1921 Lagani Handred Gunanai

JANUARY 1, 1921 The Watch Tower magasin ese Bible Student taudia dekenai inai bamona henanadai ia henia: “Inai lagani ai, dahaka gaukara do ita karaia?” Unai magasin ese Isaia 61:1, 2 ia herevalaia, unai ese Baibel Student taudia ia durua haroro gaukara ena hahegani idia laloatao totona. Ia gwau: “Iehova ese lau ia horoa manau taudia dekenai sivarai namona lau harorolaia totona. . . . Iehova ena kara namo laganina bona iseda Dirava ena badu dinana harorolaia totona.”

MAI GARI LASI IDA IDIA HARORO

Bible Student taudia idia haroro totona, idia gari lasi be namo. Idia ese manau taudia dekenai “sivarai namona” do idia harorolaia, bona kara dika taudia dekenai “Dirava ena badu dinana” do idia gwauraia.

Canada dekenai ia noho tadikaka J. H. Hoskin be mai gari lasi ida ia haroro, ena be dagedage ia davaria. Lagani 1921 ena matamanai, ia ese pasto tauna ta ia davaria. Tadikaka Hoskin ese ia hamaoroa: “Namona be mai moale ida Baibel ita herevalaia. Bema gau haida dekenai ita lalotamona lasi, to mai manau ida eda herevahereva karana do ita hadokoa bona turadia bamona do ita noho.” To unai ia vara lasi. Tadikaka Hoskin ia laloatao: “Ai be miniti haida sibona ai herevahereva murinai, [pasto] be mai badu danu iduara ia koua, unai dainai lau laloa ena iduara ena galasi do ia makohi.”

Pasto ia boiboi, ia gwau: “Oi lao bona Keristani lasi taudia oi haroro henia?” Tadikaka Hoskin be ia hereva lasi, bona pasto ia rakatania, bena sibona dekenai ia gwau: ‘Unai be Keristani karana lasi!’

Murina dinana ai, pasto be ena dubu lalonai ia haroro neganai, tadikaka Hoskin ia gwauraia dika. Tadikaka Hoskin ia gwau: “Ia ese taunimanima ia hamaoroa lau be koikoi tauna bona lau idia alaia be namo.” To tadikaka be unai ese ia koua lasi, ia haroro noho bona momo ia hereva henia. Ia gwau: “Unai gabu dekenai haroro gaukara lau moalelaia. Haida idia gwau, ‘Lau diba oi be Dirava ena hesiai tauna!’ Bona lau idia noia egu dabu gaudia idia henia totona.”

SIBONA EMU STADI BONA FAMILI STADI

Bible Student taudia ese taunimanima idia durua Baibel idia lalopararalaia totona, idia ese The Golden Age magasin, hari ita gwauraia Noga! ai Baibel ena henanadai bona haere idia halasia loulou. Bona ena kahana ta be matamata taudia edia henanadai, tama sina ida idia herevalaia totona. Tama sina ese edia natudia dekenai unai henanadai idia henia bona idia durudia Baibel ai haere idia tahua totona. Henanadai haida hegeregere, “Baibel bukadia ibounai be hida?,” unai ese idia ia durua Baibel idia diba namonamo totona. Henanadai ma ta be, “Keristani taudia ibounai be dagedage idia davaria, a?,” unai ese matamata taudia ia durua mai gari lasi ida idia haroro totona.

Danu, Baibel idia diba namonamo taudia totona Baibel ena henanadai bona haere ena kahana ia noho. Haere be Studies in the Scriptures bukana dekenai idia davaria diba. The Golden Age magasin idia duahia taudia momo be unai gaudia amo diba idia abia, to tadikaka ese hadibaia hereva idia gwauraia, unai henanadai ena kahana do idia halasia lou lasi. Dahaka dainai senisi ia vara haraga?

BUKA MATAMATANA!

*The Harp of God* bukana

Duahiduahi asainmen kadi

Henanadai kadi

Hakaua tadikaka idia laloparara, Bible student matamatadia ese Baibel ena hereva be topik ta ta ai idia dibaia be namo. Unai dainai, November 1921 ai, inai buka The Harp of God idia halasia. Bona unai buka idia abia taudia be ladana idia henia stadi kosi idia karaia totona, bona idia sibona ese unai buka do idia stadilaia. Oibe, unai bamona stadi karana ese idia ia durua Dirava ena ura taunimanima totona idia lalopararalaia.” Unai Baibel stadi kosi be edena bamona idia karaia?

Ta be unai buka ia abia neganai, kadi maragina ta idia henia, unuseniai duahiduahi asainmen ia noho. Murina wiki ai, kadi ma ta idia henia, unuseniai henanadai haida idia noho, unai amo ia duahia gaudia ia haerelaia diba. Bena kadi ena dokona kahana ai vaira wiki ena duahiduahi asainmen idia torea.

Wiki ta ta ai hua toi lalonai, stadi kosi ia naria kongrigeisen ese stiuden dekenai kadi matamata idia siaia. Nega momo kongrigeisen ai tadikaka taihu burukadia eiava idia raka diba lasi taudia ese unai kadi idia siaia. Hegeregere, Millvale, Pennsylvania, U.S.A., amo taihu Anna K. Gardner, ia gwau: “The Harp of God bukana idia halasia neganai, egu kakana Thayle, diseibol kekenina be wiki ta ta ai asainmen kadi ia siaia diba.” Ta be unai kosi ia haorea neganai, kongrigeisen amo ta ese do ia vadivadi henia bona durua Baibel amo diba ma haida ia abia totona.

