INAI HENIA KARANA ITA HADOKOA DALANA

2 | Dika Davana Haloua Lasi

Baibel Ena Hahediba Hereva:

“Tau ta ena dika davana umui haloua lasi. . . . Bema mai dalana bona bema umui karaia diba, taunimanima ibounai ida maino ai do umui noho. . . . ta ena dika davana umui haloua lasi, . . . badina Toretore Helagadia ia gwau: ‘Iehova ia gwau, “Dika ena davana be lauegu, lau ese davana do lau haloua.”’”—⁠ROMA 12:17-19.

Siri Ena Anina:

Bema ta ese ita ia hahisia, do ita badu diba, to Dirava ia ura lasi dika davana ita haloua. Ita ia hagoadaia do ita haheauka, badina kahirakahira kara gageva ibounai do ia hamaoromaoroa. —⁠Salamo 37:7, 10.

Oi Karaia Diba Gauna:

Goevadae lasi taudia be dika davana idia haloua neganai, inai henia karana idia habadaia. Unai dainai, bema ta ese oi ia habadua o hahisia, dika davana oi haloua lasi. Namona be emu badu oi biagua bona maino ai ia oi hereva henia. Nega haida ia vara gauna ita laloaboio sibona be namo. (Aonega Herevadia 19:11) To, bema kerere ta oi karaia lasi, reana ia vara gauna oi ripotilaia diba. Hegeregere, bema ta ese oi ia kara dika henia, pulisi dekenai unai dika oi ripotilaia diba.

Dika davana haloua karana be namo ta ia havaraia lasi

Bema maino ai hekwakwanai hamaoromaoroa dalana ta be lasi, be edena bamona? Eiava oi ese maino karaia daladia idauidau oi tohoa vadaeni be edena bamona? Dika davana oi haloua lasi. Unai ese hekwakwanai do ia habadaia sibona. Unai dainai inai henia karana oi hadokoa. Dirava ese hekwakwanai ia hamaoromaoroa dalana oi abidadama henia diba. “Ia dekenai oi tabekau, bona oi totona kara ta do ia karaia.”—⁠Salamo 37:3-5.

Mauri Sivaraina—ADRIÁN

Dika Haloua Karana Ia Hadokoa

Adrian ia matamata neganai, ma haida ese idia hahisia dainai dala dekenai idia ia heai henia. Ia gwau: “Nega momo ipidi amo lau tuari dainai, lau idia pidia bona dala dekenai lau hekure bona kahirakahira lau mase.”

Adrián ena mauri lagani be 16 neganai, Baibel ia stadilaia matamaia. Ia gwau: “Baibel stadilaia karana lau goadalaia neganai, lau itaia egu kara haida lau haidaua be namo.” Ia ese inai henia karana bona dagedage karana ia hadokoa be namo. Roma 12:17-19 ena hereva ese ia durua bada dika davana ia haloua lasi totona. Ia gwau: “Bona lau abia dae Iehova ese kara gagevadia be iena dala bona nega maorona ai do ia hamaoromaoroa. Metairametaira egu dagedage karana lau rakatania.”

Hanuaboi ta, guna ia idia heatu henia raskol oreana ta ese Adrián idia botaia. Edia biaguna ia boiboi: “Sibona oi gimaia!” Adrián ia gwau: “Lau ura dika davana lau henia.” To, Iehova dekenai guriguri kwadogina ia gwauraia bena unai gabu ia rakatania.

Adrián ia gwau: “Murina dinana ai lau ese unai raskol oreana edia biaguna lau hedavari henia. Lau badu dikadika lau ura ena dika davana lau haloua, to egu kudouna ai Iehova lau noia sibona lau biagua totona. Lau hoa, badina unai raskol tauna be lau dekenai ia mai bona ia gwau: “Varani hanuaboi ia vara gauna dainai lau oi gwauatao. Lau ura oi bamona egu kara do lau haidaua. Lau ura Baibel do lau stadilaia.” Lau moale bada badina egu badu lau biagua! Lau moale bada badina ia ida Baibel ai stadilaia matamaia.”