Iseda Haroro Bona Mauri Dalana Hebou Pepana Edia Referens
July 6-12
BAIBEL ENA HEREVA BADADIA | ESODO 6-7
“Hari Farao Dekenai Do Lau Karaia Gauna Do Oi Itaia”
(Esodo 6:1, NWT) Vadaeni Iehova be Mose dekenai ia gwau: “Hari Farao dekenai do lau karaia gauna do oi itaia. Egu imana goadana amo ia do lau doria idia ia siaia totona, bona egu imana goadana dainai inai tano amo idia do ia lulua raka-lasi.”
(Esodo 6:6, 7) “Unai dainai Israela taudia dekenai oi hamaoroa, lau inai Lohiabada, bona Aigupito taudia ese umui emui latanai gaukara metau idia atoa, be be inai hisihisi dohore lau kokia. Idia guia umui, to lau ese umui do lau ruhaia, lauegu imana ena goada dekena amo, bona hoa karadia badadia dekena amo dohore lau hamauria umui. 7 Lauegu bese do lau halaoa umui, bona lau be umui emui Dirava do lau lao, vadaeni dohore umui diba, lau be Lohiabada, umui emui Dirava, Aigupito taudia edia gaukara metau dekena amo lau hamauria umui, ena Dirava.
it-2-E 436 par. 3
Mose
Israela tatau edia kara ia idau. Ena be matamanai Mose ese ia karaia gaudia idia abia dae, to Farao ese ena hesiai taudia ia oda henia Israela taudia edia gaukara do idia habadaia bona ha-aukaia neganai Mose dekenai idia maumau, unai dainai Mose be ia lalometau bona Iehova dekenai ia noinoi. (Eso 4:29-31; 5:19-23) Ataiai Momokani Diravana ese Mose ia hagoadaia totona, Mose ia hamaoroa, Aberahamo, Isako, bona Iakobo dekenai ia gwauhamatalaia gauna be hari do ia hagugurua, ia ese Israela taudia ia hamauria bona gwauhamata tanona dekenai bese badana ai ia halaoa neganai, Iehova ena ladana ena anina do ia hedinarai momokani. (Eso 6:1-8) To Israela taudia be Mose idia kamonai henia lasi. To hisihisi namba 9 ia vara murinai, Mose idia kamonai henia bona badinaia matamaia, unai amo hisihisi namba 10 ia vara neganai idia ibounai ia haboua bona “tuari taudia edia orea bamona” orea ta ta dekenai Aigupito amo idia raka-lasi.—Eso 13:18, NWT.
(Esodo 7:4, 5) To Farao be do ia kamonai lasi umui dekenai. Unai dainai lauegu imana Aigupito taudia edia latanai dohore lau atoa, vadaeni lauegu orea, lauegu bese, Israela taudia, Aigupito tano dekena amo dohore lau hakaudia siri. 5 “Vadaeni lauegu imana Aigupito ena latanai dohore lau atoa, bona Israela taudia be idia edia tano dekena amo do lau hakaua siri neganai, Aigupito taudia do idia diba lau inai Lohiabada.”
it-2-E 436 par. 1-2
Mose
Aigupito Ena King Vairanai. Dirava ese Mose bona Arona ia gaukaralaia Aigupito taudia edia ‘dirava ia tuari henidia’ totona. Aigupito edia meamea taudia idia gwauraia Iane bona Iambre (2Ti 3:8), Farao be Aigupito edia dirava ibounai ia noia Iehova ena siahu ia tuari henia totona. Arona ese Mose ena hereva ia badinaia bona Farao vairanai hoa karana ginigunana ia karaia neganai, Aigupito taudia edia dirava ibounai dekenai Iehova ena siahu ia hamomokania, to Farao ena lalona be ia auka. (Eso 7:8-13) Gabeai, hisihisi namba 3 ia vara neganai, Aigupito ena meamea taudia idia gwau, “Inai kara be Dirava ena imana kwakikwakina korikori ese ia karaia!” Bona unai meamea taudia dekenai iohururu idia vara dainai, idia hegeregere lasi Farao ena vairanai idia gini bona Mose dekenai edia siahu idia hahedinaraia totona.—Eso 8:16-19; 9:10-12.
