Dahaka Dainai Iesu Ena Hahediba Taudia Be Aniani Lasi Taravatu Idia Badinaia Lasi?

Lagani 30 C.E. ena Pasova Aria murinai, Ioane Bapatiso idia hadiburaia. Ioane ia ura ena hahediba taudia be Iesu murinai idia raka, to ia idia hadiburaia murinai, idia momo be unai idia karaia lasi.

Lagani 31 C.E. ena Pasova Aria be kahirakahira neganai, Ioane ena hahediba taudia haida be Iesu dekenai idia mai bona idia nanadaia: “Dahaka dainai ai bona Farisea taudia be aniani lasi taravatu ai badinaia, to emu hahediba taudia be aniani lasi taravatu idia badinaia lasi?” (Mataio 9:14) Farisea taudia be aniani lasi taravatu idia badinaia, edia tomadiho karana bamona. Gabeai, haheitalai ta ai Iesu ese ia hekokoroku Farisea tauna ta ena guriguri ia herevalaia, ia gwau: “Dirava e, oi lau tanikiu henia badina lau be taunimanima ma haida bamona lasi,  . . Wiki ta lalonai nega rua lau aniani lasi.” (Luka 18:11, 12) Reana Ioane ena hahediba taudia be vaia aniani lasi taravatu idia badinaia. Eiava Ioane idia hadiburaia karana idia lalohisihisilaia dainai unai idia karaia. Idia daradara dahaka dainai Iesu ena hahediba taudia be aniani lasi taravatu idia badinaia lasi, Ioane dekenai ia vara gauna dainai edia lalohisihisi hahedinaraia totona.

Iesu ese haheitalai ta amo idia ia haere henia, ia gwau: “Headava matamata tauna be ena turadia ida ia noho dainai, ena turadia idia taitai be anina lasi, ani? To nega do ia ginidae, headava matamata tauna be ena turadia amo do idia abia siri, vadaeni aniani lasi taravatu do idia badinaia.”​—Mataio 9:15.

Ioane sibona ia gwau Iesu be headava matamata tauna bamona. (Ioane 3:28, 29) Unai hegeregerena, Iesu ia do noho lalonai, ena hahediba taudia be aniani lasi taravatu do idia badinaia lasi. Gabeai Iesu ia mase neganai, iena hahediba taudia be do idia taitai bona do idia ura lasi aniani. To ia toreisi lou neganai, do idia moale bada! Unai nega ai, idia taitai bona aniani lasi taravatu idia badinaia be anina lasi.

Bena Iesu ese inai parabole rua ia gwauraia: “Ta ese dabua gunana ia darea gabuna ai dabua matamata do ia turia lasi, badina dabua matamata ese dabua gunana do ia veria, bena matu do ia bada herea. Taunimanima ese wain matamata be wain puse gunana lalonai idia bubua lasi. Bema unai idia karaia, wain pusena be do ia pou bona wain do ia bubua, bona wain pusena be do ia dika. To taunimanima ese wain matamata be wain puse matamata lalonai idia bubua.” (Mataio 9:16, 17) Iesu ena parabole ena anina be dahaka?

Iesu ia ura Ioane Bapatiso ena hahediba taudia ia durua, unai amo do idia laloparara ta ese Iesu murinai idia raka taudia do ia doria lasi Iuda tomadiho ena kara gunadia, hegeregere aniani lasi taravatu idia badinaia totona. Iesu be tomadiho dala gunana hanamoa totona ia mai lasi, unai tomadiho dalana be kahirakahira do ia ore. To Iesu ese ia gwauraia tomadiho dalana be sene karadia idia badinaia Iuda tomadihona ida ia hegeregere lasi. Iesu ia ura lasi dabua matamata be dabua gunana dekenai ia turia eiava wain matamata be wain puse gunana lalonai ia bubua.