Taunimanima Idia Davaria Hisihisi Ena Hekwakwanai
“DIRAVA, DAHAKA DAINAI?” Unai revareva badadia amo idia torea hereva kwarana be Asia Minor dekenai tano mareremarere ia vara murinai, taunimanima momo ese idia abia niuspepa ena vairana kahanai ia hedinarai. Ia hahedinaraia laulauna lalonai, ia lalohisihisi bada tamana ta be iena natuna kekeni mai berona ia rosia bona ia moru vadaeni rumana idia rakatania.
Tuari, doe, daihanai goreredia, bona idia vara kava gau dikadia ese hisihisi badadia, taitai bada herea, bona taunimanima momo hamasea karana idia havaraia. Danu, hahine hadikaia karana, natuna hadikaia karana, bona kara dika ma haida idia vara. Inai oi laloa, aksiden dainai bero idauidau bona mase momo idia vara. Bona taunimanima bilioni momo ese lalohisihisi idia davaria badina idia gorere, idia buruka, bona edia lalokau taudia idia mase.
Lagani 1900 ia lao lagani 2000 ai, hisihisi be ia bada herea. Lagani 1914 ia lao 1918 dekenai, Tanobada Ibounai Tuarina Ginigunana lalonai, tuari taudia kahirakahira milioni 10 idia mase. Histori torea taudia haida idia gwau idia mase ami lasi taudia edia namba be unai bamona danu. Tanobada Ibounai Tuarina Iharuana ai, tuari taudia bona ami lasi taudia milioni 50 bamona idia mase, bona sibona idia gimaia diba lasi hahine, natudia, bona buruka taudia milioni momo idia mase. Idia hanaia laganidia 100 lalonai, bese idauna hamasea ore karana, gavamani gwau-edeede henia karana, idau bese dagedage henia karana, ogogami, bona hitolo idia vara dainai taunimanima milioni momo idia mase. Historical Atlas of the Twentieth Century bukana ia gwau “taunimanima momo herea edia hepapahuahu kava karana” dainai, reana taunimanima milioni 180 mai kahana idia mase.
Lagani 1918 bona 1919 lalonai, Spanish influenza gorerena ese taunimanima milioni 20 ia hamasea. Idia hanaia laganidia 20 lalonai, taunimanima milioni 19 bamona be AIDS gorerena amo idia mase, bona hari taunimanima milioni 35 edia tauanina ai unai gorere ia havaraia vairasi ia noho. Natudia milioni momo be tama sina lasi—AIDS dainai idia mase. Beibi momo herea be AIDS amo idia mase, badina be bogana lalonai idia do noho neganai idia abia.
Ma dala haida ai natudia ese hisihisi momo idia davaria. England ena Manchester Guardian Weekly be lagani 1995 ena dokonai United Nations Children’s Fund (UNICEF) ese ia halasia herevana ia gwauraia, ia gwau: “Idia hanaia laganidia 10 lalonai idia vara tuaridia dainai, natudia milioni rua idia mase, milioni 4 ia lao 5 edia tauanina ena kahana ta ia dika, milioni 12 ese edia ruma idia haboioa, milioni ta mai kahana edia tama sina idia mase eiava edia tama sina amo idia parara bona milioni 10 be idia itaia gau dikadia dainai idia kava.” Danu, tanobada hegegemadai—lagani iboudiai—bogana lalonai natuna hamasea karana be reana milioni 40 ia lao 50 bamona.
Vaira Negana Ai Dahaka Do Ia Vara?
Taunimanima momo be vaira negana idia garilaia. Saiens taudia edia orea ta ia gwau: “Reana taunimanima edia kara idauidau . . . ese tanobada do idia haidaua momokani, bona ita manadalaia vadaeni mauri dalana do ia henia noho diba lasi.” Ma idia gwau: “Harihari, taunimanima 5 5 amo ta ta idia ogogami momokani bona edia aniani be hegeregere lasi, bona idia 10 10 amo ta ta be tauanina ia hagoadaia lasi aniani idia ania.” Unai negai, saiens taudia ese “vaira negana ai do ia vara gauna be taunimanima ibounai dekenai idia hadibaia” bona idia gwau: “Gau badana be iseda tanobada bona mauri gaudia naria karana ita haidaua be namo, bema ita karaia lasi, taunimanima momo do idia lalohisihisi bada herea bona iseda noho gabuna, inai tanobada, do ita hadikaia.”
Dahaka dainai Dirava ese hisihisi bona gwau-edeede kara dikadia iboudiai ia koua lasi? Edena dala ai do ia hanamoa? Edena negai?
[Picture Credit Lines on page 3]
Top, wheelchair: UN/DPI Photo 186410C by P.S. Sudhakaran; middle, starving children: WHO/OXFAM; bottom, emaciated man: FAO photo/B. Imevbore