Baibel Oi Gaukaralaia Namonamo, A?
1 Inai tanobada taudia be nega momo Baibel idia laloa maragi, to Keristani taudia korikoridia be Baibel idia gaukaralaia momo. Ita abia dae “Buka Helaga ena hereva ibounai be Dirava ena Lauma ese ia havaraia” dainai, Iesu Keriso ena guriguri ita abia dae, badina Iehova dekenai ia guriguri neganai ia gwau: “Oiemu hereva be hereva momokani.” (2 Tim. 3:16; Ioa. 17:17) Edena dala ai Baibel ita gaukaralaia namonamo diba?
2 Baibel Dibaia: Iesu be Dirava ena Hereva ia diba namonamo. Unai dainai, haroro gaukara lalonai Iesu be Baibel amo taunimanima ia hadibaia. (Luka 4:16-21; 24:44-46) Edena dala ai Baibel siridia ita laloatao diba? Dina ta ta ai Baibel ita duahia bona siri ta ita laloa dobu, bema unai siri be haroro gaukara lalonai ita do ia durua. Kongrigeisen heboudia totona ita hegaegae neganai, iseda Baibel ita itaia o duahia be namo, bona reana siri ta oi hegaegaelaia, emu haere lalonai oi herevalaia totona. Hebou lalodiai, hereva henia tauna ese siri ia duahia neganai, iseda Baibel ai unai ita itaia be namo. Baibel ita dibaia neganai, unai ese ita ia durua ‘hereva momokani do ita hadibaia maoromaoro’ totona.—2 Tim. 2:15.
3 Baibel Gaukaralaia: Haroro gaukara lalonai Baibel ita gaukaralaia be namo. Hegeregere, bema ruma tauna ta ia kamonai, ia dekenai siri ta ita duahia bona herevalaia be namo. Bema ruma tauna be henanadai ta ia henia, Baibel amo ita haere be namo. Ruma tauna ia bisi negadiai danu Baibel ena hereva ta ita gwauraia be namo, reana ita gwau diba, “Lau do lao lasi neganai, lau ura inai siri ta lau duahia oi dekenai.” Bema mai dalana, Baibel oi kehoa bona oi duahia, bona kamonai tauna ese oi duahia sirina ia itaia danu be namo.
4 Kamonai tauna ta ia davaria Baibel be Toi Tamona herevana ia hakoikoia neganai, ia gwau, “Lau be hanaihanai dubu lau lao, to lau hoa badina Baibel be Toi Tamona herevana ia hakoikoia!” Bona ia ese Baibel stadi ia abia dae. Iesu ia gwau, iena mamoe be iena gadona do idia kamonai. (Ioa. 10:16, 27) Kudou-maoro taudia ese hereva momokani idia dibaia dala hereadaena be inai: Idia sibona ese Baibel ai hereva momokani idia itaia be namo. Unai dainai, Dirava ena Hereva momokani ita gaukaralaia namonamo!