Iseda Haroro Bona Mauri Dalana Hebou Pepana Edia Referens
August 3-9
BAIBEL ENA HEREVA BADADIA | ESODO 13-14
Umui Gini Goada, Iehova Ena Hahemauri Do Umui Itaia
(Esodo 14:13, 14) To Mose ia gwau, “Umui gari lasi, umui gini auka masemase, Lohiabada ena hamauria kara do umui itaia, hari dina umui dekenai do ia hamauria, badina be Aigupito taudia harihari umui itaia, be do umui itaia lou lasi, lasi bona lasi momokani. 14 Lohiabada be umui totona do ia tuari karaia, umui be do umui noho kava sibona.”
w13-E 2/1 4
Mose—Abidadama Tauna
Reana Mose be ia diba momokani lasi Dirava be Davara Kakakakana do ia hapararaia, unai amo Israela taudia idia hanaia bona idia roho mauri diba. To Mose ia abia dae Dirava ese gau ta do ia karaia ena taunimanima ia gimaia totona. Bona Mose ia ura Israela taudia danu be unai bamona abidadama karana idia hahedinaraia. Unai dainai “Mose ia gwau, ‘Umui gari lasi, umui gini auka masemase, Lohiabada ena hamauria kara do umui itaia, hari dina umui dekenai do ia hamauria.’” (Esodo 14:13) Mose ese Isaraela taudia edia abidadama karana ia hagoadaia, a? Oibe, badina Baibel ia gwau Mose sibona lasi to Israela taudia danu be, “idia abidadama dainai, Davara Kakakakana idia raka hanai.” (Heberu 11:29) Mose ena abidadama karana ese ia bona Israela taudia dekenai namo ia havaraia.
(Esodo 14:21, 22) Mose ese iena imana ia atoa maoromaoro davara ena ataiai, vadaeni Lohiabada ese lai, dina ia daekau kahana dekena amo ia siaia, davara ia haloua, vadaeni davara ia hapararaia. Hanuaboi ena hora ibounai be lai ia toa, bona davara be tano kaukau Lohiabada ese ia halaoa. 22 Vadaeni Israela taudia ese tano kaukauna dekenai davara idia raka hanaia, davara ena ranu be haba bamona edia imana idiba kahana dekenai, bona edia imana lauri kahana dekenai danu.
Siahu Ibounai Diravana be Ita Ia Laloa Bada
13 Esodo 14:19-22 duahia. Mani sibona oi piksaia, oi be Farao mai ena tuari oreana bona Davara Kakakakana edia huanai oi gini, bona dala be lasi. Bena Dirava ese kara ta ia karaia. Emui vairanai ia noho ori be murina kahanai ia lao, unai amo Aigupito taudia ia koua bona dibura lalonai idia noho. To hoa dalana ai umui ibounai be diari lalonai umui noho! Bena oi itaia Mose be ena imana ia atoa maoromaoro davara ena ataiai, bona ist kahana amo ia mai lai goadana ese davara ia hapararaia. Bena oi, emu ruma bese, bona emui animal idauidau be Israela taudia ida tano kaukauna dekenai umui raka hanai. Maoromaoro, gau idauna ta oi itaia. Unai tano kaukauna be ia kopukopu o paraka lasi; to tano ia kaukau bona ia auka dainai umui raka hanai diba. Unai badina dainai, idia raka metairametaira taudia be idia raka namonamo diba.
(Esodo 14:26-28) Vadaeni Lohiabada ese Mose dekenai ia hereva, ia gwau, “Oiemu imana be davara ena ataiai ma oi atoa maoromaoro, ranu do ia giroa lou Aigupito taudia edia latanai, bona kariota edia latanai, bona hosi guia taudia edia latanai.” 27 Vadaeni Mose ese iena imana ia atoa maoromaoro davara ena ataiai. Vadaeni daba ia rere neganai, davara ma ia giroa lou ena gabu korikori dekenai, vadaeni Aigupito taudia be davara ena vairana dekenai idia heau gwauraia. Unai bamona dekena amo Lohiabada ese Aigupito taudia ia negedia davara lalonai. 28 Ranu ia giroa lou, kariota bona hosi guia taudia bona Farao ena tuari orea ibounai, davara ena huana dekenai Israela taudia edia murina dekenai idia mai taudia ibounai, be ranu ese ia koua, ta ia mauri lasi.
Iehova Oi Laloaboio Lasi be Namo
Aigupito taudia edia kariota idia dika bona idia hekwarahi noho lalonai, Israela taudia be Davara Kakakakana ena ist kahanai idia ginidae. Vadaeni, Mose ese ena imana be Davara Kakakakana dekenai ia duduia. Unai neganai, Iehova ese unai haba bamona ia haginia ranu be Farao bona iena tuari taudia latanai ia hamorua. Idia ibounai idia mase. To Israela taudia ibounai idia roho mauri!—Eso. 14:26-28; Sal. 136:13-15.
Kahirakahira idia noho hanuadia be unai sivarai idia kamonai neganai, idia gari dikadika. (Eso. 15:14-16) Lagani 40 ia ore murinai, Ieriko hanua hahinena, Rahaba ese Israela tatau rua ia hamaoroa, ia gwau: “Umui dekenai ai gari bada. . . . Badina be ai kamonai Lohiabada ese Davara Kakakaka be umui emui vairanai ia hakaukaua, Aigupito tano dekena amo umui raka mai neganai.” (Ios. 2:9, 10) Dirava idia diba lasi besedia danu be Iehova ese ena bese ia hamauria dalana idia laloaboio diba lasi. Momokani, Israela taudia be Iehova idia laloatao noho be gau badana.
