Matamata Taudia Idia Henanadai . . .
Loa Hebou Karana be Edena Bamona Do Lau Kwalimulaia?
“HAHINE ta ladana Louise ia gwau: “Lauegu kerere badana be inai: Andy ena kara korikori lau do diba namonamo lasi neganai, ia lau ura henia. Ai loa hebou lalonai ai ruaosi sibona be nega momo ai hebamo heheni. Nega idaudia ai ia karaia karadia be lau itaia lasi.” Vadaeni edia headava idia hadokoa.
Ena be Louise be lagani 7 lalonai ia headava neganai, hisihisi ia davaria, to ia headava wiki haida sibona murinai hekwakwanai badadia idia vara. Oi be edena bamona unai kerere amo oi gini siri diba, bona edena bamona emu turana ta danu oi loa hebou negana oi kara namonamo diba emui headava do ia namo totona?
Turana Ta Oi Tahua Neganai
“Lalo-parara tauna [o hahinena] ia roharoha bona iena raka dalana ia laloa namonamo.” (Hereva Lada-isidia 14:15, The Amplified Bible) Ena be ta ena toana oi moalelaia, to ia oi do diba namonamo lasi neganai bema oi ura henia, dika do oi davaria diba. Reana ia do oi adavaia bena unai murinai do oi davaria, iena lalona bona ena palani bona oiemu be idia idau vaitani! Ia be taunimanima haida bogaragidiai ia karaia karadia oi itaia guna be namo, reana unai be gadara ta do umui moalelaia hebou negadiai do oi itaia.
Tau ta ladana David mai ena adavana ida be lagani 10 lalodiai idia noho hebou mai edia moale ida ema bona hari; ia gwau: “Guna lau diba, bema matamana neganai lau be Rose kahirakahira dekenai lau lao, egu ura-heni ese egu lalona do ia haduhua. Unai dainai daudau amo ia lau raraia, egu ura ia do diba lasi neganai. Taunimanima ia kara henidia dalana be lau itaia diba, bona lau diba ia be memero gadara henidia kekenina eiava. Ai kiki hebou negadiai, iena noho dalana bona ena palani lau dibadia.” Oi bamoa gwauraia merona o kekenina ena kara ia diba momo tauna ta oi nanadailaia danu be namo; unai amo do oi diba ia be mai ena ladana namona eiava lasi.—Hereva Lada-isidia 31:31 itaia.
Ta Oi Davaria Neganai
Namona be guna oi laloa namonamo oi (bona oi ura bamoa tauna) emui mauri lagani bona dala idia hegeregere headava ena maduna do umui huaia totona eiava lasi. Bema emu lalona ai ta oi gwauraia hidi badina oi laloa ia do oi adavaia be namo, namona be oi hamaoroa oi ura ia do oi diba namonamo. Bema emu hereva ia abia dae, umui ruaosi be dahaka do umui karaia be namo, do umui diba heheni totona?a Reana umui be ma haida ida do umui aniani hebou; unai dala amo do oi diba oi ura do oi bamoa lou eiava lasi. Bema umui ruaosi sibona umui loa hebou lasi, bena bema gabeai umui ta ena lalona ia hegeregere lasi dainai umui parara, lalohisihisi bada o hemarai bada do ia vara lasi.
Herevana edena dala amo umui ruaosi be ma haida ida umui hebamo heheni gwauraia, namona be dabua namona oi karaia namonamo bona umui gwauraia guna negana korikori ai oi ginidae. Oi hereva henia namonamo bona ena hereva oi kamonaia namonamo. Namona be tauhau ese haneulato ia kara henia mai ena hemataurai ida; unai hemataurai karadia haida be inai: iduara ia kehoa iena, o sea dekenai ia hahelaia. Ena be haneulato ia ura lasi ena bamona be hesiai tauna ta bamona do ia kara henia, to namona be ena heduru ia abia dae mai ena hemataurai ida. Bema tauhau ese haneulato unai bamona ia kara henia mai ena hemataurai ida, dala ia lailaia vaira dinadia edia. Dirava ese tau ia hagania, ‘hahine ena tauanina be goada herea lasi, unai dainai do ia naria namonamo bona do ia matauraia.’—1 Petero 3:7.
