Iesu ese Iehova Ena Ladana Ia Laloa Bada

1-2. (a) Iesu be do ia mase hanuaboina ai dahaka ia karaia? (b) Inai atikol ai dahaka henanadai haida do ita herevalaia?

LAGANI 33 C.E., Nisan 14, Thursday adorahi ai, Iesu be ena abidadama aposetolo taudia ida Lohiabada Ena Anibou ia karaia. Iesu ia diba daudau lasi Iuda ese ena mase dalana do ia karaia, ia do idia hahisia bona ena inai taudia ese ia do idia hamasea. Unai dainai idia aniani murinai, ia ese ena aposetolo taudia dekenai hagoadaia hereva momo ia gwauraia. Bona daiutu idia do rakatania lasi neganai, Iesu ese mai anina bada guriguri ta ia gwauraia. Aposetolo Ioane ese unai guriguri ia torea; unai be Ioane karoa 17 ai ia noho.

² Inai atikol ai Iesu ese ia gwauraia guriguri amo gau haida do ita dibaia. Iesu ia do mase lasi neganai, ia be dahaka ia lalohekwarahilaia? Iesu be tanobada ai ia noho neganai, ena guriguri amo ia hahedinaraia dahaka ia laloa bada? Namona be unai henanadai edia haere ita herevalaia.

“LAU ESE EMU LADANA BE IDIA DEKENAI LAU GWAURAIA HEDINARAI VADAENI”

3. Iehova ena ladana totona Iesu be dahaka ia gwau, bona ena hereva ena anina be dahaka? (Ioane 17:6, 26)

³ Iesu be ena guriguri lalonai ia gwau: “Lau ese emu ladana be idia dekenai lau gwauraia hedinarai vadaeni.” Iesu dekenai unai be mai anina bada, badina unai guriguri lalonai nega rua ia gwau Iehova ena ladana be ena hahediba taudia dekenai ia hadibaia vadaeni. (Ioane 17:6, 26 duahia.) Iesu ena hereva ena anina be dahaka? Dahaka dainai Iesu ese unai ladana be idia dekenai ia gwauraia hedinarai? Laloatao, Iesu ena hahediba taudia be Iuda taudia, unai dainai idia be Dirava ena ladana Iehova idia diba vadaeni. Unai ladana be Heberu Toretore lalonai nega tausen momo ia hedinarai. Unai dainai Iesu be Dirava ena ladana ia herevalaia lasi; to ia be unai ladana ena anina ia gwauraia hedinarai. Iesu ese Iehova Dirava ena ura, ena gaukara, bona ena kara namodia ia gwauraia hedinarai namonamo.

4-5. (a) Edena dala ai ta ena ladana ita laloa bada diba? Haheitalai gwauraia. (b) Edena dala ai Iesu ena hahediba taudia be Iehova ena ladana idia dibaia?

⁴ Mani inai haheitalai ta ita laloa, emu kongrigeisen ai elda ta ena ladana be David, ia be doketa gaukara ia karaia. Oi be unai tadikaka oi diba namonamo. To nega ta gorere badana oi davaria dainai, doketa ena heduru oi abia be namo. Bona hospital dekenai oi lao neganai, unai tadikaka be doketa dainai oi ia durua. Hari unai tadikaka oi laloa bada bona iena ladana oi kamonai neganai, oi totona ia karaia gauna oi laloatao. David be lagani momo lalonai oi dibaia elda ta sibona lasi, to ia be oi ia durua doketa tauna danu.

⁵ Unai haheitalai hegeregerena, Iesu ena hahediba taudia be Iehova ena ladana idia diba vadaeni. To unai ladana idia laloa bada, badina Iesu ese idia ia durua Iehova idia dibaia namonamo totona. Dahaka dainai unai bamona ita gwau? Badina Iesu ena hereva bona ia karaia gaudia ibounai amo, ena Tamana ena kara ia hahedinaraia goevagoeva. Unai dainai, aposetolo taudia be Iesu ese taunimanima ia hadibaia dalana bona idia ia kara henia dalana idia itaia karana amo, Iehova idia “dibaia” namonamo.—Ioa. 14:9; 17:3.

