Iehova Ita Hanamoa Daladia
1. Edena dala matamatana ese ita ia durua Iehova ita “hanamoa” totona?
1 March 2013 amo, ita be dala matamatana ta ita badinaia—anina be, vaira lagani ta ta ena March, April, bona sekit naria tauna be kongrigeisen ia vadivadi henia huadia lalodiai, heduru painia taudia ese hora 30 idia ripotilaia diba. To bema sekit naria tauna ena vadivadi negana (Tuesday ia lao Sunday) be hua ginigunana dokonai ia hamatamaia ela bona hua iharuana matamanai ia hadokoa, vadaeni unai hua rua lalonai idia heduru painia taudia be hua tamona sibona do idia abia hidi, hora 30 idia ripotilaia totona. Sekit naria tauna ia vadivadi neganai, heduru painia taudia ibounai be regula bona spesel painia edia hebou lalonai idia vareai diba bona tok ibounai idia kamonai diba. Momokani, ena be ita hegeregere lasi hora 50 ita hagugurua totona, to lagani ta ta ai nega foa ita heduru painia bena hora 30 ita ripotilaia amo Iehova ita “hanamoa” diba!—Sal. 109:30; 119:171.
2. Sekit naria tauna ena vadivadi neganai, heduru painia taudia be dahaka do idia moalelaia?
2 Sekit Naria Tauna Ena Vadivadi Neganai: Hari, momo be sekit naria tauna ena vadivadi neganai heduru painia gaukara idia karaia diba, bona ia ida idia gaukara hebou bona hagoadaia heheni. (Roma 1:11, 12) Reana momo be dina tamona do idia holidei, wiki lalonai sekit naria tauna ida idia gaukara hebou totona. Moni gaukara idia karaia taudia be sekit naria tauna idia noia diba, Saturday o Sunday ai idia gaukara hebou totona. Danu, heduru painia taudia be regula bona spesel painia edia hebou lalonai idia vareai neganai, heduru bada do idia abia!
3. Dahaka dainai Memorial negana be nega namona ita heduru painia totona?
3 March Bona April Lalodiai: Guna, Memorial neganai heduru painia idia karaia taudia be March sibona lalonai hora 30 idia ripotilaia, to hari, March bona April lalonai unai bamona idia karaia amo Dirava idia “hanamoa.” (Heb. 13:15) March bona April be nega namona heduru painia amo eda haroro gaukara ita habadaia totona. Lagani ta ta ai, unai hua rua lalodiai, ita be boiboi pepadia do ita hariharilaia, ma haida ita boiria Memorial idia mai totona. Danu, Memorial neganai momo be edia haroro idia habadaia dainai, pablisa idauidau ida idia gaukara hebou diba. Memorial murinai, kamonai taudia ita lou henia bona ita boiridia mai spesel pablik tok idia kamonai totona. Oi ura dikadika unai hua lalodiai heduru painia oi karaia, a?—Luka 6:45.