Ruma Bese be Edena Bamona Do Idia Heduru Diba?

“Tau ese muramura kavabu ia abia isi, kavabu lalonai ia noho muramura be sisina sisina ia inua, ia lao bona dokonai kavabu ese tau ia biagua.”—⁠Asia taudia edia hereva ta.

OI BE gohu ta badinai oi raka lao. Nega sisina lalonai tano ia manoka bamona bena kopukopu manokamanokana lalonai oi moru diho. Oi marere momo dainai oi mutu diho haraga.

Inuinu kekero manadalaia karana ese ruma bese ibounai unai bamona ia veria diho. Inuinu kekero manadalaia tauna ena adavana be ia ura dala idauidau amo ena adavana ena kara dikana ia haidaua. Adavana ia lalokau henia dainai nega haida ia hagaria bamona, to tau be ia kamonai lasi bona ia inua sibona. Ena kekero muramura ia hunia neganai tau be ia lao bona ma haida ia hoia. Moni ia hunia neganai tau ia lao bona turana edia amo ia abitorehai. Ena be hahine ese ia hamaoroa unai be ruma bese bona Dirava lalokau henia karana lasi​—⁠to unai hereva iboudiai be anina lasi ia dekenai. Hahine ese unai kara koua totona dala idauidau ia karaia neganai bese ibounai be hegeregere inuinu kekero ena kopukopu dekenai idia maloa bamona. To bema ta ia ura inuinu tauna ia durua neganai namona be ia ese unai kara ia vara ena anina korikori ia tahua guna. Oibe, namona be idia lalo-parara namonamo dahaka dainai “heduru” dala momo be idia hegeregere lasi, bona unai dainai do idia tahua edena heduru be do ia hegeregere diba.

Inuinu kekero manadalaia kara be sisina ia idau inuinu kekero karana amo. Unai bamona ia inua tauna be nega ibounai ia ura do ia inuinu bona ia laloa lasi kavabu hida ia inua. Diba taudia idia gwau unai kara be do ia negea diba lasi, to bema unai kekero muramura ia dadaraia momokani, unai kara dikana do ia negea diba.​—⁠Mataio 5:⁠29 oi itaia.

Inuinu kekero manadalaia tauna bema ia ura unai kara do ia dadaraia momokani, vadaeni, ena tauanina ena hekwakwanai ia hanaia diba.

Herevalaia be auka lasi, to karaia dalana be auka momokani. Inuinu kekero ia manadalaia tauna be nega ibounai unai kara ena kerere hunia dala ia tahua. Hegeregere, inai bamona do ia gwau: ‘Unai kara lau karaia ese lau ia biagua lasi.’ ‘Lauegu ruma bese edia kara dainai nega ibounai lau inuinu.’ ‘Lauegu gaukara biaguna ena kara be ia dika momokani dainai daika be ia henunai do ia gaukara bona do ia inuinu lasi, a?’ Oibe, bona nega momo ena bese ese iena hereva idia abia dae bona ena kerere idia durua bamona. Idia gwau, ‘Emui tamana be dina ai ia gaukara bada dainai ena laga-ani dala umui hadikaia lasi.’ ‘Emai sinana be ia hereva momo dainai Tamamai ia inuinu bena unai ese ena lalona do ia hamoalea.’ Io, koua hereva idauidau do idia gwauraia unai kara idia hunia totona, idia ura lasi idia gwau: Emai tamana be inuinu kekero manadalaia tauna ta.

Ruma bese taudia ese inuinu kekero ia manadalaia tauna be kekero muramura ena kopukopu bamona amo do idia veria mauri diba lasi ela bona idia sibona be unai gabu amo idia roho mauri guna. Unai inuinu kekero manadalaia tauna ena kara dekenai oiemu lalohadai bona kara be edena bamona? Iena kara dainai oi badu, oi lalohisihisi, oi lalo-hekwarahi eiava oi gari momo, a? Iena kekero karana ese ia hagorerea neganai oi ese anina bada gaukaradia oi rakatania bona ia oi naria, a? Ruma bese ai idia inuinu kekero lasi taudia ese edia mauri dalana idia haidaua neganai sedira inuinu kekero ia manadalaia tauna ese edia haheitalai do ia tohotohoa.

Iena maumau hereva oi abia dae lasi. Hegeregere inuinu tauna be inai bamona do ia gwau, ‘Bema oi ese lau dekenai kara namo oi karaia neganai do lau inuinu lasi.’ To unai lalohadai oi abia dae lasi. Momokani, ia ese unai kekero muramura ia manadalaia, to unai sibona lasi, ia ura taunimanima idia gwau ena hekwakwanai ta be lasi. Unai dainai nega momo ena be ena ruma bese taudia idia diba lasi, to edia kara amo unai inuinu tauna idia durua ia inuinu noho totona.

Buka Helaga ena aonega herevana ta badu haraga karana dekenai be mai anina inuinu kekero ia manadalaia tauna dekenai, inai bamona ia hereva: “Ta ese sibona ena kerere dainai matahakani do ia abia. Bema nega tamona durua oi henia, nega ibounai unai bamona do oi karaia.” (Hereva Lada-isidia 19:​19) Oibe, namona be unai inuinu kekero manadalaia tauna sibona ese telefon ia abia isi bona ia rini ena gaukara biaguna ia hadibaia dahaka dainai ia lao lasi gaukara, eiava sibona ia toreisi bona ia lao ena mahuta gabuna, o sibona ena mumuta ia hagoevaia. Bema ruma bese ese idia karaia neganai, ia idia durua ia inuinu ela bona unai inuinu ese do ia hamasea.

Heduru oi tahua goadagoada. Ruma bese tauna ta be unai kopukopu bamona hekwakwanai amo sibona do ia roho mauri be auka. Namona be heduru bona hahegoada oi tahua. Namona be tura namodia oi bamoa.

Bema unai inuinu kekero manadalaia tauna ese hereva do ia kamonai bona heduru ia tahua moale bada do ia havaraia. Bema iena tauanina be kekero muramura totona ia hitolo, vadaeni dina haida hospital dekenai do ia noho diba ela bona unai mamina be ena tauanina amo ia ore. To, hekwakwanai bada gauna be ia ena lalona dekenai ia ura unai inuinu kekero karana ia karaia loulou.

[Box on page 5]

Inuinu Kekero Manadalaia Taudia Edia Kara

Ia Laloa Hanaihanai: Inuinu kekero manadalaia tauna be nega ibounai do ia inua lou negana ia laloa.

Ia Haheauka Diba Lasi: Ena be ia gwauhamata do ia inua momo lasi to ia koikoi.

Taravatu Ia Atoa: Ia sibona ese ia atoa taravatudia hegeregere ia gwau (“Sibogu lau noho neganai lau inuinu lasi”), to unai be koikoi herevana. Ia laloa gauna korikorina be: “Gau ta ese lauegu inuinu karana do ia koua diba lasi.”

Ia Inuinu to Ia Kekero Haraga Lasi: Bema ta be ia inuinu bada to ia kekero haraga lasi, unai be hahenamo gauna lasi​—⁠ena anina be ia ese inuinu ia manadalaia sibona.

Ia Havaraia Hekwakwanai: Inuinu kekero karana ese ruma bese ena mauri, moni gaukara o ta sibona ena mauri do ia hadikaia.​—⁠Hereva Lada-isidia 23:​29-35.

Sibona Ena Dika Ia Hunia: Inuinu kekero manadalaia tauna ese nega ibounai iena kekero karana ena dika ia hunia toho.