Motumotu ta ai Bouti Ia Mutu

ITAIA! bouti be dika ia davaria vadaeni! Ia makohia maragimaragi noho! Ranu lalonai idia paudobi taudia oi itaia, a? Haida be kone dekenai idia ginidae vadaeni. Unai be Paulo eiava? Ia dekenai idia vara gaudia mani ita itaia.

Laloaboio lasi, Paulo be lagani rua Kaisarea ena dibura ruma lalonai ia noho. Bena ia bona dibura taudia ma haida be bouti ta dekenai idia guia, bona Roma idia heau henia. Kerete motumotu idia hanaia neganai, lai gubana badana ia mai. Lai ia toa badabada dainai, bouti idia taria diba lasi. Bona dina bona hanuaboi ai dina bona hisiu idia itaia diba lasi. Dina momo murinai, bouti lalonai idia noho taudia ibounai idia laloa do idia mase.

Bena Paulo ia toreisi, bona ia gwau: ‘Umui ta ena mauri do ia boio lasi; bouti sibona do ia boio. Badina varani hanuaboi Dirava ena aneru ta lau dekenai ia mai bona ia gwau: “Paulo e, oi gari lasi! Namona be Roma ena lohia Kaisara vairanai oi gini. Bona Dirava ese oi danu idia laolao taudia ibounai do ia hamauria.” ’

Lai gubana ia matamaia bena dina namba 14 ena hanuaboi huanai, bouti lalonai idia noho taudia idia itaia davara ena dobu ia maragi ia lao! Dibura lalonai bouti ese nadi ia botaia garina dainai, edia dogo idia negea diho. Murina dinana ai tano idia itaia. Idia laloa kone dekenai edia bouti do idia abia daekau.

Vadaeni, kone kahirakahira idia ginidae neganai, bouti be boe dekenai ia kamokau. Bena hurehure ese bouti ia botaia, bona bouti be ia makohia maragimaragi matamaia. Bouti ia biagua ami ofesa ia gwau: ‘Nahu diba taudia ibounai davara dekenai umui paudobi bona kone dekenai umui nahu lao. Umui haida be idia murinai umui paudobi, bona bouti ena reirei bona kohu haida umui dogoatao umui nahu totona.’ Bona unai bamona idia karaia. Unai amo bouti lalonai idia noho taunimanima ibounai 276 be kone dekenai idia roho mauri, aneru ena gwauhamata hegeregerena.

Unai motumotu ena ladana be Melita. Unuseniai idia noho taudia be hebogahisi taudia, bona idia ese bouti amo idia mai taudia idia naridia. Nega ia namo neganai, Paulo be bouti ma ta dekenai idia udaia, bona Roma dekenai idia laohaia.