“OIEMU LADANA, LAU DEKENAI OI HENIA GAUNA”

6. Edena dala ai Iehova ese ena ladana be Iesu dekenai ia henia? (Ioane 17:11, 12)

⁶ Iesu be ena hahediba taudia totona ia guriguri, ia gwau: “Oiemu ladana, lau dekenai oi henia gauna dainai, mani idia oi naria.” (Ioane 17:11, 12 duahia.) Unai ena anina be hari Iesu do idia gwauraia Iehova, a? Lasi. Iesu ena guriguri ai Iehova ena ladana ia gwauraia neganai, ia gwau, “oiemu ladana.” Unai dainai Iehova ena ladana be Iesu ena ladana ai ia lao lasi. To dahaka dainai Iesu ia gwau Dirava ena ladana be ia dekenai ia henia? Gau ginigunana be, Iesu be Iehova ese ia siaia mai bona ia be ena Hereva Gwauraia Tauna. Ia be ena Tamana ena ladana dainai ia mai bona unai ladana amo hoa karadia ia karaia. (Ioa. 5:43; 10:25) Danu, inai ladana Iesu ena anina be “Iehova be hamauria tauna.” Oibe, Iesu ena ladana ena anina ese Iehova ena ladana ia hahedinaraia danu.

7. Dahaka dainai Iesu be Iehova ena ladana ai ia hereva? Haheitalai gwauraia.

⁷ Mani haheitalai ta ita laloa: Praiminista ta be ena gaukara tauna ta ia siaia bena ia totona do ia hereva. Unai dainai unai tauna ia hereva neganai, ena hereva be mai ena siahu. Unai hegeregerena, Iesu be Iehova ese ia siaia tauna bona Iena ladana dainai Iesu be taunimanima ia hereva henia.—Mat. 21:9; Luka 13:35.

8. Iesu be tanobada dekenai ia do mai lasi neganai, edena dala ai Iehova ena ladana be ia dekenai ia noho? (Esodo 23:20, 21)

⁸ Baibel ese Iesu ia gwauraia Hereva, badina Iehova ese Iesu ia gaukaralaia aneru bona taunimanima dekenai Iehova ena ura bona do idia karaia gaudia ia gwauraia totona. (Ioa. 1:1-3) Israela taudia be taunimanima lasi gabuna dekenai idia loaloa neganai, reana Iehova ese idia ia naria totona ia siaia aneru be Iesu. Iehova ese idia ia hamaoroa, unai aneru do idia kamonai henia, bona unai ena badina ia gwauraia: “Egu ladana be ia dekenai ia noho.”a (Esodo 23:20, 21 duahia.) Iehova ese unai ia gwauraia badina Iesu be Iehova totona ia hereva bona ia hamomokania Iehova be gau ibounai ia karaia maoromaoro bona ena ladana ia hahelagaia.

“TAMAGU E, EMU LADANA OI HANAMOA”

9. Edena dala ai Iesu dekenai Iehova ena ladana be mai anina bada? Herevalaia.

⁹ Ita herevalaia bamona, Iesu be tanobada dekenai ia do mai lasi neganai, ia dekenai Iehova ena ladana be mai anina bada. Unai dainai Iesu be tanobada ai ia noho neganai, ia karaia gaudia ibounai lalonai ia hahedinaraia Iehova ena ladana be mai anina bada! Iesu be tanobada ai ia karaia hesiai gaukara ena dina ginigabedia ai, Iehova ia noia: “Tamagu e, emu ladana oi hanamoa.” Maoromaoro, ena tamana be mai gado badana ida guba amo ia haere, ia gwau: “Unai ladana lau hanamoa vadaeni bona do lau hanamoa lou.”—Ioa. 12:28.

10-11. (a) Edena dala ai Iesu ese Iehova ena ladana ia hanamoa? (Laulau itaia danu.) (b) Dahaka dainai Iehova ena ladana ita hahelagaia bona ita hanamoa be namo?

¹⁰ Iesu be ena Tamana ena ladana ia hanamoa danu. Edena dala ai? Dala ta be ena Tamana ena kara namodia bona ia karaia gaudia be ma haida dekenai ia gwauraia. To, unai ladana ia hanamoa totona gau ma haida ia karaia danu. Iehova ena ladana ia hahelagaia bona ia hamomokania Iehova be gau ibounai ia karaia maoromaoro. Iesu ese ena murinai idia raka taudia dekenai guriguri dalana ia hadibaia neganai, ia hahedinaraia Dirava ena ladana idia hahelagaia be gau badana. Ia gwau: “Aiemai Tamana guba dekenai oi noho, namona be ibounai ese emu ladana idia hahelagaia.”—Mat. 6:9.