Hakaua Hereva Namodia Tahua
(Esodo 13:17) Farao ese Israela taudia iena imana dekena amo ia negea murinai, Dirava ese dala kwadogi, Pilistia taudia edia tano dekenai ia hakaudia lasi, badina be Dirava ia gwau, “Idia be tuari ena mamina do idia abia neganai, edia lalona do idia giroa, Aigupito dekenai do idia giroa lou sedira.”
it-1-E 1117
Haiwei, Dala Maragina
Idaunegai, Palestine ena siti haida bona basileia ma haida edia haiwei bona dala maragidia be idia join. (Nu 20:17-19; 21:21, 22; 22:5, 21-23; Ios 2:22; Gu 21:19; 1Sa 6:9, 12; 13:17, 18; KING’S ROAD itaia.) Idia gaukaralaia dala badana be Aigupito amo ela bona Pilistia ena siti, Gasa bona Asakelona bona ia lao not ist kahana Megido dekenai. Bena ia lao Hasoro, Galilea Gohuna ena Not ist kahana, bona ia lao Damaseko. Bona Aigupito amo Pilistia ena dala oi badinaia neganai, Gwauhamata Tanona dekenai do oi ginidae haraga badina unai dala be kwadogi. To Iehova ese dala idauna amo Israela taudia ia hakaua lao unai amo Pilistia taudia ese do idia tuari henia lasi.—Eso 13:17.
(Esodo 14:2) “Israela taudia dekenai oi hamaoroa, idia giroa lou, Pi Hahiroto ena vairana dekenai do idia kamepa karaia, davara ena badibadinai. Inai gabu be Migidola bona davara edia huana dekenai, Bala Sepona kahirakahira.
it-1-E 782 par. 2-3
Esodo
Davara Kakakakana be edeseni ia parara, Israela taudia idia hanaia totona?
Edia laolao ai Etama, “taunimanima idia noho lasi tano ena badibadinai” dekenai idia ginidae, bena Dirava ese Mose ia hamaoroa “giroa lou, Pi Hahiroto ena vairana dekenai . . . kamepa karaia, davara ena badibadinai.” Reana unai bamona idia karaia neganai Farao ia laloa Israela taudia be “idia raka kava, raka kava noho.” (Eso 13:20; 14:1-3) El Haj dalana idia stadilaia diba bada taudia idia gwau, Heberu gado ai inai hereva “giroa lou” ena anina be idauidau. Hegeregere, ena anina ma ta be “dala idia haidaua,” to unai sibona lasi, idia gwau ia be do idia giroa lou eiava dala latana ma ta dekenai do idia raka lao ia herevalaia danu. Bona idia gwau, Gulf of Suez ena not kahana dekenai idia ginidae neganai, Israela taudia idia giroa lou bona ist kahana, Jebel ʽAtaqah, ororona bona Gulf ena west kahana ena huana amo idia hanaia. Israela taudia be momo herea dainai bema Not kahana dekenai idia lao bona Farao mai ena tuari oreana ese idia lulua, davara ese edia dala do ia koua dainai heau mauri gabuna be lasi.
Aposetolo taudia edia negai Iuda taudia edia kastom karadia ese unai idia hahedinaraia. (PIHAHIROTH itaia.) To mai anina bada gauna be Baibel sibona ese idia vara gaudia ia hahedinaraia namonamo, to diba bada taudia momo edia lalohadai ese unai ia hahedinaraia lasi. (Eso 14:9-16) Ita gwau diba Israela taudia be Gulf ena west kahana amo idia hanaia (eiava Davara Kakakakana ena west kahana) unai dainai Farao ena tuari taudia be idia hegeregere lasi Israela taudia idia lulua totona.—Eso 14:22, 23.
Baibel Duahiduahi
August 10-16
BAIBEL ENA HEREVA BADADIA | ESODO 15-16
“Ane amo Iehova Hanamoa”
(Esodo 15:1, 2) Vadaeni Mose bona Israela taudia ese inai ane idia abia, Lohiabada ena, idia gwau: Lau be ane do lau abia, Lohiabada ena, badina be ia kwalimu herea vadaeni. Hosi bona idia guia taudia, be davara dekenai ia negea diho vadaeni. 2 Lohiabada ese iena goada, bona iena siahu, be lau dekenai ia henia. Ia sibona ese lau ia hamauria vadaeni. Lauegu Dirava inai, iena ladana do lau hanamoa. Ia be egu tamana ena Dirava, bona iena ladana do lau habadaia egu ane dekenai.
Dahaka Dainai Dirava Momokanina be Hari Ita Gari Henia be Namo?
11 Iehova ese Aigupito ena tuari taudia ia hamasedia karana amo sibona ia abia isi ena tomadiho taudia edia vairanai, bona gabu momo ai iena ladana idia dibaia. (Iosua 2:9, 10; 4:23, 24) Oibe, ia ese ena ladana be Aigupito ena dirava koikoidia, mai edia siahu lasi edia tomadiho taudia idia hamauria diravadia, ataiai ia abia isi. Aigupito taudia ese edia dirava bona taunimanima bona tuari siahuna idia abidadama henia dainai, idia kwalimu lasi. (Salamo 146:3) Unai dainai Israela taudia ese hahenamo anena idia abia, ia amo idia hahedinaraia mauri Diravana idia gari henia, iena bese taudia be mai siahuna ida ia hamauridia Diravana unai!