Hisihisi 10 ese ta ia hamanaua bona ta ena lalona ia ha-aukaia. Mose bona Arona be hisihisi 10 idia gwauraia taudia. Idia hereva hegeregerena hisihisi 10 idia vara, unai ese ia hamomokania Mose be Iehova ena hereva gwauraia tauna. Aigupito ai taunimanima momo ese Iehova ena ladana idia herevalaia unai ese Israela taudia bona Aigupito taudia haida edia lalona ia hamanaua, to Farao bona ia idia badinaia taudia edia kudouna ia ha-aukaia. (Eso 9:16; 11:10; 12:29-39) Aigupito taudia idia laloa lasi idia be edia dirava ena lalona idia hahisia, to idia diba Iehova ese edia dirava ibounai ia kota henia. Hisihisi namba 9 ia ore murinai, “Farao ena hesiai taudia dekenai, bona hanua taudia dekenai, Mose ena ladana be ia bada.”—Eso 11:3.
Hakaua Hereva Namodia Tahua
(Esodo 6:3) Aberahamo bona Isako bona Iakobo edia vairana dekenai lau hedinarai, Siahu Ibounai Dirava, to lauegu ladana korikori, Iehova, lau hadibaia lasi idia dekenai.
it-1-E 78 par. 3-4
Siahu Ibounai Diravana
Iehova be Aberahamo dekenai Isako do ia vara totona ia gwauhamata neganai, inai dagi ladana “Siahu Ibounai Diravana” (ʼEl Shad·daiʹ) ia gaukaralaia, unai gwauhamata ia karaia totona namona be Aberahamo ese Dirava ena siahu ia abidadama henia. Dirava ese Aberahamo ida ia karaia kontraka hegeregerena, Isako bona Iakobo ia hanamoa neganai, unai dagi ladana ia gaukaralaia danu.—Ge 17:1; 28:3; 35:11; 48:3.
Unai dainai, Iehova be Mose dekenai ia gwau: “Aberahamo bona Isako bona Iakobo edia vairana dekenai lau hedinarai, Siahu Ibounai Dirava [beʼElʹ Shad·daiʹ], to lauegu ladana korikori, Iehova, lau hadibaia lasi idia dekenai.” (Eso 6:3) Ita gwau lasi unai bese kwaradia be Iehova ena ladana idia diba lasi, badina idaunegai idia noho taudia ese Iehova ena ladana idia gaukaralaia danu. (Ge 4:1, 26; 14:22; 27:27; 28:16) Genese bukana lalonai, unai bese kwaradia edia mauri ia herevalaia neganai, inai hereva “Siahu Ibounai” be nega 6 sibona ia hedinarai, to Heberu revarevadia lalonai Iehova ena ladana be nega 172 idia torea. Momokani unai bese kwaradia be edia mauri lalonai Dirava ena heduru idia mamia bona idia abia dae inai dagi ladana “Siahu Ibounai Diravana” ia abia be maoro, to idia ese Dirava ena ladana, Iehova, ena anina ibounai idia dibaia lasi. Buka ta ladana, The Illustrated Bible Dictionary (Vol. 1, p. 572) ia gwau: “Dirava ese unai bese kwaradia dekenai ia karaia gwauhamata be vaira negana ai do ia vara gauna; idia abia dae, Yahweh, be Ia hegeregere momokani unai gwauhamata ia hagugurua totona. Dirava ese unai au amo [Mose dekenai] iena ladana ena anina ia hahedinaraia, unai be idau momokani, inai ladana Yahweh amo ia hahedinaraia Ia be siahu bona noho hanaihanai Diravana.”—Edited by J. D. Douglas, 1980.
(Esodo 7:1) Lohiabada ese Mose dekenai ia haere, ia gwau, “Oi kamonai, lau ese Dirava hegeregerena oi do lau halaoa Farao ena vairana dekenai, bona oiemu kakana Arona ese do ia hereva henia, oiemu peroveta tauna hegeregerena.
it-2-E 435 par. 5
Mose
Herevana Mose be hemarai tauna to ia hegeregere. Mose ia gwau ia be hemarai tauna dainai ia hereva namonamo diba lasi. Toana be Mose be guna bamona lasi, badina lagani 40 gunanai, ia ura Israela taudia ia hamauria. To hari Iehova ia hamaoroa noho ia hegeregere lasi ia henia asainmen ia karaia totona. Ena be Dirava ia badu, to Mose ia dadaraia lasi bona ena kakana Arona ia abia hidi Mose ia durua totona. Mose be Dirava ena hereva gwauraia tauna dainai, Arona dekenai Mose be “Dirava ena gwaukau tauna” (NWT). Mose bona Arona be Israela ena tau badadia bona Farao ida idia hebou neganai, Mose ese Dirava amo ia abia hadibaia herevadia bona oda herevadia be Arona dekenai ia gwauraia, bena Arona ese Farao ia hereva henia. (Eso 2:23; 4:10-17) Gabeai, Iehova ese Arona ia gwauraia Mose ena “peroveta tauna,” anina be, Mose be Dirava ena peroveta tauna dainai, Dirava ese ia dekenai hakaua herevadia ia henia, bona Mose ese Arona dekenai unai hakaua herevadia ia henia. Danu, Mose ia hamaoroa ia be Farao ena vairana dekenai “Dirava hegeregerena” do ia halaoa, anina be, Dirava ese ia dekenai siahu ia henia dainai, Aigupito ena king do ia gari henia lasi.—Eso 7:1, 2.
