Mai Moale ida Iesu Ena Mauri Davalaia Boubouna Laloatao
1 Saturday, March 22, 2008 ai, dina ia diho murinai, Iesu ena hahegani hegeregerena, tanobada hegegemadai, Keristani taudia ibounai be Iesu Keriso ena mase do idia laloatao. (Luka 22:19; 1 Kor. 11:23-26) Unai dala amo lagani 1,975 gunanai idia vara gaudia dainai, ita ura Iehova ita tanikiu henia. Ena be Iesu be hisihisi ia abia ela bona satauro dekenai ia mase, to ia ese iena Tamana ena ladana ia hahelagaia bona Satani ena hereva ia hakoikoia.—Iobu 1:11; Aon. 27:11.
2 Iesu ena rarana ese gwauhamata matamatana ia hamomokania dainai, goevadae lasi taudia be Dirava ena natudia ai idia lao bona Keriso ida ena guba Basileia lalonai do idia lohia hebou. (Ier. 31:31-34; Mar. 14:24) Ma danu, Iesu ese Nikodemo ia hamaoroa hegeregerena, Dirava ese taunimanima ia lalokau henia bada dainai, iena lalokau Natuna tamona sibona ia bouboulaia.—Ioa. 3:16.
3 Ma Haida Boiria: January 2008 ena Iseda Basileia Gaukara be ita ia hagoadaia, ita ura boiria taudia edia ladana ena lista ta ita karaia bona idia ta ta ita boiria Memorial hebou dekenai idia mai totona. Do oi boiria taudia be emu lista dekenai oi torea bona idia oi hadibaia vadaeni, a? Oi be palani oi karaia vadaeni March 1 ai do idia karaia gaukara badana lalonai oi vareai totona, a? Memorial dekenai idia mai taudia be Baibel ena hereva namodia do idia kamonai neganai, unai ese idia do ia durua Iesu ena mauri davalaia boubouna idia abidadama henia bona idia be mai edia dala mauri hanaihanai idia abia totona.—Roma 10:17.
4 Namona be palani ita karaia ita ginidae haraga totona, unai amo ita boiria taudia ita welkam henia diba. Memorial dekenai taunimanima momo idia mai dainai, namona be ita gaukara goada kamonai matamata taudia bona nega ta ta ai kongrigeisen hebou dekenai idia mai taudia ita lalodia bada totona.
5 Emu Kudouna Oi Hegaegaelaia: Dina Iboudiai Buka Helaga Tahua—2008 bona lagani 2008 Calendar lalonai be March 17 ai do ia hamatamaia Memorial Baibel duahiduahi ena sediual ia noho. Iesu ena tanobada maurina dokonai idia vara gaudia oi laloa neganai, unai ese oi do ia durua emu kudouna oi hegaegaelaia Memorial hebouna totona. (Esr. 7:10) Mai guriguri ida unai Baibel ena sivarai oi laloa dobu neganai, unai ese oi do ia durua Iehova ena lalokau bona ena Natuna ena mauri davalaia boubouna oi laloa bada totona.—Sal. 143:5.
6 Memorial negana ia kahirakahira dainai, namona be ita bona ita durua taudia ita hegaegae. Mai moale ida Iesu ena mauri davalaia boubouna ita laloatao karana ese iseda hetura karana Iehova bona iena Natuna ida do ia hagoadaia. (2 Kor. 5:14, 15) Bona unai ese ita do ia durua Iehova bona Iesu hegeregerena, ma haida dekenai sibona eda ura dadaraia lalokauna ita hahedinaraia totona.—1 Ioa. 4:11.
[Study Questions]
1, 2. Dahaka dainai mai moale ida Iesu ena mauri davalaia boubouna ita laloatao be namo?
3. Edena dala ai Memorial dekenai idia lao taudia be namo do idia abia?
4. Dahaka dainai Memorial dekenai ita ginidae haraga be namo?
5. Edena dala ai emu kudouna oi hegaegaelaia diba Memorial hebouna totona?
6. Mai moale ida Iesu ena mauri davalaia boubouna ita laloatao karana ese edena bamona ita do ia durua?