(Esodo 15:11) Lohiabada e, dirava ibounai edia huanai, oi bamona ta be daika? Oi hegeregere be daika? Helaga dekenai oi be herea momokani. Daika be oi bamona? Hoa karadia oi karaia, bona kara badadia mai gari danu oi karaia noho.
(Esodo 15:18) Lohiabada e, oi be do oi King ela bona hanaihanai
Dahaka Dainai Dirava Momokanina be Hari Ita Gari Henia be Namo?
15 Bema unai neganai ita be Mose ida ita roho mauri bona ita gini hebou, momokani ia vara gauna ese ita ia hamarerea inai ane do ita abia: “[Iehova] e, dirava ibounai edia huanai, oi bamona ta be daika? Oi hegeregere be daika? Helaga dekenai oi be herea momokani. Daika be oi bamona? Hoa karadia oi karaia, bona kara badadia mai gari danu oi karaia noho.” (Esodo 15:11) Unai nega amo ema, haida ese unai bamona lalohadai idia gwauraia lou. Baibel ena buka ginigabena lalonai, aposetolo Ioane ese Dirava ena horoa hesiai taudia mai edia kamonai oreana ta be inai bamona ia gwauraia: “Idia ese Dirava ena hesiai tauna Mose ena ane idia abia, bona Mamoe ena Natuna ena ane danu.” Unai ane badana be dahaka? “[Iehova] Dirava e, Siahu Ibounai Dirava e, oiemu gaukara be bada herea momokani. Oiemu hoa karadia be idau momokani. Oi be bese ibounai edia King! Oiemu kara ibounai be maoromaoro bona momokani. [Iehova] e, daika ese oi dekenai do ia gari henia lasi? Daika ese oiemu ladana do ia hanamoa lasi? Badina be oi sibona be helaga.”—Apokalupo 15:2-4.
16 Hari inai negai danu, Dirava ese ia ruhaia taudia, ia idia tomadiho henia taudia, ese iena imana karakaradia bona iena oda danu idia laloa bada. Taunimanima bese iboudiai amo be lauma dalanai ia ruhaia, inai tanobada mirona amo ia abidia siri badina be Dirava ena oda maoromaorodia idia abia dae bona idia badinaia dainai. Lagani ta ta iboudiai, taunimanima tausen momo herea be inai tanobada dikana amo idia roho mauri, Iehova ena tomadiho taudia edia kara maoromaoro oreana mai goevana dekenai do idia noho totona. Kahirakahira, Dirava ese tomadiho koikoi bona inai tanobada ena orea dikadia oredia, be edia davana ia henidia murinai, idia be tanobada matamatana mai kara maoromaorona lalonai do idia noho hanaihanai.
(Esodo 15:20, 21) Vadaeni Miriama, peroveta hahine, Arona ena taihuna, ese tareko ia abia iena imana dekenai, bona hahine ibounai ese edia tareko idia abia, Miriama ena murina dekenai idia lao, mai mavaru danu. 21 Vadaeni Miriama ese tatau edia ane ena davana ia karaia, ane ia abia, ia gwau: Ane do umui abia, Lohiabada ena, badina be ia kwalimu herea vadaeni, ia ese hosi bona guia taudia, be davara dekenai ia negea diho.
it-2-E 454 par. 1
Miusiki
Israela ai, nega momo ane abia taudia be orea maragidia ai idia parara bona sitaelo idauidau ai ane idia abia. Hegeregere, orea ta ese ane ena kahana ta be sitaelo idauna ai ia abia bona ma ta be sitaelo idauna ma ta ai ia abia, o tau ta be sibona ia ane bona gabeai ibounai be ane idia abia hebou. Bona Baibel ese unai ia hahedinaraia. (Eso 15:21; 1Sa 18:6, 7) Hegeregere, Salamo 136 ai unai ane ena sitaelo idia torea. Nehemia ena negai, Ierusalema ena haba idia hahelagaia totona, orea badadia rua ese idia abia tanikiu anena be unai dala ai idia abia.—Ne 12:31, 38, 40-42; SONG itaia.
it-2-E 698
Peroveta Hahinena
Baibel ese ia hahedinaraia Miriama be peroveta hahinena ginigunana. Bona Dirava ese Miriama ia gaukaralaia ane amo ena hereva ia gwauraia totona. (Eso 15:20, 21) Unai dainai, Miriama bona Arona be Mose dekenai idia gwau: “Sedira ai danu aiemai hereva dekena amo [Iehova ] ia hereva vadaeni” (Nu 12:2) Iehova be peroveta tauna Mika amo ia gwau ia ese “Mose, bona Arona bona Miriama” ia siaia Israela taudia idia gunalaia bona Aigupito amo idia hakaua siri totona. (Mi 6:4) Herevana Miriama be Dirava ese ia gaukaralaia ena hereva ia gwauraia totona, to ia be Mose bamona lasi, badina iena hetura karana Dirava ida be ia goada lasi. Unai dainai Miriama ia maumau neganai Dirava ese ia panisia.—Nu 12:1-15.
Hakaua Hereva Namodia Tahua
(Esodo 16:13) Adorahi neganai, manu momo, edia ladana kibi idia roho mai, kamepa ena gabu ibounai idia noho. Daba neganai hanuaboi ena ranu be kamepa ena tano ibounai dekenai ia noho.
w11-E 9/1 14
Inai Oi Diba, A?
Dahaka dainai Dirava ese kibi manu ia abia hidi taunimanima idia noho lasi gabuna ai Israela taudia ia ubua totona?
Israela taudia be Aigupito idia rakatania murinai, Dirava ese nega rua kibi manudia be edia vamu bamona ia henidia.—Esodo 16:13; Numera 11:31.
