia hahedinaraia dainai. Unai ita diba iena abidadama guriguri ia gwauraia neganai, ia gwau: ‘Iehova e, lauegu biaguna [Abraham] ena Dirava e, oi dekenai lau noinoi, hari dina egu gaukara mani oi hanamoa, bona oiemu gwauhamata egu biaguna [Abraham] dekenai mani oi hamomokania. Lau be iniseni, ranu guri dekenai lau noho, bona hanua kekeni be do idia mai ranu utua totona. Lau be kekeni ta dekenai do lau hereva, do lau gwau, “Mani emu kara oiemu hodu oi atoa diho lao, bona ranu taina oi henigu, do lau inua.” Bema ia gwau, “Namo, oi inua, bona oiemu kamelo dekenai danu ranu do lau henia.” Lau ura unai kekeni be oiemu abia hidi kekeni, oiemu hesiai tauna Isako ena. Bema unai bamona do ia vara, do lau diba oiemu gwauhamata lauegu biaguna dekenai oi hamomokania vadaeni.’—Genese 24:11-14.
9 Unai be tohoa gauna namona. The New Encyclopœdia Britannica ena hereva hegeregerena, ia ranu mase kamelo ese ‘ranu ena lita 95 ia inua diba, miniti 10 lalodiai.’ Reana Abraham ena kamelo be unai bamona idia ranu mase lasi, to unai negai idia noho kekenidia idia diba momokani kamelo be unai bamona idia inuinu diba. Momokani, hebogahisi, gaukara bada, sibona ena ura ia laloa momo lasi kekeni sibona ese idau bese tauna ena hesiku kamelo dekediai ranu do ia mailaia.
10, 11. Eliesere ena guriguri ena haere be edena hoa dalana dekenai ia abia? (b) Rebeka be edena bamona kara namodia ia hahedinaraia? (c) Eliesere be dahaka ia laloa?
10 Eliesere be iena guriguri ia do hadokoa lasi neganai, haere ia abia. Sivarai ia gwau: ‘Rebeka ia ginidae. . . . Ia be tau ta dekenai ia sihari lasi kekenina bona ia hairai dikadika. Ranu guri dekenai ia diho lao, ena hodu ia hahonua, bona ma ia giroa mai. Vadaeni unai hesiai tauna be ia dekenai ia heau lao, ia gwau, “Mani emu kara, oiemu hodu amo ranu taina oi henigu, do lau inua.” Kekeni ia gwau,‘Taubada e, oi inua. . . . Ia inua, vadaeni kekeni ia gwau “Ranu ma haida do lau utua, oiemu kamelo dekenai do lau henia edia ura hegeregerena.” Vadaeni karaharaga ena hodu ranu orena daramu lalonai ia seia, bona ranuguri dekenai ia lou lao, lou lao, ia lao ela bona ena kamelo ibounai ranu idia inua vadaeni.’—Genese 24:15-20.
11 Eliesere ia itaia Dirava ese iena guriguri ena haere ia henia bona ‘ia hoa.’ Headava lasi kekeni namona ese ranu ibounai ia utua ore murinai, ia ese udu-baubau ena golo ring bona golo ageva rua ia henia; ia nanadaia: ‘Oiemu tamana be daika?’ Ia hereva ia be Abraham ena tadina ena tubuna neganai, Eliesere be Iehova dekenai ia goru diho bona ia tomadiho henia, ia gwau: “Iehova, lauegu biaguna [Abraham] ena Dirava e, oi lau hanamoa, badina be oiemu gwauhamata lauegu biaguna dekenai oi hamomokania vadaeni. Iehova ese maoromaoro lau ia hakaua, egu biaguna ena tadina ena ruma dekenai.”—Genese 24:21-27.