Oi laloa tauhau ese haneulato ena imana ia dogoatao, ia kisi henia bona ia rosia be maoro, eiava? Bema unai kara idia karaia badina idia lalokau heheni dainai—sibona edia tauanina ena ura dainai lasi—reana unai kara idia miro lasi Dirava ena matana ai. Dirava be ena lauma amo Bible buka ladana Solomon ena Ane ia havaraia bona unai buka ese Sulama kekenina bona ena lalokau tauna, iena maoheni unai, be ia gwauraidia. Ia gwau dala goevana ai idia ruaosi ese lalokau hahedinaraia kara haida idia karaia. (Solomon ena Ane 1:2; 2:6; 8:5) To unai kara goeva tauhau bona haneulato hegeregerena, namona be danu tauhau bona haneulato idia naria namonamo edia lalokau hahedinaraia kara idia miro garina eiava unai kara ese idia ia veridia idia mahuta hebou garina. (Galatia 5:19, 21) Namona be lalokau hahedinaraia kara idia karaia lasi ela bona idia gwauhamata heheni bona toana be kahirakahira do idia headava; unai negai sibona lalokau hahedinaraia kara idia karaia diba. Unai dala amo emui loa hebou karana ena badina korikori do umui laloaboio lasi—unai be emu bamona ena kara oi diba namonamo totona.
Iena Lalona Do Oi Dibaia
Diba tahua taudia haida ese uhau 231 mai edia bamona kekeni edia kara idia stadilaia murinai, idia gwauraia hedinarai dahaka badina idauidau dainai haida idia tura heheni namonamo. Magasin ta ladana Journal of Marriage and the Family (May 1980 gauna) lalonai unai diba tahua taudia edia ripoti herevana ta be inai: “Idia headava gwauraia taudia be edia maoheni taudia edia lalona bema idia diba namonamo guna, idia momo edia headava do idia namo.” Oibe, gau badana be emu bamona ena lalona oi dibaia.—1 Petero 3:4.
To namona be dala oi tahua goadagoada iena lalohadai oi “veria lasi” totona. (Hereva Lada-isidia 20:5) Kara haida oi lalohadailaia guna, unai kara do umui karaia hebou neganai emu bamona ena lalona do oi dibaia haraga diba. Reana Keristen taudia ma haida ida do umui hebou edia ruma dekenai bona aniani do umui nadua hebou, eiava gita do umui hataia bona ane do umui abia hebou, eiava volibol o unai bamona gadara ma ta do umui gadaralaia hebou.
Emu bamona ena lalona oi dibaia sisina totona, inai bamona oi nanadaia, oi gwau, “Emu laga-ani negadiai dahaka oi karaia?” “Bema emu moni be hegeregere, oi ura dahaka do oi karaia?” “Iseda Dirava tomadiho henidia karadia, edena oi ura henia bada? Badina be dahaka?” Emu bamona ese inai henanadai be mai ena lalona ida do ia haerelaia neganai, ena haere amo do oi diba ia be dahaka ia laloa bada.
Umui ruaosi umui ura heheni bada bona headava umui lalohadailaia neganai, namona be anina bada gaudia umui herevalaidia hebou; gaudia haida be inai: edeseniai bona edena bamona do umui noho; moni do umui davaria dalana; umui ruaosi be moni gaukara do umui karaia eiava; natu; natu edia vara dalana koua daladia; emui lalohadai emui headava dagidia dekenai; umui tahua noho gaudia, kerukeru vanegai bona nega daudau murinai umui abia gwauraia gaudia unai, bona unai gau do umui abia daladia danu. Iehova ena Witness memerodia bona kekenidia momo be sikuli amo idia doko murinai pioneer gaukara idia karaia, bona idia ura do idia headava murinai unai gaukara do idia karaia noho. Namona be umui ruaosi emui palani lauma gaudia totona be umui tahua namonamo, idia hegeregere eiava lasi. Emui headava do idia hadikaia diba gaudia oi gwauraia hedinarai be namo. Bema oi be mai emu abitorehai bada eiava mai emu maduna badadia eiava mai emu gorere metauna, unai oi gwauraia hedinarai danu be namo.
Unai bamona umui hereva heheni negadiai, Elihu ena kara oi tohotohoa; ia gwau: “Egu lalona amo lau hereva maoromaoro, bona lau hereva mai egu momokani ida.” (Iobu 33:3, The Holy Bible in the Language of Today, Beck ese ia torea) Hahine ta ladana Esther ia gwau, iena maoheni negana lalonai ia karaia karadia ese idia hahegaegaea headava totona, bena ena headava lalonai moale ia davaria. Ia gwau: “Lauegu lalohadai bona Jaye ena lalohadai be idau negadiai, iena hereva lau hamomokania koikoi lasi. Nega iboudiai lauegu lalohadai korikorina lau gwauraia toho, ema bona hari.”