Baibel Duahiduahi
July 13-19
BAIBEL ENA HEREVA BADADIA | ESODO 8-9
“Hekokoroku Tauna Farao Ia Laloparara Lasi Ia be Dirava Ena Ura Ia Karaia”
(Esodo 8:15) To Farao ese ia itaia gau ibounai ia namo, vadaeni iena lalona ma ia auka, ia kamonai henia lasi Mose bona Arona dekenai, Lohiabada ese ia gwauraia vadaeni bamona.
it-2-E 1040-1041
Lalona Ha-aukaia Karana
Iehova Dirava ese mai haheauka ida taunimanima bona bese haida be ia kara henidia, ena be idia karaia karadia dainai ia hamasedia diba, to ia rakatanidia idia mauri noho totona. (Ge 15:16; 2Pe 3:9) Haida be edia kara idia haidaua dainai Iehova ese idia dekenai ena hebogahisi karana ia hahedinaraia, (Ios 2:8-14; 6:22, 23; 9:3-15) ma haida be edia lalona idia ha-aukaia bena Iehova bona ena taunimanima idia inai henidia. (De 2:30-33; Ios 11:19, 20) Ta be ena lalona ia ha-aukaia neganai Iehova ese ia koua lasi, to ia rakatania ena ‘lalona ia ha-aukaia’ eiava ‘ena kudouna ia ha-aukaia.’ Iehova ese unai bamona taudia ia hahemaoro henidia neganai, ena siahu bada ia hahedinaraia bona ena ladana idia abia isi.—Eso 4:21 hahegeregerea; Ioa 12:40; Ro 9:14-18.
(Esodo 8:18, 19) Vadaeni meamea taudia ese edia meamea dekena amo nemo idia havaraia gwauraia, to havaraia ena dala idia diba lasi. To nemo ese taunimanima bona ubua gaudia idia koria noho. 19 Vadaeni inai meamea taudia ese Farao dekenai idia hamaoroa, idia gwau, “Inai kara be Dirava ena imana kwakikwakina korikori ese ia karaia.” To Farao ena lalona be ia auka, ia kamonai lasi Mose bona Arona dekenai, Lohiabada ese ia gwauraia vadaeni bamona.
(Esodo 9:15-17) Badina be lauegu imana ena siahu momokani dekena amo gorere bema lau henia umui dekenai, dohore umui mase ore diba. 16 To inai totona oi dekenai mauri lau henia vadaeni: Lauegu siahu dohore oi itaia, vadaeni tanobada taudia ibounai ese lauegu ladana dohore idia matauraia totona. 17 To do oi hekokoroku noho lauegu orea taudia edia vairana dekenai, bona do oi ura lasi oiemu imana dekena amo oi negea idia.
it-2-E 1181 par. 3-5
Gwau-edeede Karadia
Momokani, nega haida Iehova Dirava ese dala haida ia gaukaralaia diba ia idia gwau-edeede henia taudia ese ena ura idia hagugurua totona. Ena be Dirava idia inai henia, to Dirava ese idia ia koua unai amo ena hesiai taudia be edia abidadama idia hahedinaraia diba. Danu, Dirava ese gwau-edeede taudia ia gaukaralaia diba ena kara maoromaoro idia gwauraia hedinarai totona. (Ro 3:3-5, 23-26; 8:35-39; Sa 76:10) Aonega Herevadia 16:4 (NWT) ia gwau: “Iehova ese gau ibounai ia karaia vadaeni, iena ura ia hagugurua totona, kara dika taudia danu be edia nega ai dika do idia davaria.”
Hegeregere, Iehova ese, Mose bona Arona amo, Farao ia hadibaia Israela taudia do ia ruhaia. Dirava ese Aigupito ena king be kara dika tauna ai ia halaoa lasi, to Farao ia rakatania ia mauri noho, unai amo ia sibona ena kara amo ia hahedinaraia ia be gwau-edeede tauna bona Dirava ese ia hamasea be maoro. Iehova ena ura be Esodo 9:16 ese ia hahedinaraia, ia gwau: “To inai totona oi dekenai mauri lau henia vadaeni: Lauegu siahu dohore oi itaia, vadaeni tanobada taudia ibounai ese lauegu ladana dohore idia matauraia totona.”