12. Rebeka ena ruma bese dekenai edena dala ai hereva ibounai idia hamomokania?
12 Rebeka ia moale bada bona ruma dekenai ia heau lao iena ruma bese taudia ia hadibadia totona. Gabeai, Rebeka ena tamana bona taihuna be Eliesere ena laolao ena anina be dahaka idia kamonai, bona idia daradara lasi to idia gwau namona be Rebeka be Isako ena hahine ai ia lao. ‘Abraham ena hesiai tauna ese unai hereva ia kamonai, vadaeni tano dekenai ena kwarana ia atoa diho, Iehova ia hanamoa. Bona ia ese siliva gaudia, golo gaudia, bona dabua, Rebeka dekenai ia henia; bona ena taihuna bona ena sinana dekenai danu davana bada harihari gaudia ia henia.’—Genese 24:52, 53.
Headava Kekeni Bona Ena Durua Kekeni Edia Lalohadai
13 Dirava ese ia abia hidi Isako ena adavana ai do ia lao dainai, Rebeka be edena bamona ia laloa? Murina dinanai gau ta ia vara bona ena lalohadai ia hedinarai. Iena laolao ena anina ia hagugurua dainai, Eliesere ia ura ena biaguna dekenai ia giroa haraga. To Rebeka ena ruma bese taudia idia ura dina 10 idia dekenai ia noho. Unai dainai Rebeka idia nanadaia ia ura ia toreisi haraga bona ia lao. Ia gwau: “Lau ura lau lao.” Ena ruma bese ia rakatanidia haraga bona gabu daudau ai ia itaia lasi tauna ia adavaia ese iena abidadama Iehova ena hakaua hereva dekenai ia hahedinaraia momokani. Ia be abia hidi kekenina maorona.—Genese 24:54-58.
14. (a) Daidia be Rebeka danu idia lao? (b) Edia laolao be edena bamona?
14 Rebeka ia lao neganai ma haida danu be ia ida idia lao. Sivarai ia gwau: ‘Rebeka mai ena hesiai kekenidia idia toreisi, bona kamelo dekenai idia gui, bona idia lao.’ (Genese 24:61) Kamelo idia gui taudia idia lao kilomita 800 bona gabu dikana idia hanaia. The Living World of Animals bukana ia gwau: ‘Kamelo be kohu idia huaia neganai, idia be 4 km/hr idia raka diba.’ Bema Abraham ena kamelo be dina tamona lalonai hora 8 idia raka lao, idia be dina 25 lalodiai Negeb dekenai idia ginidae diba.
15. (a) Eliesere, Rebeka, bona ena hesiai kekeni edia haheitalai namodia be dahaka? (b) Unai sivarai ese dahaka ia laulaulaia?
15 Eliesere, Rebeka bona ena hesiai kekenidia be Iehova ena hakaua hereva idia tabekau henia, unai be haheitalai namona hari idia noho Keristen taudia dekenai! (Hereva Lada-isidia 3:5, 6) Ma danu, sivarai be abidadama hagoadaia peroveta herevana bamona. Ita itaia vadaeni hegeregerena, Abraham ese Iehova Dirava ia laulaulaia. Ia ese iena lalokau Natuna, Isako Badana, ia bouboulaia, kara dika taudia be mauri hanaihanai idia abia totona. (Ioane 3:16) Isako be boubou patana ena mase amo ia roho mauri nega sisina daudau murinai, iena headava totona idia hegaegae. Unai ese guba headava ena hegaegae ia perovetalaia, unai hegaegae karana momokanina be Iesu ena toreisi lou murinai ia matamaia momokani.