Bema oi ura emu bamona ena lalohadai gau ta dekenai do oi dibaia, namona be oi nanadailaia namonamo; emu henanadai dainai do ia lalohisihisi garina oi gari lasi. Beth be inai kara dekenai ia kerere, ia be John ida idia loa hebou negana lalonai. Beth ia gwau, ia laloa namona be edia moni do idia haorea kava lasi to nega vaira totona do idia haboua be namo. John ia gwau iena lalohadai be unai hegeregerena. Beth ese ia nanadailaia lou lasi, badina be ia laloa idia ruaosi be moni naria dalana dekenai idia lalo-tamona. To gabeai John ese ena lalohadai korikorina ia hahedinaraia, ia laloa moni be nega vaira totona haboua, anina be moni do ia haboua motuka matamatana mai ena hairai hoia totona! Idia headava murinai, nega ibounai moni dainai idia hepapahuahu.
Unai bamona kerere koua dalana ia noho. Ai gwauraia vadaeni hahinena, Louise, be ena maoheni negana ia laloa lou, ia gwau: “Unai negai ma henanadai momo lau henanadailaia be namo, inai bamona: ‘Bema lau rogorogo to oi ura lasi natu ta do oi havaraia, dahaka do oi karaia?’ Eiava, ‘Bema ita be mai eda abitorehai bona lau ura ruma ai do lau noho iseda natuna naria totona, dahaka do oi karaia?’ Bena iena haere lau laloa namonamo be namo.” Unai bamona herevahereva ese taunimanima ta ena lalona ena toana ia hahedinaraia diba. Idia do headava lasi neganai ena bamona ese unai toana ia dibaia guna be namo.
Iena Kara Korikori Oi Itaia!
Esther ia gwau: “Oi be emu bamona mo sibona ida umui hebamo heheni negadiai, oi ia gado namo henia diba, to umui be taunimanima bogaragidiai umui noho negadiai, ia laloa guna lasi gauna be ia dekenai ia vara diba. Reana idia ta ena hereva do ia moalelaia lasi. Bena do oi itaia, ia badu neganai ia be edena bamona do ia kara. Unai hereva ia gwauraia tauna do ia gwau henia mai ena badu ida eiava?” Esther be ma ia gwau: “Ai loa hebou neganai ai ruaosi emai turadia bona varavara ai bamodia dainai, ai diba heheni momokani.”
Moale karadia sibodia lasi, to gaukara haida danu umui karaia hebou be namo. Keristen gaukaradia haida umui karaia hebou, anina be Dirava ena Hereva stadilaia karana bona Keristen hesiai gaukarana bona ma gaukara haida danu. Do umui headava neganai dina ta ta iboudiai do umui karaia karadia haida be hari umui karaia hebou—aniani umui hoia bona umui hegaegaelaia, mereki umui huria, ruma umui hagoevaia. Headava taudia edia kara korikoridia be unai bamona do umui karaia hebou negadiai, emu bamona ena kara dikadia danu do oi itaia—ena kara korikorina ta do ia hunia diba lasi.
Mamoe naridia tauhauna, Solomon ese ena ane lalonai ia gwauraia tauna unai, ese ena lalokau haneulatona ia itaia, ia lalohisihisi neganai, bona dina ena siahu dekenai ia hekwarahi dainai ena varahuna ia diho bona ia hesiku neganai danu. (Solomon ena Ane 1:5, 6; 2:15) Ia ese danu haneulato ia itaia, moni momo tauna King Solomon ena lalo-ani ia dadaraia neganai; unai murinai ia hanamoa, ia gwau: “Egu lalokau e, oi be mai emu hairai bada, bona oi lalonai kerere be lasi.” (Solomon ena Ane 4:7) Ia laloa lasi ia goevadae momokani, to ia laloa iena kerere badana ta be lasi. Haneulato ena kara maoromaoro ese ena hairai ia habadaia dainai, ena kerere maragidia ia laloa lasi.
Umui loa hebou neganai, bema emui nega umui gaukaralaia namonamo, emui bamona ena kara do umui itaia namonamo diba. Mai emui lalo-parara ida do umui headava neganai emui lalona do idia goada, badina be umui diba, gau ta do umui lalo-tamonalaia lasi negadiai, unai hekwakwanai do umui hanamoa diba. Emui loa hebou karana umui kwalimulaia dainai, umui hegeregere emui headava danu do umui kwalimulaia mai emui moale ida.
[Footnotes]
a Tano haida dekenai tauhau ta be haneulato ta ida idia ruaosi sibodia idia loa hebou, to unai bamona kara be Papua New Guinea taudia momo edia kastom lasi. Unai tano dekenai tauhau ese haneulato ia hereva henia guna, to bema tauhau ia hemarai dainai haneulato ese ia hereva henia guna mai ena hemataurai ida, Bible ena taravatu ta ia utua lasi unai.—Solomon ena Ane 8:6 itaia.
[Picture on page 29]
Oi ura bamoa tauna be nega idauidau ai oi itaia neganai, iena kara oi diba namonamo