Aigupito taudia dekenai ia vara hisihisi 10 bona Farao mai ena tuari oreadia be Davara Kakakana dekenai idia mase karana ese Iehova ena siahu bada ia hahedinaraia. (Eso 7:14–12:30; Sa 78:43-51; 136:15) Lagani haida murinai, bese ma haida ese idia vara gaudia idia herevalaia, bona Dirava ena ladana be tanobada ibounai dekenai idia gwauraia. (Ios 2:10, 11; 1Sa 4:8) Bema Dirava ese karaharaga Farao ia alaia, Iena siahu bona Iena taunimanima ia hamauria dalana do ia hahedinaraia lasi.
Hakaua Hereva Namodia Tahua
(Esodo 8:21) Badina be oiemu imana dekena amo bema oi negea lasi idia, lau ese lao momo herea do lau siaia, oiemu latanai, bona oiemu hesiai taudia, bona oiemu orea taudia, bona umui emui ruma edia latanai dohore idia ginidae. Aigupito taudia edia ruma bona edia tano be lao dekena amo dohore idia honu.
it-1-E 878
Lao badadia (Gadfly)
Hisihisi namba 4 lalonai, insect haida ese Aigupito taudia ia hadikaia, to Gosena tanona ai idia noho Israela taudia idia hadikaia lasi. Baibel lalonai Heberu gado ai inai insect ena ladana idia gwauraia, to momo be idia diba lasi unai be edena insect ia herevalaia. (Eso 8:21, 22, 24, 29, 31; Sa 78:45; 105:31)
Hisihisi namba 4 lalonai Aigupito ia hadikaia lao badadia be animal eiava tau ta ena kopina ia koria bona ena rarana ia ania diba. Lao haida be animal eiava taunimanima idia koria neganai, edia kopina lalonai gaigai maragidia idia atoa, bena tauanina lalonai idia vareai; unai bamona lao be siahu gabudia ai (tropics) idia noho. Momokani unai bamona lao (gadfly) momo ese Aigupito taudia bona edia animal idia hadikaia bona hamasea.
(Esodo 8:25-27) Vadaeni Farao ese Mose bona Arona dekenai ia boiboi, ia gwau, “Umui lao, inai Aigupito tano sibona dekenai umui emui Dirava ena boubou do umui karaia.” 26 To Mose ia gwau, “Unai bamona dohore ai karaia be ia maoro lasi, badina be Lohiabada aiemai Dirava ena boubou karaia totona do ai alaia gaudia be Aigupito taudia ese idia ura henia lasi gaudia. Bema idia edia vairana dekenai unai bamona do ai karaia neganai, idia ese nadi dekenai dohore idia hamasea ai. 27 “To do ai laolao taunimanima idia noho lasi gabuna dekenai, dina toi dohore ai raka, Lohiabada, aiemai Dirava ena boubou gauna do ai karaia, ai dekenai ia hereva henia hegeregerena.”
w04 4/1 25 par. 9
Esodo Bukana Ena Hereva Badadia
8:26, 27—Dahaka dainai Mose ia gwau Israela taudia ese do idia bouboulaia gaudia be “Aigupito taudia ese idia ura henia lasi gaudia”? Animal idauidau momo be Aigupito taudia ese idia tomadiho henia. Mose ese boubou gaudia ia herevalaia karana amo king ia noia goada Israela taudia do ia ruhaia bena gabu ma ta ai Iehova dekenai boubou gaudia idia henia totona.
Baibel Duahiduahi
July 20-26
BAIBEL ENA HEREVA BADADIA | ESODO 10-11
“Mose Bona Arona be Gari Lasi Karana Idia Hahedinaraia”
(Esodo 10:3-6) Vadaeni Mose bona Arona be Farao dekenai idia raka vareai, idia hereva ia dekenai, idia gwau, “Lohiabada, ai Heberu taudia aiemai Dirava, be inai bamona ia hereva, ‘Lauegu vairana dekenai do oi hekokoroku noho ia lao bona edena negai? Lauegu orea taudia oiemu imana dekena amo oi negea, dohore idia tomadiho lau dekenai. 4 To bema lasi, bema oi dogoatao idia, lau ese kerukeru kwadi do lau siaia oiemu tano dekenai. 5 Idia ese tano ena kopina do idia koua momokani, tano be do oi itaia diba lasi. Vadaeni, emui aniani sisina do ia noho, medu, aisi nadi bamona ese ia hadikaia lasi gauna be, idia ese do idia ania ore, bona au ibounai be do idia ania ore. 6 Oiemu ruma danu, bona oiemu hesiai taudia ibounai edia ruma, bona Aigupito taudia ibounai edia ruma, be kwadi dekenai do idia honu momokani, umui emui tamadia bona tubudia unai bamona idia itaia lasi, idia vara dinana ia mai bona harihari.’” Vadaeni Mose ese Farao ena vairana dekena amo ia raka siri.