Isako Badana ena Headava
16 Eliesere ena ladana anina be “Lauegu Dirava be Durua Tauna.” Iena ladana dekenai bona kara dekenai, ia be Abraham Badana, Iehova Dirava, ena lauma helaga ia laulaulaia. Ia be gabu daudau, iseda tanobada dekenai, ia siaia, headava hahine namona ia abia hidi totona, Isako Badana, Iesu Keriso ena. (Ioane 14:26; 15:26) Headava oreana be ekalesia. Idia be Iesu ena hahediba taudia, Dirava ena natudia lauma dalanai idia lao badina lauma helaga ese ia horodia dainai. (Efeso 5:25-27; Roma 8:15-17) Rebeka ese davana bada harihari gaudia ia abidia hegeregerena, Keristen taudia ginigunadia, Pentekoste 33 C.E. ai, be hoa karadia karaia siahuna idia abia, unai ese ia hamomokania Dirava ese ia boiridia dainai. (Kara 2:1-4) Rebeka bamona, idia be tanobada varavara bona turadia iboudiai idia rakatanidia edia guba Adavana ida idia noho tamona totona. Dirava ese headava oreana taudia ia boiridia negana amo ela bona idia mase, idia be Satana ena koikoi, tanobada dikana ai idia laolao neganai, idia be lauma dalana dekenai rami hebou kekeni bamona idia noho be namo. (Ioane 15:18, 19; 2 Korinto 11:3; Iakobo 4:4) Lauma helaga amo idia honu dainai, headava oreana be abidadama dekenai ma haida idia boiridia Iehova ena hahemauri dalana idia abia hidi totona. (Apokalupo 22:17) Iena haheitalai oi badinaia bona lauma helaga ena hakaua hereva oi badinaia, a?
17. (a) Kamelo 10 be dahaka idia laulaulaia? (b) Ita be edena bamona ita laloa be namo Bible bona headava hahine oreana ese idia printaia Bible bukadia dekenai? (Kara 17:11)
17 Headava orea ese kamelo 10 idia laulaulaia gauna idia laloa bada. Bible lalonai 10 ena namba ese tanobada ena goevadae gauna eiava ena gau ibounai hagugurua gauna ia laulaulaia. Kamelo 10 ese Dirava ena Hereva goevadaena ia laulaulaia, unai gau amo headava gaudia lauma dalana dekenai idia abia. (Ioane 17:17; Efeso 1:13, 14; 1 Ioane 2:5) Rebeka be kamelo edia ranu ia utua sivaraina idia herevalaia neganai, November 1, 1948 The Watchtower ese unai hereva ena anina headava orea dekenai inai bamona idia gwauraia: “Idia be lalokau bada dekenai Dirava ena hereva idia dekenai, iena lauma bada ia henia gauna, idia laloa momo. Ia torea Herevana idia tahua momo. Idia be nega momo dala idauidau dekenai idia gwauraia bona ena sivarai bona ena anina idia ura henia momo, idia ura idia abia dae dainai.” Unai ia hamomokania gauna be headava oreana ena orena taudia be taunimanima milion momo dekenai, New World Translation of the Holy Scriptures idia printaia matamata bona idia haria. Herevana oiemu gado dekenai inai Bible idia karaia eiava lasi, unai headava oreana ese idia halasidia stadi bukadia oi stadilaidia namonamo, Bible ena anina oi diba totona, a?—2 Timoteo 3:16.
Mamoe Natuna Ena Headava Ia Mai Kahirakahira
18 Inai be Satana ena tanobada ena dina gabedia, bona headava hahine oreana ena orena taudia ida, “hutuma bada,” Rebeka ena “hesiai kekeni” taudia bamona, be idia ida idia gaukara hebou. Rebeka ena negai hegeregerena, durua taudia ese headava hahine oreana, 144,000, edia namba idia hanaia momokani. Idia be Iesu Keriso ena “mamoe idaudia” edia “hutuma bada.” (Apokalupo 7:4, 9; Ioane 10:16) Idia be headava hahine ena abidadama hesiai taudia bamona, idia danu be Satana ena tanobada dikana ena miro amo idia raka oho. Idia danu be Iehova ena lauma bona iena Hereva idia badinaia, headava oreana ese idia gwauraia hedinarai hegeregerena. To edia kara namo ena davana be idau. Bema Keriso ena headava hahine durua gaukara dekenai idia haheauka, idia be Satana ena tanobada ena dokona amo do idia roho mauri, bona tanobada paradaiso dekenai do idia noho ela bona hanaihanai.—Apokalupo 21:3, 4.