Kibi manu be manu maragidia, edia lata be sentimita 18 bamona bona edia metau be 100 gram bamona. Idia be western Asia bona Europe tanodia ai idia noho. Bona lagani ta ta ai, North Africa bona Arabia dekenai idia roho lao. Bona edia laolao lalonai idia momo be Meditereinien Davara ena ist kahana amo idia roho lao Sinai Tanona dekenai.
Buka ta ladana, The New Westminster Dictionary of the Bible, ia gwau kibi manu be “idia roho namonamo bona haraga, danu lai ese idia ia durua idia roho totona; to bema lai ena toa dalana ia idau, eiava idia roho daudau, do idia hesiku bona ibounai be tano dekenai do idia moru unai neganai idia marere diba lasi.” Tano dekenai dina ta eiava rua do idia laga-ani murinai, do idia roho lou bona tano dekenai idia noho neganai do ia auka lasi labana taudia ese idia abia totona. Lagani 1900 gunanai, Aigupito taudia ese kibi manu 3 milioni mai kahana be tano ma haida dekenai idia hoihoilaia aniani totona.
Dirava ese Israela taudia be kibi manu amo ia ubua negadia rua be siahu negana ai (spring). Ena be hanaihanai kibi manudia be Sinai tanona dekenai idia roho lao, to unai negai Iehova ese “lai ia siaia” bona manu ibounai be Israela taudia edia kamepa dekenai idia roho lao.—Numera 11:31.
(Esodo 16:32-34) Mose ia gwau, “Lohiabada ese inai oda ia henia, ia gwau: Uro ta mai koua gauna be inai mana dekenai do umui hahonua. Inai be do ia noho, gabeai idia vara emui bese taudia ese do idia itaia totona. Vadaeni do idia diba inai mana dekena amo umui lau ubua, Aigupito dekena amo umui lau hakaua, bona taunimanima idia noho lasi tano dekenai umui noho neganai.” 33 Vadaeni Mose ese Arona dekenai ia hamaoroa, ia gwau, “Uro ta oi abia, mana hegeregere kapusi badadia 4 oi udaia. Lohiabada ena vairana dekenai do oi atoa, vadaeni ia noho, oiemu bese, gabeai idia vara taudia do idia itaia, bona laloa totona.” 34 Unai dainai, Arona ese uro be gabu helagana ta Lohiabada ena vairana dekenai ia atoa, unuseni do ia noho totona, Lohiabada ena oda Mose dekenai hegeregerena.
Duahia Taudia Edia Henanadai
Iehova ese Aigupito amo Israela taudia ia hamauridia murinai, idia be aniani totona idia maumau matamaia. Unai dainai, Iehova ese mana ia henidia. (Esodo 12:17, 18; 16:1-5) Unai nega ai, Mose ese Arona ia hamaoroa, ia gwau: “Uro ta oi abia, mana hegeregere kapusi badadia 4 oi udaia. Lohiabada ena vairana dekenai do oi atoa, vadaeni ia noho, oiemu bese, gabeai idia vara taudia do idia itaia, bona laloa totona. Unai dainai, Arona ese uro be gabu helagana ta Lohiabada ena vairana dekenai ia atoa, unuseni do ia noho totona, Lohiabada ena oda Mose dekenai hegeregerena.” (Esodo 16:33, 34) Ita diba Arona ese uro ta lalonai mana ia udaia, to namona be ia naria ela bona Mose ese Taravatu Mauana ia karaia bona nadi palaka rua ia udaia murinai, mana ia udaia.
Baibel Duahiduahi
August 17-23
BAIBEL ENA HEREVA BADADIA | ESODO 17-18
“Manau Tauna be Ma Haida Ia Treinia Bona Maduna Ia Henia”
(Esodo 18:17, 18) Vadaeni Ietero ese ia hamaoroa, ia gwau, “Oiemu kara be ia namo lasi. 18 Oiemu goada be do ia ore, inai taunimanima danu edia goada be do ia ore. Badina be inai gaukara ia metau bada. Oi sibona do oi karaia diba lasi.
w13-E 2/1 6
Mose—Lalokau Tauna
Mose ese Israela taudia dekenai lalokau ia hahedinaraia. Idia lalaparara Iehova ese Mose ia gaukaralaia ena taunimanima ia hakaua totona, unai dainai Mose dekenai idia lao bona edia problem idauidau idia gwauraia. Baibel ia gwau: “Iena vairana dekenai taunimanima idia gini, daba ia lao bona hanuaboi.” (Esodo 18:13-16) Mani oi laloa reana Mose ia hesiku badina hora momo lalonai Israela taudia ese edia lalohekwarahi gaudia idia herevalaia bona ia kamonai! To Mose be mai moale ida ia lalokau henia taudia ia durua.
