Karoa 28

Anivaga Idia Nanadailaia

KAHIRAKAHIRA lagani ta ia lao vadaeni, Iesu be lagani 30 C.E. ena Paseka Ariana dekenai ia lao. Hari, Ioane be hua haida dibura rumana ai ia noho vadaeni. Ena be ia ura ena hahediba taudia iboudiai be Keriso murinai do idia raka, to haida sibodia ese.

Idia haida be Iesu dekenai idia mai, idia nanadaia, idia gwau: “Dahaka dainai ai bona Farisea taudia be aniani ania lasi taravatu nega ai badinaia, to oiemu diba tahua taudia be aniani ania lasi taravatu nega idia badinaia lasi?” Farisea taudia be vaia pura ta ta iboudiai nega rua idia anivaga, edia tomadiho karana ta hegeregerena. Reana Ioane ena hahediba taudia danu be unai bamona idia karaia.

Iesu ese ia haere henidia, ia gwau: “Headava matamata tauna be ena turana danu ia noho neganai be do idia taitai, a? To nega ta headava matamata tauna be idia dekena amo do ia abia siri, unai neganai aniani ania lasi ena taravatu nega do idia abia.”

Namona be Ioane ena hahediba taudia ese ena hereva idia laloatao, ia gwau Iesu be Headava Matamata Tauna. Unai dainai Iesu ia do noho neganai, Ioane bona Iesu ena hahediba taudia danu idia laloa idia anivaga be maoro lasi. Gabeai, Iesu ia mase murinai, iena hahediba taudia be ia dainai idia taitai bona idia anivaga. To, ia toreisi lou bona guba dekenai ia daekau neganai, idia be mai edia lalohisihisi ida idia anivaga ena badina ta be lasi.

Bena Iesu ese inai parabole ia gwauraidia: “Daika tauna be, dabua gunana dekenai, dabua matamata taina ia turia, hanamoa totona? Bema unai bamona, matamata gauna do ia veria, ia darea, bona matu dikana ia vara. Daika tauna be, kopina gunana lalonai uaina matamata do ia bubua? Bema unai bamona, uaina ese kopina ia darea, uaina ia bubua kava, bona kopina ia dika vadaeni. To namo be uaina matamata, kopina matamata lalonai idia atoa.” Inai parabole edia anina anivaga karana dekenai be dahaka?

Inai parabole amo Iesu ese ia hadibadia, namo lasi ta ia ura ena hahediba taudia ese Iuda tomadiho karadia gunadia do idia badinaia, unai kara ta be anivaga karana. Ia mai lasi, idia ore gwauraia tomadiho karadia gunadia ia hanamodia eiava edia nega ia hadaudaua totona. Keristen tomadiho bona Iuda tomadiho mai ena sene karadia do idia haboudia diba lasi. Lasi, bema idia haboudia toho, unai be hegeregere dabua matamata be dabua gunana dekenai idia turia bamona, eiava uaina matamata be kopina gunana lalonai idia bubua bamona. Mataio 9:​14-17; Mareko 2:​18-22; Luka 5:​33-39; Ioane 3:​27-29.

▪ Daidia idia anivaga loulou, bona badina be dahaka?

▪ Iesu be ena hahediba taudia ida idia noho neganai dahaka dainai idia anivaga lasi, bona gabeai anivaga karana ena badina be edena bamona ia boio?

▪ Iesu ese dahaka parabole ia gwauraidia, bona edia anina be dahaka?