19. Rebeka bona ena hesiai taudia be edia laolao ena dokona ai idia ginidae neganai dahaka ia vara?
19 Rebeka bona ena “hesiai kekeni” be edia laolao ena dokona gabuna dekenai idia ginidae, a? Oibe. Bible ia hereva hegeregerena: “Adorahi ta, dina ia kahira-kahira neganai taora dekenai ia loaloa, bona ia itaia be kamelo idia mai. Rebeka danu Isako ia itaia, bona ena kamelo dekena amo ia diho.” Eliesere be iena laolao ena anina ia hagugurua dalana ia gwauraia murinai, Isako ese Rebeka ia abia dae iena adavana totona bona ia ‘lalokau henia bada.’—Genese 24:63-67.
20. Isako ena headava ese dahaka moale karana ia laulaulaia?
20 Unai hegeregerena, Iehova ena ura Keriso ena headava hahine dekenai do ia vara momokani. (Isaia 55:11) Nega sisina murinai, Babulono Badana do idia hahemaoro henia bona idia hadikaia ore murinai, headava hahine ena orena taudia ginigabedia be edia laolao do idia haorea. Nega do ia ginidae edia hesiai taudia amo idia parara bona Isako Badana ida, guba dekenai idia headava. Tanobada bona guba ibounai dekenai moale bada do ia vara unai!—Apokalupo 19:6-8.
21. Guba headava ia mai kahirakahira neganai, namona be ita ibounai be dahaka ita karaia?
21 To hari, taunimanima momo be namo idia davaria badina idia be ena namba ia maragi ia lao headava hahine oreana ena orena taudia edia hesiai gaukara idia laloa bada dainai. Tanobada dekenai idia do mase ore lasi neganai, ariara hahine bamona, tomadiho koikoi ibounai, be do ia hadikaia ore, bona unai be “Dirava ese tanobada ia karaia nega dekena amo hisihisi unai bamona idia vara lasi ia mai bona harihari” do ia havaraia. Nega be kwadogi. Bema oi ura oi roho mauri, gau badana be Dirava ena taravatu oi badinadia! (Mataio 24:14, 21; Mareko 13:10; Luka 21:15; Ioane 13:34) Unai bamona taravatu be anina bada iseda nega dikana lalonai. Unai dainai, herevana oi be headava hahine ena orena tauna eiava iena hesiai taudia ena “hutuma bada” tauna ta, Iehova oi badinaia noho, oi hanamoa totona bona moale hanaihanai do oi abia totona. Hutuma bada herea dekenai, unai be namo herea, idia be Dirava ena turana ai idia lao diba, bona idia mauri noho diba Iehova ese gau ibounai ia karaia matamata’ neganai bona tanobada paradaiso dekenai taunimanima milion momo be hahenamo hanaihanai do idia davaria!—Apokalupo 21:5; 22:1, 2, 17.
Inai Oi Laloatao?
◻ Kahirakahira dahaka moale karadia do idia vara?
◻ Dahaka ese ia hamomokania guba headava be do ia vara namonamo?
◻ Eliesere bona kamelo 10 be dahaka ida ita hahegeregeredia diba?
◻ Hari inai negai, edena taudia be Rebeka bona ena hesiai kekeni bamona?
◻ Isako ena headava ia do vara lasi neganai idia vara karadia amo dahaka ita diba?
7. Abraham be edena dala ai Eliesere ia hegaegaelaia iena gaukara totona?
13. Edena dala ai Iehova ia abia hidi kekenina ia hamomokania ia be abia hidi kekeni maorona?
16. (a) Abraham ena hesiai tauna be edena bamona Dirava ena lauma helaga ia laulaulaia maoromaoro? (b) Dahaka henanadai ita henia diba lauma bona headava hahine edia kara dainai?
18. Badina be dahaka Rebeka ena hesiai taudia be hari idia noho headava hahine ena hesiai taudia idia laulaulaidia namonamo?