¹¹ Dahaka dainai Iehova ena ladana ita hahelagaia bona ita hanamoa be namo? Badina Eden umana ai, Satani Diabolo ese Iehova Dirava ena ladana ia gwauraia dika. Satani ia gwau Iehova be koikoi tauna bona Adamu bona Heva amo gau namona ta ia hunia. (Gen. 3:1-5) Danu Satani ia gwau Iehova ese gaudia ia karaia dalana be maoro lasi. Satani ena koikoi herevadia ese Iehova ena ladana ia hadikaia. Gabeai, Iobu ena nega ai, Satani ia gwau taunimanima ese Iehova idia hesiai henia, badina ia amo gau namodia idia abia. Danu, unai koikoi tauna ia gwau taunimanima be hekwakwanai idia davaria neganai, Iehova hesiai henia karana do idia rakatania badina Ia idia lalokau henia momokani lasi. (Iobu 1:9-11; 2:4) Nega ia hanaia lalonai, do ia hedinarai daika be koikoi tauna, Iehova eiava Satani.

“LAU ESE EGU MAURI LAU HENIA”

12. Iesu be Iehova ena ladana ia lalokau henia dainai, ia ura dahaka ia karaia?

¹² Iesu be Iehova ia lalokau henia dainai ia ura ena mauri do ia henia, unai amo Iehova ena ladana ia hahelagaia bona ia hamomokania Iehova ena dala be maoro. (Ioa. 10:17, 18) Oibe, ena lalona ia hadaia Iehova ena ladana totona do ia mase.b Taunimanima ginigunadia, Adamu bona Heva be Iehova idia dadaraia bona Satani ena kahana dekenai idia lao. To, Iesu be idau, ia ura tanobada dekenai do ia mai bona do ia hamomokania Iehova ia lalokau henia. Iesu ese unai ia karaia dalana be, ia karaia gaudia bona ia gwauraia herevadia ibounai amo ia hahedinaraia Iehova ia badinaia. (Heb. 4:15; 5:7-10) Ia be ena mauri ai Iehova ia badinaia ela bona hisihisi auna ai ia mase. (Heb. 12:2) Unai dala amo ia hamomokania Iehova bona Ena ladana ia lalokau henia.

13. Dahaka dainai Iesu be ia hegeregere momokani Satani ena hereva ia hakoikoia totona? (Laulau itaia danu.)

¹³ Iesu be ena mauri dalana amo ia hamomokania Satani be koikoi tauna! (Ioa. 8:44) Iesu be Iehova ia diba namonamo. Unai dainai, bema Satani ese Iehova totona ia gwauraia herevadia be momokani, Iesu be unai do ia diba. To Iesu be ena lalona ia hadaia Iehova ena ladana ia gimaia totona. Ena be Iehova ese Iesu ia rakatania, to Iesu ia ura ena Tamana do ia badinaia noho bona do ia mase.—Mat. 27:46.c

“LAU DEKENAI OI HENIA GAUKARANA LAU KARAIA HAOREA”

14. Edena dala ai Iehova ese Iesu ena badinaia karana ia hanamoa?

¹⁴ Iesu be do ia mase hanuaboina ai ia gwauraia gurigurina ai ia gwau: “Lau dekenai oi henia gaukarana lau karaia haorea.” Ia abia dae momokani ena badinaia karana dainai Iehova ese ahuna namona do ia henia. (Ioa. 17:4, 5) Iesu ese ena Tamana ia badinaia be maoro. Iehova ese guria gabuna dekenai ia rakatania lasi. (Kara 2:23, 24) Ia ese mase amo Iesu ia hatorea isi lou bona dagi hereadaena ia henia. (Fili. 2:8, 9) Gabeai, Iesu ese Dirava ena Basileia ia lohiaia matamaia. Unai Basileia ese dahaka do ia karaia? Iesu ena guriguri ena kahana iharuana ia gwau: “Oiemu Basileia ia mai be namo. Emu [Iehova ena] ura gauna tanobada dekenai ia vara be namo, guba dekenai ia vara bamona.”—Mat. 6:10.

