Ruma Bese Lalonai Inuinu Kekero Manadalaia Tauna Ia Noho Neganai

“Ena be inuinu kekero manadalaia tauna be tamona sibona, to ruma bese ibounai ese ena hisi mamina idia abia.”​—⁠Doketa Vernon E. Johnson.

LAGANINA 5 kekeni maragi ta ladana Alice be ena mahuta gabunai ia hekure bona ena aena ai hisihisi bada ia mamia. Dina rua gunanai ena aena dekenai bero ta ia davaria bona doketa idia gwau aena be do idia kumia bandesi aukana amo. To unai bandesi be idia kumia auka dainai aena ia gigia bona ia hagudua. Alice ese ena tama bona sina ia noidia doketa dekenai do idia abia lao, to tamana be hanuaboi ai ia inuinu kekero dainai tauanina ia goada lasi bona sinana be ia daradara daika do ia naria.

Dina haida idia hanaia murinai Alice ena aena ia mase. Rara korema be aena kwakikwaki amo ia diho neganai kara haraga idia abia lao hospital dekenai. Aena amo bandesi idia kokia neganai nurse ta be Alice ena aena ia itaia dainai ia mase rea. Alice ena aena ibounai be do ia namo diba lasi bona toto dikana ladana, Gangrene ese ia ania dainai ena aena idia utua oho.

Inuinu Kekero Manadalaia Karana bona Naria Manadalaia Karana

Ia vara dikana be Alice ena aena ta ia haboioa sibona lasi. Ma dika ta be Alice ena tamana be inuinu kekero manadalaia tauna ta. Oibe, unai dainai ena be kekeni ese tamana ena heduru ia noia, to tamana ena lalohadai bona tauanina idia hegeregere lasi natuna durua totona.

To Alice ena sinana be edena bamona? Ena be ia inuinu lasi, to inuinu tauna naria karana ia manadalaia, ena adavana ia durua noho unai. Vaia, bema ta ena adavana be inuinu kekero manadalaia tauna ta, vadaeni ia be nega ibounai dala idauidau ia tahua ena adavana ena kara ia hadokoa totona, eiava dala ia tahua ia karaia kava karadia ia haheaukalaidia totona.a Oibe, ia ese kekero muramura ia manadalaia adavana ena hekwakwanai ia laloa momo dainai, ia be inuinu kekero tauna hegeregerena gau ta ia manadalaia, to unai be inuinu karana lasi. Unai dainai, Alice sinana bona ia bamona hahinedia ita gwauraidia gau ta idia manadalaia taudia.

Inuinu kekero manadalaia tauna bona ia danu ia noho adavana be gau ta ese ia biagudia bamona. Idia ruaosi idia laloa hekwakwanai be lasi. Idia ruaosi be hegeregere lasi natudia durudia namonamo totona. Idia ruaosi idia lalo-hekwarahi badina inuinu kekero manadalaia tauna ese ena inua karana ia biagua diba lasi, bona ena adavana ese ia durua diba lasi, bona idia ruaosi ese inuinu kekero manadalaia karana ena dika edia natudia dekenai idia koua diba lasi.

To heduru ia noho inuinu kekero manadalaia tauna bona ena ruma bese totona. Inai hereva murinai ai torea sivaraidia ese do idia hahedinaraia.

[Footnotes]