GAUKARA IA BADA

Lagani ena dokona ai, tadikaka J. F. Rutherford ese klas taudia ibounai dekenai revareva ia siaia. Ia gwau, “Unai lagani ai haroro gaukara be idia habadaia momokani bona anina namona ia vara, unai ese lagani gunadia ia hanaia.” Bena ma ia gwau: “Gaukara badana ia do noho. Ma haida umui hagoadaia inai gaukara namona idia durua totona.” Bible Student taudia ese unai hereva idia badinaia. Oibe, lagani 1922 ai, mai gari lasi ida Basileia ena sivarai namona idia harorolaia goadagoada.

Idia Gari Lasi Turadia

Bible Student taudia be ta ta idia durua karana amo lalokau idia hahedinaraia. “Hekwakwanai negadia ai” idia be gari lasi turadia, bona henunai ia noho sivarai ese unai ia hamomokania.—Aon. 17:17.

Tuesday, May 31, 1921 ai, Tulsa, Oklahoma, U.S.A., dekenai, korema tauna ta ese kurokuro hahinena ia dagedage henia dainai, dibura ruma ai idia atoa. To unai murinai, kurokuro taudia 1,000 mai kahana be korema taudia haida ida idia heai. Karaharaga, korema taudia idia noho gabuna ladana Greenwood ai heai ia bada herea. Bona edia ruma ibounai 1,400 mai kahana bona edia bisinesi gabudia idia gabua bona edia kohu idia henaoa. Ripoti haida idia gwau, taunimanima 36 idia mase, to reana unai namba ia hanaia 300 mai kahana.

Greenwood dekenai ia noho korema tadikaka, Richard J. Hill, ia gwau: “Unai heai ia vara hanuaboina ai, emai kongrigeisen hebou ai karaia, hanaihanai ai karaia bamona. Hebou ia ore murinai, idia heai noho gabuna dekenai ipidi edia pou regena ai kamonai. Hanuaboi momokani ai ipidi edia rege ia doko lasi.” Wednesday, June 1 ena daba kahanai, heai ia bada herea. “Taunimanima haida idia mai bona idia gwau bema ai ura lasi dika ai davaria, vadaeni gavamani edia ruma badana ta dekenai ai lao haraga be namo.” Unai dainai, Tadikaka Hill bona ena adavana bona edia natudia faiv be unai ruma badana dekena idia heau lao. Unuseniai, korema tatau, hahine bona natudia 3,000 mai kahana be ami taudia ese idia gimaia.

Unai neganai, kurokuro Tadikaka Arthur Claus, be mai gari lasi ida disisen ta ia karaia. “Lau kamonai taunimanima be Greenwood ai, ruma idia gabudia bona idia henaohenao noho , unai dainai lau ura lao egu turana namona, Tadikaka Hill, lau itaia totona.”

Arthur Claus ese The Harp of God bukana amo natudia 14 ia hadibaia

Tadikaka Hill ena ruma dekenai ia ginidae neganai, kurokuro tauna ta ia davaria ipidi ia dogoatao noho, ia be tadikaka Hill ena neiba bona ena turana danu. Neiba ia laloa, Arthur be dagedage tauna ta dainai, mai boiboi ida ia nanadaia: “Dahaka dainai oi mai?”

Arthur ia laloatao: “Bema egu haere ia ura lasi, lau do ia pidia. Ia lau hamaoroa, lau be Tadikaka Hill ena turana bona nega momo ena ruma dekena lau mai.” Arthur bona unai neiba be dagedage taudia amo, unai ruma idia gimaia namonamo.

Nega sisina murinai, Arthur ia kamonai Tadikaka Hill bona ena ruma bese be gavamani edia ruma badana ta dekenai idia noho. Danu idia hamaoroa unuseniai idia noho korema taudia be unai gabu do idia rakatania lasi, bema ami jeneral ese gwaumaoro pepana ia sainia lasi. Arthur ia gwau: “Ia auka unai ami jeneral lau hereva henia totona. To ia lau hamaoroa, lau ura unai ruma bese lau hakaua raka-lasi neganai, ia henanadai: ‘Edia ura gaudia ibounai do oi henia diba, a?’ Mai moale ida lau haere: Oibe.”

Arthur be gwaumaoro pepana ia abia bona karaharaga ia lao unai ruma badana dekenai. Bona ofesa ta dekenai pepa ia hahedinaraia, bena ofesa ia gwau: “Dahaka dainai ami jeneral sibona ese inai pepa ia sainia! Oi be tau ginigunana inai gabu amo haida do oi hakaua raka-lasi totona?” Karaharaga Tadikaka Hill bona ena ruma bese idia davaria. Idia ibounai be Arthur ena motuka dekenai idia guia bona Tadikaka Hill ena ruma dekenai idia giroa lou.

Tadikaka Claus be Tadikaka Hill bona ena ruma bese ia gimaia namonamo. Tadikaka Arthur ena gari lasi bona tadikaka lalokau henia karana ese ma haida ia durua bada. Arthur ia gwau: “Tadikaka Hill ena ruma ia gimaia neiba tauna be gabeai Iehova ena Witnes taudia ia matauraia, guna bamona lasi. Bona taunimanima momo be hereva momokani idia kamonai, badina idia itaia Dirava ena taunimanima huanai, edia kopina ena kala ese idia ia hapararaia lasi, bona ta ia laloa lasi ma ta ese ia hereaia.”