Dika Gwauatao Karana

“LAU MARAGI NEGANA AI FAMILI LALONAI HEREVA DIKADIA BONA BOIBOI BADABADA KARANA VARA MOMO,” unai be hahine ta ladana Patricia ese ia gwauraia herevana. Ma ia gwau: “Dika gwauatao karana lau diba lasi. Ena be lau bada vadaeni, to ta ena kerere be dina haida lalonai do lau laloa noho, bona lau mahuta namonamo lasi.” Oibe, badu bona ta lalodika henia maurina be moale bona noho namo ia havaraia lasi. Momokani, tahua gaukara ese idia hahedinaraia dika idia gwauatao lasi taudia be . . .

• Badu o ta lalodika henia karana amo hetura karana ia hadikaia, idia be turana lasi bona sibona idia noho diba

• Idia badu haraga, idia laloa momo, o lalo-metau bada diba

• Ta ena kerere idia laloa momo dainai edia mauri idia moalelaia lasi

• Idia mamia edia kara be kerere badina idia diba momokani dika idia gwauatao be namo

• Idia lalohekwarahi momo bona edia gorere ia bada ia lao, ma danu high blood pressure, kudouna gorere, bona hisihisi ma haida hegeregere, atraitis gorere bona kwara hisihisi idia abiaa

DIKA GWAUATAO KARANA ENA ANINA BE DAHAKA? Dika gwauatao karana ena anina be kerere tauna ena dika laloaboio bona badu karana rakatania, hemami dikana bona kerere davana henia lalohadai dadaraia. To namo lasi ita gwau, ena kara be kerere lasi, ita laloa maragi, o ita laloa unai kerere ia vara lasi. To, dika gwauatao karana be ta be sibona abia hidi ia karaia, badina unai be mai anina bada maino karaia karana ia hahedinaraia totona, bona ma haida ida hetura karana namona ia hagoadaia diba.

Dika gwauatao karana ese laloparara ia hahedinaraia danu. Dika ia gwauatao tauna ia laloparara ita ibounai be kerere o kara dika ita karaia diba, iseda hereva bona kara amo. (Roma 3:23) Unai bamona laloparara ita hahedinaraia totona, Baibel ia gwau: “Bema ta be badina ta dainai ma ta dekenai ia maumau, ta ta emui kara do umui haheaukalaia noho bona mai kudouna ibounai ida do umui gwauatao heheni.”​—Kolose 3:13.

Unai ese ia hahedinaraia, Dika gwauatao karana be lalokau ena kara badana ta, unai be “hatamonaia gauna hereadaena.” (Kolose 3:14) Mayo Clinic ena websait ena hereva hegeregerena, dika gwauatao karana ese . . .

• Hetura karana namona ia havaraia, ma danu hebogahisi karadia ia hahedinaraia, laloparara, bona kerere ia karaia tauna ia hebogahisi henia

• Iseda lalohadai bona hetura karana Dirava ida ia hanamoa

• Lalohekwarahi, lalometau bona badu karana ia hamaragia

• Lalohisihisi ia hamaragia diba

SIBONA EMU DIKA OI GWAUATAO. Sibona emu dika gwauatao karana be “mai ena hekwarahi,” to “ia be mai anina bada iseda helt”​—⁠lalohadai bona tauanina dalana dekenai​—Journal Disability bona Rehabilitation taudia edia hereva hegeregerena. Dahaka ese oi do ia durua sibona emu dika oi gwauatao totona?

• Namo lasi oi laloa oi be goevadae, to namona be oi abia dae​—⁠ita ibounai​—be kerere ita karaia diba.​—Hadibaia Tauna 7:20

• Sibona emu kerere amo diba oi abia unai amo unai bamona kerere do oi karaia lou lasi

• Namona be oi haheauka, badina iseda manoka gaudia bona ura dikadia haida be do idia ore haraga lasi.​—Efeso 4:23, 24

• Namona be oi do idia hagoadaia turadia oi bamoa, idia be mai edia lalohadai namodia, kara namodia idia karaia to danu oi dekenai hereva momokani do idia gwauraia.​—Aonega Herevadia 13:20

• Bema ta oi hahisia, namona be unai kerere oi gwauraia hedinarai bona kara haraga ia dekenai sori herevana oi gwauraia. Bema maino oi karaia, lalomaino do oi abia.​—Mataio 5:23, 24

BAIBEL ENA HAKAUA HEREVADIA ESE ITA IA DURUA DIBA!

Patricia, inai atikol ai ita herevalaia hahine, be Baibel ia stadilaia murinai, dika gwauatao karana ia dibaia. Patricia ma ia gwau: “Lau mamia badu karana lau halusia vadaeni. Lau lalohisihisi lou lasi bona haida lau hahisia lasi. Baibel ena hakaua herevadia ese ia hahedinaraia Dirava be ita ia lalokau henia bona iseda namo ia laloa bada.”

Tau ta ladana, Ron, ia gwau: “Ma haida edia lalohadai bona kara lau biagua diba lasi. To egu kara sibona lau biagua diba. Bema maino lau ura, namona be badu karana lau rakatania. Maino bona badu karana be nega tamona lau hahedinaraia diba lasi. To Baibel ena hakaua herevadia lau badinaia dainai egu lalomamina ia namo.”