15. Iesu ese dahaka gau ma haida do ia karaia?

¹⁵ Kahirakahira Aramagedono ai, Iesu be Dirava ena inai taudia do ia tuari henia bona kara dika taudia ibounai do ia hadikaia ore. (Apok. 16:14, 16; 19:11-16) Unai murinai, Satani be “guri dobu masemase” lalonai do ia negea diho, unai nega ai gau ta do ia karaia diba lasi. (Apok. 20:1-3) Iesu ese Lagani 1,000 Lohia Negana lalonai taunimanima dekenai maino bona mauri goevana do ia henia. Ia ese mase taudia do ia hatorea isi lou. Bona tanobada ibounai be paradaiso ai do ia halaoa. Iehova ena ura do ia guguru!—Apok. 21:1-4.

16. Lagani 1,000 Lohia Negana ena dokona ai dahaka do ia vara?

¹⁶ Lagani 1,000 Lohia Negana ena dokona ai dahaka do ia vara? Kara dika bona goevadae lasi maurina be do ia ore. Taunimanima be mauri davana dainai do idia noinoi lasi edia kara dika idia gwauatao totona. Taunimanima totona, 144,000 taudia be hahelaga gaukara do idia karaia lasi. Bona Iesu be hahelaga tauna badana ena gaukara do ia karaia lasi taunimanima be Iehova idia tura henia totona. Bona Adamu dainai ia vara gauna “mase, ita inai henia gauna ginigabena, be do ia ore momokani.” Mase guria gabudia be do idia noho lasi. Mase taudia be do idia mauri lou. Tanobada ai do idia noho taudia ibounai be do idia goevadae.—1 Kor. 15:25, 26.

17-18. (a) Lagani 1,000 Lohia Negana ena dokona ai dahaka do ia vara? (b) Iesu ena lohia negana ia ore neganai, ia be dahaka do ia karaia? (1 Korinto 15:24, 28) (Laulau itaia danu.)

¹⁷ Lagani 1,000 Lohia Negana ena dokona ai dahaka do ia vara? Unai nega ai, mai anina bada gauna ta do ia vara. Taunimanima ibounai do idia diba Iehova be helaga bona kara maoromaoro Diravana. Dahaka dainai? Eden umana ai Satani ia gwau Iehova be koikoi tauna bona lalokau dalana ai taunimanima ia lohiaia lasi. Unai nega amo, Iehova idia hesiai henia taudia ese idia hamomokania loulou iena dala be hereadae. Unai dainai Lagani 1,000 Lohia Negana ena dokona ai Iehova do ia hamomokania Satani ena hereva be koikoi. Bona Iehova do ia hamomokania ia be lalokau guba Tamana.

¹⁸ Lagani 1,000 Lohia Negana ena dokona ai, taunimanima ibounai do idia diba Satani ese Iehova totona ia gwauraia herevadia ibounai be koikoi. Iesu ena lohia negana ia ore neganai dahaka do ia karaia? Ia be Satani ena haheitalai do ia tohotohoa bona Iehova do ia gwau-edeede henia, a? Lasi! (1 Korinto 15:24, 28 duahia.) Iesu ese Basileia be ena Tamana dekenai do ia henia lou. Ia be Iehova ena lohia henunai do ia noho. Oibe, Iesu be Satani bamona do ia karaia lasi, Iesu be gau ibounai do ia dadaraia badina Iehova ia lalokau henia.

19. Dahaka dainai Iesu ese Iehova ena ladana ia laloa bada?

¹⁹ Momokani, Iehova ia ura ena ladana be Iesu dekenai ia henia! Iesu be ena Tamana ena kara ibounai ia hahedinaraia goevagoeva. Dahaka dainai Iesu be Iehova ena ladana ia laloa bada? Badina gau ibounai amo unai ladana be Iesu dekenai mai anina bada. Iesu be unai ladana dainai ia ura ia mase, bona Lagani 1,000 Lohia negana ena dokona ai ia ura Iehova dekenai gau ibounai do ia henia lou. Edena dala ai Iesu ena haheitalai ita tohotohoa diba? Atikol gabena ai unai henanadai ena haere do ita herevalaia.