(Esodo 18:21, 22) Tau haida, mai edia aonega danu do oi abia hidi, Dirava dekenai idia gari taudia, bona moni abia hunia dala karana idia ura lasi taudia. Taunimanima gunalaia taudia do oi halaodia, 1000 ta ta edia gunalaia taudia, 100 ta ta edia gunalaia taudia, 50 ta ta edia gunalaia taudia, 10 ta ta edia gunalaia taudia. 22 Idia ese kota biaguna gaukara do idia karaia noho dina ibounai. Hereva badadia be oi dekenai do idia mailaia, to hereva maragidia be idia sibona do idia tahua. Inai dala dekenai oiemu gaukara be do ia metau bada lasi, badina gaukara umui haria dainai.
w03-E 11/1 6 par. 1
Mauri Namona Abia Totona Abidadama be Mai Anina Bada
Unai taudia be Dirava ena kara namodia idia hahedinaraia dainai maduna idia abia. Unai ese ia hahedinaraia idia be Dirava idia gari henia, bona Havaraia Tauna idia matauraia dainai idia ura lasi edia kara amo ia idia habadua. Bona unai taudia edia gaukara goada karana amo, ibounai dekenai idia hahedinaraia idia be Dirava ena taravatu idia badinaia. Bona idia ese hunia dalanai kohu bona moni abia karana idia inai henia, unai ese ia hahedinaraia ladana bada abia karana idia dadaraia. Bona idia ese edia maduna do idia gaukaralaia kerere lasi sibona edia ura, edia varavara bona turadia idia durua totona.
(Esodo 18:24, 25) Mose ese Ietero dekenai ia kamonai henia, bona iena sisiba hegeregerena ia karaia. 25 Israela taudia ibounai dekena amo aonega taudia ia abia hidi, bona taunimanima edia gunalaia taudia ia halaodia, 1000 ta ta, 100 ta ta, 50 ta ta, bona 10 ta ta edia gunalaia taudia.
Lalo-Maoromaoro ese Kara Maoromaoro Taudia Ia Hakaua
Mose danu ese manau ia hahedinaraia. Ma haida edia hekwakwanai hamaoromaoroa gaukarana ai ena goada ia ore noho neganai, ena ravana, Ietero, ese sisiba maorona ia henia: Iena gaukara ena kahana be tatau namodia haida do ia henidia be namo. Mose ese sibona ena goada ena hetoana ia diba neganai, mai aonega ida unai hereva ia abia dae. (Esodo 18:17-26; Numera 12:3) Manau tauna be ma haida dekenai mai ena ura ida gaukara ia henia, bona ia be maduna ia haria karana amo sibona ena siahu ia hadikaia garina ia gari lasi. (Numera 11:16, 17, 26-29) Lasi, ia ura do ia durudia lauma dalanai do idia goada idia lao totona. (1 Timoteo 4:15) Namona be ita danu be unai bamona, ani?
Hakaua Hereva Namodia Tahua
(Esodo 17:11-13) Mose ese iena imana ruaosi ia abia isi neganai, Israela taudia idia kwalimu noho, to iena imana ia atoa diho neganai, Amaleka taudia idia kwalimu noho. 12 Mose ena imana idia mase neganai, Arona bona Huru ese nadi ta idia abia, iena murina dekenai idia atoa, nadi latanai ia helai. Vadaeni idia ruaosi kahana kahana idia gini, iena imana ruaosi idia abia isi. Arona bona Huru ese Mose ena imana idia abia isi, ia lao bona dina ia diho. 13 Vadaeni Iosua ese Amaleka taudia ia halusia momokani.
“Emui Imadia Do Umui Ha-Aukaia, Do Umui Manoka Lasi”
14 Tuari lalonai Arona bona Huru ese Mose ena imana idia hagoadaia. Unai hegeregerena, dala ita tahua be namo ma haida ita hagoadaia totona. Daidia do ita hagoadaia? Buruka taudia, gorere taudia, ruma bese taudia ese idia dagedage henia taudia, sibona idia noho o edia lalokau taudia idia mase dainai idia lalometau taudia. Matamata taudia ita hagoadaia danu be namo, badina idia momo be edia turadia ese idia veria kara kereredia idia karaia totona, eiava inai nega oromana ai sikuli bada, o davana namona moni gaukarana idia tahua totona. (1 Tes. 3:1-3; 5:11, 14) Oibe, Kingdom Hall ai, haroro gaukara ai, ita aniani hebou lalonai, o telefon amo ma ta ita hereva henia neganai, idia ita hagoadaia be namo.
(Esodo 17:14) Lohiabada ese Mose dekenai ia hamaoroa, ia gwau, “Buka ta lalonai inai tuari kwalimu sivaraina do oi torea, taunimanima do idia laloatao totona. Bona Iosua do oi hamaoroa, lau be Amaleka taudia edia sivarai do lau haorea momokani.”
it-1-E 406
Toretore Helagadia
Mose ese ia torea revarevadia be Dirava ena hahekau henunai ia torea, bona tomadiho goevana dekenai ita idia hakaua, unai dainai ita daradara lasi badina unai hereva ibounai be momokani. Mose be Dirava ese ia abia hidi Israela taudia edia gunalaia tauna ai ia lao totona. To matamanai unai lalohadai ia abia dae lasi. (Eso 3:10, 11; 4:10-14) To, Dirava ese Mose ia hagoadaia bona ia dekenai siahu ia henia hoa karadia ia karaia totona, unai dainai Farao ena meamea taudia idia gwau iena siahu be Dirava amo ia mai. (Eso 4:1-9; 8:16-19) Unai ese ia hahedinaraia Mose be hereva gwauraia bona toretore tauna ai ia lao karana besibona ena ura dainai lasi to ia be Dirava ena ura. To Dirava ena hereva ia kamonai bona lauma helaga ese ia hakaua, unai ese Mose ia durua Dirava ena hereva ia gwauraia guna bena Baibel ena kahana haida dekenai ia torea.—Eso 17:14.