w09 7/15 20 par. 6
Iesu Tohotohoa—Mai Gari Lasi ida Haroro
6 Mani oi laloa: Nega ta Mose be mai gari lasi ida Farao ia hereva henia. Farao be lohia tauna ta, bona ia be dirava idauidau edia gwaukau tauna ta sibona lasi, to ia gwau ia be dirava ta badina ia be dina diravana, Ra, ena natuna. Reana Farao ma haida idia karaia bamona, ia be sibona ena laulau ia tomadiho henia. Farao be taravatu ia haginia tauna; ia ura taunimanima ese ena oda sibona idia badinaia. Ia be mai ena siahu, ia hekokoroku, bona dagedage tauna, bona ma haida edia lalohadai ia abia dae lasi. Ena be Farao ese Mose ia boiria lasi, to unai manau bona mamoe naria tauna be Farao vairanai ia hedinarai loulou. Mose be dahaka ia perovetalaia? Hisihisi 10. Bona dahaka ia noia? Ia ura Farao ese gwaumaoro ia henia hesiai taudia milioni momo be Aigupito do idia rakatania! Mose ia gari, a? Lasi vaitani!—Num. 12:3; Heb. 11:27.
(Esodo 10:24-26) Vadaeni Farao ese Mose ia boiria, ia gwau, “Vadaeni umui lao, Lohiabada dekenai do umui tomadiho, umui emui natudia do umui abidia lao, to umui emui mamoe bona nani bona boromakau ibounai iniseni do umui rakatania.” 25 To Mose ia gwau, “Lasi. Aiemai boubou gaudia, bona lahi ese do ia araia ore gaudia be ai dekenai do oi henia, Lohiabada aiemai Dirava ena boubou do ai karaia. 26 Aiemai boromakau ibounai do ai abia lao, ta do ia noho lasi, badina be unai dekena amo Lohiabada aiemai Dirava ena boubou do ai karaia. Ai diba lasi dahaka gau dahaka gau dekena amo Lohiabada ena boubou do ai karaia, ia lao bona boubou karaia ena gabu dekenai dohore ai ginidae.”
(Esodo 10:28) Vadaeni Farao ese Mose ia hamaoroa, ia gwau, “Oi siri, oi naria namonamo danu, lauegu vairana dohore oi itaia lou lasi, badina be oi itaia dinana dekenai, do oi mase.”
(Esodo 11:4-8) Vadaeni Mose ese Farao dekenai ia hereva, ia gwau, “Lohiabada be inai bamona ia hereva, ia gwau, ‘Hanuaboi ena huanai momokani, Aigupito tano do lau hanaia lao, 5 vadaeni Aigupito taudia edia vara guna natuna tau ibounai do idia mase, Farao ena vara guna natuna tau, Farao ena terona latanai do ia helai tauna, ia lao bona hesiai hahine, uiti ia moia nadi uili ia giroa hahinena, ena vara guna natuna tau. Boromakau ibounai edia vara guna natuna danu, do idia mase. 6 Aigupito tano ibounai dekenai taitai badana do ia vara, nega ta unai bamona idia taitai lasi ia mai bona harihari, bona inai murinai danu, unai bamona dohore idia taitai lasi. 7 To Israela taudia mai edia ubua gaudia danu be sisia ta do ia boiboi lasi edia huana dekenai. Inai bamona do umui diba lau Lohiabada ese Aigupito taudia bona Israela taudia lau hapararaia vadaeni.’” 8 Ma Mose ia gwau, “Farao e, oiemu hesiai taudia ibounai do idia mai lau dekenai, lauegu vairana dekenai do idia tomadiho, do idia gwau, ‘Oi raka siri, oiemu orea taudia ibounai danu!’ Unai murinai dohore lau raka siri.” Vadaeni Mose be Farao ena vairana dekena amo ia raka siri, mai badu siahuna danu.
