Pablik Gabudiai Haroro Dala Matamatana Ta
1. Kongrigeisen ta ta idia hagoadaia pablik gabudiai dahaka idia karaia totona?
1 Iehova ena orea ese kongrigeisen ta ta ia hagoadaia pablik gabudiai teibolo o troli idia gaukaralaia haroro totona. Bema troli idia gaukaralaia, pablisa ta be unai troli ena badinai ia gini o ia helai diba. To, bema teibolo idia gaukaralaia, vadaeni pablisa rua ese idia naria diba. Namona be unai teibolo o troli idia naria pablisa be moale toana idia hahedinaraia. Bema ta be troli o teibolo ai idia noho pablikeisen ia raraia, namona be pablisa ta ese herevahereva ia hamatamaia, reana ia gwau: “Baibel ese inai topik ia herevalaia dalana be nega ta oi laloa, a?” Unai ia karaia lalonai, pablisa ma ta o rua be idia lao mai taudia idia haroro henia diba.
2. Pablik gabudiai haroro ena namo ena ekspiriens ta herevalaia.
2 Unai dala amo Baibel stadi momo idia hamatamaia. Koledi dekenai ia sikuli kekeni ta ia ura Iehova ena Witnes taudia edia sivarai do ia tahua, to Kingdom Hall ta ia davaria lasi. To unai wiki murinai, sikuli gabunai iseda pablikeisen idia atoa teibolo ta ia itaia. Unai murinai, Baibel stadi ia abia bona hari ia be bapatiso pablisa ta. Danu, pablik gabudiai unai gaukara ia durua.
3. Pablik gabudiai idia haroro pablisa haida edia lalohadai be dahaka?
3 Pablik gabudiai haroro gaukara ia moalelaia taihu ta ia gwau: “Haida be teibolo o troli badinai idia gini bona iseda pablikeisen matamatadia idia abia. Haida be Iehova ena Witnes taudia idia diba lasi. Lau itaia inai dala matamatana amo, momo ai haroro henia diba.” Taihu ma ta ia gwau: “Inai be taunimanima haroro henia dala namo hereana, badina taunimanima be oi dekenai idia mai, bona ena be idia ura lasi kamonai, to idia ura itaia sibona.”
4. Dahaka dainai wiki ta ta ai seim gabu bona taim ai teibolo o troli ita atoa be mai ena namo?
4 Wiki ta ta ai seim gabu, dina bona taim ai teibolo o troli ita atoa be mai ena namo. Unai amo taunimanima be do idia manada bona ita idia nanadaia diba, eiava iseda teibolo o troli amo pablikeisen idia abia diba. Emu kongrigeisen ese pablik gabudiai haroro ia palanilaia vadaeni, a? Bema oibe, vadaeni unai haroro dala namona amo “gabu ibounai dekenai Dirava ena Basileia oi harorolaia” bona anina namona oi havaraia diba.—Luka 9:60.