Baibel Duahiduahi
August 24-30
BAIBEL ENA HEREVA BADADIA | ESODO 19-20
“Taravatu Ten ese Oi Ia Durua Dalana”
(Esodo 20:3-7) “Idau dirava ta do umui abia lasi lauegu vairana dekenai. 4 “Laulau ta do umui karaia lasi, guriguri henia totona kaivakuku gauna ta, o gau ta ena laulau, guba gauna ta, o tanobada gauna ta, o ranu lalonai gauna ta. 5 Laulau o kaivakuku ta dekenai do umui tomadiho henia lasi, bona iena hesiai gaukara do umui karaia lasi. Badina be lau Lohiabada emui Dirava be lau ura umui be lau sibona egu. Idia ura henia lasi lau dekenai taudia edia kara dika ena davana, be do lau henia edia natuna bona tubuna dekenai, ia lao bona uru toi o hani. 6 To lau dekenai idia lalokau henia taudia bona egu taravatu idia badinaia taudia do lau lalokau henia. Bona edia tubuna taudia momo momo herea danu do lau lalokau henia. 7 “Lohiabada emui Dirava ena ladana be do umui gwauraia kava, gwauraia kava lasi, badina be egu ladana do ia gwauraia kava tauna ena davana do lau henia.
w89-E 11/15 6 par. 1
Taravatu 10 ese Edena Bamona Oi Ia Durua?
Taravatu ginigunadia 4 ese iseda maduna Iehova dekenai ia hahedinaraia. (1) Ia be iseda Dirava bona ia sibona ita tomadiho henia be namo. (Mataio 4:10) (2) Ia idia tomadiho henia taudia ese kaivakuku ta eiava laulau ta idia gaukaralaia lasi be namo. (1 Ioane 5:21) (3) Dirava ena ladana ita matauraia be namo. (Ioane 17:26; Roma 10:13) (4) Iseda mauri ai ita karaia gaudia ibounai idia helaga be namo. Unai amo ita laga-ani, unai be hegeregere ‘sabati ita abia’ bamona. Anina be sibona iseda ura ita dadaraia.—Heberu 4:9, 10.
(Esodo 20:8-11) “Sabati Dina do umui laloatao, bona do umui hahelagaia. 9 Dina 6 edia lalonai emui gaukara ibounai do umui karaia. 10 To dina namba 7 be laga-ani ena dina, Lohiabada emui Dirava ena. Unai dina dekenai do umui gaukara lasi, umui o emui natudia, o emui hesiai tauna, o emui hesiai hahine, o emui boromakau, o idau tauna emui hanua dekenai ia noho. 11 Badina be dina 6 edia lalonai Lohiabada ese guba bona tanobada bona davara bona edia lalonai gaudia ibounai ia karaia, vadaeni dina namba 7 ia laga-ani. Unai dainai Lohiabada ese dina namba 7 ia hanamoa vadaeni, bona ia hahelagaia.
(Esodo 20:12-17) “Oiemu tamana bona sinana dekenai do oi matauraia. Unai dekena amo oiemu mauri nega do ia daudau, Lohiabada oiemu Dirava ese oi dekenai ia henia tano dekenai. 13 “Taunimanima oi alaia lasi. 14 “Oi heudahanai lasi. 15 “Oi henaoa lasi. 16 “Taunimanima ta dekenai oi samania koikoi lasi. 17 “Taunimanima ta ena ruma dainai oi mama henia lasi. Iena adavana totona do oi mama henia lasi, o iena hesiai tauna, o iena hesiai hahine, o iena boromakau, o iena doniki, o iena kohu ta totona do oi mama henia lasi.”
w89-E 11/15 6 par. 2-3
Taravatu 10 ese Edena Bamona Oi Ia Durua?
(5) Natudia ese edia tama sina idia kamonai henia be namo, unai ese ruma bese lalonai lalotamona ia havaraia, bona Iehova ese idia do ia hanamoa. Unai “taravatu ginigunana mai ena gwauhamata” ese helaro ia henia! Bona ena gwauhamata haida be “do oi noho namo” bona danu “tanobada ai nega daudau do oi noho.” (Efeso 6:1-3) Ita be inai tanobada dikana ena “dina gabediai” ita noho dainai, namona be matamata taudia ese Dirava ena taravatu idia badinaia, unai amo mauri hanaihanai ena hahenamo do idia abia.—2 Timoteo 3:1; Ioane 11:26.
Iseda dekena taudia ita lalokau henidia dainai idia dekenai inai bamona kara ita karaia lasi, hegeregere, (6) ala ala, (7) heudahanai, (adultery), (8) henaohenao, bona (9) hereva koikoi. (1 Ioane 3:10-12; Heberu 13:4; Efeso 4:28; Mataio 5:37; Aonega Herevadia 6:16-19) To iseda lalona ai dahaka gaudia ita laloa? Taravatu (10) ese mataganigani karana ia taravatua, bona unai ese ita ia hadibaia Iehova ia ura iseda lalona ai idia noho gaudia idia goeva be namo.—Aonega Herevadia 21:2.
Hakaua Hereva Namodia Tahua
(Esodo 19:5, 6) Harihari bema lauegu hereva do umui kamonai henia, bona lauegu taravatu do umui badinaia neganai, umui be lauegu bese korikori do umui lao. Tanobada besedia ibounai be lauegu, to bese ibounai edia huanai umui be lauegu abia hidi besena. 6 Lauegu helaga taudia do lau halaoa umui, bese helagana do umui lao. Lau sibona dekenai do umui helaga.’ Inai bamona do oi hamaoroa Israela taudia dekenai.”
it-2-E 687 par. 1-2
Hahelaga Tauna
Hahelaga Gaukarana. Iehova ia gwauhamata bema Israela taudia ese ena taravatu idia badinaia, idia be “helaga taudia . . . [bona] bese helagana” ai idia do ia halaoa. (Eso 19:6) To, Arona ena bese taudia ese hahelaga gaukara do idia karaia noho ela bona idia perovetalaia hahelaga tauna badana do ia mai. (He 8:4, 5) Bona unai hahelaga gaukarana be do ia noho ela bona Taravatu kontrakana ia doko bona Kontraka matamatana ia matamaia. (He 7:11-14; 8:6, 7, 13) Matamanai, Iehova ese Israela besena dekenai hahelaga gaukarana ia henia, bona Dirava ia ura ena gwauhamata Basileia lalonai hahelaga gaukara idia karaia, to gabeai unai gaukara be Idau Bese taudia dekenai ia henia.—Ka 10:34, 35; 15:14; Ro 10:21.