it-2-E 436 par. 4
Mose
Farao ena vairanai mai abidadama bona gari lasi ida ia gini be namo. Iehova ena goada bona ena lauma helaga ena heduru dainai Mose bona Arona be Dirava ese ia henia gaukara idia karaia diba. Mani Farao ena kota rumana oi laloa, unai negai ia be king goadana. Unuseniai Farao—dirava ta bamona idia laloa—be mai hekokoroku ida ia helai, bona ena advisers, tuari gunalaia taudia, gadi, bona hesiai taudia ese ia idia hagegea. Danu, edia tomadiho gunalaia taudia bona meamea taudia, idia ibounai be Mose idia tuari henia. Aigupito dekenai inai tatau be dagi bada taudia. Idia ibounai be idia hegaegae Farao bona Aigupito ena dirava idauidau idia durua totona. Mose bona Arona be nega tamona lasi, to nega momo, Farao ena vairanai idia gini, bona unai nega ta ta lalonai Farao ena lalona be ia ha-aukaia, badina ia ura ena Heberu igui hesiai taudia ia biagua. Mose bona Arona ese hisihisi namba 8 idia gwauraia murinai, Farao ese ia luludia, bona hisihisi namba 9 idia gwauraia murinai Farao ese ia hamaorodia bema ena vairana idia itaia lou, do ia hamasedia.—Eso 10:11, 28.
Hakaua Hereva Namodia Tahua
(Esodo 10:1, 2) Vadaeni Lohiabada ese Mose dekenai ia hamaoroa, ia gwau, “Farao dekenai do oi raka vareai, badina be iena lalona bona iena hesiai taudia edia lalona danu lau ha-aukaia vadaeni. Inai bamona lau karaia badina be, idia huana dekenai lauegu siahu do lau hedinaraia totona. 2 Vadaeni umui emui natudia bona emui tubudia dohore umui hadibaia diba, dahaka hoa kara badadia lau karaia Aigupito dekenai, bona edena bamona Aigupito taudia lau hakavakavadia lauegu toa karadia dekena amo, vadaeni umui ibounai do umui diba lau inai Lohiabada.”
w95 9/1 11 par. 11
Dirava Koikoidia Dadaraia Taudia
11 Guna, Israela taudia be Aigupito ai idia do noho neganai, Iehova ese Mose ia siaia lao Farao dekenai, ma ia gwau: “Farao dekenai do oi raka vareai, badina be iena lalona bona iena hesiai taudia edia lalona danu lau ha-aukaia vadaeni. Inai bamona lau karaia badina be, idia huana dekenai lauegu siahu do lau hedinaraia totona. Vadaeni umui emui natudia bona emui tubudia dohore umui hadibaia diba, dahaka hoa kara badadia lau karaia Aigupito dekenai, bona edena bamona Aigupito taudia lau hakavakavadia lauegu toa karadia dekena amo, vadaeni umui ibounai do umui diba lau inai [Iehova].” (Esodo 10:1, 2) Israela taudia mai edia kamonai ese Iehova ena kara badadia be edia natudia do idia hamaorolaia. Bena edia natudia ese sibodia edia natudia do idia hamaorolaia, bena uru ta ta iboudiai be unai bamona do idia karaia. Unai dala amo, Iehova ena siahu karadia do idia laloatao. Unai hegeregerena, hari inai negai danu, tama sina edia maduna ta be Dirava ena hereva idia gwauraia hedinarai edia natudia dekenai.—Deuteronomi 6:4-7; Aonega Herevadia 22:6.
(Esodo 11:7) To Israela taudia mai edia ubua gaudia danu be sisia ta do ia boiboi lasi edia huana dekenai. Inai bamona do umui diba lau Lohiabada ese Aigupito taudia bona Israela taudia lau hapararaia vadaeni.’
it-1-E 783 par. 5
Esodo
Iehova be ena siahu amo ena ladana ia abia isi bona Israela taudia ia hamauria. Davara Kakakana ena ist kahana ai idia ginidae neganai, Mose bona Israela taudia be ane idia abia, bona ena taihuna Miriama, peroveta hahine, ese ena tambarin ia abia, bona hahine ibounai be mai edia tambarin ida ia murinai idia raka bona idia mavaru, bona ane amo tatau edia ane herevadia idia haloua. (Eso 15:1, 20, 21) Israela taudia be edia inai taudia amo idia parara vadaeni. Aigupito amo idia raka lasi neganai, tau ta eiava animal ta ese idia ia hadikaia lasi bona sisia ta be idia dekenai ia boiboi lasi. (Eso 11:7) Ena be Esodo bukana ia gwau lasi Farao be ena tuari oreadia ida davara lalonai idia vareai bona idia mase, to Salamo 136:15 ia gwau, Iehova ese “Aigupito ena king bona iena tuari orea, be Davara Kakakaka dekenai ia aladia mase.”
