Emu Lalomamina Oi Gimaia
1. Hesiai laganina 2013 ena dina tamona hebouhebou ena sinado be dahaka? Unai program idia karaia ena badina be dahaka?
1 Dina ta ta ai ita davaria hekwakwanai ese eda lalomamina ia hadikaia diba. Unai dainai, hesiai laganina 2013 ena dina tamona hebouhebou ena sinado be, “Emu Lalomamina Oi Gimaia.” (1 Tim. 1:19) Unai program ese ita do ia durua, eda Havaraia Tauna ese ita ia henia harihari gauna, eda lalomanina unai, ita gaukaralaia dalana ita laloa namonamo totona.
2. Edena henanadai haida be inai program ese do ia haerelaia?
2 Inai Henanadai Edia Haere Tahua: Dina tamona hebouhebou ena program ese inai henanadai haida do ia haerelaia:
• Dahaka ese eda lalomamina ia hadikaia diba?
• Edena dala ai eda lalomamina ita hadibaia namonamo diba?
• Edena dala ai taunimanima ibounai edia rara amo ita goeva diba?
• Baibel ena hakaua herevadia ita laloa bona badinaia karana ese ia hahedinaraia ita be edena bamona taudia?
• Edena dala ai ita hahedinaraia ita be ma haida edia lalomamina ita matauraia?
• Matamata taudia e, dahaka dainai metau umui haheaukalaia be namo?
• Lauma helaga ese ia hakaua lalomamina idia kamonai henia taudia ese dahaka hahenamo idia moalelaia?
3. Edena dala ai dina tamona hebouhebou ese ita ia durua diba?
3 Iehova ena heduru amo ita ese Satani ena hedibagani idauidau, eda lalomamina ia ura hadikaia gaudia unai, ita dadaraia diba. Iseda lalokau guba Tamana be ena Hereva bona orea amo ita ia hadibaia, ia gwau: “Dala be inai, ia dekenai do umui raka lao.” (Isa. 30:21) Inai program be Iehova ese ita ia hadibaia dalana ta. Unai dainai, palani oi karaia dina tamona hebouhebou oi reaia lasi totona. Tok ibounai oi kamonai namonamo, bona do oi badinaia daladia oi lalohadailaia. Oi kamonai herevadia be emu famili ida oi kikilaia. Ita abia hadibaia herevadia ita badinaia neganai, unai ese ita do ia hagoadaia ‘lalomamina namona ita dogoatao noho’ totona. Danu, ita do ia durua inai tanobada ena moale karadia idauidau ita dadaraia totona.—1 Pet. 3:16.