Iuda taudia haida sibona ese Keriso idia abia dae, to gabeai idia hegeregere lasi basileia korikorina bona bese helagana ena hahelaga gaukara idia karaia totona. (Ro 11:7, 20) Israela taudia be edia kamonai lasi karana dainai, Dirava ese lagani hundred momo gunanai peroveta tauna Hosea amo idia ia sisiba henia, ia gwau: “Umui hahelagaia taudia ese lau umui badinaia lasi, bona egu hadibaia hereva umui negea vadaeni. Unai dainai lau ese umui do lau negea, bona emui natuna memero dekenai hahelagaia dagina do lau henia lasi.” (Ho 4:6) Iesu ese danu Iuda gunalaia taudia ia hamaoroa, ia gwau: “Dirava ese ena Basileia be umui amo do ia kokia bena huahua ia atoa besena dekenai do ia henia.” (Mt 21:43) To, Iesu Keriso be tanobada dekenai ia noho neganai, ia diba Arona ena bese taudia be hahelaga gaukara idia do karaia noho, unai dainai lepera taudia ia hanamoa neganai hahelaga taudia dekenai ia siaia lao unai amo taravatu hegeregerena, harihari gaudia do idia henia.—Mt 8:4; Mr 1:44; Lu 17:14.
(Esodo 20:4, 5) “Laulau ta do umui karaia lasi, guriguri henia totona kaivakuku gauna ta, o gau ta ena laulau, guba gauna ta, o tanobada gauna ta, o ranu lalonai gauna ta. 5 Laulau o kaivakuku ta dekenai do umui tomadiho henia lasi, bona iena hesiai gaukara do umui karaia lasi. Badina be lau Lohiabada emui Dirava be lau ura umui be lau sibona egu. Idia ura henia lasi lau dekenai taudia edia kara dika ena davana, be do lau henia edia natuna bona tubuna dekenai, ia lao bona uru toi o hani.
Esodo Bukana Ena Hereva Badadia
20:5—Edena dala ai Iehova idia ura henia lasi taudia edia “kara dika ena davana” be edia natuna bona tubuna dekenai ia henia? Ta be tau eiava hahine badana ai ia lao neganai, ta ta be ena kara bona lalohadai hegeregerena Dirava ese do ia hahemaoro henia. To Israela taudia ese kaivakuku idia tomadiho henia matamaia neganai, uru gabedia ese edia kara ena davana idia abia. Abidadama Israela taudia ese idia mamia unai bese edia tomadiho dalana ese edia Dirava badinaia karana ia tohoa danu.
Baibel Duahiduahi
August 31–September 6
BAIBEL ENA HEREVA BADADIA | ESODO 21-22
“Iehova Bamona Mauri Ita Laloa Bada”
(Esodo 21:20) “Bema tau ta ese iena hesiai gaukara davana lasi ia karaia tauna o hahine ia botaia au dekenai, vadaeni nega tamona ia mase, unai biaguna dekenai iena kerere davana do umui henia.
it-1-E 271
Kwadia Karana
Bema Heberu hesiai tauna eiava kekenina be ena biaguna ena hereva ia kamonai henia lasi, ena biaguna be mai ena maoro au amo ia kwadia totona. To, bema hesiai tauna eiava kekenina ia mase, biaguna idia panisia be namo. Bona bema dina ta eiava rua lalonai ia mase lasi, unai ese ia hahedinaraia biaguna be ala ala lalohadaina ia abia lasi. Biaguna be mai ena maoro ena hesiai tauna ia panisia totona, badina “iena moni” amo ia hoia. Mani oi laloa, ta be sibona ena dava bada kohudia do ia hadikaia diba lasi, bema unai ia vara do ia lalohisihisi bada. Danu, bema hesiai tauna be dina ta eiava dina momo murinai ia mase, do idia diba momokani lasi ena mase ena badina be biaguna ese ia kwadia dainai eiava badina ma ta dainai ia mase. Unai dainai bema hesiai tauna be dina ta eiava rua murinai ia mase lasi, biaguna do idia panisia lasi.—Eso 21:20, 21.
(Esodo 21:22, 23) Bema tatau idia heatu, vadaeni rogorogo hahine ta idia haberoa, ia mara dika, bona iena natuna ia mase, to hahine ia mase lasi. Vadaeni iena adavana be moni davana hida do ia gwauraia, bona hahine ia botaia tauna ese inai davana do ia henia, kota biaguna ena kota hereva hegeregerena. 23 To bema hahine ia mase, vadaeni ia alaia tauna ena mauri do umui utua.
Dirava Hegeregerena, Mauri Oi Laloa Bada, A?
