Memorial Ena Boiboi Pepadia be Tanobada Hegegemadai Do Idia Hariharilaia!
1. Tanobada hegegemadai, March 13 amo ia lao March 30 dekenai, dahaka gaukara do ita karaia?
1 “Inai bamona do umui karaia, lau dekenai do umui laloa totona.” (Luka 22:19) Iesu ena hahegani hegeregerena, March 30, 2010 ai, dina ia diho murinai, Iehova idia tomadiho henia taudia ibounai be Iesu Keriso ena mase do idia laloatao. March 13 amo ia lao March 30 dekenai, tanobada hegegemadai Memorial ena boiboi pepana do ita hariharilaia.
2. Edena dala ai Memorial ena boiboi pepana ita hariharilaia diba?
2 Karaia Dalana: Reana ruma tauna dekenai boiboi pepana ta oi henia, unai amo pepapepa ena laulau ia itaia diba, bena oi gwau: “March 30, dina ia diho murinai tanobada hegegemadai taunimanima milioni momo be do idia hebou Iesu ena mase laloatao totona. Lau mai oi bona emu ruma bese taudia dekenai inai pepa lau henia totona. Emui turadia danu idia mai diba. Mani unai hebou do ai abia negana bona gabuna be pepapepa dekenai oi itaia.” Bema hegeregere, Baibel amo Luka 22:19 oi duahia bona ena hahegani oi gwauraia hedinarai. To laloatao, nega be bada lasi iseda teritori ibounai dekenai pepapepa ita hariharilaia dainai, namona be hamatamaia hereva kwadogidia ita gaukaralaia.
3. Daidia ita boiria diba unai hebou idia mai totona?
3 Bema emui kongrigeisen ena teritori be bada, elda taudia be umui do idia hadibaia boiboi pepadia be taunimanima idia noho lasi rumadia dekenai umui rakatania totona. Bema namo, invateisen pepadia be magasin ida ita hariharilaia diba. Palani oi karaia emu lou henia, Baibel stadi taudia, varavara, sikuli turadia, gaukara turadia, dekena taudia bona ma haida oi boiria totona.
4. Iehova ese ia henia mauri davalaia boubouna ita laloa bada dainai, dahaka ita karaia be namo?
4 Oi Hegaegae Unai Gaukara Oi Durua Totona: Memorial negana be nega namona iseda haroro gaukara ita habadaia totona. Emu sediual oi haidaua diba oi heduru painia totona, a? Emu natudia o Baibel stadi be orea lalonai idia goada idia lao, a? Bema oibe, namona be elda taudia oi hadibaia bema idia hegeregere bapatiso lasi pablisa ai idia lao bona unai gaukara namona idia durua. Iehova ese ia henia mauri davalaia boubouna ita laloa bada dainai, ita ura Memorial hebouna ai ita noho bona ma haida ita boiria ita ida idia hebou totona.—Ioa. 3:16.