Iesu ena Mauri bona Gaukara

Anivaga Idia Nanadailaia

LAGANI 30 C.E. ai Iesu be Paseka ariana dekenai ia lao, bena kahirakahira lagani ta ia ore murinai, Ioane Bapatiso be hua haida ia dibura vadaeni neganai, Ioane ena hahediba taudia haida be Iesu dekenai idia lao. Ena be Ioane ia ura idia iboudiai be Keriso murinai do idia raka, to idia haida sibodia be unai bamona idia karaia.

Iesu idia nanadaia, idia gwau: “Badina dahaka Ioane Bapatiso bona Farisea orea edia diba tahua taudia idia anivaga, to oiemu diba tahua taudia be idia anivaga lasi?” Farisea taudia be vaia wiki ta ta iboudiai nega rua idia anivaga. Reana Ioane ena hahediba taudia danu be unai bamona idia karaia. Reana Ioane idia lalohisihisilaia dainai idia anivaga, bona reana idia daradara badina be Iesu ena hahediba taudia be Ioane dainai idia anivaga lasi.

Iesu ia haere henidia, ia gwau: “Umui laloa headava matamata tauna ena turadia danu ia noho neganai, idia anivaga, a? Ia noho idia danu neganai idia anivaga laloa diba lasi. To dina ta dika taudia ese headava matamata tauna do idia abia lao. Unai dina be iena turadia do idia anivaga.”

Namona be Ioane ena hahediba taudia ese ena hereva idia laloatao, ia gwau Iesu be Headava Matamata Tauna. Unai dainai Ioane bona Iesu ena hahediba taudia danu idia laloa, Iesu ia do noho negana be anivaga negana maorona lasi. Gabeai, Iesu ia mase neganai, iena hahediba taudia be ia dainai idia taitai bona idia anivaga. To, ia toreisi lou bona guba dekenai ia daekau lao neganai, idia be mai edia lalohisihisi ida idia anivaga ena badina ta be lasi.

Murinai Iesu ese inai haheitalai ia gwauraidia: “Daika tauna be, dabua gunana dekenai, dabua matamata taina ia turia, hanamoa totona? Bema unai bamona, matamata gauna do ia veria, ia darea, bona matu dikana ia vara. Daika tauna be, kopina gunana lalonai uaina matamata do ia bubua? Bema unai bamona, uaina ese kopina ia darea, uaina ia bubua kava, bona kopina ia dika vadaeni. To namo be uaina matamata, kopina matamata lalonai idia atoa.” Inai haheitalai edia anina anivaga karana dekenai be dahaka?

Unai haheitalai amo Iesu ese Ioane ena hahediba taudia ia hadibadia, namo lasi ta ia ura ena hahediba taudia ese Iuda tomadiho karadia gunadia, hegeregere anivaga karana, do idia mai lasi, idia ore gwauraia tomadiho karadia gunadia ia hanamodia eiava ia hadaudaudia totona. Keristen tomadiho bona Iuda tomadiho mai ena sene karadia do idia haboudia diba lasi. Lasi, bema idia haboudia toho, unai be hegeregere dabua matamata be dabua gunana dekenai do idia turia bamona, eiava uaina matamata be kopina gunana lalonai do idia bubua bamona. Mataio 9:​14-17; Mareko 2:​18-22; Luka 5:​33-39; Ioane 3:​27-29.

◆ Daidia idia anivaga loulou, bona badina be dahaka?

◆ Iesu be ena hahediba taudia ida idia noho neganai, dahaka dainai idia anivaga lasi, bona gabeai dahaka ia vara dainai anivaga karana idia hadokoa?

◆ Iesu ese edena haheitalai ia gwauraidia, bona edia anina be dahaka?