Baibel Duahiduahi
July 27–August 2
BAIBEL ENA HEREVA BADADIA | ESODO 12
“Pasova Ena Anina Keristani Taudia Dekenai”
(Esodo 12:5-7) Emui mamoe be do ia bero lasi gauna, mara namonamo gauna, lagani tamona ia abia gauna, mamoe o nani do umui abia. 6 Unai ubua gaudia do umui naridia ia lao bona hua ena dina 14, vadaeni dina ia diho kahirakahira neganai, Israela ena taudia ibounai ese edia mamoe natudia do idia alaia mase. 7 Vadaeni mamoe ena rara haida do umui abia, iduara ena au kahana kahana bona ataiai au dekenai rara do umui dahua, inai ubua gauna umui ania rumadia ibounai dekenai.
w07 1/1 19-25 par. 4
Mai Moale Danu Do Umui Karaia
4 Iesu be Nisan 14, 33 C.E. ai ia mase. Israela dekenai, Nisan 14 be Pasova moalelaia dinana. Lagani ta ta ai unai dina dekenai, ruma bese taudia ese mamoe goevana ta idia gabua bona idia ania hebou. Unai kara amo inai idia laloatao: Guna Aigupito dekenai Nisan 14, 1513 B.C.E. ai aneru ta ese Aigupito taudia edia vara guna natudia ia hamasea, to mamoe ena rara ese Israela taudia edia vara guna natudia ia hamauria. (Esodo 12:1-14) Unai Pasova mamoena ese Iesu ia laulaulaia. Aposetolo Paulo ese ia be inai bamona ia gwauraia: “Pasova mamoe, Keriso, idia alaia vadaeni.” (1 Korinto 5:7) Pasova mamoe ena rara hegeregerena, Iesu ena rara ese taunimanima momo ia hamauria.—Ioane 3:16, 36.
(Esodo 12:12, 13) Badina be unai hanuaboi dekenai, Aigupito tano do lau hanaia lao, edia vara guna natudia tau ibounai do lau alaia mase, taunimanima bona boromakau danu. Aigupito edia dirava ibounai danu do lau panisia momokani, badina be lau inai Lohiabada. 13 Inai rara umui emui noho rumadia dekenai be toana ta, toana be, umui be lau umui kamonai henia taudia. Rara do lau itaia neganai, do lau raka hanaia umui, lauegu badu ese do ia hadikaia lasi umui, Aigupito tano do lau botaia neganai.
it-2-E 583 par. 6
Pasova
Pasova aria ai idia karaia gaudia haida be Iesu ese ia hagugurua. Hegeregere, Aigupito dekenai rara amo edia ruma idia makaia taudia edia vara guna natuna be aneru ese ia alaia lasi. Paulo ese horoa Keristani taudia ia gwauraia vara guna natudia edia kongrigeisen (Heb 12:23), bona Keriso rarana amo idia ia hamauria. (1Te 1:10; Ef 1:7) Pasova mamoe ena turia ta idia makohia lasi. Baibel ia peroveta Iesu ena turia be do idia makohia lasi bona ia mase neganai unai peroveta herevana ia guguru. (Sa 34:20; Ioa 19:36) Unai ese ia hahedinaraia idaunegai Iuda taudia ese lagani handred momo lalonai idia karaia Pasova be Taravatu ese do idia mai gau namodia, unai be Iesu Keriso, “Dirava ena Mamoe Natuna,” ese do ia hagugurua gauna ia laulaulaia.—He 10:1; Ioa 1:29.
(Esodo 12:24-27) “Inai kara do umui badinaia, bona ena taravatu do umui atoa, umui bona emui natuna edia, lagani ibounai ela bona hanaihanai. 25 Bona Lohiabada ese umui do ia henia tano dekenai umui ginidae neganai, iena gwauhamata hegeregere, inai tomadiho karana do umui badinaia. 26 Vadaeni umui emui natudia do idia nanadaia umui dekenai, do idia gwau, ‘Inai tomadiho karana ena anina be dahaka?’ 27 Do umui haere, umui gwau, ‘Inai be Lohiabada ena Pasova boubou ena kara, Aigupito dekenai ia ese Israela taudia edia ruma ia raka hanaia lao, Aigupito taudia sibona mo ia alaia mase, bona iseda taudia ibounai ia hamauria.’” Inai hereva dainai taunimanima ibounai idia tui diho, Dirava dekenai idia toma diho.
w13 12/15 20 par. 13-14
‘Inai Dina Do Umui Laloa Noho Hanaihanai’
13 Uru matamatadia idia tubu daekau neganai, Israela taudia ese edia natudia dekenai Pasova ena sivarai idia hadibaia. Idia hadibadia Iehova be ia idia tomadiho henia taudia ia gimaia. Natudia idia diba Iehova be ia noho momokani, ena taunimanima ia laloa bada bona ia gimadia. Hisihisi namba 10 ai Aigupito taudia edia vara guna natudia ia alaia mase, to Israela taudia edia vara guna natudia ia hamauria neganai, unai ia hamomokania.