16 Dirava ena matanai ia do vara lasi beibi ena mauri be mai anina bada. Idaunegai Israela ai, bema ta ese rogorogo hahine ta ia haberoa, bena unai hahine o ena beibi ia mase, Dirava ese unai tauna do ia gwauraia ala-ala tauna, bona “mauri ena davana” be mauri do ia henia. (Esodo 21:22, 23, NW) Mani oi laloa, hahine momo idia ura matabodaga karadia idia karaia noho bona idia ura lasi idia hekwarahi dainai, lagani ta ta ai beibi be bogana lalonai idia hamasea neganai, Iehova ena hemami be edena bamona?
(Esodo 21:28, 29) “Bema boromakau ta ese iena doana dekenai tau ta o hahine ta ia alaia mase, unai boromakau be nadi dekenai do umui hodoa mase, bona iena vamuna be do umui ania lasi. To iena biaguna be ia kerere lasi. 29 To sedira unai boromakau ese nega haida taunimanima ia hadikaia, bona biaguna dekenai guna idia sisiba henia vadaeni. To gabeai ia koua namonamo lasi dainai tau ta o hahine ta ia alaia mase, vadaeni unai boromakau be nadi dekenai do umui hodoa mase, bona biaguna danu do umui alaia mase.
Iehova Ia Ura Dika ta Oi Davaria Lasi
Mose ena Taravatu lalonai animal ese tau ta ia haberoa bona idia panisia dalana ia gwauraia danu. Hegeregere, bema boromakau ta be ena doana amo tau ta ia hamasea, unai boromakau ena biaguna ese boromakau do ia alaia mase, unai amo ma haida do ia hadikaia lasi. Boromakau ena biaguna ese unai vamu do ia ania o hoihoilaia be taravatu, unai dainai bema boromakau ia alaia mase ia be moni bada ia negea unai. To, bema boromakau ese tau ta ia haberoa to biaguna ese unai boromakau ia naria namonamo lasi, dahaka do ia vara? Bema unai boromakau tamona ese tau ma ta ia hamasea, unai boromakau bona iena biaguna do idia hamasea. Unai taravatu ese Israela taudia ia durua edia animal idia naria namonamo totona.—Eso. 21:28, 29.
Hakaua Hereva Namodia Tahua
(Esodo 21:5, 6) Sedira hesiai tauna do ia gwau, ‘Lau be egu biaguna, bona egu adavana, bona egu natuna dekenai lau ura henia, lau ura lasi lau rakatania kava.’ 6 Unai neganai unai tau be, iena biaguna ese do ia mailaia Dirava ena vairana dekenai. Iduara dekenai o iduara ena auna dekenai, biaguna ese unai hesiai tauna ena taiana dekenai nila amo matuna do ia karaia. Vadaeni unai tau ese iena biaguna dekenai do ia gaukara noho, ia lao bona ia mase.
Dahaka Dainai Iehova Dekenai Oi Gwauhamata be Namo?
4 Keristani gwauhamata be mai anina bada. Ia be gwauhamata kava ta sibona lasi. To, gwauhamata ta ita karaia neganai, edena dala ai unai ese ita ia durua? Unai ita diba totona, namona be ita itaia edena dala ai taunimanima rua ese gwauhamata ta idia karaia neganai, unai ese idia ia durua. Haheitalai ta be, hetura karana. Ta oi tura henia namonamo totona, namona be turana ena maduna oi huaia. Unai ena anina be gwauhamata ta oi karaia—oi abia dae emu maduna be emu turana ena namo do oi laloa bada. Baibel be Davida bona Ionatana edia hetura namonamo karana ia herevalaia. Idia ese unai hetura karana ena gwauhamata idia karaia danu. (1 Samuela 17:57; 18:1, 3 duahia.) Ena be unai bamona gwauhamata idia karaia taudia momo ita davaria lasi, to bema taunimanima be gwauhamata idia karaia bona ta ese ma ta ena namo ia laloa bada, unai hetura karana ia namo.—Aon. 17:17; 18:24.
5 Dirava ese Israela taudia dekenai ia henia Taravatuna be hesiai tauna bona ena biaguna idia karaia gwauhamata ta ia gwauraia—unai gwauhamata amo hesiai tauna be heduru ia abia diba. Bema hesiai tauna ta ia ura biaguna namona ta ena hesiai tauna ai ia lao hanaihanai bona ia noho namonamo, vadaeni biaguna ida gwauhamata ta ia karaia bona ia badinaia hanaihanai be namo. Taravatu ia gwau: “Sedira hesiai tauna do ia gwau, ‘Lau be egu biaguna, bona egu adavana, bona egu natuna dekenai lau ura henia, lau ura lasi lau rakatania kava.’ Unai neganai unai tau be, iena biaguna ese do ia mailaia Dirava ena vairana dekenai. Iduara dekenai o iduara ena auna dekenai, biaguna ese unai hesiai tauna ena taiana dekenai nila amo matuna do ia karaia. Vadaeni unai tau ese iena biaguna dekenai do ia gaukara noho, ia lao bona ia mase.”—Eso. 21:5, 6.
(Esodo 21:14) To bema tau ta ese iena badu ia toreisi guna, vadaeni tau ta ia alaia mase, unai ala-ala tauna do umui alaia mase. Bema unai ala-ala tauna ese egu boubou patana dekenai ia heau lao, mauri davaria totona, umui ese boubou patana dekena amo do umui kokia lao, bona do umui alaia mase.
it-1-E 1143
Doana
Esodo 21:14 ese reana ia hahedinaraia, bema hahelaga tauna be ia ala ala, idia panisia be namo, eiava bema ala ala tauna be boubou patana ena doana ia dogoatao, unai ese do ia gimaia lasi.—1Ki 2:28-34 hahegeregerea.
Baibel Duahiduahi