Kahana 6
Inai Dainai Dirava ese Hisihisi Ia Koua Lasi
1, 2. Dirava ese matamana neganai ia henidia gaudia be Adam bona Eva ese edena bamona idia haboiodia?
DAHAKA dainai Dirava ese Adam bona Eva na Eden ena Paradaiso lalonai ia henidia gaudia namodia idia boio? Dahaka dainai Paradaiso ena maino bona lalo-tamona idia boio, bena lagani tausen tausen lalodiai kara dika bona hisihisi idia vara?
2 Badina be Adam bona Eva ese edia ura-kwalimu idia gaukaralaia kerere dainai. Dirava ese ia karadia iena taravatu henunai mo do idia noho namonamo, to unai idia laloa lasi. Edia lalodia idia hadaidia ena lohia siahuna henuna amo do idia siri, badina be idia laloa unai dala amo edia namo do idia habadaia. Bena Dirava ena taravatu idia utua.—Genese, karoa 3.
Iena Lohia Siahuna Dainai
3-5. Dahaka dainai Dirava ese Adam bona Eva ia hamasedia lasi bena taunimanima ma rua ia havaradia lasi?
3 Badina be dahaka Dirava ese ruaosi ia hamasedia lasi bena bese matamatana ia havaraia lasi? Badina be iena lohia siahuna idia dadaraia neganai henanadai ta ia vara dainai.
4 Unai neganai ia vara henanadaina be inai: Daika ia lohia be maoro, bona daika ena lohia dalana be maoro? Siahu ibounai Diravana ese mauri gaudia iboudiai ia havaradia dainai, ia lohiadia be maoro. Ia be aonega ibounai Diravana dainai, ena lohia dalana be hereadae, to ruaosi ese unai idia gwau-edeedelaia. Henanadai ma ta be inai: Taunimanima idia kara maoromaoro lasi, badina be ia karadia kerere dainai, a?
5 Taunimanima ese Dirava ena lohia siahuna idia dadaraia neganai, henanadai ma ta ia vara: Unai dala amo edia namo do idia habadaia eiava? Dirava be haere ia diba, to taunimanima hadibalaidia totona ura-kwalimu ibounai ia henidia, sibodia edia ura hegeregerena.
6, 7. Dahaka dainai nega daudau lalonai Dirava ese taunimanima ia koudia lasi?
6 Dirava ese nega daudau taunimanima ia henidia, edia ura-kwalimu do idia gaukaralaia toho totona; unai amo do ia hahedinaraia goevagoeva iena lohia siahuna henunai sibona do idia noho namonamo diba. Unai nega ena daudau be hegeregere, ia lalonai edia diba politik, bisinesi, saiens bona medikol karadia dekediai do idia habadaia momokani.
7 Unai dainai, Dirava ese taunimanima ia kahudia nege ema bona hari; unai amo ia hahedinaraia goevagoeva sibodia edia lohia dalana amo idia kwalimu diba eiava. Unai dainai taunimanima ese hebogahisi eiava dagedage, lalokau eiava badu, kara maoromaoro eiava kara dika, idia abia hidi diba. Bona edia kara edia huahua idia davaria danu: kara namo bona maino eiava kara dika bona hisihisi.
Lauma Idia Gwau-Edeede
8, 9. (a) Gwau-edeede be edena bamona ia vara guba dekenai? (b) Adam bona Eva mo sibodia lasi, to daidia danu be Satana ese ia hakereredia?
8 Inai danu ita laloa be namo: Iseda tubudia roboadia ruaosi mo sibodia lasi, to ma haida danu ese Dirava ena lohia dalana idia dadaraia. Lauma unai. Dirava ese taunimanima ia do karadia lasi neganai, ia ese aneru momo herea ia karadia guna, guba lalonai do idia noho totona. Ura-kwalimu ia henidia, iena lohia siahuna henunai do idia gaukaralaia.—Iobu 38:7; Salamo 104:4; Apokalupo 5:11.
9 Baibel ese ia hahedinaraia lauma ta ese Dirava ena lohia siahuna ia dadaraia guna. Ia ura lasi Dirava ese do ia biagua, bona ia ura taunimanima ese ia do idia tomadiho henia. (Mataio 4:8, 9) Adam bona Eva edia lalodia ia anidia, ia gwau edia namo do idia habadaia dalana be Dirava ese ia koua, bena idia danu idia gwau-edeede. (Genese 3:1-5) Unai dainai ena ladana idia hatoa Diabolo (Ladana Hadikaia Tauna) bona Satana (Inai Tauna). Unai murinai, aneru ma haida ia hakereredia bena idia be lauma dikadia ai idia lao.—Deuteronomi 32:17; Apokalupo 12:9; 16:14.
10. Taunimanima bona lauma idia gwau-edeede dainai, dahaka ia vara?
10 Taunimanima ese Dirava ena lohia siahuna idia dadaraia murinai, Satana bona ena lauma dikadia ese idia biagudia. Unai dainai Baibel ese Satana ia gwauraia “inai tanobada ena dirava,” abidadama lasi taudia “edia lalona ia hadiburaia tauna” unai, ma ia gwau “Satani ese tanobada taudia ibounai ia gunalaia noho.” Iesu ia gwau Satana be “inai tanobada ena lohia.”—2 Korinto 4:4; 1 Ioane 5:19; Ioane 12:31.
Samani Herevadia Rua
11. Edena dala ma ta amo Satana ese Dirava ia samania?
11 Satana ese dala ma ta amo Dirava ia samania. Ia gwau Dirava ese taunimanima ia karadia kerere dainai, do ia tohodia neganai, ta lasi ese kara maoromaoro do ia karaia, to Dirava do idia gwau dika henia. (Iobu 2:1-5) Unai dala amo Satana ese taunimanima ia samanidia, ia gwau kara maoromaoro idia badinaia diba lasi.
12-14. Nega daudau lalonai do idia vara gaudia ese dahaka do idia hahedinaraia?
12 Unai dainai Dirava ia naria ela bona ena haere be taunimanima bona aneru iboudiai vairadiai do ia hedinarai goevagoeva. (Esodo 9:16 itaia.) Ia diba taunimanima dekediai do idia vara gaudia ese Satana ena samani herevadia ruaosi do idia hakoikoidia.
13 Unai nega lalonai do idia vara gaudia ese edena bamona do idia hahedinaraia Dirava ena lohia dalana be maoro? Taunimanima edia lohia daladia ese Dirava ena do idia hereaia a? Sibodia edia lohia dalana ta amo moale do idia davaria, bona tuari, raskol karadia, kara gagevadia, ogogami, gorere, buruka, bona mase do idia haoredia, a? Dirava ena lohia dalana ese unai ibounai ia karaia diba.—Genese 1:26-31.
14 Unai nega lalonai do ia hedinarai Dirava ese taunimanima ia karadia kerere a? Idia haida be hetoho negadia lalodiai do idia kara maoromaoro eiava? Haida do idia hahedinaraia idia ese Dirava ena lohia dalana idia ura henia bona taunimanima edia idia ura henia lasi, a?
[Picture on page 13]
Dirava ese taunimanima ia henidia negana ena lata be hegeregere, ia lalonai edia diba do idia habadaia momokani
[Credit Line]
Shuttle: Based on NASA photo