14 Keristani tama sina be lagani ta ta ai edia natudia dekenai Pasova ena sivarai idia herevalaia lasi. To, oi ese emu natudia oi hadibaia, Dirava be ena taunimanima ia gimaia, a? Emu natudia dekenai oi hahedinaraia oi abia dae momokani, hari Dirava ese ena taunimanima ia gimaia danu, a? (Sal. 27:11; Isa. 12:2) Unai gaudia umui herevalaia neganai, oi sisiba auka henidia lasi, to mai moale ida umui herevahereva hebou be namo. Unai gaudia umui herevalaia neganai, emui famili do umui durua Iehova umui abidadama henia noho totona.
Hakaua Hereva Namodia Tahua
(Esodo 12:12) Badina be unai hanuaboi dekenai, Aigupito tano do lau hanaia lao, edia vara guna natudia tau ibounai do lau alaia mase, taunimanima bona boromakau danu. Aigupito edia dirava ibounai danu do lau panisia momokani, badina be lau inai Lohiabada.
it-2-E 582 par. 2
Pasova
Aigupito taudia dekenai ia vara hisihisi 10 ese ia hahedinaraia Dirava be Aigupito edia dirava ibounai ia hahemaoro henia, badina hisihisi namba 10 ai edia vara guna natudia ibounai idia mase. (Eso 12:12) Edia dirava Ra dekenai, mamoe tauna be helaga, unai dainai Israela taudia ese Pasova mamoe ena rarana be edia iduara dekenai idia dahua neganai, Aigupito taudia dekenai unai be edia dirava ena ladana hadikaia karana. Danu, idia dekenai boromakau be helaga dainai, boromakau edia vara guna natudia idia mase neganai, Osiris dirava idia tomadiho henia taudia idia lalohisihisi. Danu, Farao idia gwauraia Ra dirava ena natuna. Unai dainai ena vara guna natuna ia mase neganai, ia hahedinaraia Ra bona Farao be siahu lasi.
(Esodo 12:14-16) Inai dina danu do umui laloa noho hanaihanai, iena aria danu do umui karaia Lohiabada ena. Uru ibounai taudia danu ese do idia karaia, bona aria ena taravatu do idia badinaia hanaihanai. 15 “Dina 7 lalonai paraoa gabua gaudia, hatubua lasi gaudia, do umui ania. Dina ginigunana dekenai hatubua muramura ibounai be emui ruma dekena amo do umui atoa siri murimuri dekenai, badina be dina 1 ia lao bona dina 7 lalonai hatubua paraoa do ia ania tauna be Israela ena bese dekena amo do umui negea momokani. 16 “Dina ginigunana dekenai hebou helagana do umui abia, dina namba 7 dekenai danu hebou helagana ma do umui abia. Unai dina ruaosi edia lalonai, gaukara ta do umui karaia lasi, to hebou taudia edia aniani sibona mo do umui karaia.
it-1-E 504 par. 1
Hebou Badana
‘Hebou helagadia’ ena namo ta be, unai nega ai taunimanima be gaukara aukana ta do idia karaia lasi. Hegeregere, dina ginigunana bona dina namba 7 lalonai idia karaia Hatubua Lasi Paraoa Ariana be “hebou helagana,” badina unai hebou totona Iehova ia gwau: “Gaukara ta do umui karaia lasi, to hebou taudia edia aniani sibona mo do umui karaia.” (Eso 12:15, 16) To unai “hebou helagana” ai hahelaga taudia be Iehova totona boubou gaudia idauidau idia karaia (Le 23:37, 38), so dina ta ta ai idia karaia gaukaradia idia karaia diba badina unai ese Dirava ena taravatu ia utua lasi. Unai bamona negadia ai taunimanima be do idia noho kava lasi, to unai nega idia gaukaralaia Dirava idia tomadiho henia totona. Sabati dinana ai, taunimanima ibounai be Dirava tomadiho henia totona idia hebou bona hakaua herevadia idia kamonai. Bena Dirava ena Hereva idia duahia bona herevalaia, gabeai sinagoga dekenai unai idia karaia danu. (Ka 15:21) Sabati bona ‘hebou helagadia’ ai taunimanima be idia gaukara lasi dainai, unai nega idia gaukaralaia iseda Havaraia Tauna idia guriguri henia bona ena ura idia laloa dobu.—ASSEMBLY itaia.
Baibel Duahiduahi